PARTANGIANGAN PASSION PARNINGOTAN

DI PANAONON NI TUHAN JESUS DI HKBP

RESORT TRINITY MANDALA

G
A
M
B
A
R

S
A
L
I
B

BORNGIN PARJOLO, RABU 27 MARET 2024.

PARTANGIANGAN PASSION PARJOLO (I)

PARNINGOTAN DI PANAONON NI TUHAN JESUS.

-Paragenda – Panjaha Passion : St. E. Sianturi.

-Parjamita : Diak. Tio Juli br. Limbong.

01. Marende sian BE No. 76:1-3 “Sada na ma sangkap.”

 Sada na ma sangkap ni rohangku, di sandok portibi on. Ndang tagamon na so las
rohangku, molo jumping au inon. Naeng ma sai ingoton ni rohangku, na binaen ni
Jesus tu tondingku. Uju pinorsanNa i, saluhutna dosangki.
  Ingkon sai Ibana ingotonku, uju na tarpajal i. Tu hau pinarsilang ginatungkon, sai
mabaor mudarNa i. Ai humophop au ditaon uasNa, asa dohot au muse upaNa. Ai
ditatap do au on, di pandokNa: “Nunga sun!”
… Jongjong …
 O Jesusku, sai paingot ahu di dosangku, di basaM. Ai andorang di na holom ahu
dipalambas Ho rohaM. Nunga leleng dilului Ho do, au na lilu asa unang mago.
Ditaon Ho na bernit i, lao manobus tondingki.

AGENDA:
Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni
Tondi Parbadia, amen.

MANJAHA:
Tabereng ma Induk ni haporseaon i jala na paujungkonsa, i ma Jesus na manaonhon
parsilangon i, singkat ni las ni roha tohapNa i hian, so dietong i hailaon, gabe hundul di
siamun ni habangsa ni Debata. Paingotingot hamu ma Ibana, na pataontaon paraloan sisongon
i dompak Ibana sian angka sipardosa, asa unang marnaloja hamu, unang mandate tondimuna!

MARTANGIANG MA HITA:
Ale Tuhan Debata, Amanami na di Banuaginjang! Asi ma rohaM di hami halak na gale on.
Diida Ho, na gogo do musunami, sai talu do hami dibahen ala ni hagaleonnami. Dibahen i,
hupangido hami tu Ho: Sai pargogoi jala pamonang ma hami maralohon musu i marhitehite
panaonon ni Anak haholongan ni rohaM, Tuhan Jesus Kristus. Amen. (hundul).

02. Marende sian BE No. 152:1 “Jesus na mamorsan.”

 Jesus na mamorsan dosa ni portibi on, pangolu hami. Jesus na mamorsan dosa ni
portibi on, pangolu hami. Jesus na mamorsan dosa ni potibi on, sai pasonang
hami. Amen, amen, amen.

MANJAHA:
Jadi, diarahon Jesus ma na sampuludua i, jala didok ma tu nasida: Na nangkok ma hita tu
Jerusalem, jala tulus ma tu Anak ni jolma i sasudena, na tarsurat di angka Panurirang. Ai
pasahaton ma Ibana tu angka parbegu, gabe insahanna, leaanna jala tijuranna ma Ibana; dung
i mulak mangolu ma Ibana di ari patoluhon. Alai ndang diantusi nasida agia otik sian i; na
buni do Hata i sian rohanasida, ndang diboto nasida na ni hatahonNa i. Dung i dipansang
angka Sintua ni malim i dohot angka Parise ma rapot godang, didok nasida: Aha ma
bahenonta? Ai lan do tanda dibahen Halak i! Molo itapasombu Ibana, porsea ma halak
saluhutna tu Ibana, gabe ro ma halak Rom mangarampas tanonta dohot bangsonta.

Alai hehe ma sada sian nasida, i ma si Kayapas, sintua ni malim di na sataon i, didok ma tu
nasida: Na hurang roha do hamu! Ndang dipingkiri rohamuna, denggan do mate sahalak
humophop natorop i, unang laho mago sandok bangso i. Alai ndang sian rohana sandiri
dihatahon i; ala sintua ni malim ibana di na sataon i umbahen disurirangkon, na naeng mate
ma Jesus humophop bangso i. Alai tahe, ndada holan laho manghophop bangso i, alai naeng
papunguonNa angka i di Debata, angka na marserak dope, laho pasadahon. Asao lat ni sadari
i martuptup ma nasida laho mamusa Ibana. Alai didok nasida ma: Unang ma di pesta i,
sotung Guntur natorop i!

03. Marende sian BE No. 77:4 “Hamu saluhut halak.”

  Au on ro di dosangku na so tardok rohangku dibaen godangna i. I do na
pinorsanMu disi ale Tuhanku marsipal Ho binaen ni i.

MANJAHA:
Dung i onom ari nari asa dapot Pesta Paska i, sahat ma Jesus tu huta Betania, na ni inganan ni
si Lazarus, na sinunggul ni Jesus sian na mate. Jadi dipauli nasida ma disi panganon ujuan di
Ibana; si Marta do manghobasi, si Lazarus ma sada donganNa mangan disi. Gabe dibuat si
Maria ma sahati miak Nardus na arga na so marsaor, dimiahi ma pat ni Jesus, obukna ma
dibahen mangalapu. Jadi digohi uap ni miak i ma bagas i. Jadi sada sian angka siseanNa, si
Judas Iskariot na naeng manjehehon Ibana, mandok: Boasa so ginadis miak i arga tolu ratus
hupang, bahen silehonlehon nian di angka na Pogos? Alai ndada na pogos sinarihonna,
umbahen na didok ibana songon i, panangko do ibana tahe, diusung do asiasi ni halak, tu
ibana dipasahat puro i.

