Jadi di hamu rajani amang boru nami didok margana naeng
mulaantta ma amang pakkataionta ! “ beha nungnga mangarade hamu, dialusi” . Mauliate ma di hamu lean hamu majo dihami partingkian onasa marsisukkunan jo hamiise do nagabe raja panise manang raja panungkun tu hamu raja ni amang borunami : Dihita sude pomparanni oppu tuan situmorang sipitu ama : Dosma rohatta songon hatani natuatua ; Songgop sitapitapi toho tu bungkulan ni ruma gorga Tarida hita antong sisada tahi jala tontong dibagasan sada ni roha. Molo tung dakkana pe nang rantingna sada do anggo bonana. Molo pandohan ni hahana dohot pandohan angginasadamai anggo hatana. Dos ma rohanta dihita namardongan tubu, ise ma hita namanise rajani amang borutta. Dipasahat ma tu dongan tubu “ dialusi dongan tubu”. Mauliate ma dihita namardongan tubu situmorang sipituama dipasahat hamu tu au nagabe paniser rajani amang borutta , hu ulahon mai dohot denggan. Suang songoni ma nang dihamu rajani hulahulanami rajani tulangnami nahuonmtang hami : rajanami raja bolon, naeng mulaan nami ma pangkataion dohot raja ni amang borunami, molo tung pe hami namangkatahon dang namanjoloani hami. Dijolo hamu siaduon , dipudi hamu sipaimaon, ditongatonga hamu sipanuturi; dipartingkian annon rajanami rodo hami anmangido panuturion si hamu saluhutna, rajani hulahulanami, rajani tulangnami, alai tipak ma hamu hundul rajanami di inganan naung hu parade hami. Boha tulang nungnga rade hamu? Di a l u s i . Mauliate ma dihamu horong ni hulahulanami dohot tulangnami. Songoni ma nang di hamu rajani amang borunami, nungnga dos tahi hami tarlumobi napahotton parhundulni hulahulanami.
Partingkianon hupasahat hami tu hamu
Mauliate ma dipasahat rohanami tuhamu rajani hulahulami, hami pe rajanami mangido tingki ma tuhamu asa jolo marsirenggetan jo hami angka namarhamaranggi dohot namardongan tubu.
Songoni ma di hita namardongan tubu , oppu tuan situmorang sipitu
ama. Alana tangkas dipartingkianon naeng mulaan nami ma mangkatai dohot rajai rajani hulahulanta raja didok margana. Didok natua tua : Tinallik huling-huling ninna tandos tuholi-holi, anggina ma nagabe panamboli suang songoni muse molo marulaon haha doli anggina ma nagabe panamboli. Dipartingkianon marulaon ima di sinomor sada alani tangkas ma hupasahat hamin tu pomparan ni opputa si anggian. Jadi mauliatema dihita sude pomparan ni opputta tuan situmorang nungnga dos tahitta, dipasahat hamu pakkataion tu au, asa au mangalusi sise sungkun sian hulahulantan rajai. Attong hujalo mai dibagasan las ni roha dohot hu ulahon mai dohot denggan. Songonima dihamuna raja ni hula-hulanami dohot raja ni tulangnami rajanami raja bolon satongkinnai naeng mulaan nami ma mangkatai dohot rajai didok margana, rajanami raja bolon dang barani hami laho mamulai mangkatai anggo so njolo marsantabi hami mangalap hata hami tu hamuna horongni hula-hula dohot tulangnami. Molo tungpe songoni parhundul muna raja nami marboha baenon ma. Nga boha rajanami nga tipak be parhundul muna. Dialusi. Gabe ma jala horas. Molo jumpang di tingkina dapot do di ombasna rodo hami annon mangido panuturion sian hamu raja hula-hulanami dohot tulangnami. Songoni ma tulang “ gabe ma jala horas “. Songoni ma dihamu rajanami raja hula-hula, anggo sian hami nunga dos tahi nami dohot rohanami nalaho mangalusi sungku-sungkun ni rajani hula-hulanami. Partingkian huasahat hami ma tu hamu. Mauliatema di hamu rajani amang borunami raja siringo-ringo mula antama antong mangkatai. Didok natua-tua : tektek matutu mulani gondang serser mulani tortor, binsar mataniari poltak matani bulan pukkaontama mangkatai pasahat hamu ma pinggan panungkunan. Mauliatema rajanami raja bolon didok natua-tua baris-barisni gaja di rura pangaloan molo marsuru raja naingkon do oloan. Ai molo nioloan dapot ma antong naniluluan jumpang najinalahan. Asa pitu bona ari sampulu dua bona bulan, ala naeng mulaaan ni rajai ma antong manungkun tu hami rajani pamoruon muna dison pasahaton nami ma pinggan panungkunan. Borunami. Andorang