I.

PARHOBASON & PROSESI:

01. Pukul 08:00;
Tinagam haroro ni Ompui Ephorus HKBP dohot rombongan, Praeses,
Pandita Resort, Partohonan na gok tingki dohot Undangan.
02. Pukul 08:50;
 Prosesi Barisan Ephorus HKBP;
 Pengalungan Bunga/ Pemberian Bunga Pangku; Pengguntingan Pita
 Mamongoti Bagas Gareja dengan diiringi Vocal Solo oleh Ganang
03. Pukul 09:00 - Selesai:
Ibadah Minggu; Mameakhon Batu Ojahan; Mangompoi; dan Perayaan

II. IBADAH MINGGU, MAMEAKHON BATU OJAHAN, DAN MANGOMPOI:

01. TANGIANG NA HOHOM: Melodi BE 858

02. MARENDE: BE 581:1-3 SANGAP DI JAHOWA
 Sangap di Jahowa na sun timbul i;
Balga ni holong-Na ndang tarasam i;
Dilehon Anak-Na na sasada i;
Manobus hita jolma pardosa i.
Puji ma Debata ale manisia;
Las roham, las roham, somba ma Debata;
Dapothon Jahowa na sun timbul i,
Marhite Anak-Na TUHAN Jesus i.
 Tung so hasuhatan do basa-Na i;
Marhite Anak-Na ni lehon-Na i;
MudarNa durus do di hau silang i;
Rara pe dosanta ias dibaen I.
.... Jongjong di ayat 3....
 Balga situtu pambaen-Mi Debata;
Tung so hasuhatan holong ni rohaM;
Tu jolma pardosa asi do rohaM;
Diungkap Ho dalan lao tu banuaM.
03. VOTUM – INTRO - TANGIANG: A.XV.A6-D.XIII.51
U : Marhitehite Goar ni Debata Ama dohot Goar ni Anak-Na, TUHAN
Jesus Kristus dohot Goar ni Tondi Parbadia, na tumompa langit
dohot tano on. Amen.
Nunga dipabotohon Ibana tu ho, ale jolma, manang aha na
denggan jala manang aha na niluluan ni Jahowa sian ho, i ma na
mangulahon uhum sambing dohot holong ni roha di habasaon, jala
marpangalaho haserepon maradophon Debatam. Haleluya!

~1~
 R : Haleluya... Haleluya... Haleluya
U : Martangiang ma hita:
Ale TUHAN Debata! Asi ma rohaM di hami, ai ndang tarbahen
hami mambahen manang aha, molo so Ho dongannami. Dibahen i
sai lehon ma di hami roha banua ginjang, asa tau hami
manimbangi dohot. mangulahon lomo ni rohaM. Sai dongani ma
hami, asa mian hami di bagasan Ho dohot di bagasan HataM,
marhitehite AnakMu, Tuhan Jesus Kristus, Tuhannami. Amen.

04. MARENDE: BE 6:1+4 PUJI JAHOWA NA SANGAP

 Puji Jahowa na sangap huhut marmulia;
Hamu sude na parroha na ringgas na ria;
Marpungu be, marolopolop sude, hamu sude manisia.
 Puji Jahowa Situmpak sude ulaonmu;
Ai ditumpakhon tu ho tongtong hangoluanmu;
Ingot ma i, denggan basaNa do i, tomutomu-Na sambing do.

05. PATIK NI DEBATA: (U=Uluan; R=Ruas; S=Sude)

U : Tangihon Hamu ma Patik ni Debata: Mateus 22: 37-39
Jadi didok Jesus ma: Sihaholonganmu do TUHAN Debatam sian
nasa ateatem, sian nasa hosam dohot sian nasa roham! I do patik
raja jala parjolo.
U : Antong rap mangido gogo ma hita tu adopan ni Debata laho
mangulahon na hombar tu patik-Na i.
S : Ale Tuhan Debata ! Sai pargogoi ma hami mangulahon na hombar
tu Patik-Mi. Amen.

06. MARENDE: BE 858:1-3 JESUS KRISTUS

 Jesus Kristus sondangi rohangku;
Unang na holom mangarajai au;
Jesus Kristus sondangi rohangku;
Holong-Mi manggohi rohangkon.
 Jesus Kristus sondangi rohangku;
Unang na holom mangarajai au;
Jesus Kristus, sondangi rohangku;
Sai TondiM ma manggomgomi au.
.... Jongjong di ayat 3 ....
 Jesus Kristus sondangi rohangku;
Unang na holom mangarajai au;
Jesus Kristus sondangi rohangku;
Sai dame-M mangaramoti au.

