HATA MANJALO TINTING MARANGKUP

Tu anggi parhundul ima marga siringo ringo

Mauliate ma di tuhan ta na mondongani hita di ulaon ta di tinkki on . Las ma rohanami ,

mauliate ma dihamu apara sidoli anggi parhundul nami marga siringo ringo, tutu ma
hamu anak ni raja ala tung tangkas do dipaigil hon hamu hami tulang ni hela muna , ima
hami marga manurung sinamot ni borutta i

Saonari pe hujalo hami ma titin marangkup on , asa mulai sadarion sisada boru ma hita
tutu, hamu ma pangintubu hami ma painundun .

Asa on pe di hamu anggi parhundul nami tong tong ma hita sauduran , dina mambaen
adat tu borutta on sahat tu ari na naeng ro di las ni roha, dohot di habot ni roha.

Molo hamuna di jolo, hami ma di pudi

Molo hami di jolo, hamu ma di pudi

Anggiat ma tutu gabe ruma tangga na marlasni roha / berbahagia ma borutta on tu joloan
on di pasu pasu tuhan ma nasida.

hata tu bere dohot tu boru

Diho bere dohot di ho boru , tadok ma mauliate tu tuhan ta pardenggan basa i , ai

nungga dapot di hamu sadari on na nidok ni umpasa

Jumpang na niluluan dapot na dijalahan ima dongan sahaholongan dohot dongan sa

pangkilalaan

Diho bere dohonakku ma , didok omputta sijolo jolo tubu , hot pe jabu i sai tongdo i
marbulang bulang, sian dia pe mangalap boru bere i sai tong do i boru ni tulang

Onpe diho bere , ingot ma tu joloan ni ari, borunami do on nanialap mon

Jala tu ho pe inang dohonon nami ma ingot ma tu joloan on. Apala among mu do hami
jala manghaholongi ho

Molo adong ulaon di hami ima tulangmu gabe boru ni manurung ho da inang da..

Songoni ma tong molo di ulaon di marga siringo ringo tetap ma ho boru siringo ringo.
Na hudokkon hami disi boru , molo adong parsoalan di hamu diari ari na mangihut, sotung
pintor lao ho tu marga siringo ringo, tu hami ma ho ro parjolo, na patudu hami among mu.
Da ima da bere dohot di ho boru.

Dohonon nami ma hata umpasa tu hamu : aek sihoru horu tu sampuran ni siguru gura, rap
leleng ma hamu mangolu huhut rap saur matua,

Bissar ma mata ni ari poltak ma mata ni bulan

Sai tubu ma dihamu akka boru namalo manssari dohot ankka anak na gabe raja
panukkunan

Ni usung ma palakka tu lomban siborotan , tusi ma hamu mangalakka ba sai disi ma

hamu dapotan passamotan

Asa sahat sahat ni solu sahat tu bottean

Sahat ma hamu leleng mangolu , sahat tu panggabean

Botima .. Mauliate.