Assalamu’alaikum Wr.Wb.

Namung sateuacana seja sanduk-sanduk nya

Alhamdulillahilladzi ahallan nikah wa harroma sifah,
wassholatu wassalamu ‘ala rosulillah wa’ala alihi
washobihi wamawwalah amma ba’du. Yaa FattahuYa
‘Aliim … Iftah lanaa futuuhal ‘aarifin
Langkung ti payun balungbang timur caang bulan opat
belasna puja bari dipirig ku sucina puji, hayu urang
sanggakeun ka khadirat Alloh robbul izati, margi mung
mantena dzat hakiki anu nakdirkeun urang sadaya dina
waktos ieu tiasa patepung lawung paamprok jonghok,
andon kasono, tiasa hempak merbayaksa, kalayan aya dina
kaayaan sehat walafiat. Dina raraga ngaitkeun tali kaasih
kalih silaturahim antawis kulawarga jembar ... ti ... sareng
kulawarga jembar ... ngajadikeun jangji pasinina dua sejoli,
dua sejoli anu parantos sabeungkeutan satujuan, satujuan
seja pasang subaya baris ngahiji ngalaki rabi. Anu baris
sanada sanadi ngamaenkeun petikan2 melodi dina iringan
simponi jatukrami. Sanada sairama ngahaleuangkeun ayat2
cinta dina pirigan orkestra rumah tangga. Sasahdu sarindu
nyukruk galur sunnah rosul, mapay riwayat para ambiya,
mipir warisan para nabi, muru gedong duwur kali sambung,
pagulingan samia tingtrim, balingbing lan jeruk manis.
Teu kakantun seahna mahabbah nu singgah dina
manah ngalangkungan rumpaka shalawat miwah salam
sagemblengna mugia dilimpah curahkeun ka jungjunan
alam, pangagung linuhung, papayung agung nu suwung
tina sipat adigung, jalmi pinilih satria pininggit lalaki langit
lalanang jagat nu janten pupujaning ati sadaya umatna,
habibana, wasafiina, wakarimina walmaulana Muhammad
saw.
Neda widi tinu galih anu wening manah anu sétra
saréhna sim kuring kaselir ku pun dulur kulawarga jembar
Bapak …. sinareng Ibu … kanggo ngiring sumanggem
minangka wawakil ti sepuhna panganten istri.
tawakup, neda agung cukup lumur neda jembar hampurana,
bilih sim kuring cumarios sabalang béntor, aya basa nu teu
kahartos, teu puguh leunjeuranana, teu puguh éntép
seureuhna ma’lum sim kuring tebih tina sugri nastiti,
anggang tina subasita kawantu sanés ahlina.
Kalih perkawis bilih kirang tata-titi duduga prayoga teu
aya bémakarama teu aya pupurianeunana, teu aya
siruweunana sakali deui hapunten anu kasuhun.
Kantenan ana jung nangtung, naon rupi anu bade
dikedalkeun lus les laleungitan, Bakat ku tagiwur dugi ka
kalbu asa dag dig dug, manah asa kasima saur paripaos
pamatuk asa disamber dudut, caréham asa dipontrang
rulang, raos asa bareuheudeun ngadak-ngadak asa
katenggok tikoro, katéja elak-elakan, asa kapetik mamanik
teu puguh laku asa kapupul bayu. Da puguh kedah mitutur
payuneun para pangagung, kedah sumanggem dipayuneun
para menak.
Sim kuring kalayan ngabantun asmana kulawargi
jembar panganten istri seja nyanggakeun salam pangbagea
Jagong tuhur beunang ngunun
Tutut gunung keong reuma
Unjuk nuhun nu kasuhun
Kana kasumpingan kadang wargi sadayana.
Mugia Bapa … miwah Ibu … sepuhna panganten
pameget kalih rombongan landung kandungan laer aisan
tawakup anu kasuhun tina sanes kanten kakirangan.
Ngahaturkeun nuhun ka wawakil anu parantos
ngadugikeun kedal lisan pamaksadan anu atra tur pertela.
Naon rupi anu didugikeun ku mantena tadi estu lahir tina ati
anu wening, kedal manah anu setra. Sageuy upami kedah
domomorekeun. Sadaya rombongan anu sumping ti …
kagungan pamaksadan anu sami seja jajap asih
ngaduakeun ka panganten anu sakedap deui baris
diistrenan. Mudah-mudahan dina engoning ngarumah
tanggana aya dina ginulur rahayu ti waktu ka waktu, pinuh
ku ginalar kabagjaan ti mangsa ka mangsa.

Bapa … miwah rombongan, Alhamdulilah

wasukrulilah maksad sinareng tujuan Bapa sakulawargi
kahartos pisan. Kilang kitu pun anak sanes daek mung
semet purun wungkul dumeh kabaledog jodo, da puguh
sagala tuna, rumaos laip, lieuk euweuh ragap taya, semet
nyanggakeun badan sakujur, keur batur ngatur hirup
kapayun. Kang putra … kasumpingan salira miwah
kulawargi ditampi ku asta kalih, kasangga ka lingga murda,
binarung bingah amar wata suta, bingah kagiri-giri, mun
gunung tanpa tutugan, sagara tanpa tepian ku ageung-
ageungna kabingah sim kuring sakulawargi.
Para Ibu miwah para Bapa anu salamina mugia
dimulyakeun Alloh, pajar teu jangjang teu jingjing, pajar
jonghok bari lengoh, geuning buktosna cacandakan anu
sakieu rebona, ieu sadaya silokaning pangais asih katampi
ku asta kalih mugia rizkina ku Alloh sing ditambih-tambih.
Rizki nu dipaparinkeun mugi sing rekah ngarandakah batan
manjah, sing rekeh ngarendekeh batan sereh.
Hadirin anu ku sim kuring dipihormat,
Sateuacan dipungkas, sakali deui mangga urang sami-
sami ngado’a mugia ieu dua insan papasangan anu bade
diakadan teh sing tiasa ngawangun rumah tangga anu
sakinah, mawadah, wa rohmah. dipageran ku hasanah,
dipapaesan ku istikomah, sareng digindingan ku ahlakul
karimah. Rumah tangga anu sejahtera lahir batin, bagja
dunya rawuh akherat. Bral anaking hidep duaan gera tatan-
tatan beber layar tarik jangkar, geura sungsi pulo
pangharepan. Parahu rumah tangga hidep duaan muga
sing bisa ngungkulan motahna ombak sagara kahirupan.
Barakallahu laka – wa baraka ‘alaika – wa jama’a
bainahuma fii khoiriin.
Panutup catur, pamungkas carita, seja sanduk-sanduk
palalaku tina ireug katalingeuh boh bilih kirang tata, kirang
titi, kirang duduga peryoga, kirang dina anggah-ungguhna,
kirang merenah dina kalimah, kirang utami dina
panampianana, taya sanes neda agung cukup lumur, neja
jembar pangampura. Hapunten anu kasuhun. Hampura anu
diteda.
Nasrumminalloh wafathul qorib wabasyiril mu’minin.
Wassalamu alaikum warihmatullohi wabarokaatuh.