Satua Buron Ajak Dewa

SATUA DEWI WINATA DADOS PANYEROAN

Kacrita Dewi Kadru miwah Dewi Winata pada mireng wenten kuda Ucesrawa, sane medal saking Segara Susu sane kagebuur olih para dewata danawane. Irika Dewi Kadru ngandika, Adi Dewi Winata ! Napi ke Adi mireng, wenten kuda Ucesrawa, medal saking Segara Susune? Kocap rupanipun dahat becik, warnan bulin awakne putih, nanging ikutne selem. Sumaur Dewi Winata, Mungguin kudan punika sampun piragi titiang, nanging warnan ipun putih kewanten , boya ireng ikutipun. Kocap sang kalih pada kukuh ring pangarenga soang soang doning pada manggeh ring pakayunan, raris sang kalih masubaya pacing natasang benjangipun. Asing kaon, pacing dados panyeroan. Sasampun puput masubaya, raris Dewi Kadru nakenang ring putranida, mungguin kasujatian warnan bulun kuda Ucesrawa punika. Matur watek naga punika, Aduh ibu ! Sinah ibu pacing kaon, santukan warnanipun putih kewanten. Dewi Kadru bingung ring kayun mireng putranida, raris ida ngandika ngasih asih, Cening watek naga sareng sami ! Dumadak cening kapiolasan teken meme ! Yan kapatut, ikut kuda Ucesrawa ento siratin wisa, apang dadi selem. Kocap para naga punika, tan satinut ring sapituduh Dewi Kadru, santukan solah sekadi punika kabaos iwang. Punika mgawinang Dewi Kadru dahar duka ring putranida, saha ngandika, mastu putranida, Dadi ati pesan Cening, bani tempal teken pangedihan meme. Dumadak cebing manggihin pakeweh ageng, pacing geseng ring grombong apine, ring yadnya sarpa Maharaja Janameya. Pastun Dewi Kadru punika, kapireng olih Betara Brahma. Ida ledang dados saksi pastu punika. Ri kala punika taler Betara Brahma mapaica aji pamunah wisa, ring Begawan Kasiapa, mangde jagate rahayu. Miragi pamidukan Dewi Kadru punika, raris watek naga punika, pada masadia nyiratin wisa ikut kuda Ucesrawa punika tur raris mamargi. Tan kacrita ring margi, kocap ikut kuda Ucesrawa sampun kasiratin wisa, mawastu ireng warnanipun. Benjangipun palimunan, kacrita Dewi Kadru miwah Dewi Winata, lunga nyujur genah kuda Ucesrawa punika. Kedeh pakatunan sang kalih, maritiaksayang pangweruhidane soang soang. Pamargin sang kalih nglintangin Segara Susune, sane polih kagebur olih para dewata danawane. Cingakinida Segara Susu punika sampun paripurna sakadi nguni. Sampun rauh ring genah kuda Ucesrawa punika, cingakinida warnan bulun awakipun putih, ikutipun selem. Doning sapunika, kaon Dewi Winata. Saking kala punika Dewi Winata, dados panyeroan Dewi Kadru. Tan kocapan Dewi Winata sampun dados panyeroan, mangkin craitayang Sang Gruda medal saking taluhe sane malih abungkul, ri kala biang dane lunga. Sakadi tejan Sang Hyang Agni, sunaran Sang Grudane, ngebekin ambara, ngantos galang maglembaran langite sami, santukan Sang Gruda nglayang ring ambarane. Punika ngawinag res res kayun para dewatane nyingak cihna sakadi punika. Pitaenang ida sampun rauh panemayan gumine rug, sami jagate pacing geseng dados awu. Doning para dewatane aroara, raris Sang Hyang Agni ngandika, Inggih para dewata sinamian, sampunang sangsaya ring kayun ! Durung panemayan titiange ngeseng jagate sami, santukan kari kalintang sue, panemayan jagate rug. Mungguin tejane sane cingakin I dewa punika, wantah tejan Sang Gruda, manuk ageng dahat sakti, putran Begawan Kasiapa ring Dewi Winata. Tejan Sang Gruda punika,

