Mangombak balik. by Josep F Sihite Antar muba do tabona sipanganon ni allang molo baru mulak mangula sian hauma.

apalagi ditingki songon si sonari. mangombak balik ma nuaeng, deba mangganggangi, manga res. Alana nungga tikkina marsuan di hauma, saba bolak di kecamatan Lintongnihuta. Nangpe ari udan, sai tong do ingkon mangombak hauma di saba bolak, marsaong-saong plastik, biasana antar na balau do palastik saong-saongon. Sai ni ombakhon ma hudali sitolu mata i, olo ma sipata birsak gambo i tu bohi ni iba. Sai manaili ma iba tu pudi, sai lalap maol tamba bidang ni bogas on, binereng tu jolo sai lalap dang marnasahat. Nang pe sai ni gogo na mangombak i , tong do ngali manghitiri daging alani ngalina. So boi maradi be, ala ingkon mamaksa do bogas ingkon sae, alana tampang dipanamean ingkon do suanon, dungi muse memang ari parudan do sepanjang oktober desember. Tong massai loja do na mangulai, alani loja na olo ma marangan angan iba, atik unang be nian tinaon songon na mangula on porsuk ni parngoluan di haduan. atik boi ma nian ndang pala songonon lojana taonon laho mangalului parngoluan. Tung massam ma angan angan ro tu pingkiran ni iba di tingki na mangula i. Olo ma sipata gabe holan na jongjong iba alani ganjang ni angan angan i. sipata ni ombakhon hudali on, alai nungga be sude tangan marpura pura, marpuntaran mai, marsampur ma maniak dohot hansit ni tangan na maniop hudali i. Sipata alani ngalina sude ma dohot jari jari ni tangan mansai hassit. Patut do tahe sai digogoi angka natua tua pasingkolahon ianakhonna, unang pola ditaon songoni parirna mangalului parngoluan. olo ma songgot disampat iba dohot gambo, ala holan na jongjong marangan angan. unang holan na jonjong ho, sotung songgup sidua hore di ulu mi las berak ninna ma sipata pasingothon iba , ala holan lalap marangan angan di tingki na mangula i. Tabo na mangula tingki ari parudan, olo do godang dekke sibahut di hauma i , gabe semangat do tong iba mandadap sibahut dibogas i, ai manang na boha i , sai tong do tabo na mardekke dekke. alai sipata olo do adong lintah horbo di hauma i , ai tung massai biar do roha mamereng lintah horbo on, hape so hansit pandoit na geok do, alai antar toropdo jolma mabiar tu linta on, ai so hinata rupani linta on songon na seram do memang berengon. Mulak sian hauma, bulusdo margalutak iba sahira horbo na margulu. sude mai marbuttak sian pat rodi simajujung. Tung tabo ma maridi sae mulak sian pangulaan i, jala manang aha pe lompat di jabu tung massai tabo mai, appalagi las siallangaon i. tung tabo ma jala lambok do tangan mamohul indahan na mohop i, alana

gabe sahira malum ma tangan na marpurapura i. tabo ma gambas kepala batu i, sambil mangata sabe na tata, adong muse tommat na, akh tung tabo ma i tahe loppan i, lobi sian tabo ni siallagon na adong di sude restoran na di Jepang on. Tung toho ma tahe molo nigogo mangula gabe tabo sude sipanganon niallang. Dang masa kolesterol tu pangula, manang aha sipanganon sapsap sude hehe.... Dung borngin tung sonang situtu ma modom ala nungga tung loja pamatang na mangula i. dungo pe manogot nai tung massai sonang do, nang pe jogal-jogal sude daging. ingkon do dungo, sipata ingkon laho dope mambutbut same tu saba andorang so laho tu singkola. nang pe so i nama ngalina dohot nambur pe ni taon do, asa anggiat boi ni bubut same naggo apala dua puluh tumtum. dungi pe asa laho marbasu jala borhat tu singkola. Sahat rodi nuaeng pe tong dope songoni hubereng model ni pangulaon di saba bolak lintongnihuta. Alai tahe di tingki na loja mangula i do marsiajar bagaimana harus bekerja keras , songon dia berjuang di parngoluan on. di dok deba, ise na gogo mangula, ingkon do tabo mangan, ise na so olo mangula ingkon do rapar. Taringot iba tu angka dongan pangula, ima jo tusi , selamat marmalam minggu ma di hita sude. Kyoto, 5 Nov 2011