~2~
07. MANOPOTI DOSA & HASESAAN:
Tatopoti ma dosanta ! (Tangiang na hohom diiringi musik BE 858)
Ale Debatanami, na marasiroha jala na badia, Amanami, marhitehite
TUHAN Jesus Kristus ! Manang piga hali hami ro tu joloM, huhilala hami,
ringkot do asi ni rohaM di saluhut hami halak pardosa. Ala ni i do
umbahen na hupaserep hami dirinami sadari on di joloM, jala
huparhatopot hami, tung na jotjot do hami manimbil sian angka dalanMu
na badia songon birubiru na lilu. Sai unang pabali hami sian joloM ala ni
dosanami i, ai ndang dihalomohon roha-M hamatean ni angka pardosa,
alai hamubaon ni rohana do lomo ni roha-M, asa mangolu. Sesa ma
saluhut hageduhonnami dohot pangalaosionnami marhitehite
Pangulunami na sasada i, Anak-Mu TUHAN Jesus Kristus. Sai pahot ma
asi ni roha-M di hami marhitehite panindangion dohot hagogoon ni
Tondi Parbadia asa tarapul situtu rohanami manjou Ho, asa pantun, tigor
jala daulat hami marpangalaho, bahen hasangapon di Goar-Mu na badia i.
Amen.

Bagabaga ni Debata taringot tu hasesaan ni dosanta

Parasi roha jala pardengganbasa do Jahowa, lambat tarrimas jala
Parasiroha godang. Ndang dibahen tu hita hombar tu angka dosanta, jala
ndang dibaloshon tu hita hombar tu angka hajahatonta. Songon asi ni
roha ni amaama mida angka anakna, asi ni roha ni Jahowa di angka na
manghabiari Ibana. (Psalm 103, 8,10,13). Hasangapon ma di Debata na di
ginjang ! (Amen)
08. MARENDE: BE 438:1-2 BETA SAI TAENDEHON MA
1
Beta, sai taendehon ma TUHAN-ta Jesus i.
Hosa-Na diusehon do manghophop jolma i.
Mudar ni Tuhan i do hangoluanki.
Tung dame jala las do rohangki.
Reff: Tung mudar ni TUHAN-hu do mamuri rohangki,
Marolopolop tondingki marningot asi-Mi,
O hatuaon i, na so boi salpu i!
Humophop au do mate Tuhanhi.
2
Goar na asing ndang adong na doshon goar ni;
Tuhanhu Jesus Kristus, dipamalum rohangki;
O ho na marsak i, sai ro tu Tuhanmi.
Nang ho boi malum dibaen Jesus i.

~3~
09. EPISTEL: Psalmen 25:1-9
(U=Uluan; R=Ruas; S=Sude)
U : Ho do, ale Jahowa, dihalungunhon rohangku.
R : Ale Debatangku, marhaposan tu Ho do ahu, unang tung paila ahu,
asa unang marsuraksurak angka musungku mida ahu.
U : Ndang tahe tagamon tarurak sude angka na mangkaposi Ho,
sai maila do sogot angka pangose soada alana.
R : Ale Jahowa, sai pabotohon ma tu ahu angka dalanmu, jala ajarhon
tu ahu angka bogasmu.
U : Sai togutogu ma ahu tubagasan hasintonganmu, jala ajari ahu,
ai Ho do Debata ni hatuaonku, Ho do na huhaposi ganup ari.
R : Sai ingot ma, ale Jahowa, angka denggan ni basam dohot asi ni roham,
ai sian na robi do angka i.
U : Sai unang paingotingot angka dosa ni haposoonku dohot
pangalaosingku, sai ingot ma ahu, ale Jahowa,
hombar tu asi ni roham, ala ni denggan ni basam.
R : Pardengganbasa jala na bonar do Jahowa, ala ni dipodahon do
dalan na tigor i tu angka pardosa.
S : Diparnonohon do uhum tu angka na dangol jala diajarhon dalanna
tu angka na tarjepol.
U : I do sahatna, martua do na tumangihon Hata ni Debata
jala na umpeopsa. Amen.