Dung i ninna Jesus ma: Pasombu ma ibana, ai diparade do i hira tu ari hatatanomHi. Ai
tongtong do adong na pogos di tongatongamuna, jala asal ma olo hamu, tarpatongon hamu do
na denggan tu nasida; alai anggo Ahu ndang manongtong di hamuna. Intap na tarbahensa do
na niulana i; na manjoloani do ibana mamiahi pamatangKu songon di na mananom. Situtu do
hatangKon tu hamu: Manang di dia di liat portibi on dijamitahon muse Barita Nauli on,
hatahononna do nang na binahenna i gabe baritana.
04. Marende sian BE No. 79:7 “Di na ponjot rohangKu.”
 Sai naeng ma tiruonku, pambaenanMi di au. Tu sasude donganku; Jesus urupi au.
Mangkaholongi donganki, unang tung marpambuat nang marpangansi pe.

MANJAHA:
Dung i torang ni ari na i, dibege halak natorop na rot u pesta i, na naeng ro ma Jesus tu
Jerusalem. Jadi dibuat nasida ma angka maremare laho manomunomu Ibana huhut
manjoujou: HosianNa! Pinasupasu ma na ro marhite Goar ni Tuhan i, Raja ni Israel.
Dung i dapot Jesus ma halode sada, ima dihunduli hombar tu na tarsurat: Unang ho mabiar
ale boru Sion, ida ma: Rajam do na ro, marsihundul di anak ni halode. Jala halak Parise,
dohot na deba na sian natorop i mandok tu Ibana: Orai antong angka siseanMi, Guru! Alai
ninna ma mangalusi: Hudok ma di hamu, aut mauhom nasida, manjoujou ma angka batu.

05. Marende sian BE No. 83:5 “Na lao do birubiru i.”

 O Tuhan hinauliMi sai naeng endehononku. Diringku ma peleanMi na naeng
seahononku. O Jesus jalo ma au on, pasiat ma pamujingkon, baen sangap di
GoarMu! Pasahat au tu surgo i. Marhitehite mudarMi, baen intan ditumpalMu.

MANJAHA:
Alai dibongoti sibolis i do si Judas na margoar Iskariot, sahalak na sian sampuludua i. Gabe
laho ibana martuptup dohot angka panungganei, manang dia dalanna pasahathon Ibana tu
nasida. Jadi sian las ni rohanasida marpadan ma nasida mangalehon hepeng tu ibana. Dioloi
si Judas ma i, jadi dilului ma tingki na une pasahathon Ibana so sian pamotoan ni natorop i.

06. Marende sian BE No. 86:1,2 “Silang na badia i.”

 Silang na badia i, Ho do lombulombungki. Maralohon dosa i dohot pandelean i. Di
sude sitaonon i, Ho ma lombulombungki.
 Nasa na hu ula i, ndang tau hasonanganki. Nang ringkot pe rohangki, pola ro
nang ilungki. Holan asi ni rohaM, pangurupi, O Tuhan.
MANJAHA:
Alai di ari parhobasan parjolo di Pesta Paska i, didapothon siseanNa ma Jesus, angka ninna
ma: Tu dia ma patureonnami di Ho panganon Paska i, dipangido rohaM? Gabe didok ma:
Laho ma hamu tu huta i manopot si Anu, dok hamu ma tu ibana: Tona ni Guru i: Na dapot ne
ma tingkingKu, di ho ma Ahu sorang, laho mangan Paska i rap dohot siseanKu. Jadi saut ma
disuru Ibana siseanNa dua halak jala didok ma tu nasida: Molo laho hamu tu huta, pajumpang
ma hamu disi dohot sada halak na mangusung aek sahudon, ibana ma ihuthon hamu! Tu
Ibana ma dok hamu: Di dia do bilut inganan, asa disi hupangan hami Paska i? Jadi
patuduhonna ma tu hamu bilut parginjang sada, na lambas, na tipak hinembangan, disi ma
pature hamu di hita.

Jadi borhat ma siseanNa, dibongoti ma tu huta i, jadi jumpang nasida ma tutu songon na
nidokNa i, gabe dipature Paska i. Asa dung bot ari, ro ma Jesus dohot na sampuludua i. Jadi
di na mangan nasida, hehe ma Jesus sian na mangan i, ditanggal ma ulosNa, dibuat ma
basahan, ditapolhon tu Ibana. Diusehon ma aek tu sambong, dung i diburi ma pat ni angka
siseanNa, diapusi ma dohot basahanNa na tinapolhonNa i.

Dung i sahat ma Ibana tu si Simon Petrus, jadi didok ma mandok Ibana: Tung Ho ma ale
Tuhan, mamuri pathu? Dung i ninna Jesus ma mangalusi ibana: Ndang diantusi ho
pambahenanKu na tu ho anggo nuaeng, muse pe botoonmu i. Dung i didok si Petrus ma tu
Ibana: Matua tano on, ndang burionMu pathu. Dung i ninna Jesus ma mangalusi ibana: Molo
so burionku ho, ndang partohap ho di Ahu. Dung i ninna si Simon Petrus ma: Ale Tuhan,
unang ma holan pathu, dohot ma tangan dohot ulungku. Gabe didok Jesus ma tu ibana; halak
naung maridi i, ndang ingkon be burion; ai nunga sude ibana ias. Naung ias do anggo hamu,
alai ndnag luhut hamu. Ai ditanda do sipasahat Ibana, umbahen na didok: “Ndang saluhut
hamu ias.”

