A CARA PARTANGIANGAN PASSION

HKBP EFRATA LOROK – RESORT PALEMBANG

SELASA, 26 MARET 2024 [PASSION 1]
=======================================
01. MARENDE BE. NO. 76 : 1-3 “ SADA NAMA SANGKAP ”
 Sada nama sangkap ni rohangku di sandok portibi on. Ndang tagamon na so las rohangku,
molo jumpang au inon.Naeng ma sai ingoton ni rohangku, na binaen ni Jesus tu tondingku.
Uju pinorsanNa i, saluhutna dosangki.
 Ingkon sai Ibana ingotonku, uju na tarpajal i.Tu hau pinarsilang ginantungkon, sai mabaor
mudarNa i. Ai humophop au ditaon uasNa, asa dohot au muse upaNa. Ai ditatap do au on,
di pandokNa: “Nunga sun !”
 O Jesusku sai paingot ahu Di dosangku di basaM. Ai andorang di na holom ahu
Dipalambas Ho rohaM. Nunga leleng dilului Ho do Au na lilu asa unang mago. Ditaon Ho
na bernit i Lao manobus tondingki.
U : Marhitehite goar ni Debata Ama dohot goar ni AnakNa Tuhan Jesus Kristus dohot
goar ni Tondi Parbadia. Amen. Tabereng ma induk ni Haporseaon i, jala na
paunjunghonsa, i ma Jesus namanaonhon parsilangon i, singkat ni las ni roha tohapNa i
hian, so dietongi hailaon, gabe hundul di siamun ni habangsa ni Debata:Paingotingot hamu
ma Ibana, na pataontaon paraloon si songon i dompak Ibana sian angka si pardosa, asa
unang loja hamu, manang mandate tondimuna.haleluya. Martangiang ma hita: Ale Tuhan
Debata, Amanami na di Banuaginjang! Asi ma rohaM di hami halak na gale on. Diida Ho,
nagogo do musu nami, sai talu do hami dibahen, alani hagaleon nami. Dibahen i hupangido
hami tu Ho: Sai pargogoi jala pamonang ma hami maralohon musu i marhitehite panaonon
ni Anak haholongon ni rohaM, Tuhan Jesus Kristus. Amen.
02. MARENDE BE. NO. 152:1 “JESUS NA MAMORSAN”
 Jesus na mamorsan dosa ni portibi on, pangolu hami.
Jesus na marmosan dosa ni portibi on, pangolu hami.
Jesus na mamorsan dosa ni portibi on, sai pasonang hami, Amen, Amen, Amen.
U : Jadi diarahon Jesus ma na sampuludua i, jala didok ma tu nasida : na nangkok ma hita tu
Jerusalem, jala tulus ma tu anak ni jolma i sasudena na tarsurat di angka panurirang.Ai
pasahaton ma Ibana tu angka parbegu, gabe insahanna, leaanna, jala tijuranna ma
Ibana; dungi mulak mangolu ma Ibana di ari patoluhon. Alai ndang diantusi nasida agia
otik sian i; na buni do hata i sian rohanasida, ai ndang diboto nasida na hinatahonNa i.
Dung i di pansang angka sintua ni malim i dohot angka parise ma rapot godang, didok
nasida :
H : Aha ma bahenonta?
U : Ai lan do tanda di bahen Halak i! Molo itapasombu Ibana, porsea ma halak saluhutna tu
Ibana. Gabe ro ma halak Rom laho mangarampas tanonta dohot bangsonta. Alai hehe ma
sada sian nasida i ma si Kayapas, didok ma tu nasida : Na hurang roha do hamu! Ndang
di pingkiri rohamuna, denggan do mate sahalak humongkop na torop i, unang laho mago
sandok bangso i.alai dang sian rohana sandiri dihatahon i, ala sintua ni malim ibana na
sataon i umbahen na disuriranghon, na naeng mate ma Jesus humongkop bangso i. alai
tahe ndada holan laho manghophop bangso i, alai naeng papunguonNa angka anak ni
Debata, angka na marserak dope, laho pasadahon. Asa olat ni sadari i martuptup ma
nasida laho mamusa Ibana, alai didok nasida ma : unang ma di pesta i, sotung Guntur
natorop i.
03. KOOR : ____________________________________________
04. MARENDE BE. NO. 77:1 “ HAMU SALUHUT HALAK ”
