ACARA PARTANGIANGAN PASSION I

SITAONON NI TUHAN JESUS

Rabu, 13 April 2022
=========================================================

1.   Prelidium: — saat teduh —

2.   Marende No. 76 : 1-2   ”Sada nama sangkap”  BL. 199

      Sada nama sangkap ni rohangku Di sandok portibion,
      Ndang tagamon na so las rohangku. Molo jumpang au ianon:
      Naeng ma sai ingoton ni rohangku Na binaen ni Jesus tu tondingku,
      Uju pinorsanna i Saluhutna dosangki.
   
Ingkon sai Ibana ingotonku, Uju na tarpajal i, (Jongjong)
      Tu hau pinarsilang ginantungkon, Sai mabaor mudarna i.
      Ai humophop au ditaon uasna, Asa dohot au muse upana;
      Ai ditatap do au on. Di pandokna: ”Nunga-sun!”

3.   Votum-Tangiang : (St. P. Siahaan)

 Marhitehite Goar ni Debata Ama, Anak dohot Tondi Porbadia. Amen. Asi ma
rohaM di ahu ale Jahowa, ai targogot do ahu, maras do rohangku dohot dagingku.
Alai anggo ahu, tu Ho do ahu marhaporusan, ale Jahowa, ningku do : Ho do
Debatangku. Marguru tu tanganMu do angka parsorionku, sai palua ma ahu sian
tangan ni angka musungku dohot sian angka na mangalotongi ahu. Ale Jahowa,
sai unang paurak ahu, ai Ho do na hujou, sai palua ma ahu marhitehite
hatigoranmu. Haleluya.  Martangiang ma hita : Ale Tuhan Jesus ! Ho do
Birubiru ni Debata na mamorsan dosa ni hajolmaon tu hau pinarsilang i; sai asi
ma rohaM, ungkap ma mata ni rohanami, asa huboto hami godang ni utang nami,
jala asa lam tangkas di hami asi dohot holong ni rohaM na so hadodoan i;
patuduhon ma di hami godang ni na bernit na tinaonMi humophop hami.  Urupi
hami mamingkiri taringot tu na tinaonMi laho paluahon hami! Amen.

4.   Marende No.76 : 3   ”Sada nama sangkap”            BL. 199
      O Jesusku, sai paingot ahu Di dosangku, dibasam;
      Ai andorang di na holom ahu, Dipalambas Ho roham.
      Nunga leleng dilului Ho do Au na lilu, asa unang mago;

1
       Ditaon Ho na bernit i, Lao manobus tondingki.

5.   Manjaha : (St. M.Siagian)

Naeng pingkiran ni rohanta do sitaonon dohot hamamate ni Tuhanta Jesus Sipalua
hita i. Tung ise ma na tuk mandodo holong ni rohaNa i ? Pahusor-husoron ni
rohanta sitaonon na umborat di Getsemane, na pinaujungNa i di dolok Golgata.
Songon rante na masirain-rainan na masa tu Jesus di porlak Getsemane, dohot na
masa di dolok Golgata. Na masa di porlak Getsemane, i do pangaradeon tu
Golgata. Jala Golgata, i do pangujungi manang panggohi ni Getsemane.
Di Getsemane, pangilangan jetun, parungkilon partondion na mansai borat jala na
sobu tu Jesus, pola mardongan angguk bolon dohot ilu Ibana di parungkilonna i.
Diboan  Ibana do disi pelean pardengganan ni jolma tu Debata; disombahon do i
dibagasan parungkilon na so adong tudosanna. Alai hamonanganna na di
Getsemane i do na binoanna di Golgata.