10. MARENDE: BE 775:1 (2×) UNANG HOLSOAN

1
Unang holsoan unang tahutan. Di Debatanta so ada na hurang.
Unang holsoan, unang mabiar, haposi Debata. (2X)
.... Jongjong di ayat 2....
11. MANGHATINDANGHON HATA HAPORSEAON
U: Tahatindanghon ma haporseaonta i, songon na hinatindangkon ni
donganta sahaporseaon di sandok portibi on. Rap ma hita mandok:
R: Ahu porsea.................................. (Hundul)

12. KOOR: GABUNGAN PAROMPUAN DISTRIK REGIONAL 2

13. TINGTING: (Warta Jemaat)
14. MANJAHA SEJARAH RINGKAS HKBP YOGYAKARTA
15. KATA SAMBUTAN: Oleh Panitia

16. VOCAL SOLO/KOOR HKBP YOGYAKARTA

~4~
17. AYAT PELEAN: Psalmen 50:14
Pelehon ma tu Debata hamauliateon, jala garari ma angka bagabagami tu na
tumimbul.

18. MARENDE: BE 716:1--- (Pelean Ia & Ib)

DI NA MAMOLUS SANDOK NGOLU ON
1
Di na mamolus sandok ngolu on, gok do na marsak gale.
Boan sinondang tu na holom i, asa margogo muse.
Reff: Bahen ma ahu parhiteanMu pasupasuM mabaor ma i.
Ale TUHAN-hu patupa ma au baen pasupasu tu dongan sude.
2
Sai baritahon Jesus na burju, tuk manesa dosa i.
Asa porsea di Jesus tutu, denggan pambaenmu disi.
................MUSIK...............
3
Ula na denggan tu halak sude, songon binaenNa tu ho.
Ingot, urupi luhut na gale, gabe parholong ma ho.

19. JAMITA: Mateus 21:23-32

20. MARENDE: BE 789:1--- (Pelean II/Perayaan)

LULUI HAMU HARAJAON NI DEBATA
1
Lului hamu harajaon ni Debata, rap dohot hatigoran-Na.
Tambahonon-Na ma ondeng tu hamu, Haleluya, Haleluya.
Reff.: Haleluya, Haleluya, Haleluya, Haleluya, Haleluya.
2
Pangido ma sai na lehonon-Na do, lului ma sai na jumpang.
Tuktuhi ma sai na ungkapon-Na do, Haleluya, Haleluya.
................MUSIK...............
3
Ndada holan sipanganon na ringkot baen hangoluan ni jolma.
Tung nasa hata ni Debatanta do, Haleluya, Haleluya.
4
Dua manang tolu halak pe hamu pungu marhite goar-Na.
Tuhanta Jesus di tongatongamu, Haleluya, Haleluya.
~5~
21. MAMEAKHON BATU OJAHAN.
a. PATUJOLO: (EPHORUS HKBP)
Huria ni Tuhanta, nuaeng sahat ma hita tu acara na Mameakhon Batu
Ojahan ni Huria Kristen Batak Protestan YOGYAKARTA Resort
YOGYAKARTA on, Marende ma hita.
b. MARENDE BE 102: 5 O TONDI PARBADIA I, BONGOTI BL 206
Ho, Batu Mamak na togu, na tau Ojahan situtu, paojak rohanami.
Tu Hata hasintongan i, tung unang olo lilu be, nang sada sian hami.
Lehon roha, na tumogu, na umburju, manggoari;
Jesus Kristus Tuhannami.

c. TANGIANG - AGENDA : (EPHORUS HKBP)