 Hamu saluhut halak, ro ma hamu manatap, hangoluanmu on.
Na gantung di parsilang tumahan hamatean, naeng ingotonmu i tongtong
U : Dung i onom ari nari asa dapot pesta Paska i, sahat ma Jesus tu huta Bethania niinganan
ni si Lassarus, na sinunggul ni Jesus sian na mate. Jadi dipauli nasida ma disi panganon
ujuan di ibana, si Martado manghobasi, si Lassarus ma sada donganNa mangan disi,
gabe dibuat si Maria ma sahati miak Nardus na arga na so marsaor, dimiahi ma pat ni
Jesus, obukna ma dibahen mangalapu. Jadi digokhi uap ni miak I ma bagas i. sada sian
siseanNa, ima si Judas Iskariot na naeng manjehehon ibana mandok
H : Boasa so ginadis miak I arga tolu ratus hupang bahen silehonlehon nian di angka
na pogos?
U : Alai ndada na pogos sinarihonna, umbahen na didok ibana songon i: panangko do ibana
tahe, diusung do asiasi ni halak, ai tu ibana dipasahat puro i. Dungi ninna Jesus ma:
Pasombu ma ibana, ai diparade i hira tu ari hatatanomHu. Ai tongtong adong na pogos di
tongatongamuna, jala asal ma olo hamu, tarpatongon hamu do na denggan tu nasida.
Alai anggo Ahu ndang manontong di hamuna. Intap na tarbahensa do na niulana i.
Namanjoloani do ibana mamiahi pamatangHu songon di na mananom. Situtu do
hatangkon tu hamu: Manang didia diluat ni prtibion dijamitahon muse Barita Nauli on.
Hatahononna do nang na binahenna i gabe baritana.
05. MARENDE BE. NO. 77:4 “HAMU SALUHUT HALAK”
 Au on ro di dosangku Na so tardok rohangku Dibaen godangna i,
I do na pinorsanMu Disi ale Tuhanku Marsipal Ho binaen ni i
U: Dung i torang ni ari na i dibege halak na torop na ro tu pesta i, na naeng ro ma Jesus tu
Jerusalem jadi dibuat nasida ma mare-mare laho manomunomu ibana huhut manjouhon:
Hosianna! Pinasupasu ma na ro, marhitehite goar ni Tuhan i, Raja ni Israel. Dung i dapot
Jesus ma halode sada, ima dihunduli hombar tu na tarsurat: Unang ho mabiar ale boru sion,
ida ma Rajam do na ro marsihundul di anak ni Halode, alai jala halak parise dohot deba na
sian natorop I mandok tu ibana : Orai ma antong siseanMi Guru! Alai ninna ma mangalusi:
Hudok ma di hamu, aut mauhom nasida, manjoujou ma angka batu.
H: Alai dibongoti sibolis i do si Judas na margoar Iskariot, sahalak sian na sampuludua i.
U: Gabe laho ma ibana martutup dohot angka sintua ni malimrapphon angka panungganei,
manang dia dalanna pasahathon Ibana tu nasida. Jadi sian las ni rohanasida marpadan ma
nasida mangalehon hepengtu ibana. Dioloi si Judas ma i, jadi dilului ma tingki na une
pasahathon ibana so sian pamotoan ni natorop i.
06. KOOR : __________________________________________________
07 MARENDE BE. NO. 78 : 3 “O ULU NA SAP MUDAR”
 Au on tama, o Tuhan, manaon na tinaonMi. Dosangku do diporsan Ho na tarsilang i.
Sai tatap ale Tuhan, au na dijoloMon. Huhut sai patuduhon, basaM tu rohangkon.
U : Alai di ari parhobasan parjolo ni Pesta Paska i, di dapothon siseanNa ma Jesus, angka
ninna ma: Tu dia ma patureonnami di Ho panganon Paska i dipangido rohaM? Gabe di dok
ma: Laho ma hamu tu huta i manopot si Anu, dok hamu ma tu ibana: Tona ni Guru i; Na
dapotne ma tingkingKu, di ho ma Ahu sorang, laho mangan Paska i rap dohot siseanKu.Jadi
saut ma di suru Ibana siseanNa dua halak jala didok ma tu nasida: Molo laho hamu tu huta,
pajumpang ma hamu disi dohot sahalak na mangusung aek sahudon, ibana ma ihuthon

