20) Sub Tema : "Nggeluh ibas Kristus eme sada pasu-pasu si mereken kesempaten man banta guna ngelai ibas erbage-bage dampar kegeluhen" PERSIKAPEN * Asa bancina kerina ende-endenta sipelajari, pertoton syafaat ras simabaisa, ras sidebanna siaturken lebe ope lenga ibenaken kebaktian. * Kebaktian ibenaken pkl. 23.30 WIB (Jam 11.30 berngi) iarapken maka pergantian tahun kari pas sangana rende. * Kerna perkundul ras pertedis siaturken uga simehulina ibas jabunta sekalak-sekalak. * Adi pelayan khusus simabaisa (Pdt, Pt/Dk/Em ibabaina pemena nari seh asa dung. Tapi adi la pelayan khusus menaken no 5 seh 15. KEBAKTIAN 1. Kata penaruh Keluarga sinikelengi Tuhan Yesus Kristus, patut si kataken bujur man Dibatanta erkiteken segedang-gedang geluhta ibas ndalani tahun 2023 enda sigejapken Dibata ngarak- ngarak kita. Mbue sibagi ukur ras si la bagi ukurta si inanami kita, tapi tek kita Dibata e tetap masu-masu kita, nemani ras mpegegehi kita. Kentisik nari sitadingken tahun 2023 enda ras si bengketi tahun simbaru tahun 2024, mari sitadingken tahun simale e alu tetap erpengarapen man Dibata ibas kinitekenta man Tuhan Yesus Kristus.... Mari ras kita ertoto 2. Rende KEE No. 279 :1,4" KAM KAP DIBATANGKU“ 1) Kam kap Dibatangku Kam inganku cicio. Tegu-tegu aku begiken pertotonku. Reff. Ernalem man baNdu Kam pengarapenku Kidekah geluhku kupuji Kam Tuhan 4) Kupuji Kam Tuhan rende aku man bandu Sebab seh ulina perbahanenNdu bangku. Reff... 3. Votum-Salam Lit : Ibas gelar Dibata Bapa si tetap ngarak-ngarak kegeluhenta (ndu), ibas gelar Tuhan Jesus simereken keselamaten man banta (ndu), ras ibas gelar Kesah Si Badia siringan ibas pusuhta (ndu). Perkuah ate ras dame ibas Dibata Bapa, AnakNa Tuhan Jesus Kristus, ras Kesah Si Badia, Amin. Perp. : A...min, a...min, a...min (iendeken) 4. Invocatio: "Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia." (Kolose 3:23) 5. Sipuji ka Tuhan Dibata nta arah ende-endenta KEE No. 68:1,2 "DAHINNDU SIMBELIN TUHAN" 1) DahinNdu simbelin Tuhan kerajang kami pe Ban Kam si mada kerajan la masap lalap e Tapina bagi page me gelah ersuli turah pe E mate kap benih lebe bage pe kami krina nge Nggit mate pe lah turah page nge 2) DalinNdu ibas doni e O Tuhan mesera Enggo me iteh kami pe pendungi Golgota Di tergejap serana kin gejap pe permenangna min 'Di kita jumpa ras pagin min atan bas kiniulin Nggit kami pe ngikutken dalin e 6. Refleksi Perdalanen Geluh a. Lit : Adi nulih kita kubas perdalanen geluhta mbue erbage-bage siman bentasenta lit paksa susah entah senang, sakit entah sehat, ceda ate bage pe meriah ukur, tapi kerina kegeluhenta ikawali Dibata. -Paksa Teneng -- Rende KEE No 181:1 "SEGEDANG GEDANG GELUHKU" 1) Segedang-gedang geluhku itemani Penebus Labo kai pe lit si kurang Adi tanNa negu t'rus Dame surga lit bas aku iusekenNa bangku Kegeluhen jadi senang kai pe lalit si kurang Kegeluhen jadi senang kai pe lalit si kurang 7. Padan Dibata