BNS3023

BAHASA, KESUSASTERAAN DAN KEBUDAYAAN IBAN

NAMA STEPHENIE FIFI ANAK LOUIS

NO. MATRIK D20202096490
KUMPULAN KULIAH A
NAMA PENSYARAH PUAN SARIPAH ANAK BANSENG
 Apai Atoi Nginti Burong Tiong

Cherita tu bepun ari siti menua iya nya Kampung Kandis. Ba menua sida tu maioh bala jelu
babas baka pelandok, tenggiling, babi babas, burong enggau maioh agi. Kelimpah ari nya
maioh mega pemakai bukai baka paku, rambai enggau mayuh agi. Dia bisi siko orang ti benama
Apai Atoi. Apai Atoi tu diau enggau anak enggau bini iya. Iya tu chukup bagas bendar gawa
betanam betupi. Tang bisi mega pengurang Apai Atoi tu iya nya iya tu bisi maia tambab bisi
maia pintar. Apai Atoi tu suah dikemeli tauka dikeduan ka Apai Ayung. Apai Atoi tu suah
bendar dianu bini iya Indai Atoi laban ulah iya nadai tentu menuku. Sida Apai Atoi tu bisi
betanam padi Apai Atoi enggau Indai Atoi semina gawa bumai. Taja sida tu nadai reta penatai
pemisi tang sida tu bebasa sereta manah ati enggau orang bukai.

Tahun tu Apai Atoi nadai bumai laban bisi pengawa bukai deka diadu. Tambah mega berau
sida ti diketau taun nyin suba agi tuba bisi. Sida tu nemu berkelimat enggau pemakai ngambika
enda rua sereta chukup diempa ungkup sida sebilik. Hari siti seduai laki bini iya meh nyau lepa
pengawa udah tembu ngetau sida Apai Atoi menyanak pan nyau nadai pengawa di kerja agi ba
umai betaun baka orang bukai. Besari sari tudah Apai Atoi tu duduk dunga dunga begaga ke
sarung duku. Apai Atoi tu landik begaga ke sarung duku. Nyua sepengelama ke baka nya, nyau
bisi empat iti ga sarung duku nya udah tembu digaga iya. Nyadi pagi hari siti iya lalu madah
ngagai bini iya Abie iya nya Indai Atoi.

“Akai rai Indai Atoi, lama bendar ga aku tu udah enda nemuai ngagai Dunggat iya nya Apai
Ayung udah kami duai ke bai iya besilih rumah hari nya.”

Indai Atoi lalu nyaut “Ba nuan ka amat besulu enggau Apai Ayung, enda nemu jera kediri
empu. Setiap kali seduai besulu nuan enda tau enda bulih penusah.”

“Eh! Ukai nya lama aku nemuai ngagai iya deh. Aku enggai meh kedua kali dikeduan iya baka
nya belama. Jera asai dikeduan Apai Ayung nya. Aku empu ke tambab mudah ka dikemeli ke
iya.” pia ko saut Apai Atoi.

Nama agi deh lalu jengkau iya duku iya ke dikait ke ba tandok rusa lalu ditangkin ke ba
punggung. Lalu japai iya sumpit lalu san iya laban ke ka nemuai ngagai Dunggat iya Apai
Ayung. Lalu mupuk bejalai meh Apai Atoi ngagai rumah Apai Ayung. Nadai beleman Apai
Atoi tu nurun laban enda ngasi ke jako rara bini iya Abie, Indai Atoi. Bejalai iya kenu ko ensera
ninting serarai umai sida lalu rembus ba sungai ba Ulu Debak. Benung iya ke bejalai nya Apai
Atoi endang tak kadah kadah gining gining malik ngagai puchok kayu ngicha kediri bisi meda
kenaya burong tauka jelu laban ke lama nadai kala begiga ke lauk. Suba suah Apai Atoi tu
ngasu begiga ke jelu ba babas baka babi, pelanduk, enggau ngetan panjuk burong. Apai Atoi
tu mega suah ngetan bubu ba sungai. Apai Atoi mega bagas nubai ikan. Urat tubai dikena
ngemabukka sereta ngematika ikan. Urat tubai dipalu tauka ditanchang lalu dikirah iya ba
dalam perau nya ngambika rachun nya ulih ngerekai ba sebarang endur ai ke deka ditubai.
Leboh maia iya ngetan bubu iya kala bulih lelabi enggau tekura tama ba dalam bubu ke ditan
ke iya. Nya alai bini iya siru sereta sayau ke laki iya Apai Atoi tu laban iya tu chukup bagas
ngiga lauk ke babas. Tang kasih mega bini iya Abie, Indai Atoi meda iya suah bendar dikeduan
sereta dikemeli ke orang.