2
 hamu! Tu ibana ma dok hamu: Didia do bilut inganan, asa disi hupangan hami Paska i? Jadi
patuduhononna ma tu hamu bilut parginjang sada, na lambas, na tipak hinembangan, disi
ma pature hamu di hita! Jadi Borhat ma SiseanNa, dibongoti ma hutai.
H: Jadi jumpang nasida ma tutu songon na ni dokNa i, gabe dipature ma Paska i.
U: Asa dung bot ari, hehe ma Jesus dohot na sampulu dua i. Jadi di na mangan nasida, hehe
ma Jesus, di tanggal ma ulosna, dibuat ma basahan di tapolhon tu ibana. Diusehon ma aek
tu sambong, dungi diburi ma pat ni angka siseanNa, diapusi ma dohot basahanNa na
tinapolhonNa i. Dungi sahat ma Ibana tu si Simon Petrus, jadi didok ma tu Ibana:
H: Tung Ho ma ale Tuhan mamuri pathu?
U: Dungi ninna Jesus ma mangalusi ibana: Ndang di antusi ho pambahenanKu na tu ho anggo
nuaeng, muse pe botoonmu i. Dungi didok si Petrus ma tu Ibana:
H: Matua tanoon, ndang burionMu pathu.
U: Dungi ninna Jesus ma mangalusi ibana: Molo so burionKu ho, ndang partohap ho di
Ahu.Dungi ninna si Petrus ma: Ale Tuhan, unang holan pathu, dohot ma tangan dohot
ulungku. Gabe didok Jesus ma tu ibana, halak naung maridi i, ndang ingkon be burion; ai
nunga sude ibana ias. Naung ias do anggo hamu, alai ndang luhut hamu. Ai di tanda do
sipasahat Ibana, umbahen na didok: Ndang saluhut hamu ias. Asa ndung diburi Jesus pat
nasida, dipangke ma muse ulosNa, hundul ma Ibana, didok ma tu nasida:
H: Ai diantusi hamu do pambahenanki tu hamu?
U: Digoar hamu du Ahu Guru dohot Tuhan, jadi ture do pandok muna disi, ai ido Ahu tutu. Asa
molo ahu Tuhan jala Guru muna mamuri pat muna, tama ma nang hamu masiburian pat! Ai
sitiruan do Hulehon tu hamu asa dibahen hamu songon naung hubahen i tu hamu. Na tutu
situtu do na Hudok on tu hamu: ndang umbalga anak somang sian indukna, ndang
sumurung suruan sian na marsuru ibana. Molo diboto hamu i, martua ma hamu
mangulahonsa.
08. MARENDE BE. NO. 83 : 4 “NA LAO DO BIRU BIRU I”
 Saleleng na mangolu au, naeng ingotonku Jesus;
Sude na binaenMi di au hataM naeng hupatulus.
Ho naeng haholonganku do, huhut ihuthononku do di dalan hangoluan.
Tung ingkon Ho, nampuna ahu; mangolu manang mate au sai Ho do tioponhu.
U : Jadi di na mangan i nasida , ninna Jesus ma : situtu do na hudok on tu hamu: sada sian
hamu naeng pasahathon Ahu, Dung i marsak situtu ma nasida, gabe di pandok be ma tu
ibana:
H : Nda tung ahu i Tuhan?
U : Alai ninna ma mangalusi : ia i na rap dohot Ahu8 manurdukkon tanganna tu paringkauan,
ido na pasahathon Ahu. Tong do nian ujung ni Anak ni Jolma i songan na tarsurat hian; Alai
marjea do halak na pasahathon Anak ni Jolma i. Tagonan unang ma sanga tubu ibana tu
hasiangan on. Alai adong ma sada sian angka siseanNa i, na hundul jumonok tu Ibana,
haholongan ni Jesus i. I ma di hila psi Petrus, jadi ninna ma mandok ibana: sungkun ma, ise
na nidokNa i. Jadi di pajonok ma tu lambung ni Jesus mandok tu Ibana:
H : Tuhan, Ise i?
U : Gabe dialusi Jesus ma : ia tusi hulehon na santopik na husornophon on, i ma ibana. Jadi
disornophon ma santopik, dilehon ma tu si Judas Iskariot, anak ni si Simon, jadi dung
dibondut i, dibongoti sibolis i ma ibana. Dung i didok Jesus ma tu ibana : humatop ma ula
siulaonmu. Asa dung di jalo si Judas na santopik i, pintor laho do ibana tu balian, alai
borngin ma uju i. Jadi di namangan i nasida, di hindat Jesus ma roti, dipasupasu ma,
diponggoli ma jala diparlehon ma tu angka siseanNa huhut ma didok: jalo hamu ma, pangan
hamu, dagingKu do on. Dungi dihindat ma panginumanna di dok ma mauliate, dilehon ma tu

