Satua Manusa Ajak Raksasa

SATUA SANG RAMA NGEMIT TAPASUI

Sasampune Ida Sang Barata matulak budal ka Ayodia kacrita mangkin Sang Rama masusupan ring alase. Raris rauh ring gunung Citrakuta kairing antuk Ida Sang Laksmana miwah Ida Dewi Sita. I rika wenten pasraman druen Ida Maharesi Atri punika sane kaungsi antuk Ida Sang Rama. Sarauh ida ring pasraman gelis Ida Sang Maharesi matur panyapa. Nanging nenten asue ida I rika saantukan kapireng wenten alas linggah madurgama mawasta alas Dandaka, punika sane kajujur antuk Ida Sang Ragutama. Masusupan Ida Sang Rama miwah Sang Laksmana kasarengin antuk Dewi Sita ring alas Dandaka punika nenten wenten sane kajrihin. Tam dumade rauh raksasa aeng, mawasta I Wirada. I raksasa nyagjang, jaga nyedayang Ida Sang Rama. Pajalannyane sakadi buta sungsang, batisnyane beduur, limannyane beten kaanggen majalan. Kenginan pajalanipun setata nyumpling. Beh, minab jejeh I Kala Mertiyu mgantenang kaaengan tang i raksasa Wirada punika. Nanging Ida Sang laksmana tan pisan rumasa jejeh angan amatra, ngaksi saparipolah I raksasa Wirada asapunika. Sapadem I Wirada malih masusupan Sang Rama. Tan asue kapanggih pasraman asri gumanti patapan sang yogi sidi mapesengan Bagawan Sarabangga. Ida tatas uning ring daging tatwa kasukseman miwah pageh masemadi. Wau kacingak Ida Sang Rama rauh, gelis Bagawan Sarabangga ngandika, Uduh Dewa Sang Rama, putran Sang Prabu Dasarata I dewa. Titiang sane mangkin jagi mapamit, pacang budal ring ka moksan. Kalangkung sadian titiange, palungguh I dewa rauh mriki. Sampun saking sue titiang nyantos pangrauh I dewane, maka larapan titiange sida budal ka kamoksan. I Dewa maraga wisnu sane setata ngardinin karahayuan jagat. Sane mangkin titiang nguningayang ring I dewa, mungguin irika wenten pasraman druene Ida Sang Yogi Sutiksna. Punika patut ungsin I dewa. Sampunang I dewa sumandea ring pikayun. Pasraman punika nampek saking irika. Ida Sang Resi Yogi Sutiksna patut anggen I dewa kanti. Sasampune Ida Sang Resi mawacana asapunika, nuli gelis ida ngelarang yoga ngregepang semadi. Tan asue medal geni rahasia dumilah saking angganida, mawasana telas puun anggasariranida lebur. Usan punika malih Ida Sang Rama, Sang Laksmana miwah Ida Dewi Sita masusupan ring alas wayah. Tan asue kancit kapanggih punika pasraman Ida Sang Yogi Sutiksna. Kaparanin raris Ida Resi Sutiksna, mawastu kapiwelasan ida ring Sang Rama kalara lara. Sue Sang Rama magenah ring pasraman punika. Malelincakan raris ida ring wawengkon patapane, miwah tangkil ring pasraman sane lianan sane wenten irika. Sang Rama raris katamiu olih ida sang maharesi antuk sarwa umbi umbian. Ri kala wengi makolem Ida Sang Rama makelasan antuk daun taru. Yadiastun asapunika, pikayunanida teher pageh ngamargiang tapaberata, ri kala rahina malih Sang Rama masusupan ring alase, pikayunanida gumanti pacing maburu. Sami patapan sane wenten ring sisin gununge sampun polih karauhin antuk Ida Sang Rama miwah kakemit. Punika mawinan nenten wenten pakewuh malih mawesana ledang tur langgeng Ida Sang Maharesi ngamargiang oma yadnya. Asapunika kawentenan Ida Sang Rama sasuenida ring tengahing alas.