Nyau kelama Apai Atoi ke bejalai, bukit di turun bukit di tiki, bejalai meruan niti menasan jalai
jani dia dinga iya nyau rami munyi kukok manok Apai Ayung ba rumah ke udah di pesilih ke
seduai iya tahun nyin suba. Lalu bejalai keno ko iya begadai gadai niti jalai pendai sida Apai
Ayung laban nemu diri sigi udah datai. Datai meh iya ba kaki tangga rumah sida Apai Ayung
lalu nyapa nanya ke penyadi rumah Apai Ayung nya alai iya nemuai.

“Oh Dunggat! Nyadi rumah nuan sehari tu alai aku nemuai.” pia ko Apai Atoi ngangau ari
tanah. Udah nya lalu peda Apai Atoi pansut deh anak dara Apai Ayung ngelalu ke iya.

“Lalu meh Aya, nadai rumah kami sehari tu bangat bisi penti bisi pemali di tiki. Lalu meh,”
pia ko anak Apai Ayung.

Apai Atoi pan lalu niki ke rumah. Iya pan lalu nudok kediri ba tikai ke udah di anchau ke anak
Apai Ayung. Anak dara Apai Ayung lalu mupok ke dapur ga nampung pengawa iya ke bebela
ka lauk. Kelama ke duduk nadai orang nunga nyau enda berasai Apai Atoi nanya anak dara
Apai Ayung meda Apai Ayung tak nadai ayan.

“Oh Ayung! Kini penunga apai enggau indai nuan deh tak nadai ayan betunga enggau aku
ditu,” pia ko Apai Atoi.

“Amat ga Aya, enda ingat madah ngagai nuan aku tadi. Nyau ka datai seduai iya tu pelaba ke
aku. Laban tumu pagi tadi seduai iya nurun ngabas ginti ke di tan ke ba tisi kaki umai kami.”
pia saut anak Apai Ayung.

“Agi lama alai seduai tu pulai, enti enda pia mulai kediri dulu ga aku. Ila nemuai baru. Lama
dah ku duduk kediri ditu nganti iya datai. Lelenggau bendar ke Dunggat nya aku tu.” pia ko
Apai Atoi.
“Duduk dulu meh Aya. Tu aku nyau udah mela lauk lalu nyangkong nuan merarau lagi. Nadai
patut seduai tu tak bangat lama deh ti semina tak naka ngabas ginti.” pia ko anak Apai Ayung
nan ke tudah Apai Atoi enggai ke lalu enda betemu enggau apai iya.

Nama agi deh lalu ngali kediri tudah Apai Atoi ba tikai idas ke dianchau anak Apai Ayung.
Benung ke gali nyau betampung batang ga daun ruku daun biru nya di insap iya. Nyau baka
asap orang ke nepok landak ba lubang pemalat kesoh asap insap Apai Atoi. Nyau enda berasai
tudah Apai Atoi lalu meliar ai mata meda pemanah rumah iya nya tak percuma di silih iya
enggau Apai Ayung laban ngingat ke pengelantang sida menyanak sekumbang ti diau ba utai
ke ngemanah nya menya.

Nyau meh penumbas iya Apai Atoi ke nganti Apai Ayung, dinga iya tak baka lukau orang
berandau ngadap ke tunga pala tangga. Lalu beguai iya ensugau ngesai kediri ari ti gali nya
laban ka nyengok ari lubang penyengok ka meda sapa orang ke bemunyi nya tadi. Nama agi
deh pengaga ati Apai Atoi meda Apai Ayung seduai bini iya Indai Ayung nyau betangkan
tangkan baru datai ba pala tangga ka niki. Peda iya Apai Ayung tak naka iya pengaga megai
burong tiong ba jari iya nyau baka anak mit. Apai Atoi pan lalu ngangau ari lubang penyengok
nya.

