GKPS DISTRIK I 1. Votum – Introitus – Tonggo P : Hita na marsihaholongan i rumah on! Baru ope imasuki hita tahun 2023. Tuhan do na padiparhon hita hubani tahun on, na mangkasomani hita bani tahun-tahun na salpu, anjaha na totap do mangiring-iring goluhta hanjon hujanan. Patut do hita marunduk ni uhur martarimakasih hubani Tuhan. Pasirsir hita ma dirinta laho mamuji pasangapkon Tuhan marhitei partonggoan bona tahun keluarga on. ……………… Saat teduh ……………… P : Ibagas goran ni Naibata Bapa pakon Tuhan Jesus Kristus ampa Tonduy Napansing, sitompa langit pakon tanoh on. Amen “Martarimakasih bani Naibata, na dob pataluphon nasiam marparbagianan bani siteanon ni halak na mapansing ibagas haliharon. Ia do na paluahkon hita humbani kuasa ni hagolapan, anjaha ipapindah do hita hubagas harajaon ni Anak na hinaholongan ni uhur-Ni in. (Kolosse 1:12-13). Haleluya, Martonggo ma hita! Ham Tuhan Naibata Bapanami na i nagori atas simada tahun, bulan, minggu pakon ari-ari. Puji-pujian pakon tarima kasih ma isombahkon hanami hu Bamu, halani idop pakon holong ni uhur-Mu do na mangkasomani hanami boi mandipar das hubani tahun na baru on. Pasu- pasu Ham ma hanami keluarga na martumpu on, ase tongtong hanami mardalan bani harosuh ni uhurMu bani tahun-tahun ni goluhnami. Ajari Ham tongtong hanami ase lambin ihargahon hanami panorang na binere- Mu on bannnami. Ibagas goran ni AnakMu Jesus Kristus Tuhannami. Amen. 2. Mandoding Haleluya No. 46 : 1 + 5 Satahun use ma surutni, surut homa ma umurhin Naha do au na sain dokahni, margagan do parlahouhin Ganda do haporsayaonku ‘ge holong ni ateihu pe Bai Jesus pakon Naibatangku, ‘pa bai hasomankin ale Halani ai ma ‘se hupuji layakMu in sadari on Ai na patibal ruji-ruji, sai na tarlobih do in tong O Jesus, na marholong atei! Ningon hupuji goranMu Ai Ham do hapeni na pandei mambere bangku layakMu 3. Mambasa Hata ni Naibata (Ibasahon sahalak anggota keluarga) P : Hata ni Tuhan sibasaonta aima humbani Psalmen 121 : 1 – 8 , sonon ma tarsurat : …….. (ibasa ma humbani Bibel) ….. Amen….. Martuah ma na manangar hata ni Naibata anjaha na mamparimbagaskonsi. P +K : Amen
4. Mandoding Haleluya No. 50 : 1, 5
Sai na margantih tahun on sonin ronsi magira Jesus baen ham uhurhon ase tongtong marhira Bai parsurutni ajalhin, janah manimbang ujungnin. O Jesus, au urupi ma bai tahun on mamboan, Buah na ramos, na tama, padaoh ma hamagouan, Sai Ham pagogoh au tongtong, pasangap Ham bai goluhkon. 5. Renungan (Ibuha anjaha itutup ibagas tonggo) Martonggo ma hita… Amen Nini hata ni Tuhan na itangar hita nokkan ai bani Psalmen 121 : 8 “Jahowa do manjagai ho laho luar ampa laho masuk, humbani sonari ronsi sadokah ni dokahni.” Hita haganupan, Parpsalmen mandompakhon pangkawahni dompak dolog-dolog na i sekitar Jerusalem, irik sungkun-sungkun anjaha mangarap do ia : “Hunja do nani roh pangurupion bangku?”. Ijia, halak Israel anggo laho hu rumah panumbahan, maningon manlopusi ianan na lungun anjaha berbahaya i sabolah timur ampa selatan dolog-dolog na i Jersalem ai. Buei ijai jumpah binatang buas, panamum na gati manamun anjaha mamunuh, adong homa hayu-hayu banggal na ianggap keramat halani memilki kekuatan gaib. Sada ianan na ihabiari halani buei ijai na mangancam keselamatanni halak na manlopusi. Pardalanan tangkog hu rumah panumbahan ai manggambarhon paboa halak na porsaya sasintongni inggot do i lambungni buei masalah, tantangan ampa ancaman bani goluh on. Dob mulak ia hun hun Rumah Panumbahan, jumpahsi ma balos ibagas bentuk pengakuan: “Pangurupion bangku roh humbani Jahowa, sitompa langit pakon tanoh”. Parpsalmen manegaskon bahwa jumpah do jaminan haluahoon ibagas Jahowa. Halani ai naheini seng anjai jiris, Tuhan na igoran sidea homa “sijaga Israel” lang ongga tartunduh atap pe tarpodom. Totap do Tuhan manjaga bangsa Isarel, arian age borngin, usih hubani parmahan na totap puho janah marjaga marmahani biri-biri na ondos bani. Malim-malim na i rumah panumbahan ai mambere penegasan : “Jahowa do sijaga