so huhatahon pinggan panungkunan on dohot isina parjolo mandok mauliate tu amanta namartua debata diari nauli di bulan na denggan di taon parasian dibagasan sadarion dibagasan hahopason do hita saluhhutna hipas do hamu amang borunami dohot uduranmu naro mandapothon hami, hami pe antong dibagasan hahipason mauliatema di Tuhanta. Dison nungnga dipasahat hamu pinggan panungkunan pinggan nahot dihundulanna ima pinggan pasu asa hot ma antong panggabean hot parhorason dihitaon saluhutna debatama antong namasu-masu. Namarisihon boras siribur-ribur asa torop maribur ma antong pomparanta tu joloan ni arion tumpahon amanta namartua debata, boras satti maon antong boras pir satti madingin satti matogu asa pir ma antong tondi madingin horas tondin matogu, asa pir ma pokki bahul bahul passalongan pirma tonditta saluhut luju-luju nang dohot pansarian nang angka passamotan. Dison namarisihon dohot demban sirara uruk napuran rata siatupon ni inanta soripada, sipasindak panaili maon sipasuang hosa loja dibibir mai daina ditolonan do anggo tabona napuran maon ditoba demban do di angkola asi rohani amanta debata nga dapot pajumpang di hitaon angka silas ni roha asa napuran tano- tano rangging masi ranggongan tung badanta padao-dao tondinta marsigonggoman dison rupia nadibaen pamarenta ta singkap ni ringgit sitio soara, asa didok natua-tua sipalas rohani amanta sigohi hajut ni inanta soripada, amang boru naburju 4 ma dison rupiana buaton nami maon antong 3 tubuma antong nang ngolu-ngolu tumpahon ni amanta debata. Dihamu rajani amang borunami didok natua-tua didok natua-tua ogung sabangunan nina ula-ulani pargonci sian pinggan panungkunan naung pinasahat muna tuhami mulakmaon gabe pinggan pangalusi sada ma dison amang boru rupiana sada ma hamu sungkunon nami songon daion mual. Laoos dipasahat ma pinggani. Maulliatema rajanami raja bolon nungnga tangkas dipasahat hamu tuhami ima pinggan pangalusi namarisihon 1 ringgit sitio soara. Dipangidoan ni rajai asa sadama rohanami sida tahi hami sada nang hatanami di namangalusi sise sungkun sian hamuna rajani hula- hulanami. Sidok boti ma hami rajanami. Mauliate.. gabema tutu jala horas tumpahon ni amanta namartua debata di nahundul ma hita nuaeng dibagas namarampang namarjual namarsangap namartua sigonggom pangisina hundul hita antong di hundulan singkap ni lage tiar, tiar ma panggabean tiar parhorason di hitaon saluhutna. Amangboru naburju sisedo mulani hata sungkun do mulani uhum, manisema raja panise manungkun raja panungkun, asa namanungkun ma hami nuaeng tu hamu raja ni amangborunami. Dinabutong hita antong mangan indahan na las sagat marlompan juhut natabo dohot minum aek sitio-tio napasombu uas, disido amang boru gandina disido nang gandona, disidi daina disido nang tabona, sirsirdo assimna hona dohot asomna asa didok natuatua bagot namarhalto naniagatan dirobean jolo dinangnang do ninna asa di nungnung, jolo di pangan do asa di sungkun asa nuaeng pe raja ni amangborunami marpanungkun ma hami diado laklakna diado unokna diado hatana diama nidokna sidok boti ma hami amang boru. Mauliatema raja nami raja bolon andorang so hualusi hami sise sungkun munai rajanami parjolo sahali hami mandokkon mauliate hami tu amanta namartua debata siala asi dohot holong ni rohana dinaboi hita marpungu dibagasan namarampang namarjualon. Rajanami raja bolon molo marpanungkun ma tutu rajai dihata ni sipanganon naung taparsaulihoni. Asa didoknatuatua marbahu ninna tanduk marbau ninna holi-holi godang antong sibutong-butong otik sipirni tondi asa pamurhas mai tudaging saudara mai tubohi sipalomak imbulu mai jala sipaniang holiholi, asa sititip sigompa golang-golang pangarahutna, otik sosadia natarpatupa hami sai tuhanta ma namanggohi pasu-pasuna. rajanami raja bolon ianggo hatani sipanganon naung taparsaulihoni panggabean parhorason do rajanami. Sidok botimahami rajanami. Mauliatema dihamu rajani amang borunami raja siringo-ringo panggabean parhorason mahape hatani sipanganon naung taparsaulihoni