simpetetap Ukur Guna Ndalanken Tahun Simbaru. Lit : Nina Dibata "Tetaplah min kam ibas Aku, janah Aku pe tetap ibas kam. Dahan labo ngasup erbuah adi la kin ersada dahan e ras batangna. Bageme pe kam, adi la kin kam ersada ras Aku labo kam erbuah (Yohanes 15:4). Perp : Amin 8. Rende ka kita arah KEE No. 201:1, 3 "MALEM ATE TUHU- TUHU" 1) Malem ate tuhu-tuhu si ernalem man banNdu Kam Dibata sinjadiken langit ras doni enda SalsaliNdu pusuh kami maka t'rangNdu tergejap Kalak sitek la kap bene ban kelengNdu e tetap 3) Tetap kuakuken la ibas kinitekenku Kam me ngenca simbelinNa kusembah bas geluhku Yesus Kam nggo mate jine man penebus dosangku Tetaplah min aku dage ibas geluh simbaru 9. Khotbah : Pilipi 1:20-26 Tema : KEGELUHENKU GUNA TUHAN Sub Tema : Kegeluhen Eme Kesempaten Guna Erdahin, Nambahi Keriahen Ras Kemajuan Ibas Kiniteken. Isi : Lit ende enden rohani "Hidup ini adalah kesempaten hidup ini untuk melayani Tuhan jangan sia-siakan apa yang Tuhan b'ri hidup ini harus jadi berkat, Oh Tuhan pakailah hidupku selagi aku masih kuat bila saatnya nanti kutak berdaya lagi hidup ini sudah jadi berkat". Bagi ende-enden enda min prinsip nggeluhta pasti kita ngasup ngergai waktu demi waktu kegeluhenta, guna si pakeken untuk melayani Tuhan. Lanai man ayakennta kerna kesenangen doni tapi kesenangen Dibata. Lanai kita ketadingen ibas erta surgawi e bagi kuan- kuan kalak karo: "taren taren ngayaki siman tadingenken tading siman ayaken, taren-taren ngayaki erta doni tading erta surga". Kinatana kita sibuken denga ngurusi ntah pe ngayaki urusen doni/erta enda asangken urusen Dibata, erta surga, kesenangen surga. Paulus ningetken man perpulungen i Filipi ibas bahan renungenta sendah kerna kesaksin tentang dirina maka igejapkenna nggeluh ras matena guna Tuhan. Nggeluh eme sada kesempaten guna erdahin ngelai Kristus Yesus arah ngelai/ngkelengi anak jabunta, perpulungenta, bangsa ras negara, bagepe nambahi keriahen man kerina sekelewetta ras nambahi kedewasaan/kemajuan ibas kinitekennta man Tuhan Yesus, mate eme keuntungen sebab jumpa ras Dibata. Paulus sedekah nggeluhna la pernah nia-niaken waktuna tapi ipergunakenna untuk pembarken Berita si meriah e buktina nggo mbue surat-surat si itulisna guna pembarken Berita Simeriah, bahkan tupung ibas kiniseran (ipenjaraken) pe ia tetap ngelai. Kemegahen. kalak Kristen eme ikut muat bagin ibas ngelai Tuhan ras ikut muat bagin ibas kiniseran Yesus Kristus e. Tahun si male enggo sidalani, mbue si reh subuk bagi ukurta bage pe si la bagi ukurta, lit si nggo seh sura-sura lit ka si lenga seh, banci saja mbuen kesusahen asangken kesenangen, sipenting asa gundari kita tetap megegeh denga e perbahan gegeh ras perkuah ate Dibata. Tahun simbaru nandangi sibengketi mari kita tetap fokus nandangi kinitekenta man Tuhan Yesus, ula mbiar ula aru ateta, ula siikutken godaan doni enda entah pe ngasup ka kita nguasai kemajuan doni si banci