Asa dung diburi Jesus patnasida, dipangke ma muse ulosNa, hundul ma Ibana, didok ma tu
nasida: Ai diantusi hamu do pambahenanKi tu hamu? Digoar hamu do Ahu Guru dohot
Tuhan, jadi ture do pandokmu disi, ai i do Ahu tutu. Asa molo Ahu Tuhan jala Gurumuna
mamuri patmuna, tama ma nang hamu masiburian pat! Ai sitiruon do Hulehon tu hamu, asa
dibahen hamu songon naung Hubahen i tu hamu! Na tutu situtu do na hudok on tu hamu:
Ndang umbalga anak somang sian indukna, ndnag sumurung suruan sian na marsuru ibana.
Molo diboto hamu i, martua ma hamu mangulahonsa.

07. Marende sian BE No. 83:4 “Na lao do birubiru i.”

 Saleleng na mangolu au, naeng ingotonku Jesus. Sude na binaenMi di au, hataM
naeng hupatulus. Ho naeng haholonganku do, huhut ihuthononku Ho. Di dalan
hangoluan, tung ingkon Ho nampuna au; mangolu manang mate au, sai Ho do
tioponku.

MANJAHA:
Jadi di na mangan i nasida, ninna Jesus ma: Situtu do na hudok on tu hamu: Sada sian hamu
naeng pasahathon Ahu! Dung i marsak situtu ma nasida, gabe dipandok be ma tu Ibana: Nda
tung ahu i Tuhan? Alai ninna ma mangalusi: Ia i na rap dohot Ahu manurdukhon tanganna tu
paringkauan, i do na pasahathon Ahu! Tong do nian ujung ni Anak ni Jolma i songon na
tarsurat hian; alai marjea do halak na pasahathon Anak ni Jolma i. Tagonan unang ma sanga
tubu ibana tu hasianganon. Alai adong ma sada sian angka siseanNa i, na hundul jumonok tu
Ibana, haholongan ni Jesus i. I ma dihilap si Petrus, jadi ninna ma mandok ibana: Sungkun
ma, ise na nidokNa i. Jadi dipajonok ma tu lambung ni Jesus mandok tu Ibana: Tuhan, ise i?
Gabe dialusi Jesus ma: Ia tusi Hulehon na santopik na Husornophon on, i ma ibana. Jadi
disornophon ma santopik, dilehon ma tu si Judas Iskariot, anak ni si Simon.

Jadi dung dibondut i, dibongoti sibolis i ma ibana. Dung i didok Jesus ma tu ibana: Humatop
ma ula siulaonmu. Asa dung dijalo si Judas na santopik i, pintor laho ma ibana tu balian, alai
borngin ma uju i.

08. Marende sian BE No. 173:4 “Sai mulak.”

 Sai mulak, sai mulak ai na sonang ma ho! Molo sesa dosam jala sabam roham. O
parjalang ho, mulak, mulak ma ho. Mulak, mulak ma ho.

MANJAHA:
Jadi di na mangan i nasida, dihindat Jesus ma roti, dipasupasu ma, diponggoli ma jala
diparlehon ma tu angka siseanNa, huhut ma didok: Jalo hamu, pangan hamu, dagingKu do
on.

Dung i dihindat ma panginuman, didok ma mauliate, dilehon ma tu nasida, huhut ma didok:

Sude hamu manginum sian i. Ai mudarHu do on, mudar parpadanan i, na ni usehon
humophop torop, bahen hasesaan ni dosa. Alai hudok ma tu hamu: Na so tupa be inumonKu
olat ni on sian parbue ni hau anggur i sahat ro di ari sogot; disi ma inumonKu na imbaru rap
dohot hamu di Harajaon ni Damang.

09. Marende sian BE No. 153:4 “O Jesus naung sineat.”

 Pelean na badia, dagingMu sipanganon. Di angka na porsea mudarNa siinumon.
Sai ro ma maringanan, marhite parpadanan di hami on, O Jesus.

MANJAHA:
Jadi dung diendehonnasida ende pujipujian i, ruar ma nasida tu dolok Jetun. Disi ma didok
Jesus tu nasida: Saluhut do hamu naeng targasip mida Ahu di na saborngin on. Ai na tarsurat
do: Lombutanku ma parmahan i, gabe marserak ma birubiru na sapunguan i. Alai ninna si
Petrus ma mangalusi Ibana: Agia sude nasida targasip mida Ho, anggo ahu, na so tupa
targasip. Alai ninna Jesus ma mandok ibana: O Simon, Simon; nunga dipangido sibolis naeng
segeonna hamu songon dahanon. Alai Ahu do manangiangkon ho, unang mintop
haporseaonmi. Jadi dung mulak sogot roham, pargogoi ma roha ni angka hahaanggim! Alai
ninna si Petrus ma mandok Ibana: Tuhan, na bolas do ahu mandongani Ho tu hurungan, nang
tu hamatean pe! Alai ninna Jesus ma: Hudok ma tu ho Petrus, ndang martahuak manuk
saborngin on, so jolo tolu hali soadahononmu, na so tinandam Ahu.