dohonon ma songon hatani natuatua bagot namarhalto ma naniagatan di robean sai jumolo doi marhalto udut tu namarmeang horas ma namangathon tugandana ma dihamu namangalean. Asa binangani simare binongkak ni sipaetua tusanggar ma apporik tulombang ma satua sinur ma pinahan gabe naniula amangboru naburju tangkas ujung purba tumangkasan uju angkola nungnga tangkas hita maduma tumangkasan ma hita mamora sitangkasni panggabean parhorasani tangkas ma dihatahon amangboru. Mauliatema rajanami raja bolon, saonari pe rajanami tangkas ma alusannami sungkun sise ni rajai, didok natuatua molo tinaba ninna hau hombung unemai antong baen soban molo nungnga manungkun rajai raja panungkun unemai antong uli ingkon alusan dohot tangkas. Saonaripe rajanami alusannamima sisesungkun munai. Dinkki naung salpu tangkas doro hami mandapothon hamu tu tongani bagasmuna ima napatupahon ulaon patua hata. Laos manguduti i rajanami laos disi mahita mangarangrangai tahi ni dohot sangkap ni ianakkontai. Nasogot rajanami diparbuhani mataniari tangkas doro hami mandapothon hamu tutongani bagasmuna ima natulahon ulaon marsibuha-buhai. Dung simpul ulaon marsibuhai-buhai. Dung simpul marsibuha-buhai nanidonganan ni tangiangmuna rap mahita mangudurhon ianakkonta tu bagas joro ni tuhantai ima namanjalo pamasu-masuon pardongan saripeon. Rajanami rajabolon nungnga simpul betutu pamasu-masuon jala nungnga tangkas borumuna gabe parumaen nami anak nami gabe helamuna. Pangidoan elek-eleknami tu amanta namartua debata sai sirongkap ni tondina mai huhut rongkap gabe sahat saur matua. Rajanami rajabolon namarningot do hami podani opputta sijolo-jolo tubu molo dung nialap parumen ingkon pasahaton ma sinamot ni parumaen. Disiala ni ma rajanami dipartikian on manian, molo siat elek-elek nami laos dison ma nian hami ro pasahathon sombani adat sombani uhum tuhamuna rajani hula-hulanami. Ima sitangkasni panggabean parhorason i .sidok boti ma hami marangup mauliate. Mauliatema d hamu rajani amangborunami raja siringo-ringo. Andorang so hualusi hami amangboru songon naung nihatahomunai. Idotutu nataparsitta hita natuatua, balga ninna bulu godang denggan baen sege, molo anak magodang boru magodang denggan be ma marhot ripe. Ia diari nasalpu tutu nungnga ro hamu di naung magodang anakmuna songoni dung magodang borunami maen mu. Dialu aluni anak muna tuhamu naung denggan masijaloan hata unduk marsioloan laos ro hamu mamboan ima di namarhusip patua hata hita asa sahat hatani naposo tu natuatua. Antong laos dipartingkiani ma hita mangarangrangi do taringot namarta sinamot. Laos dipartingkianon ma amangborunami, nanaeng ro ma hamu ima namanggarar sinamot ni borunami. Antong maauliate ma dihamu amangborunami raja siringo- ringo. Songon hatani natuatua. Tubu inna singkoru jonok tubonani sapot, molo pamuli boru ingkon jaloon ma sinamot. Jala nuaeng pe amang boru partingkian nauli on. Barita lampedang mardakka bulung bira, barita ni hamu siringo-ringo tabarita do ro didia. Patni gaja ninna tu patni hora, anak ni raja do hamu pomparan ni namora. Nuaeng pe amangboru godang ma pasahat hamuna; piga ma hodana, piga lombuna dohot horbo nang dohot ratiti mas na sipasahatonmuna sada- sadama gora hamu. Jala goari hamuma. Mauliatema rajanami dipangidoan munai molo sian hami pamoruon muna sangap do hamu diadopan nami. Nungnga tangkas marpangidoan rajai ima disinamot ni parumaen nami. Rajanami rajabolon napatutu do nian sude pangidoanmunai pasahaton nami, alai mangido mangelek hami molo tung pehupasada hami disinamot ni parumaen nami sinamot boru ni rajai asa sahali mangelek sahalai manombahon nian hami tu hamuna raja hula-hulanami asa disi ma horbona, disi ma lombuna, disi ma nang hodana disi perakna nang ratiti mas na hupapungu hami mai annon rajanami dipagasan rupia ima sipalas roha amatta raja dohot sigohi hajutni inatta soripada, ima elek-elek pangidoan nami naboi sombahonon nami tuhamuna rajani hula-hulanami. Sidok boti ma hami rajanamai. Mauliatema dihamu rajani amangborunami