Ari on do na jinadihon ni Jahowa, marolopolop jala marlas ni
roha ma hita disi. Amen.
Liturgi I: (EPHORUS HKBP)
Agenda : Dung i tarsunggul ma si Jakob sian na modom i, jadi didok ma:
inganan ni Jahowa do on hape, so pamotoanku. Jadi mabiar ma
ibana, ninna ma: na songkal situtu do inganan on, ndang
tarbahen so on bagas ni Debata, jala baba pintu ni langit.
Dung i hehe ma si Jakob sogot manogotna i dibuat ma batu
pinarhalanguluna i, jala dipajongjong bahen partinandaan, jala
diusehon miak tu ginjangna. Dung i dibahen ma goar ni inganan
i Betel (bagas ni Debata). Lus do goar ni huta i ianggo nasailaon.
Dung i marbagabaga ma si Jakob ninna do: molo didongani jala
diramoti Debata ahu di dalan na hudalani on, jala dilehon di ahu
sagusagu sipanganon dohot ulos siparuloshononhon, jala
marsonangsonang ahu mulak ditogihon tu bagas ni damang, sai
Jahowa ma Debatangku. Jala batu na hupajongjong on bahen
partinandaan, i ma gabe bagas ni Debata, jala sude na
nilehonMu tu ahu parsampuluonhu ma i tu Ho (1 Musa 28: 16-
22)
Tangiang : Ale Amanami jala Debatanami na maringanan di banua ginjang.
Nang pe so hahaliangan langit ni langitan dohot tano on Ho, alai
tong diparsinta rohaM joroM di tano on, inganan panjouon di
GoarMu na badia i. Ditangihon Ho do parhurajaon ni naposoM
raja Daud uju i, i ma na boi pajongjongon ni anakna raja Salomo
bagas JoroM i. Songon panangihonMu di parhurajaon ni
naposoM raja Daud i, laos songon i ma tangihon elekeleknami
on: sai patulus ma jongjong joroM di inganan on. Hupangido

~6~
 hami i di bagasan Goar ni AnakMu Tuhan Jesus Kristus
Tuhannami. Amen.
Liturgi II : Praeses HKBP Distrik XVIII Jabartengdiy.
Agenda : Dibahen i songon on do Hata ni Tuhan Jahowa: Ida ma, Ahu
paojakhon di son sada batu, batu na niuji, sada batu parsuhi na
arga bahen ojahan na hot; manang ise na porsea di Ibana,
ndang tagamon maporus (Jes. 28, 16).
Tangiang : Ale Tuhannami Tuhan Jesus Kristus, Anak ni Ama na mangolu
jala Pargogo na so hatudosan i. Ho do Sillam ni hasangapon ni
Ama i dohot Suman ni hadirionNa; Ho do batu parsuhi na
marpili jala na arga dohot ojahan na hot. Na mangido ma hami
tu Ho: pahot ma batu parsuhi na naeng peakhononnami di
bagasan GoarMu na badia i. Songon Ho mula dohot Ujung ni
nasa na adong, laos Ho ma na mamulai, patorushon dohot na
paujunghon ulaon on, na hupungka hami tau hasangapon dohot
hamuliaon ni GoarMu na badia i. Hupasahat hami
pangidoannami on tu Ho ale Tuhannami, ai Ho do Tuhan na
mangolu jala na sintong, na mangarajai rap dohot Ama dohot
Tondi Parbadia, ro di saleleng ni lelengna. Amen.
Liturgi III: Kepala Biro Jemaat HKBP.
Agenda : Asa ndada be angka paisolat manang panginsua hamu; angka
dongan saharajaon raphon angka na badia do, jala dongan
sabagas ni Debata. Ai dipauliuli do hamu di atas ojahan ni
angka Apostel dohot Panurirang; Jesus Kristus sandiri do batu
parsuhi disi. Di bagasan Ibana do martomu sandok bagas i jala
lam ganda, gabe joro na badia di bagasan Tuhan i. Di bagasan
Ibana do nang hamu rap dipauliuli, gabe parmianan ni Debata
di bagasan Tondi i. (Epesus 2: 19-22).
Tangiang : Ale Tuhan Debata Amanami na di banua ginjang. Diparade Ho
do parmianan ni hamuliaonMu na hot sian punguan ni angka na
badia i. Lehon ma pangurupionMu dohot pasupasuM di na
mamparsaulihon bagas joro-M on. Sai pauli ma nang hami
songon angka batu na mangolu gabe bagas partondion jala joro
na hot, parmianan ni hamuliaon-Mu. Hupangido hami i di
bagasan Goar ni AnakMu Tuhan Jesus Kristus Tuhannami.
Amen.
d. MARENDE BE 655: 1-2 OJAHAN NI HURIA
(Di tingki marende, jongjong tu jolo mangadophon Ompu i Ephorus i ma:
Pandita Resort, Ketua Panitia dohot sude Parhalado ni HKBP Yogyakarta)
1. Ojahan ni Huria sasada Jesus i, marhite Pandidion rap dohot Hata i
Huria niriritNa baen oroanNa i, pinarbadiaanNa marhite mudar i.
2. Sian saluhut bangso na di portibi on, marhite haluaon sada Huria on