6. Marende BE. No. 76:4”Sada nama sangkap”            BL. 199

Gok di Ho ma au ale Tuhanku jala Ho ma jambarhi
Dok ma Amen rongkom ma goarMu, tu bagasan rohangki
Lomo ni rohaM ma sungkunonku, di sude na naeng ulahononku
Olo, i ma padanki Tu Ho Jesus Tuhanki
7. Manjaha : (St. PE. Damanik)
Ndang na tarhatahon jolma na masa tu Jesus i, ala so adong na marnida jala ndang
siat be i tu roha ni jolma. Ai di na songgop parungkilon haholomon i, dipaholang
Jesus do Ibana saotik tu jolo, sian sisean haholonganna i. Tuk dangguron do nian
parholangan i. Alai parholangan na so hasuhutan do i, songon laut na so martopi,
songon langit na so marsisi dipandodoon na so tardongdong na masa tu Jesus i.
Molo naeng jonohanta i, tarbege do soara ni Debata na mandok : ” Tanggali ma
sipatum, sian patmu, ai tano na badia do hajongjonganmon”
Antong manonditnondit ma rohanta laho manatap inganan on, asa tabereng
nanggo saotik topina i, ai tung na so marnangon do patta jongjong anggo tung
jonok. Tatatap ma : Parungkilon  ni Jesus Kristus di Getsemane mardongan
haporseaon.
8.   Marende No. 77 : “Hamu saluhut halak” BL. 65
Hamu saluhut halak Ro ma hamu manatap Hangoluanmu on,
Na gantung di parsilang, Tumahan hamatean; Naeng ingotonmu i tongtong.
      Patangkas ma luhutna Sap mudar do dagingna Sai hir hodokna i 
      Buas huhut hosana Hinorhon ni bernitna Modar sude dagingna i
 

2
  Koor INA
9   Manjaha : (St. J. br. Sihombing )
Boasa masuk Jesus tu parungkilon na mansai borat i ? Di jolo ni parungkilon i, i
ma si borgin na parpupudi i, tagan so mate Tuhan Jesus, marulaon na badia do
Ibana rap dohot angka siseanna. Diponggoli do roti bahen parningotan di
dagingna na pinonggolan i, mandok na binunu i. Laos songon i dohot anggur i
diparis tu nasida bahen parningotan di mudarNa na niusehon humophop nasida.
Ndang angka hitir Jesus laho mangalehon, sandok sonang do Ibana di hatiha i.
Diujungna diendehon nasida ma ende pujipujian i na sian Buku Psalm.
Dung i ruar ma nasida sian bagas i laho tuat tu rura Kidron, jala si Judas parjehe i
pe laho ma di haholom i laho mangatur parjeheonna i. Di rura i mabaor batang
aek Kidron, na tinariparan ni Raja Daud na jolo uju na maporus ibana marsak,
maradophon anak na si Absalom na mangalele ibana. I ma nuaeng ditaripari Jesus
di borgin na holom i. Sian i nangkok torus tu ladang Getsemane manaon na
porsuk humophop hita.

10.      Marende No.153 : 2 ”o Jesus Naung Sineat”

Pelean na badia, Na masuk tu Jahowa, Singkat ni manisa, Na so daulat roha.
Di taon Ho dosanami, So i, lao mago hami. Asi roham, O Jesus!.
      Pelean na badia, Jinalo ni Debata, Panaon ni manisia Na pasohothon bada
     Sai sesa dosanami Ho hatigorannami, Asi rohaM o Jesus

11.   Manjaha : (St. HD. Br. Sihaloho)

Dung sahat Jesus dohot angka siseanna i tu porlak Getsemane, tompu ma muba
bohi ni Jesus, binahen ni arsakna dohot bobosna. Jadi di dokkon ma siseanna na
ualu halak tinggal di duru ni porlak i, holan tolu halak do ditogihon tu bagasan, na
tardok tiang partunggul ni angka Apostel i, i ma si Jakobus, si Johannes dohot si
Petrus. I ma naung marnida hasangaponna di dolok, di na muba tingki i rupa ni
Jesus marsinondang bohina songon mata ni ari, jala laos nasida na tolu i do na
umbage hata ni Debata na Sumurung i taringot tu Tuhan Jesus, ruar sian ombun i
mandok : On ma Anak haholongan ni rohangku, halalas ni rohangku do Ibana,
tangihon hamu ma Ibana. ”Asa nunga dapotan gogo nasida uju i, jala gabe
sitindangi ni hasangapon ni Tuhanta i.” Alai anggo sahali on, umbahen na tolu
halak i ditogihon, asa gabe sitindangi nasida, na malo paboahon tu hita arga ni
tobusta na tinaon ni Sipangolu hita sian hamagoan. Anggo tu na ualu halak i
didok do : Hundul  ma hamu dison, saleleng Ahu laho tusa martangiang.
Martangiang ma hamu, asa unang masuk hamu tu pangunjunan.” Ndang tang
manang tau dope nasida tumangihon tangiangNa dohot marsak ni rohaNa

3
sipasahatonna tu Amana, ndang tartaon nasida dope marnida na porsuk, na naeng
taonon ni Tuhanta i.

