DITANDA TUHAN I DO HO Turpuk : Johannes 1: 43 - 51 I. Pamuhai : Parjumpangan boi do patubuhon komunikasi na mangolu,lapatanna di parjumpangan i dilului ma dia do mula ni partinandaanna tu hita songon na masa di turpuk jamita on, parjumpangan ni angka sisean ni Tuhan Jesus di mulana i. sumurung do digombarhon parjumpangan ni Tuhan Jesus rap dohot si Simon Petrus, Andreas, Pilipus dohot si Natanael. Parjumpangan on ma muse na gabe parmulaan ni hapapatar ni Tuhan Jesus songon Anak ni Debata naung dibagabagahon di Padan Na robi. Parjumpangan na gabe pamilliton ni Jesus maradophon angka sisean i mambahen dalan panandaan ni jolma i tu 'ha- Debata-an ni Jesus na gabe jolma. Panandaan ndang holan 'tanda-tanda Sukarno' –asal kenal saja- ninna istilah nuaeng, holan diboto alai ndang jelas pamotoanna taringot tusi, on ma na ginoaran "tak kenal maka tak sayang", aut ditanda tangkas, pasti do dilului manang disulingkiti latar belakangna (adong rasa ingin tahu yang dalam). Partinandaan ni angka sisean i nunga dipungka sian na manjaha jala mambege barita sian Padan Na robi na manaringoti haroro ni Tuhan Jesus Kristus tu portibi on, i do umbaen na manigor las roha ni angka sisean i manjangkon Jesus di parjumpangan i. Jala dung dapot si Natanael latar belakang ni jesus, marudut ma muse sungkunsungkun na tutu do sian huta na metemet ro sahalak na popular, i ma Jesus? Ternyata ndang soal huta na metmet alai sintuhuna i ma, porsea do si Natanael i di angka naung disurathon di Padan Na robi i. Parjumpangan dohot partinandaan i marproses ma saleleng si Natanel mangihuthon Jesus laho pararat Barita Na uli. II.Hatorangan ni turpuk jamita: 1. Goar Natanael ndang tarida di angka goar ni sisean na 12 i alai hombar tu tafsiran ni turpuk on na boi do dipatudos tu Joh. 21: 2 na adong tong goar ni si Natanael na marpungu rap dohot sisean ni Jesus, hape di Ulaon ni Apostel bindu 1: 13 dipadomu do goar ni si Pilipus tu Bartolomeus (pat.Mat.10: 3; Mark.3: 18; Luk.6:14), gabe boi dohonon si Natanel dos do goarna tu si Bartolomeus. 2. Nunga tung disurathon haroro ni Mesias i di bagasan Padan Na robi isara 1 Musa 49: 10; dohot di angka surat ni panurirang Jes.9: 5; Jes.53; Jer. 23: 5-6; Daniel 9: 24,27. Dohot udutna. Sian angka surat naung dijaha si Pilipus do panandaan dohot panjaloonna di Jesus naung pajumpang i, i do umbaen na diboto nasida huta Nasaret jala dipatangkas di ayat 45 i, "nunga jumpangnami Ibana dst, laos longang do si Natanael di na manungkun: "tung tarbahen ma ro na denggan sian huta Nasaret?". Marhitehite sungkunsungkun ni Natanael on ma didapothon jala dipangkulingi dohot dilumbahon Jesus panandaanna tu si Natanael. Didok Jesus:" On ma sada halak na sintong, na so marpangansi..." i ma patuduhon na parjolo do hape Jesus mananda si Natanael. 3. Parjumpangani komunikasi na denggan antara si Natanael dohot Jesus, lam disulingkit si Natanael ma tutu sian dia do partinandaan ni Jesus tu dirina. Dung didok Jesus naung diida Jesus ibana di toru ni hau ara, manigor adong ma panindangionna taringot tu Jesus na tutu Anak ni Debata di ayat 49 i "Ho do Anak ni Debata...raja ni halak Israel." Marhite komunikasi na denggan tarida ma udut ni Hata ni Debata naung tarsurat di Padan Na robi i tu Padan na Imbaru naung dipasingkop Tuhan Jesus. Adong pengakuan (panindangion) na papatarhon Jesus Anak ni Debata. 