10. Marende sian BE No. 83:1,2 “Na lao do birubiru i.”

 Na lao do Birubiru i, mamorsan angka dosa. Ni nasa hajolmaon i, di benget ni
rohana. Diporsan do sahitta i, dilehon do diriNa i, tu tangan ni pamunu, ditaoni do
na bernit i. Ro di na tos hosaNa i, didok: Naeng porsanonKu.
… Jongjong …
 Ianggo Birubiru i, i ma alealengku. Na paluahon tondingki, disuru Debatangku.
Didok mandok AnakNa i, sai topot ma pardosa i Naung sun tinoruanKu. Balga
tutu do rimasHi, alai tarbaen do mombun i. Horhonon ni mudarMu.

MANJAHA:
Dung i sahat ma Jesus rap dohot nasida tu porlak sada, na margoar Getsemane. Jadi didok ma
tu angka siseanNa i: Hundul ma hamu jolo dison saleleng disan Ahu martangiang. Dung i
ditogihon ma si Petrus dohot anak ni si Sebedeus na dua i, dung i, gabe marsak situtu ma
Ibana jala bobonosan. Jadi didok ma tu nasida: Mansai marsak situtu do rohangKu, hira na
mate do. Dison ma hamu dungo rap dohot Ahu.
Dung i laho ma Ibana saotik tu jolo, dipatungkap ma bohiNa tu tano martangiang, ninna ma:
Ale Amang, namun na tarbahen, salpuhon ma siinumon on sian Ahu! Alai tahe, unang
marguru tu rohangKu, rohaM do. Dung i mulak ma Ibana tu angka siseanNa, jala tarpodom
nasida di dapot, jadi didok ma tu si Petrus: Ndang margogo hamu hape dungo rap dohot Ahu
nanggo sangombas? Dungo ma hamu jala martangiang, asa unang hamu bongot tu
pangunjunan, ai na girgir do nian tondi i, alai gale do ia daging.

11. Marende sian BE No. 171:1,2 “Tandai ma au.”

 Tandai ma au, sungkapi ma dohot rohangku. Uji ma au, pamanat huhut ma
dalanku. Olo ditanda Ho au Debata.
 Asi ma rohaM, taringot tu pangalahongku. Olo tutu, jotjot do na lilu dalanku. Sesa
dosangku, sude Debata.

MANJAHA:
Dung I laho ma Ibana paduahalihon martangiang, ninna ma: Ale Amang, molo so tarbahen
salpu on, nda ingkon Huinum, sai saut ma lomo ni rohaM. Dung i di na ro i Ibana, tarpodom
muse ma siseanNa i di dapot, ai mansai dokdok do salibonnasida. Jadi ditadingkon ma laho
martangiang patoluhalihon mandok hata ondeng. Dung i di dapothon ma muse angka
siseanNa i. Jadi didok ma tu nasida: Datdatanmuna dope modom dohot maradian? Nunga
dapot tingkina nuaeng, sahat ma Anak ni jolma tu tangan ni pardosa. Hehe ma hamu, laho ma
hita! Ndi, nunga ro na pasahathon Ahu!

12. Marende sian BE No. 79:8 “Di na ponjot rohangku.”

 Sai sonang ma rohangku binaen ni bugangMi. Di na lao tos hosangku marningot
mudarMi. Pos ma rohangku baenon ni pamasuhonMu ahu, marnida bohiMi.

MANJAHA:
Alai diboto si Judas Parjehe i do inganan i, ai jotjot do marpungu Jesus tu si dohot angka
siseanNa. Ia si Judas, diarahon ma angka soldadu dohot angka naposo ni sintua ni malim,
didapothon ma tusi mantat sulusulu, palito dohot sinjata. Diboto Jesus do saluhut na naeng
songgop tu Ibana, jala ruar ma Ibana, didok ma tu nasida: Ise do na jinalahanmu?

Gabe ninna nasida ma mangalusi Ibana: Jesus halak Nasaret i do! Dung i ninna Jesus ma
mandok nasida: Ahu do i! Alai dohot do si Judas siparjehe i jongjong di lambungnasida. Asa
dung didok tu nasida: Ahu do i, sumurut ma nasida, angka martinggangan ma tu tano. Dung i
diulahi ma manungkun nasida: Ise do na ni luluanmuna? Jadi didok nasida ma: Jesus halak
Nasaret i do! Dung i ninna Jesus ma mangalusi nasida: Nunga Hupaboa tu hamu, Ahu do i.
Asa molo Ahu dilului hamu, loas ma laho angka on! Ai naeng do jumpang na nidokNa i:
Ndang adong na mago Hubahen agia sada sian angka na ni lehonMi tu Ahu. Alai nunga
dipabotohon parjehe i hian partinandaan tu nasida, ai didok do: Ia i na huumma, Ibana ma i. I
ma tangkup hamu! Asa pintor di dapothon ma Jesus, didok ma: Tabi di Ho Guru! Laos
diumma. Alai ninna Jesus ma mandok ibana: Marhua ho tuson, anggia? O Judas,
pangummaon do hape dibahen ho pasahathon Anak ni jolma i. Dung i ro ma nasida,
dilaluhon ma tangan nasida tu Jesus manangkup Ibana.

13. KOOR:
14. Marende sian BE No. 180:1,3 “Ro tu Jesus, ho na loja.”
 Ro tu Jesus, ho na loja, na maheu i. Lam lumbang do di lambungNa, rohami.
 Timbang holong ni rohaNa, na sai godang i. Ai dilehon do hosanna, tobusmi.