12. Marende BE 154 SAI PALINGGGAS HO

Sai palinggas ho tondingku, sai tadingkon ma arsakmu.
Ro ma ho tu hatorangan, asa dapot hasonangan.
Ai tarontang ho saonari, tu haroan na badia,
Na manggomgom parluhutan, naeng tu ho do maringanan.

13. Manjaha (St. R. Dabukke)

Muba ma muse bohi ni Tuhanta i, ndang marsinondang, mansai tompu marsak
rohaNa, surbot bohina idaon, songon na bojogiton dohot pamatangna i, sude
angka hitir. Suman tu sada halak na mogap na marsiranggut dohot hamatean di
aek i. Madabu ma tu bagasan rohaNa biar ni roha godang jala na so tardodo
dibahen bagasna. Tung na jorbut situtu do rongom mangkaliangi Ibana,
mangkaliangi jolma parbagasNa. Bobonosan Tuhan i, rongom tu Ibana, songon ni
dok ni Psalm 18:5-6 : Dihaliangi angka jorat ni hamatean ma jala disonggoti
angka liang ni Belial, sai dihaliangi angka laut ni banua toru Ibana, dihungkupi
angka jorgong ni hamatean i Ibana. Gabe targogot situtu ma ala ni i. Tardok sude
hagogoon ni banuatoru ro tu Ibana laho patundukkon. Didok Jesus ma tu siseanna
i : ”Mansai marsak rohangku, hira na mate do, dison ma hamu dungo rap dohot
Ahu.”
Dia do alana umbahen apala songon i jorbutna ? Songon nido ni si Jesaya :
”Hajahaton ni hita sudena dihonahon Jahowa tu Ibana. ” Ido isi ni panginuman i.
Hajahatonku, hajahatonmuna, hajahaton ni sude bangso, hajahaton ni sandok
hajolmaon dohot hajahaton ni sude sundut, na songon pangalantap ni aek
magodang manghuphupi Ibana. I do parniahapan na so dung niae ni manang ise
jolma.
*Koor NHKBP
14. Marende No. 77 : 3    Hamu saluhut halak BL. 65
      Aha do manginona Tu Ho, Silehon tua Dihajolmaon i?
So dung hea mardosa Ho doshon hami jolma. Ndang dung dibaen Ho dosa i.
      Au on ro di dosangku Na so tardok rohangku Dibaen godangna i
       I do na pinorsanMu Disi ale Tuhanku Marsipal  Ho  binaen ni i

