KABAKTIANG MINGGU KAAMPA

JAMAAT GPM EBENHAEZER – KLASIS BENDAR AMBON

Hari Dominggu, 22 November 2020

SIAP-SIAP
 Sombayang di Konsistori
 Syamas baca jamaat pung barita
 Suling kas babunyi lagu “mari masuk” baru kampinjang 3 kali babunyi

DATANG PAR TUHAN

Kampinjang babunyi 3 kali, jamaat badiri la manyanyi KJ No. 20 : 1, 4 (pake Bahasa Alune)

P Jamaat, Tabea! Mari katong kas tado hati deng pikirang babarapa saat minta Tuhan pung lindungang, la katong
maso di kabaktiang minggu kaampa oras ini.
(orjen barmaeng salagu barang 30 detik bagitu)

TUHAN ADA DENG KATONG DENG BILANG TABEA

P Mari katong somba Tuhan di kabaktiang oras ini
J Sio Tuhan, tarima katong yang datang manyatu ni par somba Tuhan, di katong pung ruma
P Katong pung tolongang dalang kabaktiang ni cuma Allah yang kas jadi dunya deng akang pung isi, Yesus Kristus
Allah pung Ana yang datang par kasi salamat samua orang yang parcaya deng Allah pung Roh yang salalu ada deng
katong
J (manyanyi) Helo, Helo, Helo Kokuanya!

NYANYIANG JAMAAT KJ No. 21 : 1, 2 (pake Bahasa Alune)

Jamaat langsung dudu

KALUARGA PUNG SOMBAYANG
P Jamaat e, kaluarga ni tampa manyatu par sombayang, tagal itu mari katong sama-sama sombayang minta Tuhan
pung tolongang di katong pung hidop
J (manyanyi) Sio Tuhan Allah e, dengar katong pung sombayang jua
P Katong sombayang par dunya yang ada pono deng sakitang tagal korona. Katong parcaya Tuhan ada deng katong,
Tuhan jua seng akan kas tinggal katong, tagal itu angka sagala sakitang ni dar dunya jua Tuhan, la kasi salamat
katong samua
J (manyanyi) Sio Tuhan Allah e, dengar katong pung sombayang jua
P Katong sombayang dari atas tana pusaka yang Tuhan kasi ni, katong taru sagala orang yang pegang parenta di
bangsa, daera, bendar sampe di ruma-rumatangga. Tuhan jaga katong jua, supaya katong hidop aman, utuh di
atas tana yang Tuhan kasi ni
J (manyanyi) Sio Tuhan Allah e, dengar katong pung sombayang jua
P Katong sombayang par sasama dalang kahidopang “Orang Basudara”. Tuhan, tolong ajar katong par baku bantu,
baku keku, deng salalu paduli basudara yang laeng supaya katong sunggu-sunggu tabaos kabar bae yang Tuhan
ajar
J (manyanyi) Sio Tuhan Allah e, dengar katong pung sombayang jua
P Katong sombayang cuma par Tuhan sa, tagal itu katong seng takotang apapa satu di dunya ni lai
J Amin!

NYANYIANG JAMAAT KJ No. 453 : 1, 3 (pake Bahasa Alune)

BACA DENG DENGAR ALLAH PUNG AJARANG

 Sombayang minta Tuhan pung Roh tolong
 Baca Alkitab (Matius 20 : 1-16)
 Manyanyi Haleluya, Haleluya, Haleluya
 Riwayat
 Dudu tado-tado la inga riwayat tadi

JAMAAT PUNG JAWABANG

MANGAKU KATONG PUNG PARCAYA
P Jamaat, mari badiri la katong mangaku katong pung parcaya. Sama-sama deng samua orang parcya di sagala
waktu deng tanpa, mari katong bilang:
Beta parcaya par Allah Bapa yang pung kuasa par samua-samua yang ada. Antua yang biking langit deng dunya ni.

Beta parcaya par Yesus Kristus, Allah pung Ana satu areng-areng, yang jadi katong pung Raja.

