PARTORDING NI MINGGU PASKAH I

PARNINGOTAN ARI HAHEHEON NI TUHAN JESUS

HKBP GETSEMANE RES.TAPIAN NAULI SUNGGAL MEDAN
Minggu, 04 April 2021

EV: MARKUS 16 : 9 - 18  EP : JOHANNES 20 : 1 - 10

TOPIK :
HUASO HAHEHEON NI JESUS (KUASA KEBANGKITAN YESUS)

1. Pamuhai
U : Selamat Paskah ma di hamu saluhutna ruas ni hurianta, angka na
hinaholongan di bagasan Goar ni Tuhanta Jesus Kristus!
R : Selamat Paskah ma tutu nang di hamu na manghobasi hami
sadari on!
U : Na marpungu do hita muse sadari on manghalashon haheheon ni
Tuhanta Jesus Kristus sian hamatean. Marhuaso situtu do haheheonNa
i laho pamatehon huaso ni hamatean asa mangolu angka na mate.
R : Tama ma pujipujian dohot hasangapon di Ibana saleleng ni
lelengna.
U : Ima tutu! Antong tapuji jala tapasangap ma Ibana na marmulia i,
marende ma hita!

2. Marende BE HKBP No. 93 : 1 - 2 “Pesta Paska Hatuaon”

Pesta Paska hatuaon! Pesta Paska haluaon sian hamatean i sian hamatean i.
Tuhan Jesus do pasuang, hangoluan, hasonangan tu saluhut jolma i.
[Jongjong] Talu ho banua toru ndang tarbahen tiopanmu Raja Siparngolu i,
Raja Siparngolu i. Hamatean, hamagoan na so pola habiaran; nunga
talu i sude.

3. Votum - Introitus - Tangiang

U : Marhitehite Goar ni Debata Ama dohot Goar ni AnakNa Tuhan Jesus
Kristus dohot Goar ni Tondi Parbadia, na tumompa langit dohot tano on.
Amen. Nunga hehe Tuhan i, nunga tutu hehe Ibana. Ari on do na
jinadihon ni Jahowa, marolopolop jala marlas ni roha ma hita disi. Batu
naung binolongkon ni angka pande bagas, i ma gabe batu parsuhi.
Pinamasa ni Jahowa do i, halongangan do i anggo di matanta. Haleluya!
R : Mangendehon: Haleluya, Haleluya, Haleluya!
U : Martangiang ma hita! Ale Tuhan Jesus, Tuhannami! Na mandok
mauliate do hami tu Ho, ala ditaluhon Ho do dosa dohot hamatean
marhitehite hamamateMi, ala disondangi Ho tanomannami, asa
1
 marpanghirimon na mangolu hami ala ni haheheonMi. Ndang pola be
mabiar hami mida hamatean, ai Ho do ulunami, ruasMu do hami.
Dipaunsat Ho do hami sian haholomon tu hatiuron, sian hamatean tu
hangoluan. Antong, pargogoi ma hami mamuji dohot mangoloi Ho ariari,
pasangaphon Ho di bagasan haporseaon na mangolu, paima sahat
hami tu lambungMu. Amen. ------------- Hundul

4. Marende BE HKBP No. 95 : 1 “Haleluya Taendehon”

 Haleluya taendehon nuaeng di ari haheheon, Tuhanta Siparmonang i.
Ai malua do Ibana, haruar sian tanomanNa, na talu hamatean i.
Sun ulaonNa i dibaen Tuhanta i. Haleluya;
Naung sahat di Tuhanta i upaNa na sumurung i.

5. Patik
U : Tatangihon ma Patik ni Debata sadari on, i ma na tarsurat di
Panindangion Haporseaon ni HKBP Bindu VI. Tahaporseai jala
tahatindanghon do: Debata do patupa haluaon, ima haluaon sian dosa,
sian gomgoman ni sibolis dohot hamatean, nang sian ragam ni huaso na
maralo tu hata ni Debata. Sian asi dohot holong ni roha ni Debata do
dipatupa haluaon i marhite panghophopon ni AnakNa na sasada i,
Tuhan Jesus Kristus na mate di hau pinarsilang, na tuat tu banuatoru
dung ditanom jala na mulak mangolu di ari patoluhon.
R : Dalan manjalo haluaon i, ima marhite haporseaon na tinubuhon ni
Tondi Parbadia jala haporseaon i do dirajumi Debata gabe
hapintoran ni jolma.
U : Ia haluaon i hamuliaon ni Debata dohot hatuaon ni jolma i do i. Nunga
malua na porsea i, atik pe godang dope parungkilon sibolusonna di
portibi on. Sai dipalua asi ni roha ni Debata do na porsea i sian ragam ni
mara di ngolu siganup ari, di ngolu pardagingon nang partondion pe,
manang marsasahalak, manang marsasapunguan.
R : Hataridaan ni haluaon i do ngolu ni na porsea i di portibi on, ima
ngolu na marhabadiaon, na marparbuehon angka parbue ni Tondi.
U : Marhite poda on taondolhon do, na so adong haluaon na asing sian
haluaon na pinatupa ni Jesus Kristus jala Jesus Kristus sambing do
nampuna halak na pinaluaNa i.
R : Na so tarrampas sibolis manang angka huaso na asing be na
porsea i sian gomgoman ni Kristus.
U : Alani i tatulak do poda na mandok, boi jolma i paluahon dirina sian
gomgoman ni dosa, sibolis dohot hamatean marhite sian na
manadingkon hariburon ni portibi on. Laos tatulak do poda na mandok
usaho ni jolma i sandiri do na manontuhon haluaonna. Antong rap
2
 mangido gogo ma hita sian Debata laho mangulahon na hombar tu
patikNa i.
U+R : Ale Tuhan Debata, sai pargogoi ma hami mangulahon na hombar
tu PatikMi. Amen.