Satua Buron Ajak Dewa pateh ring tejan titiange. Sapunika pangandika Sang Hyang Agni ring para dewatane punika. Kenginan degdeg pakayunan para dewatane tur sami misadia nganampekin sang Gruda. Sasampune tampek raris sami ngandika, pangajum, Inggih Dewa Sang Gruda ! I Dewa sawiakti sang maharesi. Sang dewata taler I Dewa. Wantah I Dewa retuning watek manglayang. Kadi tejan Sang HYang Surya tejan I dewane. Patut I Dewa dados kantin para dewatane, genah titiange masayuban, santukan I Dewa retuning manuk Kenginan ledang Sang Gruda miireng pangajum para dewatane sapunika, raris kaudepang tejan danene, mangda nenten dumilah malih. Tan kacritayang pakantian Sang Gruda ring para dewata punika, mangkin kocapan pamargi Sang Gruda nyujur genah biang dane ring tepin Segara Susu punika. Sasampun rauh irika, Sang Gruda kasambrama olih biang dane, tur kandikayangmangda Sang Gruda sareng magenag irika, mamarekan ring Dewi Kadru. Yen kudang rahina sampun suen Dewi Winata dados panyeroan Dewi Kadru, critayang Dewi Kadru mapakayunang mameng-ameng ring tepin Segara Susu punika. Dewi Winata kandikayang ngiring raganida, nanging Sang Gruda kandikayang ngempu watek nagane. Raris Sang Gruda ngeberang naga punikamakasiu, ngantos nampek ring Sang Hyang Surya. Kenginan sami naga punika uyang paling, nandang sunaran Sang Hyang Surya sane dahat ngebusin. Indik punika kauningin olih Dewi Kadru. Di gelis Dewi Kadru ninas ica ring Sang Hyang Indra, mangda ledang nayuhin pinunas Dewi Kadru punika. Ajahan Ambarane bek madaging gulem saha kilat miwah gereh megenturan. Raris tedun sabeh kalintang deres, kenginan tis manah nagane sami. Doning sapunika mrasidayang naga punika malali mideran, nylupsup ring sarwa desa miwah alase. Kasuen-suen Sang Gruda rumasa keweh ngempu watek naga punika, raris Sang Gruda matur ring biang dane, Inggih Ibu ! Sawiakti titiang nenten uning, makawinan ibu mituutin sapituduh Dewi Kadru miwah naga punika. Titiang taler nikayang Ibu ngempu naga punika. Kalintang-lintang keweh titiang ngempu, santukan plalinipun mideran. Napi mawinan Ibu ngandikayang titiang ngempu naga punika ? Sumaur Dewi Winata, Uduh Cening, Sang Gruda ! Sane mangkin meme dados penyeroan Dewi Kadru, sawireh meme kalah matoh-tohan. Solah anake dados panyeroan, nenten pisan dados tempal ring sapitudur pamekelnya. Ento ane manggehang meme. Nanging yen cening tresna tekening meme, takonin watek nagane, buat barange ane dadi anggon nebus meme ! Sapunika pangndikan Dewi Kadru, kenginan uning Sang Gruda, ring pariindikbiang dane dados panyeroan. Punika awinan, yen plalin naga punika tan dados tambakin dane, raris kacotot tur keeled. Punika pinaka sangunida, ngempu naga sane akehne siu diri. Sang Gruda raris mataken ring watek naga punika, He Sang Naga sinamian ! Napi sane dados anggen titiang nebus biang tiange, mangda usan dados panyeroan ? Sumaur watek naga punika, Yen sapunika pakayunan Sang Gruda rerehang tiang Tirta Amerta ! Tirta Amerta punika, pikolih para Dewatane ngebur Segara Susu. Punika sane dados anggen nebus biang I Dewane, mangda usan dados panyeroan .

Kaketus Saking: Satua Satua Bali, I Nengah Tinggen