Badong to Kesu’

Umbai tonna dikombong, bunga’na dipangidenni

to tangdikandean essun, tang dilaeran bua kayu
to laen-laen dadinna, to senga’ pangidenanna

dikkan to malemi sau’, dikkan to membuleammi

na bala dambu ma’dandan, ullambi’ rombena langi’
ullambi’mo Pong Lalondong, undete’ bambana mukkun
La sangbanua nene’na, la sangtondok todolona

tang marandenkoka iko, tae’ ka dallo riomu?

kami kami madandenkan, dikki’ to dallo rioki

tibaen rokko matampu’, diong kalambunan allo

bendan kalukumo diong, la ma’induk tumayangmo

la naola langngan langi’, la kendek to palullungan

ditingara ke mangambo’, ke umparokkoki’ banne
la mendadi bunga’ lalan, la kombong bentoen tasak
la dadi dao pussakna, kombong lan matalabona.

Badong to Pangala’

ambe’ki, umbamira sangtondokna,

tomai sangsaroanna, sito’doan tarampakna…

maiko anta unnondo, inde pangrante manikna

ambe’ perangngimo’ matin,

inde nasangmo rapummu, sola mana’ sariummu
perangngiimoko batingmu, patananko talingammu,
alenko pa’perangngimmu

anna maleso murangngi, tilanta’ lan talingammu,

alen lan pa’perangngimmu

angki tolorangko bating, angki ba’nangko mario

angki eteng-etenganko

ba’tu la tetena bating, ba’tu la lalanna mario

sisalo-salo batingna, sikalamban mariona,

paningomu tommu pia, lolloanmu tommu bitti’,
tommu randuk lelewai.

paningo disurasammu, lollo dianggiloammu,

dibetau-taummu

paningo disura’ seleng, lollo dimata bulayan

sundun sangtangkena bating, sangparayanna mario

la ditindok temmi bating, diala temmi mario.

Badong Sa’dan
 Maiko ta tannun bating, ta pana’ta’ rio-rio

tiromi tu tau tongan, tu tonatampa deata

malulun padang naola, ma’ti tombang napolalan

tileak lembangmo lao’, tirabun pa’taunanmo

tang diruamo dilambi’, direnden dikilalai

inde dao to tungara, rintin to mennulu sau’

umpolo bintanna sali
matindo situang timbo, mamma’ sitonda patoke’
daori tangngana sondong, dao lisunna banua
anna lendu’ daya mai la messa’de banuami
la merreke’ tarampakmi

umpopani’-pani’ angin, umpolentek talimpuru’

sumurruk susi burinti, bali anakna betulang
tangkan lentekna lumingka, tangkan tuntun tarunona
lendu’ titumbu tombinna, tipailan benderana,
tilantuk baka buana

malemo situru’ gaun, sikaloli’ rambu roya

sau’ tondok to mario, pessulunan to makarorrong

tondok tangdu’ku apinna, tang disulun ruayanna

tibaen rokko matampu’, diong kabotoan allo,

kalambunan pidun-pidun

bendan kalukumi diong, lama’induk tumayangmi

te’dek batangmo sarira, ambuyu’mo taraue,

napolalan langngan langi’, naola langngan batara

dadi detami dao, kombongmi to Palullungan,
patontongan dao mai, dambassan katiro-tiro

laumbengki’ tua’ sanda, paraya sanda mairi’

lan tondok sangkaleleta, bamba ma’datu-datunta.

Badong Umbating

tonna masaki ulunna

tikuramban beluakna
nenne’ samandu-mandunna
kerangan umbongi-bongi

samari tampak sarrona

tu upu’ pekaindo’na
ka’tu angin dipudukna
ronta’ bannang penaanna

sokan-sokannamo ia
tu nene’ mendeatanna
todolo kapuanganna
unnamboran tinaranna

naamboran salarika
nasio’tantongan dikka’
 denka tau tangna basa
tangna lulun barana’i

laditulakraka langi’
la dimanangngai rika
sokan-sokan ia nene’
tangmaga’ta’ todolota

kenna patui lenki’

kenasanda simisa’ki’
sanda’-sanda’ dilempangan
pangkun dipentirerungan

tallang turananki’ Puang

ao’ bela’-belaranna
kedisaile sulei
ladibarinka menassan

inde dao to tungara

bintin to mennulu sau’
umpolo bintanna sali
bituru’ karasan tanga

malemi situru’ gaun

sikaloli’ rambu ruaya
naempa-empa salebu’
sau’ tondok Pong Lalondong

unnola tossoan adang

panta’daran tau bunga’
dadi deatami lao’
kombongmi topalullungan…

Bating pa’pakilala

Umbamira sangtondokta
tomai sangbanuanta
ke’de’ko anta umbating
tapana’ta’ rio-rio

tangmadande’ko ka iko
tae’ka dollo riomu
lako te ambe’ masokan
ma’dadi salle kaboro’

ambe’ perangngikan mati’

ambe’ tanding talingakan
angki lolloan batingki
ussauran marioki

keumpokadaki’ bating
untannun mario-rio
da’ta barrugai bating
da’ta lalan paningoi

da’ta lambi’ badong russeng

to rintin pa’ealian
anta masakke’ mairi’
sali papan solanasang.
 Bating lan badong

Umbamira sangtondokta,
tomai sangbanuanta sang to’doan tarampakta
Ke’de’ko ta tannun bating, ta pana’ta’ rio-rio

Rio-rio mentarampak, bating messa’de banua

Mario-riokan kami, makarorrong silelekan,

ramangkan massolanasang, sukkunkan angge mairi’

Male natampe ambe’ki, naboko’i ma’dadingki

Anna la mindamo dikka, la umpakande re’dekkan,

la umbarra’ karoenkan

Ambe’ perangngikan mati’, ambe’ tanding talingakan

Angki lolloan rara’ko, angki tendeng bulaanko,

angki gente’ kandaureko

Anta sisulle sitendeng, sisonda sisiri-siri

Panglolloannamo tondo’ pa’tendeng misa-misanna

Solon-solonna tang mamma’, passondana tingkaru’du’.

Lakulambi’mo dadimmu, lakudete’ garagammu,

to nene’ mendeatammu

Umbai tommu dikombong, randukmu dipangidenan,

tang kan dikandean essun, tang dileran bua kayu.

Ia tonna didadian, randukna ditibussanan,

silalle-lallemi guntu’ sileleanna galugu, sirintikan susulandu’.

To laen-laen dadinna, senga’ kombong garaganna.

Tu to tang bu’turi lino, to tang ombo’ri daenan.

Anna kasalle dadinna, anna lobo’ garaganna

marumbo pa’kaleanna.

Umbangun lando longa, unnosok salle a’riri

Nanai longke ma’bua’, tumayang ma’balinono

Torro madatumi dao, unnisung makaraengmi.

Randuk tumengka lentekna, tirimbak passoeanna

Nadoloan burakena, naturu’ panglalananna,

sola buntu saratu’na

Ullambi’ to tabang tarri’, bambana to’kulo’-kulo’

Umbangunan lando longa, unnosok sale a’riri

bendanmi banua bassi, a’riri bongga ura’na.