~7~
 Ai sada pandidion, sada haporseaon; sada nang panghirimon ni
huriaNa on.
e. MANJAHA SURAT PARPADANAN: (Pandita Ressort)
(Dung sahat tu pandohan: “Na marpadan do hami di adopan ni Debata
dohot di jolo ni portibi on songon on,” rap ma na sahuria mandok jala
jongjong di inganna be):
1) Hot do hami marojahan jala marpangguruan tu hasintongan,
dohot tu poda na sian hata ni Debata, angka na tarsurat di buku
na di Batu Ojahan na hupeakhon hami on.
2) Ingkon tonahononnami, ajarhononnami, podahononnami tu
angka pinomparnami, ro di sundut na umposo sogot asa hot
nasida manghabiari Debata Ama Parasiroha i, dohot
manghaporseai Tuhan Jesus Kristus Sipalua i, marhite na
manjalo Tondi Parbadia i.
3) Ingkon tonahononnami, na so jadi ramunan ni pinomparnami
Gareja on, jala ingkon tongtong do jagahononnami habadiaon ni
joro on.
4) Ingkon pinsangonnami do nasa halak na mambahen na so jadi,
mangaroai, na mangaramuni bagas Gareja on, songon i dohot
pekaranganna.
5) Marhite naung dipeakhon Batu Ojahan on, sahat ma
parnampunaonna tu HKBP Hatopan, hombar tu Aturan dohot
Peraturan ni HKBP.

f. MARENDE BE 655 : 4 OJAHAN NI HURIA

(Tingki na marende, dipamasuk ma poti Batu Ojahan tu inganan naung
diparade hian)
Tongtong marsada roha nang pe di tano on,
Huria na badia pinasupasuM on
Ulaon na badia patogu roha on,
Tuhan Sitolusada pamonang hami on.

g. MAMEAKHON BATU OJAHAN

EPHORUS HKBP:
Di bagasan haporseaon di Tuhan Jesus Kristus pineakhon batu on gabe
ojahan. Di bagasan Goar ni Debata Ama, Anak, dohot Tondi Parbadia.
Anggiat ma mian tongtong dison: haporseaon na sintong, biar mida
Jahowa dohot holong ni roha. Tau inganan partangiangan na
pinarbadiaan ma on, laho manjou dohot mamuji Goar ni Tuhanta Tuhan
~8~
 Jesus Kristus, na mangolu jala na mangarajai rap dohot Ama i dohot
Tondi Parbadia, ro di saleleng ni lelengna. Amen.
h. MARENDE BE 184 : 1 NUNGA TUNG JUMPANG AU OJAHAN BL.103
Nunga tung jumpang au Ojahan ni tondingki na mago i
Mudar ni Jesus do manahan saleleng ni lelengna i
Nang mago pe portibi on, tongtong do hot Ojahan on.
i. TANGIANG BATU OJAHAN : (EPHORUS HKBP)
Ale Tuhan Debata, Amanami Parasiroha na sumurung, na
marhabangsa di Banua ginjang. Nunga hupeakhon hami Batu Ojahan
ni Gareja on, songon sada partanda do i paboa Ho sandiri do OJAHAN
ni haporseaonnami. Alani i sai pahot ma haporseaonnami ganup
tingki, marlas ni roha di bagasan Ho, asa unang muramura mimbar
haporseaonnami dipalindaklindak poda angka na marragam i. Sai
sungguli ma ruas ni huriaM, mamungka sian angka dakdanak na
metmet, na posobulung, ro di angka na matua, asa lam hehe rohanami
mangoloi Ho, mangaradoti dohot mangulahon HataM. Sai Ho ma
Ojahan ni haporseonnami be, sian tingki on ro di saleleng ni lelengna.
Amen.
(Hundul ma ruas, angka na jongjong di jolo mulak ma tu hundulanna
be)