ho, Jahowa do parlinggomanmu bani tanganmu siamun”. Domma ipadipar Tuhan Naibata hita manlopusi tahun 2022 anjaha masuk hita hubani tahun 2023 on. Buei do na ialami hita sadokah satahun in, malas ni uhur age pusok ni uhur, tangis sonai homa tartawa, kesuksesan atap kegagalan. Sonai homa bani tahun on sai buei do homa na maningon sidompakkononta use. Ise pe lang humbanta na mambotoh aha na sihol masa bani ari patar, haduan, bulan na roh ronsi ujungni tahun. Tapi sebagai halak na porsaya hubani Tuhan, totap ma mangunsagah hita bani gogohNi ibagas haganup persoalanni goluhta. Boi hita das hubani tahun 2023on, aima halani panramotionni Tuhan. Ase sonai ma torus mardalan langkah, ibagas panjagaani Tuhan, sanggah luar hita hinan humbani tahun 2022 pakon na mamasuki tahun 2023 on. Artini Tuhan totap mangkasomani hita torus sepanjang masa, bani siklus pergantian tahun, mandompakhon tantangan ni goluh totap do ijagai Tuhan hita. Memang lang ongga ibotoh hita aha na sihol tarjadi bani goluhta bani tahun na baru on, tapi sada na gabe jaminan bahwa mangajamhon Tuhan sai ijagai anjaha ihasomani do hota mandalani goluh on. Agepe domma dong peringatan humbani pemerintah pasal tahun 2023 kemungkinan adong resesi atap krisis ekonomi, na boi berdampak hubani krisis sosial ampa politik. Tontu pasal on na porlu hita lambin waspada, bekerja keras, hemat, ampa totap homa manjaga kesehatanta. Dalani hita ma tahun on ibagas hapentaran na humbani Tuhan. Tuhan do na manjagai sepanjang masa, mulai humbani na luar sidea hun Rumah Panumbahan das hu rumahni sidea bei, ronsi na roh ulaki use sidea hu Rumah Panumbahan use. Sonai ma panjagaan ni Tuhan ai sadokah goluh ni sidea i dunia on. On ma na patotapkon pangarapan ampa haporsayaonta hubani Tuhan, ibagas na idalani hita tahun 2023 on. Selamat Tahun Baru ma hubanta ganup. Amen.. Martonggo ma hita…. 6. Mandoding Haleluya No. 209 : 1 – 2 Dob salpu taun na buruk in, Ham ma hupuji Tuhankin Ai iparorot Ham tongtong tonduyhu pakon dagingkon Ai iparorot Ham tongtong tonduyhu pakon dagingkon Holong ma Ham, o Jesus, patorap Ham gabei-Mu in Bani Kuria-Mu tongtong ibagas taun na baru on Bani Kuria-Mu tongtong ibagas taun na baru on 7. Tonggo Pangapitioon Topik sitonggohonon : (Hatarimakasihon, Rencana-rencana keluarga, Pangidangion i GKPS, Pemerintahan, Pnl) 8. Mandoding Haleluya No. 340 : 1 (Galangan na itujuhon hu Kas Resort) Huondoskon bani Jesus haganupan diringkon Ia do pasangaponku sadokah bai goluhkon Huondoskon ma, huondoskon ma. Bani Jesus Sipaluah, huondoskon ma 9. Tonggo Galangan – Panutup – Pasu-Pasu P : Martonggo ma hita mangondoskon galanganta hubani Naibata! Ham Tuhan Naibata Bapanami, tarima kasih ma sombahnami huBamu na dob padiparhon hanami hu tahun 2023 on. Ihasomani Ham do hanami mandompakkon bagei ni sitaronon na maningon idompakkon hanami. Iondoskon hanami ma dirinami ampa galangan na ipatumpu hanami on huBamu, tanda ni tarima kasihnami bani pasu-pasuMu. Ajari Ham ma hanami ase lambin igalangkon hanami dirinami ase sipardihut hanami bani horja-Mu i tongah-tongah ni keluarga, kuria ampa masyarakat. Urupi anjaha pargogohi Ham ma hanami marhasadaon ibagas holongMu. Pargogohi Ham ma hanami ase boi totap manaksihon haluahon na pinatalarMu in. Togu janah hasomani Ham ma hanami ganup ari ibagas tahun on, ase ipakei hanami ari-ari ni goluhnami domu hubani rosuh-Mu. Idop ma uhur-Mu Tuhan, jalo Ham ma hanami. Amen. Riap ma hita martonggo marhitei tonggo na iajarhon Tuhan Jesus hubani susianni! K : Ham Bapanami na i nagori atas…… Amen P : Jalo hita ma pasu-pasu humbani Tuhan Naibatanta: “Idop ni uhur ni Tuhanta Jesus Kristus, pakon holong ni ateiNi Naibata Bapa ampa parsaoran ni Tonduy Napansing ma mangkasomani hita haganupan. Amen Acara keluarga: Salosei kebaktian, marsisalam-salaman, irik ma mambahen ramah tamah (ucapan selamat ampa harapan-harapan ni pagori keluarga) …………………………….x………………………………
GALANGAN
Ijon iondoskon hanami do galangan Kebaktian Bona Taun Keluarga 1