15. Manjaha : (St. S. Situngkir)

Isi ni panginuman i dope, i ma huaso ni haholomon na manosak Jesus.
Pangarongom ni angka tondi na hodar dohot pungkul-pungkul ni sibolis, na
mangalombuti tondina, uap hamatean na sian setan i, na mambahen mingguk
4
Ibana dohot songgot-songgot na ro sian banuatoru tu TondiNa. Gok rimas ni
Debata panginuman i, siala dosa ni hajolmaon. Jumpang nuaeng di Ibana tarsurat
di 2 Korint 5:21 : ai on do dipatupa Debata: humophop hita gabe dosa Ibana na
tumanda dosa, asa gabe hatigoran ni Debata hita dibagasan Ibana.” Sude dosanta
diampehon Debata tu Ibana, asa dosanta i gabe dosaNa. Jadi rimas ni Debata na
ingkon mangonai tu hita hian, gabe tu Ibana dihonahon Debata. Ala naung gabe
dosa Ibana, diahap Ibana ma pangkilalaan na di tadingkon Debata Ibana.
Anggo na sailaon, manang di tingki sadiahari pe, boi do didok Ibana : Ndang
holan Ahu, Ama i do dilambungku.” Alai anggo nuaeng ndang be tardoksa
songon i. Masuk ma Ibana nuaeng tu sada tingki, ingkon jouhononna ma na so
dung jinouhonna : Ale Debatangku, Debatangku, boasa tung tadingkononMu Ahu
? I ma na sun hinaporsuk di Jesus, ai so hira tartaonsa, hira songon na di api
naroko nama Ibana.
O, tung na so hadodoan hita do borat ni parungkilon i, ai tung na so adong di
jolma na di tano on, nang halak naung sahat tu banua ginjang na mamolus songon
parungkilonNa i. Mangkilala borat ni sitaonon i ma Ibana manungkap tu tano
martangiang tu Amana mandok : Ale Amang, namun na tarbahen, salpuhon ma
siinumon on sian ahu! Alai tahe unang marguru tu rohangKu. RohaM do !”
* Koor AMA
15. Marende  No. 80:2   Mauas Jesus   BL. 39
Holong ni rohaM, o Tuhan Jesus! Ise ma na tuk mandodo i?
ParungkilonMi do na manobus au na mago ala dosa i.
      Aha Jesus hinauashonMu Uju songon i marsipal Ho ?
      O, huboto na hinophopanMu  Au ro di saluhut jolma do

16.   Manjaha : (St. MB. Gultom)

Alai atik pe sai manungkap tu tano Ibana, hira na margiling di orbuk, atik pe
dielehelek Ibana Amana na dibanuaginjang, mardongan angguk bolon, dohot ilu-
ilu, ndang dapotan alus Ibana sian Debata, ndang dapotan apul-apul Ibana sian
Amana uju i, ingkon manaon haporsuhon songon halak na sirang sian Debata jala
na pinasahat tu angka huaso na dibanuatoru i, ingkon dihilala Ibana songon
pangkilalaan ni halak na di api naroko, ndang dapotan alus Anak ni Debata sian
banua ginjang.
O, ale Jesus! Ndang dapotan alus Ho sian AmangMu, asa ahu dapotan alus sian
Ibana tongtong. Hudok mauliate di Ho sian nasa rohangku.
Dung so adong alus sian banua ginjang na tau mangapuli rohaNa na magopu i,
hehe ma Ibana sian tano i, laho ma Ibana tu alealeNa, hira songon na mangalap
apul-apul sian nasida na tolu i, hape modom do nasida didapot. Asa ndang

5
jumpangsa nanggo sada hata na tau mangapuli rohana, asa saut na nidok ni Hata
ni Debata : Hupaima do angka apul-apul, hape ndang jumpang Ahu!”
17.   Marende No. 83 : 1     Na lao do birubiru i              BL. 214.
Na lao do birubiru i, mamorsan angka dosa
Ni nasa hajolmaon i di benget ni rohana.
Diporsan do sahitta i, dilehon do dirina i
Tu tangan ni pamunu. Ditaoni do na bernit i,
Ro di na tos hosanna i didok naeng porsanonku.
18.  Manjaha : (St. M. Manurung)
Dungi laho ma Ibana muse tu angka anak siseanNa: jadi modom muse ma nasida
didapot, ai mansai dokdok do matanasida. Jadi dung disungguli Ibana nasida,
ndang diboto nasida be na nialushon nasida tu Ibana sian panoro ni matanasida.
Dungi ditadingkon ma nasida, diulakkon martangiang patolu halion mandok :
“Ale Amang! Molo so tarbahen salpu on, nda ingkon huinum, sai saut ma lomo ni
rohaM! Alai dung sangon I patoluhalihon, jala manungkap anakNa I diida, ndang
tarjuasa be so tiroanNa pangidoan ni Anakna I, 6roma suru-suruan ni Debata sian
banuaginjang margogoihon  Ibana. Marhitehite haroro ni suru-suruan i dapotan
apul-apul Tuhanta i. Diboto Amana i do na masa tu Ibana. Alai tutu ndang na
pasalpuhon panginuman i suru-suruan i, alai diboan gogo tu jolma parbagasanna.
Dohot hahorasan ni saudarana laho mandapothon parporangan i. Sian
parporangan i tarsurat di hata ni Debata : Di na marsiranggut Ibana dohot
hamatean, lam manggogo ma Ibana martangiang, jadi songon mudar na himpal do
hodokNa madabu tu tano. Pinggkiri ma jorbut ni parporangan na songon i.
Gorgahon ma tu roham nuaeng! Olo, patut nian bobonosan rohanta, ai tarida disi
na mangkilalahon bura dohot toru-toru Ibana, ala dosa ni hajolmaon. Martua ma
hita dijolo ni Biru-biru ni Debata na marhodok mudar i: marnida godang ni
holong ni roha ni Debata  diportibi on, pola do Anakna Sasada I dilehon tu
hamatean na jorbut I, asa unang mago ganup na porsea di Ibana, asa hangoluan na
salelenglelengna di Ibana.
19. Marende BE 699 SINGKOP DO ASI NI ROHAM
Singkop do asi ni rohaM, tu au na dangol on,
Na lilu ahu na hinan, nuaeng jumpang do.

