PARTANGIANGAN TAON BARU KELUARGA

SABTU, 01 JANUARI 2022 PUKUL 00.00 WIB

HURIA KRISTEN BATAK PROTESTAN

(HKBP) RESORT KOSERNA

“Masiurupan ma hamu mamorsan angka na dokdok i; i

ma dalan mangaradoti patik ni Kristus.”
(Galatia 6:2).

1
 PARTANGIANGAN TAON BARU KELUARGA (PUKUL 00.00 WIB)
SABTU, 01 JANUARI 2022
Pangaradeon:
1. Dipillit ma na manguluhon partangiangan on.
2. Diparade ma lilin.
3. Diparade ma inganan ni pelean.

I. JOUJOU TU PARTANGIANGAN (U: Uluan, K: Keluarga)

U: Selamat taon baru ma di hita!
K: Selamat taon baru ma tutu di hita
U: Mandok mauliate ma hita tu Jahowa, ai asi ni rohaNa do na pataruhon
ngolunta sian taon 2021 tu taon 2022 on. Debata Parasiroha jala
Pardengganbasa do Ibana na mangaramoti pardalanan ni ngolunta, na
mangalehon gogo di hita uju gale jala paserep rohanta uju di las ni roha.
K: Pinuji ma tutu Debata Jahowa naung mambasabasahon taon 2022
on di hita.
U: Antong tapasada ma roha dohot pikiranta laho marsomba tu Ibana, ai
Ibana do na mangudut hosanta sahat ro di bona ni taon on.
K: Ima tutu, taparade ma sandok rohanta asa tapungka mandalani
taon na imbaru on marhite na jumolo tapatupa Partangiangan Taon
Baru Keluarga paboa na mangasahon hagogoon ni Debata na
songkal i do hita mandalani taon 2022 on.
U: Antong tapuji ma Debata marhite ende sian BE. No. 65:1-2.     
1. MARENDE SIAN BE HKBP NO. 65:1-2 “Majumpang Taon na Imbaru on”
(uju marende, digalahi ma lilin)
1. Ma jumpang taon na imbaru on, di au dibahen Jesus/ Dibaen rohana di au
on, basana dipatulus/ Ibana do manogu au, saluhut jea dipadao/
Mambaen las ni rohangku/
2. Dibahen i hupuji Ho, o Jesus Debatangku/ Ai ndang hea mangulon Ho
mambaen partuaonhu/ Rohangku panuratan nigodang ni denggan
basaMi/ Ai Ho do pangurupi//
2. VOTUM- INTROITUS-TANGIANG       
U: (Molo Partohonan na manguluhon)
Marhitehite Goar Ni Debata Ama dohot Goar Ni AnakNa Tuhan Jesus
Kristus dohot Goar Ni Tondi Parbadia na tumompa langit dohot tano on.
Amen.