22. MANGOMPOI GEREJA HKBP YOGYAKARTA

a. MARENDE BE 363: 10 ENDEHON ENDE NA IMBARU BL 194
(Di tingki marende ro ma tu jolo angka Pandita na naeng manjaha ayat)
Dison do Bahal ni Jahowa, bongotan ni partigor i.
Lao pasangaphon Debatana, di serep ni rohana i.
Mauliate ma rohangku, di Ho na asi roha i;
Na mangalusi tangiangku, mambahen hatuaonki.
b. MANJAHA PSALMEN 132 : 1 – 10
1) EPHORUS HKBP
Sai ingot ma, ale Jahowa, di si Daud sude angka parniahapanna! Na
marmangmang i ibana tu Jahowa, marbagabagahon tu Sipargogoi
Jakkob: Molo tung bongotanku undungundung ni bagashu, molo tung
panaehonku podoman hapeahanku. Molo tung loasonku tarnono
matangku manang tung podompodom bolak langkop ni matangku.
Paima jumpang ahu sada ojahan di Jahowa, sada inganan di
Sipargogoi Jakkob. Ida ma, nunga itabege barita ni poti parpadanan
di Eprata, nunga jumpang hita di ladang ni si Jaar. Antong itabongoti
ma angka ingananNa i, marsomba ma hita tu jolo ni sidegedegean ni
totNa! Hehe ma Ho, ale Jahowa, mandapothon paradiananMu, Ho
dohot poti hamuliaonMu!
~9~
 Sai marpahean hatigoran ma angka malimMi jala marolopolop angka
na niasianMu. Ala ni si Daud, naposoMi, unang tulakhon bohi ni na
miniahanMu!
2) Partohonan Pandita
(manjaha ayat hombar tu naung disagihon)

c. MARENDE BE 121: 1+5 JESUS RAJA NI HURIA BL. 97

1. Jesus Raja ni Huria na porsea na badia, pasupasu ma au on
Sai sungguli ma rohangku mangihuthon Ho, Rajangku
Pargogoi ma au tongtong, pargogoi ma au tongtong.
5. Sai pauli HuriaMu asa lomo ni rohaMu jumpang Ho di ruasMi
Angka na serep marroha, na magigi mida dosa
Ho ditiru sasude, Ho ditiru sasude.

d. TANGIANG PANGOMPOION: Sesuai Agenda HKBP

(Oleh: EPHORUS HKBP)
Ale Tuhan Debata, Parasiroha na sumurung ! Mauliate ma rohanami tu
Ho ala ni godang ni asi ni rohaM di hami. Diurupi Ho do hami
mamparsaulihon bagas on sahat ro di nuaeng. Pujionnami ma Ho ro di
saleleng ni lelengna, ala naung sun saluhutna i bahen inganan ni
hasangaponMu dohot pamaritaan di GoarMu na badia i. Sian Ho do
hujalo hami angka silehonlehonMi, umbahen na sun bagas on. Ala ni i
hupasahat hami ma i tu Ho, asa Ho nampunasa. Asi ma rohaM, sai ro ma
Ho tumopot bagas ingananMon. Sai parbadiai ma i. Sai patubegehon ma
Hata hasintonganMi sian hajongjongan on asa adong sitiopannami laho
tu hasonangan. Sai marmulia ma bahen ulaon pandidion i dison,
parhitean laho bongot tu HuriaM, paboa anakhonMu hami. Sai parade
ma parpadanan na badia i di langgatan on, parhitean ni silehonlehonMu
na godang i di hami. Sai jalo ma ende angka na huendehon hami dison
laho pasangaphon GoarMu na badia i. Sai paria ma hami ro tu
bagasMon, di na hubege hami soara ni giringgiring, na manjou hami. Sai
pasupasu ma sude angka na mangalehon guguan dohot na
mamparsaulihon bagas on. Sai ajari ma hami paulihon nang rohanami
be, asa tau hami bahen ingananMu.
Sai parmahani ma hami ro di pinomparnami marnini marnono; sai
lehon di hami pangula angka na burju marmahani pangisi ni Huria on.
Sai topot ma hami marhitehite Tondi Parbadia, asa lam hot
haporsenonnami jala huhatindangkon hami Ho sahat ro di
hamamatenami be. Sai jumpang hami ma dison Barita na Uli, i ma
HataM na badia i, na paubahon, na mangapul jala na pasonangkon
rohanami.
~ 10 ~
 Asi ma rohaM ale Tuhan Debata ! Sai tangihon ma tangiangnami dohot
tangiang ni angka dongan na ro tu bagas on. Sai pasupasu ma hami
manang sadihari pe hami marpungu di bagas on. Sai pasupasu ma
angka parminggu, angka parguru, angka na tardidi, angka na marulaon
na badia dohot angka na pinabagas dison.
Sai jalo jala pasupasu hami dohot ianakhonnami, molo huboan hami
tuson angka posoposo dohot angka na manghajongjonghon
haporseaonna. Sai alusi jala oloi pangidoannami, molo ro hami tu bagas
on jumpa masa hagogotan, sahit manang haleon pe. Sai jalo ma
hamauliateonnami, angka na huboan hami tu bagas on. Sai alusi angka
partangiang na ro tu bagas on, i ma angka na lumpuon, na dangol, na
mabalu, na so marama, na so marina, panangkarnangkar, na targogot,
sai lehon tu nasida haluaon dohot apulapul. Sai oloi ma pangidoan ni
dongan, angka na ro tu bagas on, i ma na mangido hasesaan ni dosa, na
mangido gogo dohot apulapul ro di sude na hasea, na hombar tu lomo ni
rohaM.
Asi ma rohaM di hami naung hinophop ni AnakMu Tuhan Jesus Kristus,
Tuhannami, sai ramoti hami marhitehite TondiM i, paima sahat hami tu
hasonangan na di banua ginjang. Amen.