“Apo Dunggat! Kumbai aku enda datai seduai Indai Ayung tadi. Udah ka mulai kediri aku tadi
tang agi di tan ke Ayung laban ti ngumbai seduai nyau ka pulai ngabas ginti ba tisi umai.” Pia
ko Apai Atoi.

“Eh dudok dulu meh Apai Atoi! Lama bendar nuan udah enda nemuai ngagai kami menyanak.
Aku tu ka limpang nyimpan burong tiong tu ba kurungan baroh rumah tu dulu.” Pia ko Apai
Ayung nyaut iya.

Udah meh Apai Ayung tembu nyimpan burong tiong nya iya lalu niki ke rumah dudok nunga
Apai Atoi. Seduai iya endang baka selama tau bendar besulu enggau pangan diri lalu maioh
macham cherita ti ka di kenang enggau pangan laban ke lama udah enda betemu. Panjai jaku
randau seduai iya. Nyau kepuas seduai iya ke berandau nya sekali dinga Apai Atoi tak bejako
orang ari baroh rumah tak nyau ngeragak nya nadai orang nimbal. Alit ati Apai Atoi ninga
bunyi orang ti bejako ari baroh rumah sida Apai Ayung. Agi naka sekali orang nya bejako enda
Apai Atoi iboh, lalu perening iya ga gamal mua tudah Apai Ayung ke berandau nunga iya.
Peda iya tudah Apai Ayung tak nadai apa nama, tak majak kediri berandau baka ke nadai ninga
utai. Nyau ke leju ninga utai nyelai munyi nya dia Apai Atoi lalu nanya Apai Ayung.
“Dunggat bisi nuan ninga orang bejako kediri nadai orang nimbal tak nyau bekelukau ba baroh
rumah nuan tu. Ukai antu sebayan nya kini?” pia ko Apai Atoi.

“Iya ke nyau radak radak bejako sebarang utai rara sekumbang tua ke berandau nya tadi ko
nuan Dunggat,” pia ko saut Apai Ayung.

“Au ah! Di anti niki nadai ga niki. Nanya ke penyadi rumah nuan tu nadai ga di dinga nyapa.
Tak geli ati aku ninga orang nya Dunggat,” pia ko Apai Atoi ga agi irau ati.

“Eh nya meh burong tiong ke di bai kami duai Indai Ayung pulai ngabas ginti tadi. Baru ulih
kami duai laban ke semampai ninga iya bemunyi ba tisi umai sekumbang kami ti ngetau tu
tadi,” pia ko Apai Ayung.

‘Apo amat bidik nuan Dunggat! Nurun nginti tau tak pulai bulih burong tiong ukai mai ikan.”
pia ko Apai Atoi majak irau ati ninga Apai Ayung ke nurun nginti tau tak bulih burong. Ti tak
sengapa burong enda ga iboh nya burong tiong ke udah nemu bejako munyi kitai mensia.

“Nadai aku bula ke nuan Dunggat. Endang amat ulih kami duai nginti burong tiong nya tadi.
Ginti kami duai ba lubang pun kayu ba tisi umai kami nya.” Pia ko Apai Ayung ngemendar ke
cherita diri.

“Bah nama utai ke umpan di kena nuan nginti alai tau tak ulih nuan burong tiong nya deh?” pia
ko Apai Atoi laban iya tak rindu ati ninga burong tiong nya nemu bendar bejako munyi kitai
mensia.

“Nadai nya utai bukai deh Dunggat! Bai ke nuan penganan jala, telu manok mansau, asi pulut
lulun enggau penganan iri ka umpan, ka iya olih deh, baka enggi aku tadi,” pia ko Apai Ayung.

Ninga munyi nya lalu naka iya pengaga ati Apai Atoi laban ngarap kediri tau bulih nginti
burong tiong baka enggai Apai Ayung nya. Seduai iya Apai Ayung pan lalu besemaia laban
hari siti Apai Ayung madah kediri ka nunjok ke Apai Atoi madah ke dini bagi lubang pun kayu
ke agi bisi alai burong tiong nya besarang.