saja mbeneken kita tapi kita arus pentar, bijak, megegeh. Emaka siperkuat hubungennta ras Dibata, tetaplah erpengarapen man baNa sebab rancangen Dibata e eme rancangen damai sejahtra man banta bagepe nandangi isi jabunta. Amin 10. Pengakun Kiniteken 11. Persembahen (100 % Guna Pensiunen GBKP) a. Kata Dibata si jadi palas persembahen : "Man kalak si engkelengi Aku, Kubereken kebayaken melala, rumahna Kudemi alu erta-erta simeherga." (Kuan-Kuanen 8:21) b. Rende KEE No. 302:1-3 "NGINGET PERKUAH DIBATA SI MBELIN“ 1) Nginget perkuah Dibata si mbelin si isehkenNa man banta k'rina kin Ibas kerina dampar kegeluhen i doni si dem alu keguluten Reff. : Endeskenlah kulanta man Dibata kerinana si lit ibas geluhta Selaku persembahenta singgeluh em persembahen si ngena ateNa 2) Sabab bage me arusna kita kin ersembah man Dibatanta si mejin Si nggo m'reken banta manusia keg'luhen si mehuli ras badia Reff... 3) Marilah k'rina sipuji Dibata janah sipeteruk ka pe ukurta Alu bage si dat sura-suraNa kai si mehuli ras ngena atena Reff. c. Ertoto kerna persembahen. 12. Pukul 24.00 WIB (BENGKET KU TAHUN SIMBARU TAHUN 2024) 13. Rende pengataken bujur ibas ngaloken tahun si mbaru. Tuhan Dibata enggo naruhken kita kubas Tahun simbaru enda, mari sikataken bujur man Tuhan sipuji gelarNa arah ende- endenta KEE No. 117:1-3 "NGGO MENTAS TAHUN MALE E" 1) Nggo mentas tahun male e, Kam me kupuji Tuhan e Jaga kawali Kam tetap, tendingku ras dagingku kap 2) O Yesus Kam Penebusku keleng ateNdu man bangku Tahun simbaru enda pe, taruhken perpulungen e 3) Ras kami min kataNdu e, man tendang ukur kami e Pedauh min krina dosa e, ras percuban si jahat e. 14. Pertoton Syafaat 15. Tekad Lit : Enggo sialoken tahun simbaru, kai dage arapenta? Perp : Si kuarapken, reh paguhna min kinitekenku ras isi jabungku bagepe ipasu-pasu Tuhan tetap kesehaten, pendahin itengah-tengah jabu Lit : Nina Tuhan Nehenlah sekelewetndu, mbelang me kap man peranin tapi kurang siranisa pe, ise nggit kusuruh?" Perp :Ijenda aku Tuhan suruhlah aku, pengarapenku tambahindu gegeh, pemeteh/talenta man bangku ibas ndahiken dahinNdu e. Amin 16. Rende "HIDUP INI ADALAH KESEMPATAN" (2X) Hidup ini adalah kesempatan Hidup ini untuk melayani Tuhan Jangan sia-siakan apa yang Tuhan b'ri Hidup ini harus jadi berkat Oh Tuhan pakailah hidupku Selagi aku masih kuat Bila saatnya nanti kutak berdaya lagi Hidup ini harus jadi berkat 17. Pertoton Tuhan 18. Pemasu-masun Lit : Bengketilah kegeluhenndu kubas kegeluhen simbaru ibas tahun simbaru enda, nggeluh enda sada kesempaten pakekenlah guna Tuhan ras tetapkenlah ukurndu. Alokenlah Pasu-pasu idur Dibata nari: "Ipasu-pasu janah ikawali Dibata kita (kam), siang ayo Dibata ersinalsal ibabota (ndu), janah melias ateNa ngeneheri kita (kam). Itatap Dibata ku kita (kam), janah malem ateta (ndu) ibahanNa." Amin Perp : A...min, a...min, a...min.
C. Penutup: Sisalam-salamen, ngerana-ngerana ras snack.