Sibasaon Minggu 27 Juni 2021 (2 Korint 8 : 7 – 15) Usul Doding : Haleluya No.

348 : 1-2
“BAYAK BANI HORJA IDOP NI UHUR”
Hun kuria Makedonia do itongos Paulus suratni on. Paulus bani surat 2 Korint on sihol
“patorsahon” pemahamanni kuria Korint na sompat iagou pengajar-pengajar sesat na mamabahen
sangsi kuria Korint pasal haapostelon ni Paulus. Kuria Korint memang marianan ibagas sada kota
pelabuhan na buei pengaruh pangajaran-pangajaran na legan ampa pengaruhni horja-horja
hadagingon pe buei do ijon. Ambahni ai, boi ididah hita humbani teks ambilan on; sidea (kurai Korint)
do na parlobei antusias laho mangurupi kuria na marsitaronon I Jerusalem (na iparburu, sulit secara
ekonomi halani tekanan ni kaisar hubani halak Kristen). Domma dong hinan riahni sidea laho
mangurupi, tapi lang boi lalap tarpasaud. Anggo humbani sudut potensi, termasuk kuria na bayak do
sidea panorang ai. Tapi mase lang bayak sidea bani horja idop ni uhur (pelayanan kasih)? Adong dua
kemungkinan alasan ; naparlobei aima halani persoalan internal (ibagas kuria) na ija mulai adong
parbolah-bolahan. Napaduahon, aima halani sidea domma mulai sangsi bani haapostelon ni Paulus.
Bani ambilan on, ipakei Paulus do situasi na isaksihonni bani horja zending ai laho “mendidik”
kuria-kuria ase mananda holongni Kristus ampa mampraktekkon ai bani dunia nyata. Adong tolu
kuria na boi ididah hita humbani konteks on. Naparlobei, kuria na i Jerusalem, marsitaronon halani
mangirikkon Kristus. Gabe miskin do sidea, kemungkinan halani iparburu, lang dong peluang kerja
(sari mangan). On ma kuria siurupan. Napaduahon, aima kuria na i Makedonia, na domma
mangkorjahon horja idopni uhur ai. anjaha na patoluhon, aima kuria Korint, na sasintongni bayak
(secara ekonomi), tapi justru soh ibagas horja idopni uhur. Ijon Paulus hadir marhitei haapostelonni
gabe “jembatan” bani kuria-kuria, ase masa horja idop ni uhur.
Kuria Makedonia sebagai sumber inspirasi ibagas horja idop ni uhur. Anggo nini Paulus
aha namasa bani kuria ai aima “idop ni uhur ni Naibata, na binereni bani kuria-kuria na i Makedonia”
(ay.1). Isaksihon do paboa kuria Makedonia “pro aktif” mangurupi hasoman kuria na na marsitaronon
i Jesusalem. Anggo humbani haadongan, doah ma bayakan kuria Korint. Mangihutkon ayat 2 “Ai age pe
ibagas parlajouan ampa sitaronon banggal sidea, tapi ibagas haganupan ai malas tumang do uhur ni
sidea, gabe surung do halayakon ni sidea, age pe miskin tumang sidea.” Tapi sidea ibagas na mangurupi
na marsitaronon, ibahen sidea do na lobeih humbani na tarbahen sidea, humbani rosuhni uhur ni
sidea. Miskin bani materi, tapi bayak bani holong ni uhur.
Aha do dasar ni horja idop ni uhur ai?. Aima anggo ibotoh atap itanda hita sonaha idop ni
uhur ni Tuhanta Jesus Kristus, na bayak hinan gabe miskin halani nasiam, ase bayak nasiam halani
sombuhni ai. Lang halani bayak, lang halani patuduhkon hajagoan, lang halani ase ipuji atap lang homa
halani kesombongan.
Marhasurungan ma ibagas horja idop ni uhur. Songon na sinobutni Paulus, marhasurungan
do kuria Korint bani bani haporsayaon, bani hata, bani habotohon, bani sagala haringgason, bani
holong dompak hanami (dirini Paulus). Tapi mase lang marhasurungan sidea bani horja idop ni uhur?
Hape on do na gabe tujuanni haporsayaon ai, tujuanni habotohon ai, atap tujuanni haringgasonta ai.
Marhitei on iojur Paulus do ase itoruskon sidea ma use horja pangurupion ai.
Mambere ibagas malas ni uhur, humbani porlu ni uhur, domu hubani na tarbahen. Sedo
ase sonang halak na legan (mangorui tanggungjawab), hape gabe susah na mambere. Seng sonai tene.
Tapi ase boi do adong prinsip “marsipadosan”. Bani hata Indonesia “keseimbangan”. Artini ase boi
berkelanjutan goluh on anggo sada panorang holi na mangurupi mangalami sitaronon homa.
Keseimbangan na isobut ijon sedo ase dos secara parbagianan, tapi ase boi riap mangahapkon holong
do, holongni uhur ni Naibata na torus marhorja. On ma tanggungjawab ni halak na porsaya hubani
Jesus, menjaga keseimbangan. Perbandingan : Pangalaman Jhon Wesley, sahalak tokoh Gereja.
Sanggah poso, pandapotanni 30 poundsterling per tahun; bolanjani 27 poundsterling anjaha lobihni ai
isumbangkon untuk horja ni Tuhan. Dob piga-piga tahun, marlompit ma pandapotanni gabe 60
poundsterling per tahun, bolanjani totap 27 poundsterling anjaha lobihni ai isumbangkon. Age
sanggah naik use pandapotanni gabe 90 poundsterling per tahun, totap do bolanjani 27 poundsterling.
Hunjon boi ididah hita artini mambere domu hubani na tarbahen mararti do homa ai manggoluh ma
hita manurut na porlu banta, sedo manurut pandapotanta. Pori ni pe lang tartiru hita ai, tapi na
imaksud ijon porlu do hape margoluh na sederhana, ase ulang dong na marlobih-lobih anjaha ulang
dong homa na marhahurangan (bnd ay.15). Sai lambin bayak ma hita bani horja idop ni uhur. Amen