Udah meh tembu merarau tengah hari nya dia Apai Atoi lalu madah kediri ka pulai. Iya lalu
berat rat bendar enggai ke Apai Ayung bula enda nurun pagila ngulu ke iya nginti burong tiong
munyi ke tusoi Apai Ayung ngagai iya. Datai Apai Atoi ba langkau iya empu dia iya lalu
ngasoh bini iya Abie, Indai Atoi ngaga penganan jala enggau penganan iri. Atoi lalu diasoh iya
ngambi telu manok sida ke di kemisi ke ba kurungan di baroh langkau. Iya pan lalu nurun
begiga ke buloh ruas ambi ke bisi di kena iya belulun ka asi pulut laban semua utai tu endang
semina nya aja ke tau nyadi ke umpan kena nginti burong tiong munyi ko tusoi Apai Ayung.

Iya meh tekerbak tawas pagi hari siti Apai Atoi lalu beguai guai nyimpan semua utai ke umpan
iya nya ke dalam raga serta mupok nuju tisi umai sida Apai Ayung nitih ke semaia seduai.
Datai iya ba tisi umai peda iya Apai Ayung endang udah dugau dugau dudok nginsap ba pelasar
dalam langkau umai sida. Naka iya pengeransing ati Apai Atoi sehari nya laban nadai patut
enda olih iya burong tiong enti nitih ko Apai Ayung laban umpan kelalu maioh dibai iya nginti
burong tiong.

“Bah Dunggat ni bagi pun kayu ke bisi lubang alai burong tiong nya besarang. Padah ke aku
meh ambi ke hari enda tebasau enggai ke hari nyau tinggi lagi. Takut ke iya siga lalu terbai ke
bukai.” Pia ko iya minta tunjok ke Apai Ayung.

“Eh nyin iya Dunggat! Tang nuan nganti ditu dulu nganti nuan bisi ninga iya bemunyi baru
nuan tau ngulur ke ginti nuan ngagai lubang pun kayu nya enggai ke burong tiong nya nadai
dia. Aku ka ngiga lauk ke bukai asoh Indai Ayung tadi,” pia ko saut Apai Ayung ke endang
udah be ema raga lalu mupok ngejang ninggal ke Apai Atoi kediri.

Nama agi deh lalu beguai guai Apai Ayung ninggal ke Apai Atoi ngelaung enggai ke di peda
Apai Atoi nuju ngagai pun kayu ke udah di tunjok ke iya nya tadi. Datai ba pun kayu nya tadi
dia Apai Ayung lalu rauh rauh ngaga diri munyi burong tiong ke bisi ba kurungan di baroh
rumah iya. Apai Atoi pan lalu beguai guai ga nuju lubang pun kayu nya lalu ngulur ka tali ginti
iya ke dalam lubang munyi ko tusoi Apai Ayung.

Keterubah iya Apai Atoi ngulur ka telu manok mansau ke umpan iya. Iya meh nyau abis semua
telu manok mansau ke bisi di bai iya nya lalu bedau ga burong tiong nya ulih iya. Apai Atoi
lalu bejako kediri meda burong tiong lalu bedau ulih.

“Bangar amat ga burong tiong tu lalu bedau ulih. Tu nama nyau abis telu manok mansau ke di
bai aku tu,” pia ko iya mutap. Udah nya dinga iya tak nyaut ga Apai Ayung ke belalai dalam
lubang kayu nya nyaut ngelulu kediri nyadi burong tiong.

“Enggai agi aku beguna ka telu manok mansau. Tak nya belama. penganan iri ka aku,” ko Apai
Ayung ke nyadi burong tiong dalam lubang kayu nya.
Nama lalu beguai guai ga iya ngulur ke ginti iya beumpan ke penganan iri ngarap ke ginti diri
bulih burong tiong. Iya meh nyau abis penganan iri nya ke umpan iya burong tiong pan lalu
bedau ga ulih. Naka iya pemedis ati tudah Apai Atoi meda ginti diri lalu bedau bulih burong
tiong, dia iya lalu bejako.

“Ah deh. Naka naka ga burong tiong tu lalu enda ulih. Telu mansau enggau penganan iri ke
umpan aku pan udah ga abis, tak bulu burong tu lalu bedau meh aku meda. Anang ke tak mai
tuboh iya,” pia ko iya muchau bejako kediri.

Sekali dinga iya tak nemu nyaut deh burong tiong dalam pun kayu nya munyi tu:

“Selalu tu belama ke di empa ka kena ngumpan kami. Uji penganan jala nya baru iya,” pia ko
Apai Ayung nyaut dalam lubang kayu ngelulu kediri nyadi burong tiong.