raja siringo-ringo tangkas dinamangaelek ma hamu disinamot ni borunami sisahali mangelekhon sahali manombahon ma hamu antong lean hamu majo parjolo partingkian di hami asa anggiat attong dibagasan do roha hami tarlumobi mangido paniroion sian rajani hula-hula nami dohot rajani tulang nami. Suang songonima dihita pomparan ni opputa tuan raja pangaribuan toga raja pangaribuan talumobi di hamu borunami, nungnga tangka dipihut-ihut hamu pangkataion dohot rajani amang borunami ima paribanmu, baung tangkas dihatahon nasida, dinapasahathon sinamotni pariban mu sahali manombahon ma pasahaton ni nasida alai dang didok dope bilang-bilang na. Nuaeng pe diborunami hupahat hami partingkian tu hamu. Dialusi “ gabe jala horas “ . Songoni do di hamu rajani hulla-hula na huparsangapi hami dohot rajani tulang nami na huparsangapi, rajanami raja bolon martamba- tamba ma las ni roha nami dibagasan partingkianon, dinarade rohamuna rajanami paihut-ihuthon dohot namangarangrangi sinamot ni beremuna dohot pahompuna ima nanaeng sombahonon ni amang borunami raja siringo-ringo. Ima namarpangidoan nasida sisahali manombahon, sahali mangolophon ima ringgit sitio suara ima rupia sigohi hajutni inanta soripada, alai dang dihatahon dope anggo bilang-bilang na. Sonari mangido paniroion hami sian hamu hula-hulanami dohot tulang nami, partingkianon hupasahat hami tu hamu. Songon hatani natuatua andalu ma panduda, anduri ma pamiari Sipanuturi ma hamu hula-hulananmi, tulang nami sipangajari. Dialusi “ hula-hula dohot tulang “ . Jadi mauliate ma amangboru sian hami namardongan tubu sunag songoni boru nami nang siang raja ni hula-hulanami dohot sian tulang nami, sisahali pasahathon hamu disinamot ni borunami ima parumaen muna, antong amangboru godang ma pasahat hamu partingkian huapasahat hami tu hamu. Mauliatema rajanami raj bolon hami pe mangido partingkian majo tu hamu rajani hula-hulanami, asa hualap hata sian borunami naung sisada hata hami dohot borunami. Songoni ma dihamuna raja ni boru dohot bere nami tangkas do nungnga dipaihut-ihut hamu hami pangkatai dohot rajai raja pangaribuan ima nanaeng sahali manombahon sahali mangelekhon disinamot ni parumaen nami, mangido hata hami tuhamu borunami. Partingkian on hupasahat hami tu hamu. “ dialusi boruna “ . Songoni ma di hamu nahuparsangapi hami horong ni hula-hula dohot tulang nami, nungnga tung tangkas humulai hami ima dimangkatai sinamot beremuna dohot pahompumuna. rajanami raja bolon dang barani dope hami patolhason mangulahon on aianggo so jolo mangido panuturion sian hamu. Songon nidokni natuatua “ rantingni bulu duri sanjongkal dua jari, hamu do rajani hula-hhula dohot tulang sipanuturi dohot sipangajari. Antong rajanami saonaripe ajari hamuma hami. Partingkian on hupasahat tu hamu. “ dialusi hulahula dohot tulang “ . Mauliatema rajanami dinaung tangka di kean hamu panuturion tu hami borumuna, asa dohonon nami ma songon hata natuatua namandokhon “ asa auga ni pangula ma dibaen dipara-para, molo nungnga manuturi hula-hula dohot tulang ido naboi paposhon roha. Rajanami rajabolon nungnga pos be roha nami dinalaho manghatahon bilang ni sinamot ni beremuna dohot pahompuna. Mauliatema tulang. Songonima rajanami taudutima. Nungnga tung tangkas dihatahon hamu amangboru, ima dinamangelek hamu disinamot ni borunami. Nangkining nungnga tung tangkas dihatahon hamu dinamangudurhon ianangkonta namanjalo pamasu-masuon sian bagas joro ni tuhanta torusma hita muse tu inganan on manggarar adat dohot manjalo adat nahombar tu pardongan saripeon ni ianakonta. Antong marpangidoan tu amanta debata asa anggiat ma rongkap na gabe rongkap horas jala dongan na saur matua. Antong amangboru sinamot ni borunami nungnga tangka dihatahon hamu sisahali pasahathon. Pasahat hamu ma amangboru nungnga rade hami. Mauliatema rajanami rajabolon tangkas do nangkin songon elek- elek nami tu hamu ima di sinamot ni parumaen nami sisahali manombahon, jala las rohanami diharadeon ni rohamuna manjalo. Mauliatema mardongan sangap.