15. JAMITA : Napinasahat ni Diak. Tio Juli br. Limbong.

16. Marende sian BE No. 82:1---- “O Jesusku, tu bugangMu.” (Papungu Pelean).

 O Jesusku, tu bugangMu, ro marsomba rohangkon. Sai tarpuji, sai tarpuji, na
pamalum tondingkon.
 Tung di patMu, O Jesusku, solsolanku rohangki. Tangisanku na tinaonMu, ala jat
ni rohangki.
… Musik …
 Tu tanganMu ma tondingku, jumpa hamamatengki. Tu lambungMu, O Tuhanku,
alap na tinobusMi.

17. TANGIANG PELEAN + ALE AMANAMI + PASUPASU + AMEN… AMEN…

AMEN.

“TAINGOT MA SOGOT LAHO MANDOHOTI PASSION NA PADUAHON, DOHOT

DI ARI JUMAT PAGI 08.00 Wib + ULAON NA BADIA – SIANG 11.00 Wib +
ULAON NA BADIA – PARPUNGUAN NA HOHOM-IBADAH HENING 14.00
Wib.”
 PARTANGIANGAN PASSION PARNINGOTAN
DI PANAONON NI TUHAN JESUS DI HKBP
RESSORT TRINITY MANDALA

G
A
M
B
A
R

S
A
L
I
B

BORNGIN PADUAHON, KAMIS 28 MARET 2024.

PARTANGIANGAN PASSION PADUAHON (II)

PARNINGOTAN DI PANAONON NI TUHAN JESUS.

-Paragenda-Panjaha Passion : St. M. TURNIP.

-Parjamita : Pdt. Leonard Sigalingging.

01. Marende sian BE No. 83:1,3 “Na lao do birubiru i.”

 Na lao do birubiru i, mamorsan angka dosa. Ni nasa hajolmaon i di benget ni
rohana. Diporsan do sahitta i, dilehon do diriNa i, tu tangan ni pamunu. Ditaon i
do na bernit i, ro di na tos hosanna i, didok naeng porsanonKu.
… Jongjong …
  Na olo au, ale Amang sian sandok rohangku. Pasauthon lomo ni rohaM, rohaM
sambaing do guru. O holong ni rohaNa i tung aha do tudosanMi, na songon Ho
margogo? Dilehon Debata hape, AnakNa lao manaon sude, sitaonon ni na mago.

AGENDA:
Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni
Tondi Parbadia. Amen.

MANJAHA:
On do dipatupa Debata: Humophop hita gabe dosa do Ibana, na so tumanda dosa, asa gabe
hatigoran ni Debata hita dibagasan Ibana.

MARTANGIANG MA HITA:
Ale Amanami na di Banuaginjang. Parasiroha na sumurung di sude jolma! Ndang diolani Ho
AnakMu ba sasada i, dilehon Ho do Ibana humophop hami, mamorsan dosanami sahat tu hau
pinarsilang i. Sai patogu ma rohanami, asa unang ganggu rohanami manghaporseai hasesaan
ni dosanami, asa unang mandele hami ala ni dosanami, alai asa pos situtu rohanami di asi ni
rohaM na godang i, marhitehite Tuhan Jesus Kristus Tuhannami, Anak haholongan ni
rohaMi. Amen.

02. Marende sian BE No. 152:1 “Jesus na mamorsan.”

 Jesus na mamorsan dosa ni portibi on pangolu hami. Jesus na mamorsan dosa ni
portibi on pangolu hami. Jesus na mamorsan dosa ni portibi on sai pasonang hami.
Amen, amen, amen.

MANJAHA:
Dung i adong ma sada sian dongan ni Jesus mangalaluhon tanganna, disintak ma podangna,
ditampulhon ma tu naposo ni sintua ni malim sahalak, dipisikkon ma pinggolna. Jadi didok
Jesus ma tu Ibana: Pasarung podangmi, ai na manintak podang, mago ma bahenon ni podang!
Ai na so tarbahen Ahu do di roham mangido sian Damang, asa dipadiri di Ahu saonnari lobi
sian sampuludua loksa surusuruan? Alai songon dia ma disi saut hata ni surat i na mandok:
Ingkon masa do na songon i!

Uju i ma didok Jesus tu angka natorop i: Hira na dompak panamun do hamu hehe,
marpodang jala marlombutlombut manangkup Ahu. Ariari do Ahu nian hundul mangajari di
Bagasjoro, so adong ditangkup hamu Ahu. Alai na masa do sudena on, asa jumpang hata ni
angka panurirang i. Dung i ditadingkon saluhut sisean i ma Ibana laho maporus.

03. Marende sian BE No. 182:1,2 “Haholongon na badia.”

 Tu joloM, O Debatangku sai use do rohangkon. Sai pasiat tangiangku dohot
iluilungkon.
 Husolsoli do rohangku nag ok dosa i tongtong. Ai godang ariaringku na hubahen
ambolong.

MANJAHA:
Dung i ditangkup angka soldadu dohot induknasida ro di angka naposo ni Jahudi ma Jesus
jala diihoti. Jadi ditogihon ma Ibana jumolo tu si Hannas, i ma simatua ni si Kayapas, sintua
ni malim di na sataon i, i ma si Kayapas naung mandok tu angka Jahudi: Dengganan do mate
sahalak humophop bangso. Alai diihuthon si Simon Petrus dohot sisean na sadanari ma Jesus.
Na marsitandaan do sisean na sada i dohot sintua ni malim i, jadi bongot ma Ibana rap dohot
Jesus tu alaman ni malim i. Alai disungkun sintua ni malim i ma Jesus taringot tu angka
siseanNa dohot taringot tu podaNa i. Jadi dialusi Jesus ma ibana, ninna ma: Patar do
hatangKi di hatoropan. Na tongtong do Ahu mangajari na sailaon di bagasan parguruan na di
bagasjoro pe, parpunguan ni saluhut halak Jahudi. Ndang adong manang aha Huhatahon
marsibuni. Boasa Ahu disungkun ho? Nasida naung umbege hatangKi, i ma sungkun! Ai
diboto nasida do na Huhatahon i. Dung didok Jesus songon i, dipastap sada opas na jongjong
disi ma Ibana, huhut ma didok: Songon i pangalusiM tu sintua ni malim i? Dung i ninna Jesus
ma mangalusi Ibana: Ia na hurang na hudok, hajongjonghon na hurang, alai anggo na hona
do, boasa pastaponmu Ahu.