Ninga munyi nya lalu beguai ga tudah Apai Atoi ngait ke penganan jala ba mata ginti iya lalu
ngulur ke nya dalam lubang kayu ngarap kediri tau bulih nginti burong tiong. Ulur ke iya sekali
peda abis ga umpan nya di empa burong, tang burong lalu bedau ulih. Umpan pan nyau majak
abis seabis. Iya pan bejako kediri barandau nengali ngeransi meda diri lalu nadai utai udah ulih.

“Apo naka meh burong tu lalu enggai ulih. Tu deh nyau abis semua umpan aku. Pagila nama
enda utai kena ngumpan ti semua nya tak dikumbai burong tiong tu selalu diempa iya,” ko iya
kutap kutap ngeransi diri ke lalu nadai utai udah ulih. Sekali dinga iya lalu nyaut deh burong
tiong dalam lubang nya.

“Buah pisang, dagin babi panggang enggau manok panggang baru kami ka makai,” pia ko saut
Apai Ayung ke dalam lubang kayu nya ngelulu kediri nyadi burong tiong.

Apai Atoi lalu mulai kediri ngagai langkau sida. Datai iya din, dia iya lalu ngasoh Atoi nebang
pisang sida lalu milih buah ti mansau aja. Bini iya Abie, Indai Atoi lalu diasoh iya nangkap
manok laban iya ka nangkap babi. Ninga Apai Atoi ngasoh ngereja utai munyi nya dia bini iya
Indai Atoi lalu nanya kapa guna iya ka bebunoh ke babi manok nyangka bisi temuai ka datai
ba rumah sida.

“Eh nadai nya utai di tanya ke nuan Indai Atoi. Ka di kena aku nginti burong tiong ke umpan
aku laban nya utai tau ke umpan ko burong tiong nya tadi leboh aku ke nginti ba tisi umai sida
Apai Ayung,” pia ko saut Apai Atoi.
Udah nya baru Indai Atoi nemu guna iya enggau telu manok mansau, penganan iri enggau
penganan jala sehari nya tadi. Indai Atoi pan lalu enda lantang ati ninga iya nyebut diri ngena
umpan nya nitih ke padah Apai Ayung.

“Apo Apai Atoi. Salah nama baka tu, nadai apai indai, aki ini kitai tu kelia kala nginti burong
lalu beumpan ke utai munyi ko Apai Ayung nya tauka munyi ko burong tiong nya tadi. Uji
abas nuan baru ngagai pun kayu nya tadi amat enda nya bisi burong tiong diau dia.” Pia ko bini
iya Abie, Indai Atoi tekenyit ninga cherita Apai Atoi serta sinu ninga iya semampai di keduan
Apai Ayung.

Ninga munyi nya Apai Atoi lalu pedis amat ati laban nemu diri udah dikeduan Apai Ayung
baru. Iya lalu beguai guai ngabas ngagai pun kayu ke alai iya nginti pagi nya. Datai iya ba pun
kayu nya lalu ngalih ke sepiak ari ke ukai burong alai iya ngulor ke ginti. Sekali tak peda iya
nyau denga denga pemesai lubang pun kayu nya tau alai mensia belalai. Peda iya kulit kerubong
telu enggau repik penganan nyau betabur bekau Apai Ayung makai umpan ke di ulur ke Apai
Atoi leboh ke ka nginti burong tiong pagi nya tadi. Naka iya pengeringat Apai Atoi laban amat
munyi ko bini iya Abie iya sigi dikemula serta dikelakar Apai Ayung baru.

Tumu pagi hari siti iya pan lalu nurun baru ga ka nginti burong tiong nya nitih ke padah burong
tiong nya kemari. Tang penurun iya pagi nya enda mai umpan babi panggang enggau manok
panggang tang semina mai buah pisang lengki sigi aja serta enggau ruas payan ti naka iya
pemesai alai iya nyimpan ai angat. Datai iya ba tisi umai sida Apai Ayung peda iya Apai Ayung
endang udah bisi dia ngelulu kediri matah ke daun ubi.

“Tumu bendar nuan pagi tu Dunggat,” ko Apai Ayung nanya iya dulu.

“Enggai nyadi enda tu Dunggat, bangar amat burong tiong nya nemu bendar milih utai diempa
ke umpan, nya alai aku nguji baru sehari tu,” ko iya nyaut Apai Ayung. Pedis ati Apai Atoi
leboh iya nyaut Apai Ayung nya tadi.

