Patut marmalas ni uhur hita mamuji Tuhanta in, bani haganupan pasu-pasuNi na gokan dear in ibagas pargoluhanta, sonin ma hinajengesni pakon hinamantinni goluh na dob idaihon hita, ipadipat do hita hubani tahun 2023 on. Anggo bani media pemberitaan ipardiatei hita, buei do pemimpin dunia bahkan bapa Presidenta Joko Widodo mangkatahon bahasa tahun 2023 on aima tahun na golap, janah haganupan negara i dunia on maningon pasirsirkon janah mambohali botul laho mandompakhon tahun on. Bani situasi na sonon, halak Kristen pe homa maningon boi do ibagas pangarapan na laho manlangkah bani tahun on, hansi pe marhitei perkiraan bani tahun on ibagas hagolapan, totap do ihaporsayai hita hataNi Naibata “Ulang ho mabiar, ai Ahu do hasomanmu, ulang ho rusak, ai Ahu do Naibatamu. Hupargogohi pe ho, tongon Huurupi pe ho, tongon Hutatang pe ho marhitei tangan-Ku siamun na marhamonangan in” (Jesaya 41:10). Sinalsal na humbani Naibata na manorangi uhur pakon pikkiranta, na patoguhkon hita ase totap sauhur sapanriah janah pataridahkon uhur na marsihaholongan, aima tandani na ihasomani janah isondangi Tuhan Naibata do dalan ni goluhta bani tahun on. Na laho mansuhuni visi ni GKPS aima “Gabe Gereja Siboan Pasu-Pasu janah Sari” na mangkasiholhon haganupan hita halak na porsaya gabe pasu-pasu janah pataridahkonkon goluh na sari hubani dunia on. Iparhatongon hita do bahasa pasu-pasu na humbani Naibata domma layur ijalo hita, nai do homa na gabe onjolan banta janah tardilo do hita, bahasa maningon gabe pasu-pasu do hita janah pataridahkon goluh na sari hubani hasomanta. Apostel Paulus manuratkon bani Galatia 6:2 “Marsiurupan ma nasiam mamorsan na borat in” janah falsafahni hita halak Simalungun na mangkatahon “Sapangambei Manoktok Hitei”, semangat on ma na mangarahkon hita na laho marsiurupan/marharoan bolon/bergotong-royong bani sada tujuan na dear, sauhur sapanriah janah marhasadaon na dear haganupan mangkorjahon horja itongah-tongahni kuria Ni Tuhanta in. Kuria GKPS Bandung Selatan aima sada kuria na ipajongjong marhitei holongNi Naibata, marbanggal janah eksis i tongah-tongahni tanoh Pasundan, janah domma 23 Tahun itogu-togu janah iramotkon Naibata kuria in. Anggo manaili hupudi, pusok ni uhur pakon malas ni uhur margantih soluk do ihapkon haganupan kuria, tarlobih ma in na pajongjongkon ianan marhasadaon na laho mamuji Tuhan Naibata na maralamat i Jalan Mekar Agung No. 52 i Perumahan Mekar Wangi, Kecamatan Bojongloa Kidul, Kota Bandung, Jawa Barat. HolongNi Naibata in na mampargogohi haganupan panitia pembangunan, donatur, kuria, majelis, PMJ sonai homa Fulltimer na mamberehon gogoh, pikkiran, pakon materi. Jongjong ma sada ianan ni kuria in na laho marsaor dompak Tuhan Naibata. Iadongkon do parmingguan na parlobei bai ianan marhasadaon in bani ari Minggu, 15 November 2015. Ari margantih ari, bulan margantih bulan, tahun margantih tahun sai tong marmalas ni uhur do kuria in, na marhitei markegiatan pakon mandalankon program napabanggalhon pakon patoraskon haporsayaon ni kuria in. Na laho manggoki malasni uhur na dob idaihon kuria in sadokah on janah gabe hataridahanni hatarimakasihon ni kuria in hubani Naibata, ihasiholhon kuria in do na laho mangadongkon sada horja na margoran “PESTA PATIBAL BATU ONJOLAN GKPS BANDUNG SELATAN RESORT BANDUNG” bani ari Minggu, 12 November 2023. Ibagas toruhni uhur, ijon roh do hanami haganupan panitia Pesta Patibal Batu Onjolan on, laho mangontang janah mangarahkon riap hita haganupan Bapa, Inang, Namaposo, Sikolah Minggu na laho mangolobkon horja on marhitei na mambere uhur pakon pikkiranta sonai ge gogohta. Etah hita, pataridahkon hita use semangat marsiurupan/marharoan bolon/bergotong-royong patorsahon horja i kuria in, ase hita haganupan gabe parsimada bani malasni uhur on. Andohar Tuhan Naibata mamasu-masu haganup lahoanni goluhta, janah marsangap janah marmulia ma goranNi Tuhanta marhitei horja on. Tabi pakon tonggo nami Rinson Feryanto Girsang Ketua Pelaksana