04. Marende sian BE No. 81:2 “Aha ma endehononku.”

 Haleaon, insahinsak, reherehe, tijur pe. Tali dohot pastappastap, tung ditaonhon
Ho sude. Paluahon au na pogos, sian tangan ni sibolis. Ala ni hupuji Ho, tung
marribu hali do.

MANJAHA:
Asa disuru si Hannas ma Ibana naug tinali tu sintua malim si Kayapas, disi do marpungu
angka siboto surat dohot sintua ni malim. Laos bongot ma Ibana tu bagasan, laho hundul tusi
rap dohot angka naposo marnida ujung na. Alai anggo angka sintua ni malim ro di sandok
rapot godang i, mangalului panindangion gapgap dompak Jesus, na tuk mambahen Ibana
marutang hosa. Alai parpudi ro ma dua halak, ninna ma: Didok Halak on: Tarbahen Ahu do
mangalohai Joro ni Debata jala pajongjongonNa i sumuang di bagasan tolu ari. Dung i hehe
ma sintua ni malim i, mandok tu Ibana: Ndang alusanMu na hinatindangkon nasida dompak
Ho? Alai sai hohom do anggo Jesus. Dung i dipangkulingi sintua ni malim i ma Ibana, ninna:
Hupatolon ma Ho tu Debata Siparngolu, asa dipaboa Ho tu hami manang na tutu Ho Kristus,
Anak ni Debata!

Dung i didok Jesus ma tu ibana: Songon na nidokmi ma tutu! Alai Hudok ma tu hamu: Olat
ni on ma idaonmuna Anak ni jolma i, hundul di siamun ni hagogoon jala ro di atas ombun ni
langit. Gabe diribakhon sintua ni malim ma paheanNa mandok: Na mangaleai Debata do
Ibana. Pola luluan dope sitindangi? Nunga dibege hamu pangaleaiNa! Beha do di rohamu?
Dung i ninna nasida ma mangalusi: Marutang hosa ma Ibana? Jadi ditijuri nasida ma bohiNa,
na deba manompuk, na deba mangalinsingi huhut mandok: Surirangi hami, Kristus, ise do na
mamunu Ho?

05. Marende sian BE No. 78:3 “O ulu na sap mudar.”

 Au on tama O Tuhan, manaon na tinaonMi. Dosangku do diporsan, Ho na
tarsilang i. Sai tatap ale Tuhan, au na dijoloMon. Huhut sai patuduhon, basaM tu
rohangkon.

MANJAHA:
Alai na hundul do anggo si Petrus di alaman i, jadi didapothon sada parompuan ma ibana
mandok: Dohot do ho dongan ni Jesus na sian Galilea i? Alai diporso si Petrus do, didok ma:
Ndang adong huboto, jala ndang huantusi na nidokmi. Laos ruar ma ibana tu alaman jolojolo,
jala martahuak ma manuk. Alai marnida ibana, diulahi naposo boruboru i ma mandok tu
angka na jongjong disi: On do sada sian nasida. Alai mamorso muse anggo ibana. Jadi dung
satongkin nari, disok angka na jongjong disi ma muse mandok si Petrus: Atehe, tongon do
dongannasida do ho, ai halak Galilea do ho. Gabe dipungka si Petrus ma mambuburahon
dirina huhut manolonnolon, didok ma: Ndang hutanda jolma na nidokmuna i! Dung i
mamintor martahuak ma manuk paduahalihon. Jadi diingot si Petrus ma na nidok ni Jesus i tu
ibana: Tolu hali do soadahonmu Ahu, andorang so martahuak manuk paduahalihon. Jadi
marningot i, tumatangis ma ibana.

06. Marende sian BE No. 206:5 “Na dison do au, Tuhanku.”

 Sai tangihon, ditangishon rohangki dangolna i. Sai tangihon, ditangishon
tondingki siholna i. RohaMi ma tu rohangku, sai di Ho ma tondingki.
MANJAHA:
Jadi dung diida si Judas Iskariot parjehe i, na naeng hona uhum na ma Jesus, disolsoli ma
rohana, dipaulak ma na tolupulu rupia i tu angka sintua ni malim dohot sintua ni bangso i,
ninna ma: Sala do ahu, hujehehon do hape na so marpipot! Alai didok nasida ma: “Ndang ro
di hami i! Ho do na sari di si.” Jadi ditimpalhon ma perak i tu bagasan joro i, laos sumurut
sian i laho maningkot. Alai dibuat sintua ni malim ma hepeng i, ninna ma: Ndang jadi
padomuon i tu arta ni joro, ai tuhor ni mudar do i! Jadi mardos ni roha ma nasida
manuhorhonsa tu ladang ni pande hudon, bahen parbandaan ni halak dagang. Ala ni i do
umbahen margoar i, ladang mudar ro di sadari on.