Hutiop bagabagaMi, di pardalananki,

Ho Tuhan lombulombungki, di paraloan i.

20. Jamita

6
 21. Buku Ende No. 622 Mansai Nalnal Di Angka Partingkian (P. Pelean)
Mansai nalnal di angka partingkian Sinondang ni silangMu Tuhanki
Sian hatiuron na marsinondang. HolongNa na so halampoan i
Sudena bangso do marpanghirimon. Tu sondang ni asi ni roha i
Songon parluga na manghalungunhon. Parbinsar ni mataniari i

SilangMu Kristus tanda ni holongMu.Pahisar tondi na magopu i

Mangalononghon sasude dosangku.Mabaor tu laut asi ni rohaMi
Naung tubu hami gabe na imbaru. Na niurasan sian dosa i
Ala mudarMu na niusehonMu. Di Golgota di hamamateMi
22. Tangiang Pelean – Tangiang Ale Amanami – Pasupasu.

ACARA PARTANGIANGAN PASSION II

SITAONON NI TUHAN JESUS
Kamis, 14 April 2022

1.   Prelidium – Saat Teduh

2.   Marende No. 86 : 1      Silang na badia i        BL. 67

      Silang na badia i, Ho do lombu-lombungki
      Maralohon dosa i dohot pandelean i.
      Disude sitaonon i, Ho ma lombu-lombungki.
      
Ro do au nuaeng tu ho, sai palambas ma rohaM.
      Nunga pola mate Ho, ala asi ni rohaM
      Jangkon au na dangol on, sai ulosi tondingkon.  

3.   Votum-Introitus-Tangiang : (St. L. Sinaga)

Marhitehite Goar ni Debata Ama, Anak dohot Tondi Porbadia. Amen.  Asi ma
roham di ahu ale Jahowa, ai targogot do au, maras do rohangku dohot dagingku.
Alai anggo ahu, tu Ho do au marhaporusan, ale Jahowa ningku do: Ho do
Debatangku! Marguru tu tanganMu do angka na mangalotongi ahu. Ale Jahowa,
sai unang paurak ahu, ai Ho do na hujou, sai palua ma ahu marhitehite
hatigoranMu. Haleluya.

7
Martangiang ma hita : Ale Tuhan Debata, Amanami na saluhut parasirohaon!
Nunga ditatap Ho hami bangsomon, ai ndang manjua Ho mangalehon AnakMu na
sasada i Tuhan Jesus Kristus tu tangan ni pardosa, as taononNa haleaon dohot siak
ni bagi, sahat ro di hau pinorsilang. Sai tumpahi hami marhitehite asi ni rohaM,
asa margogo hami jala marbenget ni roha, songon anak haholongan ni rohaMi di
angka sitanonon, asa marsangap goarMu dohot AnakMu Tuhan Jesus Kristus
dohot Tondi Parbadia marhitehite hami. Amin.

4.   Marende No. 83 : 2     Na lao do birubiru i              BL. 214.

Ianggo birubirui, ima alealengku,
na paluahon tondingki, disuru Debatangku.
Didok mandok Anaknai; sai topotma pardosai,
Naung sun tinoruanku. Balga tutu do rimashi,
Alai tarbaen do mombun i horhonon ni mudarmu.

