Part 3

TIMANG JALUNG

Manggai di kampung baung nadai dinga ensung anak sengayan lelang.

Manggai di kampung siak bala sebayan ke nandang mansang ngayak nadai dinga kuak

empeliau arang.

Manggai di pulau sida sebayan ke danjan dulu lenyau nadai dinga kangau orang.

Manggai di kampung sunyi nadai dinga kesui nyumbuh bujang.

Manggai di temuda damun lama bali pengerang.

Manggai di jerami taun siti tu kemari bedau bekau sempeli padi bangang.

Ti baka tu tebang bu genalu nusu.

Nyaduh betubuh bebai ngetu.

Lalu lumpung mengkubung ambika salar.

Lalu tebang menua’ ambika panggal.

Ngetu enda lama ngambi sesempa rampang pinang.

Lalu ngetu ngejuka belakang.

Aram tua ining mempating manding nagai

Ngabas anak pelepuk panduk bungai

Nya alai tak lalu nyingkang deh endun kumang ke bulang kaki nantai

Peda balat repa tudung bedega serangkap rumput pinggai

Dia nyaya deh ai mata sida endun dara nelaga labuh bekaberai

Laban nadai diensiang kami

Laban ke udah midang dulu parai

Naka lebuh jawang ku agi menya

Agi diundang sida dom bujang ambai lemai

Tang tak laban aku ti nyu sakit nyau parai

Seput enggi aku nyi seranyut nurun kerigai

Laban mati enda ulih dikenangi

Parai enda ulih dikenggai

Laban beguai diambi sida Indai Bilai kedua aya kitai Bugai

Dibai pulai ngagai tembawai madang ranyai ke bekaberai muai mayang.

Tampung Deskripsyen

Anang guai dulu Aya Jimang nganti kami duai dulu nginang kelembembang lebu nyangkung

Deka ngabas lepuk pansuk bunga belitung diratah tanah busung

Enda kaju kakang dara mekang nyingkang di bulan kaki nyangkung

Datai diteratak tanah langgung peda balat repa beta serangkap beta di balut rumput

mambung

Dia lalu nanya ai mata endun dara labuh ngerundung

Insak dara biak temepekak nurun idung

Nya alai peda dan siti udah diambi melanyi bujang tinggi disuli tanduk labung

Dan ari kiba udah diambi bunga genaya bujang bula tak laga balut upung

Nya alai tu nadai dipensiang laban ke tinggal aku ti laya midang pumpung

Nya alai aki agi idup enggau sening kukut karung kerubung

Jawang disinang sulu sangkung bisi ngundang kami dua ngadang ngerimbas papan kandung

Agi langgu bujang tuyu bisi negu disimpu papan rebung

Seput enda ulih bai idup beseranyut nurun idung

Semengat ulih tangkap sida renchap manang chelum

Beguai ambi aya kitai buga kedua aya nyimung

Beguai sida pulai ke menua raya besai

Enti kampung madang nibung berayung batang

Kejang ari nya nyau jimpu di munggu datai di iya datai seberai

Richah rami di sebayan danyan ulu ba titi kesa entali jalai iya dikarung iya

Nyau manggai ba tembawai madang rian

Nya alai agi menya tu mit ari disumpit mesai emperean

Nya alai diatu berubah nabur dan neladan kapal bujang nyumbuh

Nyau manggai tembawai madang rembai apin lesi bebadi dulu kelia

Ukai main mit anak batang rembai bebuah ninting ari tiap lemai

Enti bekerundai ngelandang tangkai isang

Ninga munyi antu bala ngemba iya bala pengabang

Lalu ninga gagak lapa ga rumah bala diemba iya bala penguang

Nyau manggai pendai ili agi datai reni pasang di bungai

Lalu manggai di pendai ulu balat chiru baka madu minyak kebayang