Parken, 10 April 2016/
Mantenna oge teu kendat-kendat maparinan
CONTO PANATA ACARA NIKAHAN
Ku: Galih Aji Darma, SD., SMP., STM.
Rengrengan Kulawarga Calon Panganten Istri
parantos siap kalayan merenah payuneun
Rombongan Calon Panganten Pameget, diandeg
heula di payuneun bumi.
Iber Pidato ti MC :
Ka rombongan pipanganteneun pameget,
pamugi kersa ngantos heula sakedap,
sakantenan memeres rombongan, atanapi tamu
nu sanes, anu kaleresan teu acan siap.
Ka Pager Bagus sareng Pager Ayu nu bade
mayungan Calon Panganten Pameget, mangga
dihaturanan kanggo mapag, ngiringkeun Calon
Panganten Pameget ka bumi Pipanganteneun
Istri.
Di lawang panto, dina panyaweran, diandeg
deui, dipapag ku Ibuna pipanganteneun istri,
dikangkalungan kembang malati.
Mangga ka ibuna pipangantenneun istri, pamugi
kersa ngangkalungkeun kembang malati, Tawis
panampian tatamu, tanda kameumeut,
kadeudeuh, tawis asih ti kakasih, tanda tresna
kanyaah, sumangga mangle di kalungkeun ka
calon panganten pamegeut,ku ibu/wawakil ti
pihak calon panganten istri, saparantosna
dikangkalungan kembang malati,
pipanganteneun pameget munjungan ka ibu-
ramana pipanganteneun istri, kitu deui ibu
ramana pipanganteneun pameget, pada-pada
munjungan kadua pihakanana.
Rengse ngalungan mangle:
Mangga ka Pipanganteneun Pameget oge ka ibu
ramana dihaturanan calik di tempat anu
parantos disayogikeun.
Bawiraos ka para tamu nu teu acan kaagehan
tempat, mangga milarian tempat heula, supados
rada salse, sateuacan ieu acara dikawitan.
Saparantos para tamu merenah caralik, acara
dikawitan:
Assalamuallaikum. Wr. Wb.
Alhamdulillaahilladzii khalaqa lakum min
amfusikum azwaajaa, litaskunuu ilaihaa, waja
'alana bainakum mawadah warahmah,
washolatu wassalaamu ala rasulillah,
muhammadin wa’ala aalihi washahbihi waman
walah, Qola rasulullaahu Shalla laahu ‘alaihi
wasalam, annikahu sunnatii faman raghiba ‘an
sunnatii falaesa minni. Amma ba’du.
Alhamdulillah, sadaya puji kagungan Alloh, ieu
kalimah mangga urang sasarengan usahakeun
tansah ngabaseuhan lambey urang, margi
nikmat ka urang sadayana, dugi ka urang
sadayana dina danget ayena tiasa ngumpul
ngariung kekempelan dina ieu haplah
mubarokah dina raraga seja ibadah ka Manten-
Na ku ngalangkungan walimatul urusy ieu,
mugia bae sadaya paniatan urang oge kempelna
urang dina danget ayena, aya dina ridho Alloh
SWT,, Aamin yra.
Teu hilap sholawat sinareng salam anu
salalawasna ku urang sadayana diginulurkeun
ka Rosul anu panungtung, ka Nabi anu
pamungkas ka jungjunan urang sadayana,
Kanjeng Rosululloh Muhammad SAW.
Limpahannana mugia sing dugi ka kulawargina
ka para sahabatna ka tabiin tabiit, tug dugi deui
ka urang sadayana salaku umatna anu teu weleh
teu cape nikreuh ngeureuyeuh, geten tulaten,
tur apik taliti dina engggoning nampi sareng
ngajalankeun dawuhannana, malah mandar
urang kengeng syafa’atul ujma ti Mantenna jaga
engke di Yaumil Jaza. Aamin yra.
Hadirin, para sepuh miwah palawargi sadayana,
utamina para tatamu anu ku simkuring
dipihormat
Sim kuring muwakilan ti sohibul bait, Bapak
Budi kalih Ibu, langkung ti payun seja
ngahaturkeun salam pangbagea, Wilujeng
Sumping di Lemah sim kuring di wewengkon
Bumi Parahyangan Kencana RW 14 Desa Nagrak
Kec. Cangkuang. Tebih nya ibu, bandungna
nyingcet ieu mah. Simkuring pun Galih Aji
Darma, kapapancenan kanggo nata ieu acara
nanging sateuacan kebat nya lumampah, seja
ngadugikeun rundayan acara anu baris di pedar,
nyaeta:
1. Bubuka
2. Lantunan kalam illahi Ku : ......
3. Seren tampi ti 2 pihak calon panganten
- Panyeren ti pihak calon panganten pameget
ku: . . . . . . . . . . . . . . . . . . . . . . . .
- Panampian ti pihak calon panganten istri
ku : Ust. Nasrudin al Jaelani S.Pd.I, M.M
4. Akad nikah *ku petugas KUA
5. Sungkeman / Do’a
6. Tutup
Hadirin, para sepuh miwah palawargi sadayana,
utamina para tatamu anu ku simkuring
dipihormat
Supados teu nyangkolong kana waktos mangga
minangka bubuka ieu acara urang sasarengan
maos basmallah. Margi numutkeun katerangan
oge yen satiap perkara anu teu dikawitan ku
maos Basmallah maka eta perkara teh pegat tina
rohmat Alloh, atanapi moal sampurna, kumargi
kitu mangga urang sami-sami aoskeun
basmalllah sasarengan.......
Bismillahirrohmanirrohim. Mudah-mudahan ieu
acara tiasa beres roes sarta ditangtayungan ku
Allah SWT kalayan aya dina kalancaran ti kawit
dugi ka akhir ieu acara. Aamiin ya Rabbal
‘aalamiin.
Hadirin kadang wargi anu mulya sadayana !
Mun balayar tanpa kamudi, Palang siang
katambias, Mun hirup Tanpa kendali Palang
siang bakal sasab, Poekeun jalan, leungiteun
udagan, mung bagja keur sakumna umat islam
margi hirupna gaduh pedoman, nyeta kitab suci
al Qur’an. Bisi leumpang pareng sasab mun