6. Marende BE HKBP No. 90 : 1 - 2 “Sai Tapuji Debatanta”

Sai tapuji Debatanta, ale hajolmaon i. Ai naung hehe do Tuhanta sian hamatean i.
Dipasidung Jesus i ulaonNa sasude. Patupahon haluaon di saluhut hajolmaon.
[Jongjong] Anggo utang ni dosangku digarari Jesus i.
I do haporseaonku di na tinaonNa i. Nunga tulus patik i, nunga mintop rimas i.
Di na hehe i Ibana ro di au hangoluanNa.

7. Manopoti Dosa
U : Tatopoti ma dosanta na godang i tu adopan ni Debata, martangiang
ma hita! Ale Amanami jala Debatanami, na di banua ginjang, Pargogo
na so hatudosan! Pardengganbasa do Ho, jala ro di saleleng ni lelengna
do asi ni rohaM. Sai marpamuati ma rohaM di
hajahatonnami, jala sai unang be ingot angka dosanami.
R : Jotjot do mardosa hami maradophon Ho, jala jotjot do husungguli
hami rimasMu marhite sian pangalaosionnami.
U : Unang alang asi ni rohaM, sai urupi ma hami, Ho ale Tuhan Debata
hatuannami, palua hami, jala sesa dosanami, alani AnakMu Tuhan
Jesus Kristus Tuhannami. Amen.
R : Mangendehon BE HKBP No. 683 : 3 - 4 “Di Adopanmu Jesus”
Di adopanMu Jesus, tarsolsol bagi rohangkon.
Muba ma au tu jolo on, di adopanMu Jesus.
Di adopanMu Jesus taruli au di asiMi.
tu Ho ma sahat diringki, di adopanMu Jesus.
U : Laos tabege ma bagabaga ni Debata taringot tu hasesaan ni
dosanta! Parasiroha jala pardengganbasa do Jahowa, lambat tarrimas
jala parasiroha godang. Ndang dibahen tu hita hombar tu angka
dosanta, jala ndang dibaloshon tu hita hombar tu angka hajahatonta.
Songon asi ni roha ni amaama mida angka anakna, asi ni roha ni
Jahowa di angka na manghabiari Ibana. Hasangapon ma di Debata na
di ginjang !
R+U : Amen. --------------- Hundul

8. Marende BE HKBP No. 632 : 1 “Nunga Hehe Kristus”

Nunga hehe Kristus, marsihohot ma hamu. Lam sumurung hita di ulaon ni
Tuhanta. Lam sumurung hita di ulaon ni Tuhanta.

3
 Radot ma hita lao mangula tu Tuhanta. Radot ma hita lao mangula tu Tuhanta.
Amen.
9. Epistel : JOHANNES 20 :1 - 10. --------------------- (Responsoria)

10. Marende BE HKBP No. 96 : 1 + 3 “Nunga Talu Hamatean”

Nunga talu hamatean dibaen Tuhan Jesus i. Ai na hehe do Ibana songon na
nidokNa i. ;,; Haleluya, haleluya, nunga hehe Jesus I ;,;. [Jongjong]
Marlas roha be ma hita ala hehe Jesus i. Ai malua sude hita sian
hamagoan i. ;,; Haleluya, haleluya, nunga hehe Jesus i. ;,;

11. Manghatindanghon Haporseaon

12. Tingting

13. Tangiang Pangondianon

14. Bernyanyi BE HKBP No. 91 : 1 - 4 “Hatuaon Do” P.P. Ia & Ib

Hatua on do, las ni roha do Hangongot ni Tuhanta i.
;,; Mago do hita, ngot ma Tuhanta; las be las be ma rohanta i! ;,;
Hatua on do las ni roha do Hangongot ni Tuhanta i.
;,; Monang do Jesus, talu sibolis; las be, las be ma rohanta i! ;,;
Hatuaon do, las ni roha do Hangongot ni Tuhanta i.
;,; Mungkap do dalan tu hangoluan; las be, las be ma rohanta i! ;,;
Hatua on do, las ni roha do Hangongot ni Tuhanta i.
;,; I ma gogonta, dompak dosanta; las be, las be ma rohanta i! ;,;

15. Khotbah : MARKUS 16 : 9 - 18

16. Bernyanyi BE HKBP No. 633 : 1 - 4 “Nunga Hehe Kristus I”

P.P. II (Kategorial Parompuan)
Nunga hehe Kristus i, Haleluya; sian hamatean i, Haleluya.
Parlangitan jouhon ma, Haleluya; tano on alusi ma, Haleluya.
Singkop panghophopNa i, Haleluya; gok hamonanganNa i, Haleluya.
Sondang haluaon i, Haleluya; patiur dalanta i, Haleluya.
Tartahan naroko i, Haleluya; dibaen Tuhan Jesus i, Haleluya.
Nunga mungkap surgo i, Haleluya; di na tinobusNa i, Haleluya.
Monang do Tuhanta i, Haleluya; talu hamatean i, Haleluya.
Mago do soropna i, Haleluya; ala monang Tuhan i, Haleluya.

17. Panutup: Tangiang Pelean - Tangiang Ari Pesta Dung Salpu

Jamita: Haheheon Ni Tuhan Jesus - Tangiang Ale Amanami -
Pasupasu
4