“RANO POSO”

Ri tempo anu masaemo, ree tuama pai rongonya anu napokapuru tuwu ri samba`a lipu
anu masana pai kawongko ndaya. Tuama setu to`onya Ue Bailolo. Sandeme pai sandeme
motetala ri lida. Nce`emeo anu nakomatasi mapatuwu si`a pai rongonya. Ue Bailolo pai
rongomya se`i tinuwunya be`emo mangura, maria nta`umo po ncombori be`epa re`e ana nawai
Mpue ri yangi. Paikanya Ue Bailolo pai rongonya maroso rayanya pai be`e me`onto-onto
pekakainya ri Pue anu makuasa danaka Ndapepombaika ana ri tau se`e radua, maka anu narata
ndaya ntau se`enya, i ncemamo anu dama tulungi ri raya mpelinja katuwu ri tinuwu anu
matu`amo.
Ri sambengi kalintu ngkayore, Ue Bailolo mangipi. Riraya pangipinya, sindara si`a
mekakore ri suara banuanya jela samba`a tuama anu mangurapa pai magaya mampelamba baula
mabuya. Tuama setu me`onto ri suara Ue Bailolo. Nato`o mo to`onya “Yaku Manurung”.
“mokuja siko jela i re`i”, meoasi Ue Bailolo. “Kajelaku re`i bere`e damowia ja`a ri siko, yaku
podo jela maparata to`oku ri siko maka dare`e tempo dakajelaku wo`u re`i” mesono Manurung ri
kawongko ndayanya. Manurung mampelamba muni baula setu ronce`e malaimo mapalaika Ue
Bailolo.
Karaneo mpowuro ri pembangu Ue Bailolo, naendopa pangipi anu jela sambengi ngena,
paikanya be`e nato`oka rongonya, pangipi setu podo nadika ngkalionya.
Mpowuro setu Ue Bailolo malai ri yopo damampepali woyo, darayanya mampowia
tampa peosa ungka ri lenge mpotetala risuara banuanya. Ri tempo Ue Bailolo sindara ma tando
pu`u mboyo anu bangke ri une yopo, re`e nadonge oni nganga tau mompau ungka ri oyo ewo,
“ne`e ma`ai gaga nu tando ri aranya, damawela paleku”, oni nganga setu ewa pompau ana we`a.
Jingki raya Ue Bailolo madonge oni nganga setu, si`a me`onto mantando woyo setu,
paikanya mampopea pesuwu tau anu nadonge pompaunya ngena. Masaemo popeanya, bere`e
sako samba`a tau anu mesuwu, jela eka ndayanya, kandende-ndende pai koronya. Ue Bailolo
molonco mewalili ribanuanya. Kajelanya ribanua, naparata ri rongonya anu tepewali ri si`a.
Rongo Ue Bailolo mapokau langkainya njo`u ritampa kare`e oni nganga ngena makeni
samba`a manu buya pai bunga nggala tumpu oni nganga setu. Napoaya monco naka bedare`e
tepewali rugi ri tau se`e radua.
Karaneo mpowuro Ue Bailolo ma tando woyo anu na tima wengi, na papewalika tampa
mpotunda ri suara banuanya. Maka napoaya monco re`epa tumpu ntana anu metaka riwoyo setu,
Ue Bailolo pai rongonya madika wea mabuya anu naome ri ue nadika riya tabo kodi, ronce`e
nadika ri suara banuanya natutuka ayapa mabuya.
Katatogo ndemenya, Ue Bailolo pai rongonya maenga anu mawongi ri suara banuanya.
Jingki raya tau se`e radua maole anu risuaranya ri tempo pabuka wombo. Jela samba`a ana we`a
anu madolidi pai mangurapa mekakore nepa mogele maole tau se`e. Tampa potunda pai pombai
ntau se`e tetaji. Ana we`a setu mompau “Yaku jela ungka ri Suruga da maroo-roo pai komi radua
ri banua se`i. Yaku napokau Pue ri yangi mampopea tau anu dewali langkaiku ri banua se`i”.
 Ue Bailolo pai rongonya podo monjinji mampeole ana we`a anu maruna setu. Tau se`e
ntongo jingki pa ua kajela we`a setu. Bemasae Ue Bailolo mesono “Yaku pai rongoku matarima
koromu da maroo-roo re`I paikanya ne`e makura rayamu ua banua se`i belese.” Ue Bailolo
ntongo kanya`u-nya`u pa rayanya, nja posoki kajela ana we`a se`i ri banuanya.
Mawongko raya ana we`a setu ua koronya natarima Ue Bailolo pai rongonya da maroo-
roo ri banua tau se`enya. “Tuarapa Pue ri yangi da madonco komi radua” nato`o ana we`a anu
mampoto`o Lalung.
Sandeme pai sandeme pusa. Ue Bailolo pai rongonya masana pai mawongko rayanya ua
kare`e Lalung anu narekemo mewali ananya. Wance`e se`e pai Lalung anu mareke Ue Bailolo
pai rongonya ewa tau tu`a ngkoronya.
Ri samba`a ntempo, Lalung manto`o uneki ndayanya anu mapodaraya damakoni tonci
merpati buya. Ue Bailolo malai ri yopo makeni pana. Ri sandeme pelinjanya, Ue Bailolo bere`e
male`o tonci merpati sawi samba`a. Ue Bailolo tekayore ua malenge.