“Kapa nuan ruas ngemesai nya deh Dunggat. Nama umpan bai nuan sehari tu,” pia ko Apai
Ayung bejako sambil nyeling ke bukai laban ti ka ketawa kediri empu ti beduan Apai Atoi.

“Eh munyi ke dipinta meh Dunggat. Mai manok panggang enggau babi panggang aku dalam
ruas tu enggau buah pisang nitih ke pinta burong tiong nya kemari,” pia ko iya ga nyaut sambil
ti tuchum laban ka malas Apai Ayung. Apai Ayung endang mimit pan nadai meh nyangka Apai
Atoi nemu diri udah di keduan iya kemari.
Apai Atoi lalu ngelulu kediri nginsap laban ngawak ke Apai Ayung nya mupok dulu ngelaung
ngagai pun kayu ke dikumbai bisi burong tiong besarang. Enda lama udah nya dinga iya tak
nyau kaung kaung munyi burong tiong nya bejako nadai utai ngemanah manah nya ari munyi
ke kemari. Apai Atoi pan lalu beguai ga nuju pun kayu nya lalu ngulor ka buah pisang lengki
ke nyadi ke umpan ka di kena iya nginti burong tiong nya. Udah nya peda iya enda lama buah
pisang nya lalu abis, lalu dipeda iya semina kulit aja ke agi tekait ba mata ginti.

“Apo jampat amat burong tu makai. Umpan pan ka semina sigi tu aja bisi dibai aku,” ko iya
bejako kediri beketup ngeli laban ti pedis ati ngagai Apai Ayung.

Dinga iya lalu nyaut deh burong tiong dalam lubang kayu nya tadi.

“Panggang babi baru kami ka makai, buah pisang nya enda nyamai,” pia ko Apai Ayung ke
belalai dalam lubang kayu ngelulu kediri nyadi burong tiong.

“Au lagi meh! Nganti aku udah ngulih ke ruas panggang tu ari ema,” pia ko Apai Atoi.

Apai Ayung pan lalu naka iya pengaga ati ninga Apai Atoi baru ka ngulih ke ruas payan nadai
utai ngemesai mesai nya dalam ema iya.

“Nyampau pemaioh lauk tu lagi, nya baru bebendar perut tu bentus kenyang makai sehari tu.
Tau lalu lemai mulai kediri ke rumah,” ko Apai Ayung bejako dalam ati diri.

Apai Atoi pan lalu beguai guai ngulih ke ruas payan ari ema iya enggai ke siuh laban ai angat
ke dibai iya ari rumah nya endang tak semadi enggai angat agi dibai iya nurun pagi nya laban
deka manjah Apai Ayung ti selalu ngayah sereta beduan ke iya. Apai Atoi pan lalu enda
chamang chamang nyiuh ka ai angat nya ngagai lubang pun kayu ke alai Apai Ayung nya
belalai makai umpan ke di ulur ke iya. Serta meh ai angat nya udah dipanjah Apai Atoi ngagai
Apai Ayung sekali dinga Apai Atoi tak nyau munyi remaung negong naka pengingar nyawa
Apai Ayung manjong dalam lubang kayu ke alai iya belalai.

“Apo Dunggat! Parai aku tu Dunggat dipanjah nuan ngena ai angat ngenyadi tu,” ko Apai
Ayung rauh rauh nyabak tuai nat kediri betu.

Apai Atoi lalu beguai guai ngebu kediri pulai belanda landa enggai kiroh ke Apai Ayung ti nat
ke pemedis laban betu ai angat nya tadi. Benung iya ke belanda pulai iya pan naka iya pengaga
ati laban udah tebalas ke Apai Ayung ke selalu beduan iya.
Daya idup Iban ti agi dikembuan sampai ke diatu

1. Pengawa betanam betupi

• Pengawa betanam baka bumai
• Pengawa betupi baka engkani babi enggau jelu inang ti bukai
• Pengawa tu dikena ngulihka jereki
2. Ngasu
• Begiga jelu ba sebelah babas
• Pengawa beraban-raban
• Utai ulih dibagi nitihka penyampau orang enggau sereta bisi ungkup ngagai orang ke
empu uduk taja orang ke empu uduk enda enggau.