4. Dibagabagahon Jesus do angka parjumpangan na lobi sian parjumpaan na parjolo i, i ma parjumpangan marhite angka tandatanda halongangan na naeng pinatupa ni Jesus saleleng rap nasida mardalan. Dipapos Jesus do roha ni si Natanael na ragu taringot tu huta Nasaret na metmet i, ai songon na menek do roha ni Natanael marnida huta na metmet i, hape huta hatubuan ni Jesus do i, jala ipe nunga disurirangkon i di Padan Na robi (Mika 5: 1-2). 5.Dilumbahon Jesus do hapapatar ni hadirionNa marhite na nidokNa:".idaonmu do mungkap banua ginjang jala mijur angka surusuruan ni Debata tumopot Anak ni Jolma i." 5. On ma sada bukti na tutu do Jesus Anak ni Debata, Ibana patupa dalan tu banua ginjang. Ai surusuruan ni Debata do marhobas tu Jesus di angka panghobasion-Na di portibi on jala boi do on tapatudos tu nipi ni si Josep na tarsurat di I Musa 28: 12 'diida ma sada tangga na pinagohan tu tano, tolhas tu langit jala marnaek mijur angka surusuruan ni Debata'. III.Panutup : Mangarimangi hata ni Debata Pamilliton ni Jesus marhite parjumpangan-Na tu angka siseani patuduhon na tanda do panandaan ni Jesus di angka sisean i, nang tu hita pe, ringkot do tahatindanghon na ditanda Jesus hadirionta. Tung sura pe gok hamaolon dohot sorimago (sahit Corona-19) ro manahopi hita, diboto jala dipaihutihut Debata do ngolunta on mamolus angka ari, bulan nang taon. Ai haroro ni Tuhan Jesus tu portibi on pe nunga disangkapi laho paluahon jolma i sian dosa nang hamatean, nuaeng pe sangkap ni Debata naung manobus hita jolma nunga tung patar marhite sian angka Hata-Na na ingkon gabe siula hasintongan dohot holong hita di portibi on songon tanda na olo hita mangihuthon Ibana. Tarajumi do panandaanta tu Jesus ndang hita na parjolo mananda Ibana, alai Ibana sandiri do parjolo mananda hita. Sungkun sungkun i ma, boha do partinandaanta tu Jesus, 1. tangkas do tapanghilalahon di ngoluntaon holong-Nado na pangolu hita? 2.Tangkas do pangoloionta di patik-Na? Marhitehite sungkunsungkun on ma lam tarimangi ise do hita di jolo ni Debata asa nang pe hita metmet unang gabe menek rohanta, asal ma taboto i, ala tangkas do diboto Jesus hadirionta, tung angka obukta pe dietong Debata do (Mateus 10: 30), dibahenima, molo ditanda Tuhan i do hita, lam denggan ma komunikasinta tu Jesus si Parholong i marhite tangiang, pamujian, manjaha hata-Na dohot pangoloi di patik-Na. Di si do jumpang paralealeanta dohot Jesus. Paralealean na dipajongjong parsaoran na uli, ndang ala ni arta nang materi nang luatta pe, alai hinorhon ni pangoloion do. Ai didok do di Johannes 15: 15-16 na aleale ni Jesus do naung dipillit jala dipadiri asa marparbue. Ndang boi be hita marsidalian na so boi hita marparbuehon hata-Na, ai tangkas do panandaon ni Jesus tu hita, nang hita pe tapatuduhon ma na denggan parsaoranta dohot Jesus. Di Minggu Ephipanias (Hapapatar) on, patar ma tutu panandaan ni Jesus tu hita jolma naung tinobusna, jala naeng ma nian patar nang angka ulaonta na marparbuehon angka na denggan di ngolunta. Amen.