Antua ada dalang Maria pung poro tagal Allah pung Roh, la lahir ka dunya biar kata Maria ni masi parawang.

Antua dapa siksa waktu Pontius Pilatus pegang parenta. Antua dapa salib, mati, la dapa kubur. Antua turung ka orang mati
pung dunya, la hidop kombali pas akang pung lusa.

Antua nai ka sorga, dudu di Allah pung sabala kanang, la pegang parenta sama-sama deng Antua yang pung kuasa par
samua yang ada.

Antua nanti datang dari sana par jadi hakim par samua orang yang masi hidop deng yang su mati.

Beta parcaya par Allah pung Roh.

Beta parcaya kalo Allah su pili katong par jadi Yesus pung orang-orang yang taika jadi satu di antero dunya ni, deng sama-
sama tarima apa yang bae dari Antua.

Beta parcaya kalo Antua kasi ampong katong pung dosa-dosa deng nanti kasi hidop katong pung badang kombali, la
katong hidop tarus-tarus deng Antua.
Jamaat langsung dudu
2
MANYANYI PUJI TUHAN (SOLO/KUMPULANG MANYANYI/YANG LAENG)

KASI PERSEMBAHAN PAR TUHAN

 Sombayang sebelum kasi Persembahan
  Manyanyi : KJ 450 : 1 (Pake Bahasa Alune)

SOMBAYANG PAR DUNYA (akang pung laste, samua orang sombayang sama deng apa yang Yesus ajar)
Sio Bapa di Sorga. Katong minta biar samua orang taru hormat par Bapa.
Katong minta biar Bapa parenta samua orang di dunya ni,
deng biar Bapa pung mau jadi di dunya ni sama deng yang jadi di sorga.
Katong minta biar Bapa kasi makanang yang katong parlu sabang hari par katong makang hari ini.
Sio Bapa e! Tolong kasi ampong katong pung dosa-dosa jua,
sama deng katong jua su kasi ampong orang-orang yang biking sala par katong.
La jang kasi tinggal katong dapa coba par biking dosa.
Mar, kasi salamat katong jua dari Setang pung Raja pung kuasa.
Tagal Bapa tu Raja, deng yang pung kuasa par samua-samua, deng yang pantas par dapa puji tarus-tarus. Amin.

ALLAH UTUS DENG KASI BERKAT

NYANYIANG JAMAAT KJ No. 424 : 1, 2, 3 (pake Bahasa Alune) Jamaat langsung badiri

ALLAH UTUS DENG KASI BERKAT

P Basudara jamaat e! Katong ni dapa panggel supaya sombayang par dunya
J Sio Tuhan, kas puli dunya ni deng Tuhan pung sayang jua
P Katong jua tapanggel par sombayang bangsa deng panguasa negara
J Sio Tuhan, taru hokmat deng pangartiang di dong pung hidop, la kas’ utuh katong pung bangsa ni jua
P Katong musti sombayang par samua basudara dimana sa dong ada
J Sio Tuhan, ajar deng taru di katong pung hidop ni rasa kasi dalang samangat hidop orang basudara
P Katong jua tapanggel par baku tolong kalesang alam yang Allah su kasi par katong ni
J Sio Tuhan, sayang katong pung karja deng usaha par kalesang Allah pung pambariang di alam ni, labe lai jaga
katong dar sagala susa, calaka deng bahaya tagal alam pung pawaru deng akang barang korona ni yang sasaja
biking katong takotang deng biking katong pung hidop seng tado
P tagal itu, angka hati par Tuhan la tarima Allah pung janji berkat ni: ALLAH SUMBER SAGALA KASIH DENG KARUNIA
KASI BERKAT MALIONG-MALIONG DI KATONG PUNG HIDOP; TUHAN YESUS KRISTUS YANG RELA KASI SALAMAT
KATONG JAGA DENG PIARA KATONG PUNG SAGALA KARJA DENG USAHA; ALLAH PUNG ROH TOLONG KATONG
PAR SALALU PADULI KAHIDOPANG DI ALAM NI DENG SAMUA CIPTAANG
J (manyanyi) AMIN, AMIN, AMIN.