07. Marende sian BE No. 82:1---- “O Jesusku, tu bugangMu.”

 O Jesusku, tu bugangMu, ro marsomba rohangkon. Sai tarpuji, sai tarpuji, na
pamalum tondingkon.
 Tung di patMu, O Jesusku, solsolanku rohangki. Tangisanku na tinaonMu, ala jat
ni rohangki.

MANJAHA:
Asa ditogihon nasida ma Jesus sian jolo ni si Kayapas tu Kantor. Alai sogot ma manogot i.
Ndang na bongot anggo nasida tu kantor, asa unang tarsubang nasida laho manganhon Paska
i. Gabe ruar ma si Latus mandapothon nasida, didok ma: Pangaluan dia do diboan hamu
dompak Halak on? Dung i, ninna nasida ma mangalusi: Aut unang sibahen na jahat Halak on,
ndang tagamon pasahathon Ibana tu ho.

Gabe ninna si Latus ma mandok nasida: Boan hamu ma Ibana, uhum hamu ma Ibana marguru
tu adatmuna. Alai ninna Jahudi ma mandok ibana: Ndang jadi pusaonnami manang ise. Jadi
dialuhon nasida ma Ibana, ninna: Na dapot hami do on pabalikbalikhon bangsonami jala
mangorai mangalehon guguan tu Kesar i, dipandok: Raja, Kristus do Ibana. Jadi dibongoti si
Latus ma muse kantorna, dijou ma Jesus, didok ma tu Ibana: Atehe, Ho do Raja ni Jahudi?
Ro ma alus ni Jesus: Na sian roham do na nidokmi, manang na nidok ni halak do i tu ho
taringot tu Ahu? Gabe dialusi si Latus ma: Ai halak Jahudi do ahu? BangsoMi dohot angka
sintua ni malim i do pasahathon Ho tu ahu, aha do na binahenMu? Jadi dialusi Jesus ma:
“Ndang sian portibi on harajaonKu, ndang tarbahen so mangalo angka naposongKu asa
unang sahat Ahu tu tangan ni angka Jahudi. Alai ndang songon i harajaonKi.” Dung i
ninna si Latus ma mandok Ibana: Asa Raja do Ho? Jadi ninna Jesus ma mangalusi: “Songon
na nidokmi ma tutu, Raja do Ahu; umbahen na tubu Ahu jala umbahen na ro Ahu tu
portibi on, asa Huhatindangkon hasintongan i. Ganup na sian hasintongan i, tangihonon
ni i do soarangKu.” Jadi ninna si Latus ma mandok Ibana: Aha ma i hasintongan i? Jadi
dung didok songon i, ruar ma ibana muse manopot angka Jahudi mandok tu nasida: “Ndang
jumping ahu manang dia salana.”

08. Marende sian BE No. 81:1 “Jesus Mual ni ngolungku.”

 Jesus mual ni ngolungku, Sipangolu tondingki. Ai dibunu Ho musungku, i ma
hamatean i. Ho manaoni hamagoan, patupahon hangoluan. Ala ni hupuji Ho, tung
marribu hali do.
MANJAHA:
Alai lam digogohon nasida ma mandok: Digunturi Ibana do bangso i, ai mangajari do Ibana
di sandok tano Judea mamungka sian Galilea sahat ro tuson. Alai umbege i si Latus,
manungkun ma ibana, manang na halak Galilea Jesus. Jala dung diboto na sian gomgoman ni
si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem
uju i.

Marnida Jesus i si Herodes, las situtu ma rohana, ai nunga nania lelengna, sai naeng idaonna
tanda sian Ibana sipatupaonNa. Jadi godang-godang ma disungkunhon tu Ibana; alai ndang
dialusi Jesus ibana. Disi do angka sintua ni malim ro di Sibotosurat, jala gogogogo do Ibana
dialuhon. Ia si Herodes rap dohot donganna, direherehe jala dilealeai do Ibana, disolukhon
ma pahean na arga tu Ibana, laos songon i ma disuru Ibana mulak tu si Latus. Jadi di na sadari
i ma maraleale si Herodes dohot si Latus, ai na masihosoman do nasida anggo na sailaon.

9. Marende sian BE No. 76:4 “Sada nama sangkap.”

 Gok di Ho ma au ale Tuhanku, jala Ho ma jambarhi. Dok ma amen rongkom ma
goarMu, tu bagasan rohangki. Lomo ni rohaM ma sungkunonku, di sude na naeng
ulahononku. Olo i ma padanki, tu Ho Jesus Tuhanki.

MANJAHA:
Alai peam do dipalua panguhum i di Pesta i sada halak na tarhurung, marguru tu na tinodo ni
natorop i. Alai adong ma tarhurung uju i sada parjahat na sumalin na margoar si Barabbas.
Jadi din a pungu i nasida, didok si Latus ma tu nasida: Ise dipangido hamu paluaonku, si
Barabbas manang Jesus na targoar Kristus do? Ai diboto do, late ni rohanasida do umbahen
na dipasahat nasida Ibana. Alai sai disosoi angka sintua ni malim rap dohot sintua ni bangso i
do natorop i, asa dipangido nasida malua si Barabbas, alai pusaon do anggo Jesus.
Dung i ninna panguhum i ma mandok nasida: Ise sian na dua i dipangido hamu paluaonku?
Jadi didok nasida ma: Si Barabbas! Dung i didok si Latus ma tu nasida: Antong, aha ma
bahenonku tu Jesus, na targoar Kristus? Gabe saluhut nasida mandok: Parsilangkon ma! Alai
ninna panguhum i ma: Ai aha ma na jahat dibahen? Jadi lam gogo ma dipanjouhon:
Parsilangkon ma!