balayar pareng katambias, rampang reumpeung
poekeun jalan sorangeun, sangkan manah jadi
caang, guligah ku katengtreman kalayan maksad
ibadah, sumangga urang sami-sami dangukeun
aosan ayat suci al-qur’an anu baris diaoskeun ku
sdrk . . . . . . . . . . . . . . , sumangga anu
kapapancenan dihaturanan.
Panganteur nganuhunkeun sabadana beres
ngaos kalam Illahi:
Hatur nuhun ka . . . . . . . . . . . . . . . . , mudah
mudahan galindengna ayat suci Alqur’an nembe
sing janten cukang lantaran ngocorna rahmat
sareng barokah Allah SWT oge ku galindengna
kalam ilahi nembe tiasa mapaler hate nu
cape,ngupahan manah nu susah, rembes
nembus kana sanubari, sumarambah kana
bayah, sumeleket kana hate, nyaliara minuhan
awak, sok komo upami ngartos maknana, cacak
dirarampa oge geuning nikmaaat karaosna.
Dedeul du’a, mugia ageng manfaatna husus kanu
ngaosna, oge walatra ka urang sadayana, Aamiin
yra…
Acara katilu:
Para hadirin, miwah para tatamu sadayana,
khususna ka calon panganten pameget miwah
rombongan, nincak ka acara anu katilu, nyatana
seren tampi, atuh bawiraos emutan pribados,
pamali mun dilami-lami, angot pami dilila-lila,
nu dianti-anti ti tatadi, ayeuna parantos
nyampak bukti. Sok sanaos sami surti, sami
uninga maksadna, nanging, kanggo nyumponan
tindak tanduk tata titi duduga peryoga manusa
pangeusi dunya, anu parantos dipaparinan
manah, rasa, sareng lisan dina saliring dumadi,
teu cekap ku surti sareng tekad wungkul,
namung kedah di sarengan ku ucap, geusan
ngabejer beaskeun naon anu janten eusining
kolbu dugi ka jauh jauh ge teu burung dijugjug,
anggang ge teu burung diteang, tebih ge teu
burung disungsi, sumangga wawakil ti pihak
calon panganten pamegeut dihaturanan kanggo
ngadugikeun lebeting kolbu jeroning ati anu
janten pimaksadannana.
Saparantos rengse nyerenkeun ku wakil ti
pamegeut:
Para wargi sadayana, nembe sami-sami ku
urang sadayana kadangu gerentes kalbu
kasepuhan ti pihak calon panganten pameget
miwah rombongan. Lain lantung tambuh laku
sanes lunta tanpa seja, purwa aya nu di maksad,
seja ngaitkeun jangji pasini , manjangkeun
simpay babarayaan, sakotretna tina hate.
Sakeser daun satangkal, sabungkus bareng
jeung bungkusna nyerahkeun panganten
pameget sareng cacandakanana. Sim kuring
saukur darma, teu wasa  panjang carita. Kanggo
pang walerna mangga nyanggakeun kanu
disepuhkeun ti pihak calon panganten istri.
Saparantos rengse panampian ku wawakil ti
panganten istri:
Alhamdulillah, Para wargi sadayana, bingah
amarwata suta, bingah ka giri-giri, bingah nu
taya papadana. Nugar cadas mangih emas,
mobok manggih gorowong, aya jalan komo
mentas. Jalan gede sasapuan batu turun kesik
naek, itu purun ieu daek, laksana nya
pamaksadan. Nembe ku urang sadayana
kadangu naon anu janten pamaksadan tatamu
parantos ditampi ku hasta kalih kasangga
kalingga murda, kumargi eta mangga geura
hiyap calon panganten pameget miwah
cacandakanana. Mangga salah sawios
cacandakan didugikeun minangka simbul ti Ibu
calon panganten pameget di tampi ku Ibu calon
panganten istri.Nu sanesna mah diantaykeun
bae manawi. Ka pageur bagus oge pageur ayu
mangga dibantos, estapet weh supados enggal.
AKAD NIKAH
Para wargi sadayana..
Niti wanci nu mustari, ninggang mangsa nu
waluya. Malati ligar na ati, campaka mangkak na
dada, koleak sakembaran, koceak ninggang
ugana. Uga pakaitna tatali asih antawis
Neng_____________ sareng Cep __________________.
Jangji urang pastikeun subaya urang nyatakeun.
Nu diseja mangka nyata, neda panyakseni ti 
para wargi sadayana, upacara akad nikah seja
dikawitan.
Sumangga ka pangersa bapa petugas ti Kantor
Urusan Agama kanggo ngalaksanakeun Akad
Nikah.
..........................................................
Rengse akad nikah:
Barakallaahu laka wa baraka alaika, wa jama'a
bainakuma fii khaiir
Alhamdulillah wa sukurillah kalawan rido Gusti
anu maha welas  tur maha asih, oge pangdu'a ti
sadayana, akad nikah parantos rengse kalayan
lancar. Mugia ieu janten ciciren kana
pilancareunna sagala urusan ieu panganten baru
dina ngambah sagara rumah tanggana, sabadana
di walimahan nembe, mugi –mugi hidep duaan
sing tiasa ngawangun rumah tangga anu
ngarunggunuk kawas dukuh, ngarandakah
kawas majah, ngarendekeh kawas sereh. Sing
ayem tengtrem kutaraharja. Runtut raut
sauyunan, sareundeuk saigel sabata
sarimbangan sabobot sapihanean. Ka cai jadi
saleuwi ka darat jadi salebak, ka cai sing getol
mandi ka darat sing getol solat. Sing tiasa silih
simbeuh ku kadeudeuh silih kojayan ku
kanyaah, titih rintih mupusti kaasih, tebih tina
hiri dengki anggang tina pacengkadan jauh tina
salingkuh, guyub akur sauyunan, geusan
ngawangun rumah tangga anu sakinah
mawaddah warohmah. Aamin yra

