Ensera Ngasuh Ketawa: Mati Kentut (Nendak Lumur 6)

Aloi seduai ini iya diau nguan rumah nyembuah kediri. Nyepi seduai selalu makai nadai lauk,
dia ini Aloi bejaku,

“Aloi, uji nuan undur ke pasar. Nyau puas nadai lauk, nadai garam” ku iya.

“Au, aram mih ini” ku saut Aloi.

Udah tembu beradu, Aloi pan nurun, nepan perau lalu belabuh bekayuh. Iya bekayuh sepagi-
pagi nya. Peluh ngenjing beterenjui, baju iya nyau basah, tau dipulas laban pemendar iya
bekayuh. Nyau kelama iya dugau-dugau, dia iya ninga kukuk manuk.

“Ah! Enda jauh agi pasar.” Pia ku iya bejaku kediri berandau nengali. Nyau kelama dinga
gerung-gerung munyi labu orang mansang nyauk datai ari atas.

“Nama nya nuan dih Aloi!” pia ku ini iya.

“Nama nya nuan dih ini!” ku saut Aloi.

Enda mukai-mukai dih Aloi, enda ingat muka tali perau iya. Iya ke bekayuh nya sigi endang
mindah ari pengkalan.

“Aih dih Aloi. Andal aku ngumbai nuan datai di pasar meli lauk. Enti pia, aram mih tua sama
undur ke pasar” pia ku ini iya.

Ini iya lalu muka tali perau. Iya ngejang ke luan perau. Seduai lalu bekayuh undur ngili ai. Apin
jauh udah ngejang ke pengkalan, dia Aloi meda bangkai ukui. Aloi enda senunuh bendar,
endang sebarang utai rara.

“Nama nya tak baka ukui tua dih ini?” ku iya.

“Enda tau nyadi undur, ini. Jai burung tua,” ku Aloi.

Enda mih seduai nyadi undur ke pasar, laban meda bangkai ukui. Seduai iya ga jai burung.
Ukui nya udah mati kira dua tiga hari dulu ari nya. Diatu iya nyau but. Lebuh Aloi narit bangkai
ukui dia iya nanya ini iya.

“Kati alai ukui tu tak bebau dih ini? Mati ukui tu?” ku iya.

“Au,” pia ku saut ini Aloi.

Pagi siti Aloi seduai ini iya sama undur ke pasar deka ngalu lauk. Seduai iya nepan perau lalu
undur. Kira takah tiga tanjung ari ili pendai, dia seduai iya betemu enggau but ukui tepanggai ba
reba. Ukui nya nyau but. Bau iya ngenjing nempuh.

“Kati alai ukui nya bebau? Mati ukui nya ini?” ku Aloi.

“Au,” ku ini iya.

Seduai pan majak bekayuh regup-regup ngili ai. Nyau kelama seduai udah bekayuh, dia ini Aloi
kentut. Kentut iya balat bendar bau. Iya ga luan nya alai bau kentut nepuk Aloi ke ngemudi.

“Apu! Mati ini tu dih,” pia ku Aloi bejaku dalam ati diri. Iya tusah amat ati. Luan perau lalu
dituntung iya ke tebing. Ini iya lalu disangkai ke iya dia.

“Nama main nuan nyangkai ke aku dih uchu?” ku ini iya.

“Nuan ga mati dih ini,” ku Aloi nyaut.

“Enda aku mati dih Aloi,” pia ku tudah ini iya.

“Mati mih nuan! Nuan ga bebau!” ku Aloi.

Perau Aloi endang udah jauh ngejang ke tebing.

“Keba nuan tambab!” ku ini iya ngangau ari tebing.

Dia Aloi pan mupuk bekayuh. Iya enda peduli ke kangau ini iya. Dia iya bekayuh kediri-diri ngili
ai, regup-regup. Iya tusah ati laban ini iya udah mati. Nyau kepuas iya bekayuh, ta enda berasai
lalu kentut. Ensium bau kentut diri empu, dia iya tekenyit ati.

“Apu! Mati mih aku tu,” pia ku iya bejaku kediri, berandau nengali.

Kelalu tusah ati ke diri parai kentut, dia iya nyau enda engkebut. Sengayuh iya nyau tebeleka
ari jari. Perau iya lepung-lepung rarat ngili ai. Iya mansa mayuh buah rumah orang ngili ai nya.
Orang alit ati meda gaya iya.

Lebuh iya meda buah mirah mansau, dia iya nengkelak.

“Ah! Sayau endar aku tu mati. Enti aku enda udah mati, tentu aku ulih makai buah nyin,” ku iya.

Mayuh macham buah bukai dipeda iya. Kili agi, dia iya meda orang nyual ikan, undang enggau
mayuh macham lauk bukai. Lebuh iya mansa pasar dia iya tusah agi ati. Orang ke bepansa
enggau iya alit bendar ati meda iya beranyut enggau perau sereta dugau-dugau enda engkebut.
Diatu perau iya nyau pansut ari nanga sungai ngagai tasik besai. Nyau kelama mua hari pan
mansang chelum-sechelum.

Dia ribut bepuput begulang galu,

Angin bepusin balat udu,

Burung terebai bekelepu,

Ngiga tebing alai ngetu.

Pupu gumbang nyau merengung,

Mangka ke gerugu batu anggung.

Umbak gumbang nyau kechimbung,

Nyelepak pun apung.

Perau Aloi ama tenggelam,

Ama melepung,

Ama telentang, ama mengkanjung.

Iya empu tenggelam ditaban ke bangkung,

Enda agi pegari panjung.

Mati mih tudah Aloi nengali hari,

Parai mih iya nyenggai lemai,

Danjan mih iya nyenggai bulan,

Enggau orang ke sebayan mandai mati.

Latih tutorial

1. Bepelasarka siti teks ba Nendak, salin baru teks ti dipilih lalu kemetulka ubah ti bisi ayan
ari sukut fonem/sepil, morfologi enggau sintaksis ngena sistem ke dikena diatu.

2. Beri simpul penemu senentang ubah ti nyadi maya jeman Nendak dichelak enggau
jeman diatu.

(a) Maya jeman nendak lumur 6 tu dichelak, ubah ti ulih dipeda ari sukut sepil baka:

Melepong melepung

Merengong merengung

Ukoi ukui

(b) Ubah ari sukut sintaksis nya ulih dipeda baka chunto di baruh tu,

Chunto:

- Pama nuan undur ke pasar.

- Uji nuan undur ke pasar.

(c) Mayuh ngena tanda bacha (koma, titik) ba endur ti enda engkeman.