2
U:   Ahu do Alpha, Ahu do Omega, bonana dohot ujungna ninna Tuhan i, na
adong dohot naung adong hian dohot na ro. Pargogo na sumurung.
Haleluya! Martangiang ma hita:
Ale Tuhan Debata! Sian asi ni rohaM do umbahen sahat hami na
sakeluarga tu taon 2022 on; Ho do na mangaramoti hami manipat taon
2021 naung salpu i. Sai asi ma rohaM, sai unang tulak hami nuaeng, sai
dongani ma keluarganami di bagasan taon na imbaru on. Pasupasu hami
ro di angka ulaon na denggan, na huula hami marhitehite GoarMu. Alai na
gumodang , pasupasuhon ma HataM na badia i tu rohanami, asa gabe na
imbaru rohanami, asa tarpamasuk Ho hami tu banua ginjang di hasusuda
ni bohalnami. Amen.
3. MARENDE BE.NO.70:2 “Naung salpu taon na buruk i”  BL. 36.
2. Jesus sai asi rohaM, paian denggan ni basaM/ Muse di taon na’mbaru on
di nasa huriaM tongtong/ Muse di taon na’mbaru on di nasa huriaM
tongtong//
4. MANJAHA HATA NI DEBATA:
U: Hata ni Debata di hita apala sopot di bona ni taon on, ima na tarsurat di
Psalmen 136:1-9. Tajaha ma marsingkatsorin:
Mandok mauliate ma hamu tu Jahowa, ai pardengganbasa do Ibana, ai ro
di salelenglelengna do asi ni rohana.
K: Mandok mauliate ma hamu tu Debata, na mangatasi angka Debata
sileban, ai ro di salelenglelengna do asi ni rohana.
U: Mandok mauliate ma hamu tu Tuhan ni angka tuan, ai ro di
salelenglelengna do asi ni rohana.
K: Ibana sandiri jumadihon halongangan angka na bolon, ai ro di
salelenglelengna do asi ni rohana.
U: Ibana sandiri jumadihon angka langit marhitehite hapistaran, ai ro di
salelenglelengna do asi ni rohana.
K: Ibana sandiri paherbang tano on di atas ni angka aek, ai ro di
salelenglelengna do asi ni rohana.
U: Ibana sandiri jumadihon panondang angka na bolon, ai ro di
salelenglelengna do asi ni rohana.
K: Mata ni ari bahen pangguruan ni arian, ai ro di salelenglelengna do
asi ni rohana.
U: Bulan i dohot angka bintang bahen pangguruan ni borngin, ai ro di
salelenglelengna do asi ni rohana. Ido sahatna. Martua do angka na
tumangihon hata ni Debata jala na umpeopsa.
U+K : Amen.
3
5. MARENDE BE NO. 265:1. “Mauliate ale Tuhan” BL. 192.
1. Mauliate ale Tuhan ala ni hahoholongmi/ Ro Ho sian banua ginjang
pangolu au na mago i/ Hudok di Ho mauliate, naung singkop
hangoluanki/ Ala holong huhut marasi rohaM di au pardosa on//
6. REFLEKSI TAON BARU     
U: Molo tatailihon satongkin dompak taon naung salpu i, tontu sumuang ma
tu bagasan parningotanta paboa marragam do angka na masa naung
tabolus dohot angka na binolus ni donganta di luat on dohot di angka luat
na asing. Diapuli do hita uju marsak, dipargogoi uju gale, dipapos rohanta
uju ganggu, jala disarihon do hita di nasa na hurang. Bahat donganta
angka na marsitaonon bolon, ima siala ni pangontak ni pandemi Covid
19, bencana alam isarani aek magodang na mangarondam torop
parhutaan pola ingkon torop sian angka pangisi ni huta manang kota na
ingkon marsaro di pengungsian. Anggiat ma didongani Tuhan sude
keluarga na tumaon na dokdok hinorhon ni angka na masa i.
K: Alai mauliate ma tadok tu Debata ai diloas dope hita marhosa sahat
tu taon na imbaru on.
U: Apala di bona ni taon na imbaru on manatap ma hita tu jolo.
Sungkunsungkun di rohanta i ma: Aha ma angka na naeng siadopanta tu
jolo? Boha do hita di angka ulaonta siganup ari? Aha ma angka na masa di
tongatonga ni masyarakat? Ditaon 2022 on, pamasaon ni hurianta do
ragam ni panghobasion na marpardomuan tu hasadaon ni roha dohot
pikiran. Marhite i digoari ma taon panghobasion ni hurianta di taon 2022
on, tahun Kesehatian. Hombar tu si do pandohan ni Apostel Paulus na
mandok: “Gohi hamu ma halalas ni rohangkon: Sada ma parrohhon
hamu; sada ma haholonganmuna; saroha, sapingkiran ma hamu.” (Pilippi
2:2).
K:   Ima tutu, saroha sapingkiran ma hita laho mandalani taon 2022 on.
Saroha sapingkiran ma hita mangula nasa siulaon, saroha
sapingkiran masitungkoltungkolan jala saroha sapingkiran
manghaporseai Tuhan i.
U:   Halomohon Jahowa ro di nasa pangajarionNa, jadi lehononNa ma tu Ho
nasa nauli dohot na denggan hombar tu lomo ni rohaNa.   Antong hata ni
Debata naung tajaha nangkin, i ma na papposhon rohanta ai
Pardengganbasa do Ibana jala ro di saleleng ni lelengna do asi ni
rohaNa.  
7. MARENDE BE. NO. 475:1     “Ho tongtong ihuthononku-2”  BL. 92.     