3
 nasida, huhut ma didok: sude hamu manginum sian i, ai mudarHu do on, mudar parpadanan
i, na niusehon humophop torop jolma bahen hasesaan ni dosa. Alai Hudok ma tu hamu: na
so tupa be inumonKu olat ni on sian parbue ni hau anggur i sahat rodi ari sogot. disi ma
inumonku naimbaru rap dohot hamu di harajaon ni Damang.

09. MARENDE BE NO 153:4 “O JESUS NAUNG SINEAT”

 Pelean na badia DagingMu sipanganon
Di angka na porsea MudarMu sinumon
Sai ro ma maringanan Marhite parpadanan, Di hami on, o Jesus.
U: Jadi dung di endehon nasida ende pujipujian i, ruar ma nasida tu dolok Jetun Disi ma didok
Jesus tu nasida: saluhut do hamu naeng targasip mida Ahu di na saborngin on. Ai na
tarsurat do : Lombutanku ma parmahan i, gabe marserak ma biru biru na sapunguan i. Alai
ninna si Petrus ma mangalusi Ibana:
H: Agia sude nasida targasip mida Ho, anggo ahu, na so tupa targasip.
U: Alai ninna Jesus ma mandok ibana: O, Simon…. Simon, nunga dipangido sibolis naeng
sagaonna hamu songon dahanon. Alai Ahu do manangianglon ho, unang mintop
haporseaon mi. Jadi ndung mulak sogot roham, pargogoi ma roha ni hahaanggim. Alai
ninna si Petrus ma mandok Ibana:
H: Tuhan, na hobas do ahu mandongani Ho tu hurungan, nang tu hamatean pe.
U: Alai ninna Jesus ma: Hu dok ma tu ho, ndang martahuan manuk borgin on, so jolo tolu hali
soadahonon mu naso tinandam Ahu.
10. KOOR : ______________________________________________
11. MARENDE BE NO 180:1-2 “RO TU JESUS HO NA LOJA”
 Ro tu Jesus ho na loja Na maheu i.
Lam lumbang do di lambungNa Rohami.
 Bereng di hau pinarsilang Daon ni sahitmi.
Tuhanmi na hona uhum Singkatmi.
12. JAMITA
13. MARENDE BE NO 82:1… “O JESUSHU TU BUGANGMU” (PAPUNGU PELEAN)
 Jesusku, tu bugangMu, ro marsomba rohangkon.
Sai tarpuji, sai tarpuji, na pamalum tondingkon.
 Tung di patMu, o Jesusku, solsolanku rohangki.
Tangisanku na tinaonMu, ala jat ni rohangki.
 Tu tanganMu ma tondingku, jumpa hamamatengki.
Tu lambungMu, o Tuhanku, alap na tinobusMi.

14. TANGIANG PELEAN, ALE AMANAMI, PASUPASU, AMEN 3X