5. Manjaha : (St. HLE. Pangaribuan)

Songon na giniling Jesus di Getsemane, gabe ruar hodokna marsaor mudar himpal
bahen hangoluanta. Marjea ma hita molo so olo hita mananda hina jorbut ni
hamagoan ni nialap ni dosanta, jala molo so olo hita paubahon rohanta dijolo ni
Anak ni Debata na mamelehon hodokna, mudarna, ilu-iluna na mardongan
angguk bolon, paluahon hita sian hamagoan sisongon i. Molo so dipardulihon
rohanta na masa dison ndang dapot hita be haluaon ro di salelenglelengna; holan
on na ma sipaimaonta : Anggukangguk dohot na patungoripon di laut barerang na
di api naroko i.

6. Marende No. 79 : 4   Di na ponjot rohangku   BL. 124

Antong, sai pujionku do Ho, o Jesuski.
Marningot na tinaonMu di hamamteMi,
Marningot angguhanggukMi, ro di sude na bernit tinaonMi disi.
      Laos i ma  pajujuhon Rohangku sai tongtong Manggotap hajahaton
      Sian rohangkinon Unang huhalupahon be HalojaonMu
      Tuhan Nang tung satongkin pe.

7.  Manjaha : (St. T. Napitupulu)

Diboto Jesus do na naeng tangkupon ni parjahat i Ibana. Nunga ro si Judas
parjehe rap dohot angka soldadu, dohot angka naposo ni sintua ni malim mantat
sulu-sulu dohot ragam ni sinjata. Ruar ma Jesus rap dohot angka siseanna
mandapothon rombongan ni si Judas i, didok ma tu nasida : ”Ise do na
jinalahanmuna? Gabe ninna nasida ma mangalusi Ibana : Jesus halak Nasaret i do!
8
Dung i ninna Jesus ma mangalusi nasida : ”Ahu do I !” Disi didok Jesus Ahu do I,
mamintor sumurut ma nasida angka martinggangan tu tano. Songon sinoro na
porhas do nasida, rabat-rabat jala martinggangan. Mardabuan do nasida nionjar ni
pangulus ni hosa ni Debata; dihilala nasida do habadiaon ni Tuhan Jesus dohot
iasna dohot hasogiron ni hasangaponna. Tung sura dipasombu Tuhan Jesus nasida
peak, boi do Jesus dohot angka siseanna laho so dapot tangkupon ni manang ise.
Alai ndang songon i, dipahehe Jesus do nasida.

 KOOR INA

8. Manjaha (St. JW. Manik)

Dung tarjolma saluhut soldadu na naeng manangkup Jesus i, memong ma
parnidaan nasida mangalului di tonga-tonga ni angka siseanna. Songon na mabiar
nasida manjama Jesus. Songon na mabuk do nasida so umboto marpingkir be.
Alai didok Jesus ma muse: ”Ise do naniluluan muna?” Jadi didok nasida ma:
”Jesus halak Nasaret i do!” Dung i ninna Jesus ma mangalusi nasida: ”Nunga
hupaboa tu hamu, Ahu do I. Asa molo Ahu na ni luluan muna, loas ma laho angka
on!” Jadi didok ma tu angka siseanNa i : ”Laho ma hamu saonari, ndang dope tuk
gogomuna laho mangihuthon Ahu! Alai umbahen didok Ibana songon i, asa
jumpang ma nidok na hian : Ndang adong na mago sian angka na nilehonMi tu
Ahu!

9.   Marende No. 83 : 4    Na lao do birubiru i               BL. 214.

Saleleng na mangolu au naeng ingotonku, Jesus ;
sude na binahenmi di au, Hatam naeng hupatulus.
Ho naeng haholonganku do, huhut ihuthononku
Ho di dalan hangoluan tung ingkon Ho nampuna au;
Mangolu manang mate au, sai Ho do tiopanku.
10.   Manjaha : (St. D. Sinaga)
Jongjong do Jesus  diparaloan i, ndang marsinjata, jala hira na so mardongan
ditonga-tonga ni punguan na jahat marroha, na marsinjata, na maniop pasak-
pasak, jala na mauas di mudar. Alai atik pe songon i, ndang tarjua nasida
pandokkon ni Biru-biru ni Debata na lambok jala na serep marroha i, ndang
barani nasida mangalo hatana: diloas nasida  do laho angka siseanna: gabe hata ni
Tuhan i mangkaliangi nasida  songon parik api, nang pe dipamuruk si Petrus roha
nasida muse, i ma na tinampulna i pinggol ni si Malkus naposo ni Sintua ni malim
i.