4
 1. Ho tongtong ihuthononku Jesus, sipangolu au/ Tung na so
tadingkononku Ho na paluahon au/ Sai marguru au tu Ho, sai marguru au
tu Ho, Ho tongtong ihuthononku Jesus, sipangolu au//
8. RENUNGAN: 
“Masiurupan ma hamu mamorsan angka na dokdok i; i ma dalan mangaradoti
patik ni Kristus.” (Galatia 6:2).
HATORANGAN:
Di angka tingki naung salpu, tangkas do dihangoluhon angka ompunta na
parjolo i ngolu na masiurupan. Adong na na ginoaran marsialap ari manang
marsirumpa laho mangula di porlak manang hauma ni sasahalak. Adong na
marrodi manang gotong royong laho pauli bagas, patiur bondar manang batang
aek suang songon i nang na pature dalan tu huta. Hira di ganup huta do najolo
adong na ginoaran “saringkat” isarana: Saringkat Masihaholongan, Saringkat
Saroha, Saringkat Parsahutaon, dohot na asing. Saringkat on ma sada inganan
manang wadah laho masiurupan isara ni molo marpesta sian ruas ni Saringkat
i, manigor sigop ma anggota ni saringkat i laho mangalehon pangurupion
hombar tu ringkotna isara ni na marhobas, mangindahani dohot na asing
hombar tu ringkotna.
Lam maju zaman, lam muba ma nang rumang ni pangalaho na
masiurupan i. Dung adong “hand tractor” mangula hauma, lam mago ma ngolu
na marsialap ari. Dung ro par catering, dang pola masiurupan be marhobas di
parpestaan. Lumobi ma di zaman Teknologi Informasi nuaeng on, nunga lam
hatop be hamajuon i mardalan jala bahat na boi diula marsasahaak. Pola do
nuaeng digoari partingkian on zaman digital, era millennium dohot era Revolusi
Industri na paopathon. Manang dia pe goarni i, sandok taida do na lam hatop
jolma mangula ulaonna jala hatop jumpang parbuena. Lam tu hatopna do arus
informasi di sandok liat portibi on pola didok na deba naung lam sompit portibi
on. Dang hinata tutu, ai manang aha na masa di Amerika, Afrika dohot Australia,
manigor sahat do i tu hita marsasahalak marhite smartphone manang android
naung hira ris adong pinomat di sandok rumatangga.
Nang pe songon i, naeng ma jamot hita paboa ala ni hamajuon i nunga
lam mangolu nuaeng on di bagasan diri ni jolma ima individualisme (dang pola
ringkot rap dohot halak na asing), egoisme (holan manarihon na ringkot tu diri
sandiri), hedonisme (lalap holan naeng menikmati haulion ni portibi on).
Angkup ni i, lam longkang ma sian ngolu ni jolma i hasabaron, ai naeng hatop
nian sude jumpang nasa na sinangkapan ni rohana. Lam mago ma nang na
parduli tu dongan ai lam tubu ma ngolu na masipasombuan.
Jamot ma hita sotung tubu pangalaho songon na ginoaran ondeng di
dirinta marsadasada, di keluarganta nang di ngolu ni huria pe tahe. Huria na
5
gumodang manjalo pasupasu sian Tuhanta naeng ma gabe pasupasu tu angka
huria na metmet asa lam marbungaran harajaon ni Debata di sude huria i.
Di bagasan na sataon bolon taon 2021 na baru ta tinggalhon, jumpang
hita do ngolu na masiurupan lumobi di na tongon mangadopi pangontak ni
pendemi Covid-19 i hita. Na masiurupan do hita molo taihuthon protokol
kesehatan. Isarana marhite na mamangke masker hita, nunga dohot hita
mangurupi torop halak asa unang mangararati virus corona i. Laos
tahamauliatehon ma tu Tuhanta Pardenggan basa i, na mangalehon gogo dohot
bisuk tu panggomgomi ni Bangsonta laho mangadopi pandemi Covid-19 i, pola
dipatupa nasida vaksinasi tu masyarakat Indonesia on, so pola ingkon martuhor.
Anggiat ma di taon 2022 on, boi sude masyarakat ni Indonesia on, taruli di
vaksinasi i jala tongtong ma hita masiurupan marhite na manghangoluhon
protokol kesehatan i.
Disangkapi Hurianta HKBP do laho patupahon nasa panghobasion di
taon 2022 on, marojahan tu ngolu na saroha jala sapingkiran songon na nidok ni
apostel Paulus di Pilippi 2:2 i. Ido tutu, molo saroha sapingkiran hita laho
mamorsan na dokdok i, tontu gabe neang do i. Ido umbahen ingkon tongtong
taparangehon ngolu na saroha sapingkiran laho mamorsan angka na dokdok
mamungka sian keluarganta ganup. Ama dohot ina, natoras dohot ianakhon,
angka na marhahamaranggi naeng ma hot saroha sapingkiran asa numeang
siporsanon i songon nidok ni na bisuk: “Ringan sama dijingjing, berat sama
dipikul.
Tung dipanghilalahon Hurianta HKBP do panghorhon nauli siala na
saroha dohot sapingkiran i hita di taon 2021 i, lumobi ma i laho mamorsan na
dokdok ima utang tu Dana Pensiun na hira so tartuhuk be didok roha ala ni
boratna. Hape, dilehon Tuhanta do hasadaon ni roha dohot pikiran di sandok
ruas dohot parhalado gabe boi ma digarar deba utang i lobi sian na hinirim
hinan. Anggiat ma gabe jamita na mangolu i nang di hita marsahuria nang
marsakeluarga paboa tung gogo situtu do panghorhon ni sisada roha dohot si
sada pingkiran i.
Antong dia ma siporsanonta di bagasan taon 2022 on umbahen ingkon
masiurupan hita mamorsansa? Tontu adong do siporsanonta i nung taboto
hombar tu sangkap dohot ulaon di keluarganta, hurianta, masyarakat nang
ulaonta siganup ari, alai adong do i na so taboto dope ala boi masa tompu haroro
ni siporsanon i. Alai hata ni Debata nuaeng mamanghulingi hita mandok:
“Masiurupan ma hamu mamorsan angka na dokdok i; i ma dalan mangaradoti
patik ni Kristus.” Amen.
9. MARENDE BE. NO. 122:1 “Ida Hinadenggan Ni”    BL. 13.