e. PENANDATANGANAN PRASASTI: ( Oleh Ompui Ephorus HKBP)

f. MARENDE BE 792 : 1 PASUPASU HAMI O TUHAN BL. 792

1. Pasupasu hami O Tuhan sai usehon dame-Mi, (Jongjong)

Sai ampehon tanganMi Tuhan lehon tu au gogoMi.
Di portibion, baen ma au Tuhan habaoran ni las ni roha;
Tu na marsak i, tu na dangol i, gabe pangapuli i.
Pasupasu hami o Tuhan sai usehon dame-Mi,
Sai ampehon tanganMi Tuhan lehon tu au gogoMi.

23. TANGIANG PANUTUP (Agenda HKBP):

(Tangiang Pelean – Tangiang Ale Amanami – Pasupasu - Amen – Amen.)

a. Paragenda:
Tatangianghon ma peleanta on tu Debata, martangiang ma hita:
Ale Debata, Amanami na di banua ginjang, Ho do haroroan ni saluhut
silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai jalo
ma i gabe uap na hushus di joloM.

~ 11 ~
 Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni HuriaM dohot di portibi on.
Buhai ma rohanami marhitehite TondiM, asa lam hutanda hami godang
ni silehonlehonMi tu hami, asa lam girgir hami mandak mauliate tu Ho,
marhitehite Jesus Kristus Tuhannami. A m e n .
Huria Mangendehon: BE 204: 2
Nasa na nilehonMi, tondi ro di pamatangku
Hosa dohot gogongki, ro di saluhut artangku
Hupasahat i tu Ho, na so unsatonku do

b. Paragenda:
Ale Amanami na di banua ginjang! Sai pinarbadia ma GoarMu ! Sai ro ma
harajaonMu ! Sai saut ma lomo ni rohaM di banua tonga on songon na di
banua ginjang ! Lehon ma tu hami sadari on hangoluan siapari ! Sesa ma
dosanami songon panesanami di dosa ni dongan na mardosa tu hami !
Unang hami togihon tu pangunjunan ! Palua ma hami sian pangago !

Huria Mangendehon:
Ai Ho do nampuna harajaon dohot hagogoon ro di hasangapon saleleng
ni lelengna. A m e n

c. Paragenda:
Dipasupasu jala diramoti Tuhan Debata ma ho! Disondangkon Tuhan
Debata ma bohiNa tu ho jala asi ma rohaNa mida ho! Didompakhon
Tuhan Debata ma bohiNa tu ho jala dipasaorhon ma dame-Na tu tondim.
Amen.

Huria Mangendehon:
Amen Amen Amen.

-----------------<<<†>>>----------------

24. PERAYAAN DAN RAMAH-TAMAH:

a. Foto Bersama
b. Doa dan Makan Bersama
c. Bimbingan Pastoral oleh Ephorus
d. Mangulosi, dll
e. Doa Penutup

~ 12 ~
~ 13 ~