9
Ndang manigor barani nasida manangkup Tuhan Jesus, dipaima nasida dope
partinandaan na nilehon ni si Judas i tu nasida : Manang ise na huumma, i ma
Ibana, tangkup hamu ma i, ramot ma hamu mamboan Ibana.
 ”Jadi dung sahat si Judas di jolo ni Tuhan Jesus, pintor dihaol ma Jesus jala
diumma, didok : Tabe ma di Ho Guru!” Alai ninna Jesus ma mandok ibana :
”Marhua ho tuson, anggia ? O Judas! Pangummaon do hape dibahen ho
pasahathon Anak ni Jolma i? ”Dung i ro ma nasida dilaluhon ma tangan nasida tu
Jesus laho manangkup Ibana. Marnida i dibuat si Petrus ma podangna,
ditampulhon ma tu naposo ni sintua ni malim sahalak, dipisikkon ma pinggolna.
Alai didok Jesus ma tu ibana : Nunga sae be i. Pasarung ma podangmi. Ai na so
tarbahen Ahu huroha di roham mangido sian Damang asa dipadiri di Ahu saonari
lobi sian 12 loksa suru-suruan ? Alai songon dia ma saut hata ni surat i na mandok
: Ingkon masa do songon i ? Jadi dipangido Jesus ma asa dipalua jolo tanganna na
hona rante i, naeng pangkeonna tanganna na lambok i pamalum sumuang pinggol
si Malkus i.
 Dung dipalua, dijomput Jesus ma pinggol na pisik i sian tano, dilohothon ma
sumuang gabe malum pinggol ni naposo ni sintua malim i. Marhitehite i, malua
ma si Petrus sian pamaloson ni soldadu i.
 KOOR NHKBP
11.Marende No. 84 : 1    Aut na Ginorga tu Rohangku          BL. 195.
Aut na ginorga tu rohangku bohim di na lao mate Ho !
Aut na huingot, O Tuhanku, tongtong pangkophopmi  di au !
Ai Ho do paluahon ahu, dosangku do pinorsanmi ;
Di daoni Ho parsahitonku ; Martua au binahen ni i !

12.   Manjaha : (St. L. Br. Silalahi)

Dung dipamalum Jesus Pinggol ni si Malkus i, ditangkup ma Jesus jala diihoti.
Alai diapoi Tuhan Jesus dope nasida sahali nari, ninna ma mandok tu angka sintua
ni malim dohot tu angka sintua ni bagas joro dohot tu angka situan  natoropi,
angka naung rongom dompak Ibana : ”Songon na dompak panamun do hamu
mandapothon Ahu, marpodang jala marlombut-lombut manangkup  Ahu, ganup
ari do Ahu nian hundul mangajari di bagas joro, alai ndang ditangkup hamu Ahu,
jala ndang olo hamu palaluhon tanganmu tu Ahu: alai on ma tutu tingkimuna
dohot hasangapon ni haholomon jala asa jumpang na nidok ni angka surat ni
panurirang i. ”Alai ndang be siat hata i tu roha nasida, ai angka na manggadis
dirina tu sibolis i do nasida. Dung i ditadingkon saluhut sisean i ma Ibana laho
maporus. Saut ma antong na nidok ni Tuhan Jesus, uju na nidokna i : Targasip do

10
hamu muse mida Ahu. Songon na tarsurat i; Lombutanna ma Parmahan i, dung i
marserak ma angka biru-biru i.

13. Marende No. 88 : 4     Di surgo do alealenta     BL.106.

Bagas huhirhon tu rohangku Panghophopmi humohop au ;
Tu sima togu pingkiranku, Guru di Ho sambing ma ahu.
Hupuji nasa asi mi, Alai gumodang holongmi.