6
 1. Ida hinadenggan ni angka na saroha i, parpambaenan na burju nang
hatana pe tutu/ Diparbaga Debata tu na marsaroha da. Pasupasu na
godang, i ma roha na sonang//

10. MANDOK HATA:

Di pungka sian na umposo, manang dipillit ma na mewakili ianakhon dung i
natoras.
11. MARENDE BE. NO. 260:1,2+4 “Holan Jesus do hubaen donganku”
(Papungu Pelean)      BL. 40.
1. Holan Jesus do hubaen donganku Ai Ibana pasonangkon au/ Ingkon sai
tongtong tiur langkangku Molo raphon Jesus i au lao/ Molo raphon Jesus
i au lao/
2. Tano dohot laut sonang hubolus Molo sai diiring Jesus au/ Tu
banuaginjang pe sai torus Do boanon ni Tuhanku au/ Do boanon ni
Tuhanku au/
4. Jesus do tongtong haporusanku Arta dohot hangoluanki/ Nang
tondingku nang pe pamatangku Hupasahat tu tanganNa i/ Hupasahat tu
tanganNa i//
12. (rap mandok) Tangiang Ale Amanami, (mangendehon) Amen, Amen,
Amen.

7
(Persembahan dapat diserahkan melalui sintua wijk, atau transfer ke norek HKBP
Koserna. BNI 0380893453).

Pendeta Resort: Pdt Jasa Simorangkir, S.Th

Pendeta Fungsional: Pdt Ririn Mayer Lina Sinurat, S.Th
Seluruh Sintua HKBP Koserna,
Menyampaikan:

Selamat Natal 25-26

Desember 2021
&
Selamat Tahun Baru
2022