Ia tonna makaroen sulemi umbaa bale sangburia' na patorroi diong sali. Ma'dondomi
sae tu serre' datu unnalai tu bale misa'. Naula'mi naalai dio mai tu bale. Mangka to na
pesissikimi tu bale, na tollo'i. Pakalan saeomi na ala serre' datu tu bale misa'. Naula'mi,
na la'ka'i tu serre' datu anna durru'i api tu danggo'na anna mararang tu pudukna.
Mallaimi te serre' lako leko' dapo'.
Ia tonna la kumandemo te puangna, natambaimi tu serre' datu dio mai leko' dapo', apa
noka sae. Pempiran-piran ditambai apa tontong bang ma'dokko dio leko' dapo'
belanna sengke tu penaanna mangka didurru' api.
Mengkalaomi tu serre' datu rokko sali nakua kuanni tu La'bo' Penai: “Torromoko iko
la'bo', la malemo' aku.”
Apa nakua La'bo' Penai: “Minda lamorai torro nabenga' balao. La male dukana' aku.”
Kendek omo langngan alang te serre' datu, nakuami lako Pare: “Torromoko iko bo'bo', la
malemo' aku.”
Nakuami tu Pare: “Minda la torro napesserang sia napura balao, la male dukakan kami.”
Maleomi te serre' datu ungkuan Tedong tama balana, kumua: “Torromoko iko, Tedong. La
malemo' aku. Mangkamo' didurru' api.”
Nakuami Tedong: “Minda la torro napebalulangi balao, la undi dukakan kami.”
Nakutanaiomi serre' tu Bai kumua: “Torromoko iko Bai, la malemo' aku. Mangkamo'
dipa'dikki.”
Nakuami Bai ma'kada: “Inda ia latorro nabu'bu'i balao tu bulunta.”
Sirampunmi sola nasang anna sangke'deran male. Dolomi tu serre' datu anna
sangundian tu pare sia muntu' parea sia patuoan dio boko'na.
Ullambi'mi misa' banua nanii tau sengke sia untendang bako bua lako salian.
Sangundianmi tu issinna baka bua unturu' serre' datu. Ullambi'omi tu to umpakande
asunna apa mukkun duka nabamba. Lussu'mi tu asu anna male unturu' serre' datu.
Nalambi'omi tu to umpakande manuk, apa mukkun duka naleba' batu. Undi omi tu
manuk unturu' serre' datu. Na lambi'omi tu tomarassan umpakande tedongna apa
marassa duka nabamba tu kamorokna. Mallaimi tu tedong na undi unturu' serre' datu.
Ma'kadami sola duai nakua: “Lendu'komi mai, da' ammi dio bang salian.”
Mebalimi tu serre' datu nakua: “La tarru' siakan, melayo bangrakan sattu'."
Masemi penaanna serre' datu sola sangsiturusanna urrangngi kadanna pia biung.
Nakuami serre' datu: “Iate kami sola nasang, latorromokanni ussisolankomi.”
Tiramban kapuami te pia biung sola duai.
Naumpu'i serre' nakua: “Iake tallung bongipa la memala' komi ma'kurre sumanga' belanna pada
la untorroikan torroan malesoki la ussisolan komi.”
Pakalan pada umporupamo rupanna tu serre' datu sola sangsiturusanna anna torro
sisola te pia biung. Sugi' sangattu'mi te pia biung makario-rio. Katampakanna ia te pia
baine sola duai sibali tu pia muane anakna to sugi' nasisangbanuan simisaran.
Sakerangngan-rangngannami tu kasugiranna. Apa tae' na pamadao penaai sangadinna
tontong nakilalai tu apa mangka dadi, sia tontong napakaboro' sia nakananna'i tu apa
den dio kalena.
Iamoto anna randuk tau umpakaboro'i tu serre' belanna disangan garonto'na eanan,
sia biasa diposengo-sengo dikua:
Serre'ri oto' na eanan,
salimbanna baka bua,
ia petamba eanan,
peongli angge maritik,
dio mai randan langi',
to dio oloan uran.