 14. Manjaha : (St.R. Siregar)

Ditogihon nasida ma Jesus na tarihot i  tu si Hannas simatua ni malim Kayapas.
Hona pastap ni opas do Jesus di jolo ni malim i, soada hasalaan ni Jesus di alusna.
Sian i, disuru si Hannas ma muse mamboan Jesus tu jolo ni si Kayapas. Dung so
adong 11t u11ng malim i hasalaan ni Tuhan Jesus, dipajongjong ma dua
sitindangi gapgap na tuk mambahen Ibana marutang hosa. Saut ma marutang hosa
Jesus. Ditijuri nasida ma bohi ni Tuhan Jesus, na deba manompuk, na deba
mangalinsingi huhut mandok : Surirangi hami, Kristus, ise do na mamunu Ho ?
Disi ma si Petrus mamorso na so ditanda Jesus, pola dipambuburahon na so
dongan ni Jesus ibana.
Si Judas pe, dung diboto ingkon uhum hamatean ma tu Jesus, gabe maningkot ma
ibana. Sian jolo ni si Kayapas ditogu ma Jesus na tarrante 11t u panguhum Latus.
Tung na marsipal do Tuhanta i dijolo ni panguhum Latus. Tagonan do si Barnabas
parjahat i dipillit  paluaon ni si Latus, asa tu pamajalan anggo Tuhan Jesus.
Putusan ni panguhum i: Ingkon pajalon ma Tuhan Jesus 11t u hau na pinarsilang.
Hamu ale angka dongan! Marnida sude na tinaon ni Tuhanta i, tama tapaserep
rohanta martangiang : ”Mauliate ma tu Ho, ale Tuhan Jesus, ala ni holong ni
rohaM na so hadodoan i, na mandasdas Ho tu hagogotan, tu haporsuhon dohot
hamatean humophop ahu. Ditaon Ho do sude rimas ni roha, na patut mangonai tu
ahu. Tu Ho ma tama hupasahat diringku, hosangku dohot saluhut tahe na di ahu.
Ai ho di Biru-biru ni Debata na sineat ala ni ahu. Sai unang ma adong manang ise
na tarbahen manirang ahu sian Ho. Sai Ho ma tongtong Siparmahan ahu, na
mangiringiring ahu sian hangoluan na porsuk on tu hangoluan na sun denggan na
dilambungMi. Disi ma naeng pujionku Ho rap dohot angka suru-suruanMi, jala
rap dohot angka na mangkaholongi jala manghaposi Ho rodi salelenglelengna.
Amen.
* KOOR AMA
15. Marende No. 412 : 1 – 2     Ndi di Dolok Adui”     BL.387  
Ndi, di Dolok adui, silang ni Tuhan i, sap mudar, sap tijur do i.
Jesus mate disi, asa malum dibaen sude angka gondok roha i,
Dibaen i, tung holong rohangki mida silang di Golgata i.
11
 Hupasolhot diringki tu si, dompak surgo pardalananki
      
Dileai jolma i silang ni Tuhan i. Hape haluaon do i.
      Nang godang dosangki, alai sesa do i, dibaen mudar na durus disi
Dibaen i, tung holong rohangki mida silang di Golgata i.
Hupasolhot diringki tu si, dompak surgo pardalananki

16. Marjamita :

17. Marende No. 76 Sada na ma Sangkap” (P. Pelean)

      Sada nama sangkap ni rohangku di sandok portibi on.
      Ndang tagamon na so las rohangku, molo jumpang au inon.
      Naeng ma sai ingoton ni rohangku, na binaen ni Jesus tu tondingku.
      Uju pinorsanNa i, saluhutna dosangki.
      
Ingkon sai Ibana ingotonku, uju na tarpajal i.
      Tu hau pinarsilang ginantungkon, sai mabaor mudarNa i.
      Ai humophop au ditaon uasNa, asa dohot au muse upaNa.
      Ai ditatap do au on, di pandokNa: “Nunga sun !”
   
18.  Tangiang Pelean – Tangiang Ale Amanami – Pasupasu.

12