Tangon

Kusai di Basug

Ii nopo di pogulu po, haro songulun kusai di basug kopio om aiso toilalaan dau.
Nokolohing no kaka i kusai dii om kasawo nogi di tondu i nasawo gulu. Aparu daa i kusai dii
nga au milo do tudukan. Insan tadau, minoboros i molohing sawo dau. Mongoi no pomonsoi
sulap hilo tumo do suab tu’ mangasok tokou nga tambang - tambangon nopo om opongo po i
sulap om popintaamon po i hilo tuoon, ka di tiwanon. Komoyon nopo do
tambang - tambangon nga wonsoyon i sulap nga au minog do olumis, owonsoi po. Soira do
muli,kada no lihuai manganu do lobpung, ka kawagu di tiwanon dau. Ibok no kaka i kusai di
minongoi hilo tumo.

Soira nokorikot hilo id tumo, pogihum no kaka i kusai dii do tambang. Minsorut po kaka
i kusai hilo id talun do mogihum tambang. Piipiro jaam mantad dii, kokito no i kusai do songinan
tambang i agayo’ kopio. Sopuko’ no kaka di kusai nga kapatai nopo i tambang. Owito’ no kaka
di kusai ri om tonomo’ no i longon om i gakod hilo koyonon pamansayan do sulap tu’ nosorou
kaka di kusai i boros di tiwanon dau do momonsoi sulap nga tambang - tambangon. Kopongo
po kaka om ongoi no i kusai pintaam id tuoon di tumo. Notogu’ ngawi i tinan di kusai dii tu’
okon koi kayu o pinataam dau nga sondii yau do mintaam. Tumakad po kaka i kusai dii id
sokid di tumo om tumaam nogi gisom korikot hilo tuoon di tumo. Nokoitom ngawi i turos di
kusai do nokogugu di tongotuod ngawi.

Kobobos po kaka i kusai dii do mintaam om kosorou nogi do muli. Kosorou kawagu di
kusai i boros di tiwanon dau do muli nopo nga manganu do lobpung. Ibok no kawagu i kusai
do minongoi sorut id talun. Minongoi i kusai pogihum do lopung tulanut di agayo’ kopio. Kokito
nopo i kusai do lopung nga’ patayo’ no kaka di kusai om owito’ no muli. Alaid kopio i kusai do
nokouli tu’ awagat kaka i lopung dii tu’ anaru om agayo po. Witilon po dii kaka i kusai dii tu au
nakaakan mantad kosuabon.

Otuong no om korikot nogi i kusai dii hilo walai. Uhoto’ no kaka di tiwanon i kusai dii.
‘Nokowonsoi ko no sulap daak?’ ka di tiwanon. ‘Nokowonsoi no,’ ka di kusai. ‘Om nokopintaam
nu no i hilo tuoon di tumo?’ ka kawagu di tiwanon. ‘Nokopintaam ku no,’ ka di kusai. Kokito
kaka di tiwanon i turos di kusai dii tu’ nokoitom om ogumu notogu’ di tinan di kusai. Osuayan
no kopio kaka i tiwanon do nokokito kowoowoyoon di kusai dii. Uhoto’ no kawagu di tiwanon
nung nakaanu isio do lobpung tobu ko’ au. Ongoyo no kaka di kusai pokitanai di tiwanon i
naanu dau. Nokotigog kopio i tiwanon soira nokokito di lopung tagayo’ kopio naanu di kusai.
Piipiro tadau mantad dii, suhuo’ no kawagu di tiwanon i kusai dii mongoi pomoli tusi. ‘’Moi po
pomoli tusi kio daak. Naawi no dii tusi tokou pongosin do sada om mintaataam pondo bo’’. Ka
di tiwanon. Ibok no kaka i kusai dii do minongoi pomoli tusi. Soira do nokoboli tusi, kokito no
kaka i kusai dii do sada di ogumu’ kopio sontoyog-toyog id waig. Kosorou no kawagu dau
boros di tiwanon do momoli tusi pongosin do sada. Iso kaka okito di kusai di sada dii om
mangan osino gisom do naawi i tusi. Kaawi po i tusi om pintaam no kaka i kusai dii id nagas
di bawang. Tumindal po kaka i kusai om tumaam id bawang dii tu’ nokosorou boros di tiwanon
do mintaataam. Kobobos po kaka i kusai dii do mintaam om uli’ nogi yau.

Korikot nopo id walai nga uhoto’ no di tiwanon. ‘’Atuukoi Daak! Nokuro no turos nu tu’ nokoitom
ngawi? Ka di tiwanon. ‘’minintaam oku hilo nagas di bawang.’’ Ka di kusai. ‘’Om honggo di i
tusi sinuhuan ku momoli?’’ Ka kawagu di tiwanon. ‘’Naawi no moti ri. Nokoosin ku no sada hilo
waig.’’ Ka kawagu di kusai. ‘’Adoi…okon bogia ko’ i sada sontoyog-toyog hilo bawang o
osinon, i naansak no’’. Kaka di tiwanon miampai nokotogod tu’ aiso no kopio tusi id walai diolo
dii. Otogod kopio kaka i tiwanon dii om pomoros no yau. ‘Basug ko no kopio oi daak! Nunu
nopo posunudon ku nga au nopo otopot wonsoyon nu, ka. Koilaai po kaka di tanak di tiwanon
i sawo di kusai om kotogod kawagu isido.

Mantad dii, nokopitongkiad di i kusai om i sawo dau. Mumbal po dii kaka i kusai dii do
mokirayou di tongotondu ngawi nga aiso no muhang dau tu’ nokoilo no ngawi di kobosugo’ di
kusai. Toun om toun misowoli nga au nodi ii kusai do nakasawo. Nokolohing no dii kaka i kusai
dii. Insan tadau, minongoi i kusai dii pongindakod tua timadang. Korikot no i kusai id tuntu di
timdang om talib no kaka o sangkawad moniningot i roitan do potiukan. Osiau tomod i kusai
do luminintuhun nga nokoulok isio do raan di okoro om kotipu no i raan dii nga karatu no i
kusai. Akawas kopio i timadang dii om soira nopo do naratu i kusai nga kapatai no isio. Mantad
dii, napatai dii i kusai om nadaadi di do susuyan kumaa tulun ngawi. Basug nopo kopio nga
aiso o tulun do orohian om aiso nogi o tondu di muhang tu koruol ginawo kopio do au milo do
sunudan.