Ntongo mbengi, Ue Bailolo mangipi momberata pai Manurung, pamuda anu jela ri raya
pangipinya owi, Manurung mompau nato`o Pue damatulungi siko Ue Bailolo. Karaneo
mpowuro, Ue Bailolo male`o samba`a tonci merpati ri yopo setu. Ue Bailolo njo`u matima tonci
setu, kanya ja jingki ranyanya ua si`a momberata pai Manurung anu re`e ri pangipinya setu
njaumo ri suara banuanya. “To`oku Manurung”, nato`o pamuda setu ri rongo Ue Bailolo. Rongo
Ue Bailolo mapokau Manurung damesua ri banuanya pai kanya nato`o Manurung “Banya ri
tempo se`i”. Pamuda setu ma tana santoko bunga matahari ri suara banua Ue Bailolo, “Ane anu
mapati bunga se`i tuama, daku papewalika yunu maramu, kanya ane anu mapati ana we`a, daku
papewalika rongoku”, Nato`oka rongo Ue Bailolo anu ungka ngena sambela mapeole i
Manurung. Rongo Ue Bailolo podo mekakore mantanga kasoyo limbayo tuama pai baula anu
napelamba malai mapalaika sianya.
Mawongko raya Lalung ua Ue Bailolo mewalili makeni tonci merpati setu, rongo Ue
Bailolo maliga-liga mapoapu tonci setu jela nakalingani ma parata ri langkainya kajela
Manurung ngena mpowuro. Ri ntongo eo setu, tau se`enya mangkoni tonci anu na pana Ue
Bailolo.
Ri samba`a tempo ri mpowuro, Ue Bailolo anu sindara mapakoni wa`a pinatuwunya,
si`anya makita re`e santoko pu`u bunga matahari tuwu ri soma banuanya, ua manngkita bunga
setu, napeoasi ri rongonya, naendomo rongonya kajela Manurung ri tempo setu. Naparatamo ri
langkainya nja anu tepewali.
Ue Bailolo anu madonge pomparata rongonya mawongko, naeondomo pangipinya tempo
pampepalinya nu tonci ri yopo, napoaya monco dakajela Manurung ribanuanya. Masae maliga,
Manurung jela muni ri banua Ue Bailolo “Tabea mpowuro Ue Bailolo” nato`o pamuda setu
nce`emo i Manurung. “Yaku jela damapeoasi bara sema anu mapati bunga matahari anu romo ku
pomuya tempo setu” meoasi Manurung.
Ue Bailolo anu nancanimo ka ncemanya pamuda se`i mesono “ne`emo nukitanaka
Manurung, anakku Lalung anu mapati bunga setu” paikanya pesono Ue Bailolo ewa makura
raya, Manurung anu madonge pau setu bere`e kaja`a ndayanya, paikanya ja darayanya da
mombetomu pai Lalung.
Manurung anu makita Lalung motunda-tunda ri suara banuanya mawongko rayanya
makita ana we`a anu mangura pai madolidi, maruna-runa pai pidinya. Wance`e se`e pai Lalung.
Sindara makekenika santoko bunga matahari anu nepa roo napati, Lalung mekakore matomu
Manurung. Ungka uyu pomberata setu, radua pamuda pai pamudi se`i mombepokono, tau se`e
bemo naengge damombelapa.
Ungka ri pombetowe tau se`enya, Manurung mamperapimo Lalung damewali rongonya
ri Ue Bailolo. Nda powiamo posusa ri banua Ue Bailolo, tau sondo mosintuwu matulungi posusa
se`i. Manurung morongo pai Lalung ronce`e maroo-roomo pai Ue Bailolo. Katuwu Ue Bailolo
sandeme pai sandeme madagomo, si`anya mewali tau anu sondo aga-aganya ri lipu setu.
Manurung se`e mewali ngali tau anu natubunaka tau sondo ua kadago ndayanya. Ungka
ria, Manurung na papewali tau se`enya tadulako.
Ungka ri pewalinya tadulako, Manurung sambela melinja-linja mampeole wa`a katuwu
ntau ri tananya. Ri tempo setu, si`anya sambela male`o tau anu manto`o kabere`e ue ri tau
se`enya maka tempo poreme, kabelanya lida pai bonde mangau pai wa`a ntau maorosi
komponya.
Ungka ria, Manurung mapokau wa`a ntau danaka makae tana mapepali jaya pesuwu ue.
Paikanya sondomo nakae tau se`enya ja bere`e nale`o ue. Ungka ria, Manurung melinja mena`u
buyu, Sianya mombukotu mekakari ri Pue anu makuasa, Ua kapurundaya Mpue, napokau
manurung ma tana kaju anu romo napatuju Pue, ungka ri bolo ntana setu mesuwumo ue anu
maria. Ue setu ja be`e me`onto, Manurung mandake ri buyu roonce`e napeole riaranya tetutumo
ue mewalimo rano. Ungka ri tempo setu, rano setu nda papoto`o “Rano Poso”. Wa`a ntau sondo
puramamo mapoaya monco i Manurung tadulako anu lawi na pepombaika Mpue danaka katuwu
ntau se`e re`e ri kadagonya.