10. Marende sian BE No. 77:3 “Hamu saluhut halak.”

 Aha do manginona, tu Ho Silehon tua, di hajolmaon i? So dung hea mardosa Ho
doshon hami jolma, ndang dung dibaen Ho dosa i.

MANJAHA:
Dung i ditogu si Latus ma Jesus, didokhon ma linsingan. Jadi didandani soldadu ma sungsang
duri bahen tumpal, diampehon ma i tu uluNa; baju dapdap ma dialithon tu dagingNa. Dung i
ro ma nasida tu joloNa mandok: Tabi di Ho, ale Raja Jahudi! Laos dipastapi ma Ibana. Dung
i ruar ma muse si Latus didok ma tu angka Jahudi: Ida hamu ma, hutogihon do Ibana tu
jolomuna asa diboto hamu na so adong jumpang ahu salana.

Laos ruar ma Jesus manjujung sungsang duri jala marbaju dapdap. Jadi didok si Latus ma tu
nasida: Ida hamu ma jolma i! Asa dung diida sintua ni malim dohot angka naposo Ibana,
dijouhon nasida ma: Parsilangkon, parsilangkon ma Ibana! Dung i didok si Latus ma mandok
tu nasida: Boan hamu ma Ibana, parsilangkon hamu ma; ai ndang jumpang ahu salana. Gabe
dialusi angka Jahudi ma ibana, ninna ma: Marguru tu patiknami, ingkon marutang hosa
Ibana, ai dibahen do diriNa Anak ni Debata. Umbege i si Latus, lam ganda ma biarna. Dung i
diulahi muse ma tu kantorna, didok ma tu Jesus: Sian dia do Ho? Alai ndang dialusi Jesus
ibana.

Dung i didok si Latus ma tu Ibana: Ndang angkupanMu ahu mangkatai? Ndang dibotoHo,
marhuaso ahu paluahon Ho jala marhuaso parsilangkon Ho? Jadi dialusi Jesus ma: Ndang
adong huasom mangago Ahu, aut unang dilehon i tu ho sian ginjang. Dibahen i gumodang do
dosa ni na pasahathon Ahu tu ho. Jadi olat ni I ma dilului si Latus dalan paluahon Ibana. Alai
manjujui ma angka Jahudi, ninna do: Molo dipalua ho On, ndang aleale ni Kesar ho! Ai na
mangalo Kesar i do ganup na mambahen dirina gabe raja.

Asa dung dibege si Latus hata i, ditogihon ma Jesus haruar, laos hundul Ibana d habangsa
paruhuman i, na di inganan na margoar: Pantar Batu, Gabbata didok anggo di hata Heber. I
ma na masa di ari parhobasan ni Paska i, mareak hos ni ari. Dung i didok ma tu angka Jahudi:
Ida hamu ma Rajamuna! Alai digogo nasida ma manjouhon: Padao, padao ma i, parsilangkon
ma Ibana! Dung i didok si Latus ma tu nasida: Parsilangkononku ma Rajamuna? Jadi dialusi
angka sintua ni malim i ma: Ndang adong rajanami dungkon ni Kesar i!

Asa dung diida si Latus, na so marguna hatana, lam ganda tahe gaorna, dibuat ma aek
mamuri tanganna di jolo ni natorop i, huhut mandok: Lias do ahu sian mudar ni On! Hamu do
na sari disi! Dung i ninna sude natorop i ma: “Marsapata tu hami dohot tu ianakhonnami
ma mudarNa i.” Dung i saut ma dipalua si Barabbas. Alai anggo Jesus dilinsingi, dung i
dipasahat ma, asa diparsilangkon.

11. KOOR:

12. Marende sian BE No. 88:2,4 “Di surgo do Alealenta.”

 Tarsolsolbagi do rohangku paidaida dangolMi. Marningot sasude dosangku, ai i do
na tinaonMi. Hupuji nasa asiMi, alai gumodang holongMi.
 Bagas uhirhon tu rohangku, panghophopMi humophop au. Tusi ma togu
pingkiranku, Guru di Ho sambing ma au. Hupuji nasa asiMi, alai gumodang
holongMi.

13. JAMITA : Napinasahat ni Pdt. Leonard Sigalingging, STh.

14. Marende sian BE No. 81:1--- “Aha ma endehononku.” (Papungu Pelean).

 Jesus mual ni ngolungku, sipangolu tondingki. Ai dibunu Ho musungku, i ma
hamatean i. Ho manaoni hamagoan, patupahon hangoluan. Ala ni hupuji Ho, tung
marribu hali do.
 Haleaon, insahinsak, reherehe, tijur pe. Tali dohot pastappastap tung ditaonhon
Ho sude. Paluahon au na pogos sian tangan ni sibolis. Ala ni hupuji Ho, tung
marribu hali do.
… Musik …
 Bugang sada tanggurungMu di na hona linsing i. Hamamalum ni bugangku na di
rohangki do i. Ho do gabe binuraan, au dapotan hangoluan. Ala ni hupuji Ho,
tung marribu hali do.

15. TANGIANG PELEAN + ALE AMANAMI + PASUPASU + AMEN… AMEN…

AMEN.
“TAINGOT MA SOGOT JUMAT AGUNG PAGI 08.00 Wib + ULAON NA BADIA –
SIANG 11.00 Wib + ULAON NA BADIA – PARPUNGUAN NA HOHOM 14.00 Wib.”