DO'A / panut up

Acara ti kawit dugi ka akhir parantos rengse

dilaksanakeun kalayan aya dina kalancaran,
mugi – mugi urang sadayana aya dina
panangtayungan Gusti nu maha suci. Kukituna
kanggo panganteb kahoyong urang sadaya
sumangga urang munajat sasarengan. Kanggo
mingpin do'a, mangga pangersa __________________
ti dihaturanan.
Ngahaturkeun nuhun ka pangersa anu parantos
mingpin du’a, mugia bae sadaya paniatan urang
oge pamaksadan urang sadayana dikabulkeun
ku Alloh SWT. Aamiin yra….
rupina urang ayena aya dina acara anu
pamungkas.
Ti pribados salaku pangatur waktos, boh bilih
aya basa nu teu sampurna, teu merenah tata titi
sareng undak usuk basana, hapunten anu
kasuhun.
Urang pungkas ieu acara ku maos hamdalah
sasarengan . . . . Alhamdulillaahi robbil
'aalamiin.
Wabillahi taufiq wal hidayah
Wassalamualaikum Wr. Wb.

Ka para tamu oge kadang wargi sadayana,

sumangga dihaturanan kanggo ngadeudeul du’a
ka panganten baru, diteraskeun kana nampi anu
parantos disayogikeun ku sohibul bait.