Ambilan Minggu 7 Maret 2021 (Minggu Inang)

2 Musa 20 : 1 – 11

1. Hata on ipadas Naibata hubani si Musa sanggah na tangkog ia hu atas dolog Sinai. I dolog on do hinan si
Musa idilo Naibata anjaha pardasni bangsa ai i dolog Sinai, ai do gabe sada tanda paboa Naibata do na
paluahkon sidea hu Masir (2 Musa 3:12). Dob luar hun tanoh Masir, i pardalanan manuju hu tanoh
Kanaan, tanoh na binereNi Naibata hubani bangsa ai. Sidea domma dokah manggoluh riap pakon halak
Masir (mulai jaman Jakob – Josep na gabe bagian harajaonni Parao) anjaha dob matei si Josep buei ma
tarjadi perubahan, lambin galek ma halak Israel (gabe jabolon) anjaha paidah-idah goluh parugamaonni
sidea (terpengaruh). Domma buei tumang pengaruhni bangsa Masir hubani halak Israel baik ibagas
pemikiran, budaya sonai homa pakon cara beragama. Anggo sanggah manjalo hata on bangsa ai i
pardalanan (das sidea i dolog Sinai, patolubulankon dob luar hun Masir/ 2 Musa 19:1), ai mararti sidea
sedang iperhadapkon hubani dua proses na sedang berlangsung bani panorang na dos ; manadingkon
Masir ampa mangayaki Kanaan. Luar hun parjabolonanni halak Masir, masuk hubani tanoh na domma
iiani gok bangsa-bangsa na so mananda Naibata, aima halak Kanaan, Het. Amori, Peresi, Hewi pakon
Jebus. Jadi luar hun Masir, ai sedo mararti sidea lang mandompakkon masalah be, tapi justru iboan hubani
tantangan-tantangan na lobih borat.
2. Tangkas do tujuanni Naibata paluahkon halak Israel hun Masir aima halak Israel gabe halak na
manangihon Naibata anjaha gabe bangsa-Ni. Nini bani 2 Musa 19:5-6 “Ai pe anggo itangihon hanima
hatang-Ku, anjaha ihorjahon hanima padan-Kin; gabe ahu ma simada hanima humbani sagala bangsa,
ai gok Bangku do ganup dunia on. Gabe harajaon malim-malim ma hanima Bangku anjaha sada bangsa
na pansing. On ma hata sihatahononmu hubani halak Israel.”. Naibata manghasiholhon ase adong
pembaharuan hubungan antara Ia pakon na pinilihNi, aima ginomparni si Jakob. Domma itangihon
Naibata doruh-doruhni sidea marhitei na mandilo si Musa laho padaratkon sidea humbani parjabolonan
Masir ase mulak use mangirikkon panogu-noguonni Naibata. Lang marosuh Naibata halak na piniliNi ai
manggoluh ibagas parjabolonan. Ibagas pangarusion na sonon ma hita memahami ayat 2 ai, “Ahu do
Jahowa Naibatamu, na paluarhon ho hun tanoh Masir, hun rumah parjabolonanmu”. Itegaskon do
hubani bangsa ai, pasal ise na paluahkon ampa hunja sidea ipaluah. Naibata na paluarhon (membawa
keluar) ai aima Jahowa (Ahu na adong na Ahu adong/ 2 Musa 3:14). On ma artini goran pakon kuasani
Naibata, aima Naibata na adong (na manggoluh). Ipaluar sidea hun rumah parjabolonan. On mararti
haluahon na binahenni Naibata iwujudkon marhitei proses, sedo marhitei sada peristiwa tumang, tapi
marhitei dalan na ganjang (sedo instant), na maningon iirik-irik sepanjang pargoluhanni jolma on. Mase?
Halani sanggah mandompakkon bageini musuh ampa situasi na sulit do ipatalar Naibata gogohNi dompak
bangsa ai.
3. Ganupan penegasan ampa larangan na isobut bani hata na pinadasni Musa hubani bangsa ai, aima dalam
rangka sonaha ase proses “manadingkon” Masir ai, ase tanggal haganup pengaruhni gaya hidup ampa
parugamaonni halak Masir na domma lokkot bani hadirionni sidea, anjaha lambin ipersiapkon ma sidea
mangayaki ampa masuk hu tanoh Kanaan na sasintongni gok homa ijai bentuk-bentuk parugamaon na
manombah gana-gana. Haluahon na binahenni Naibata ai manuntut sikap galuh na baru, sonaha sidea ase
totap mardingat ampa manangihon Naibata Jahowa bani goluhni. Adong piga-piga larangan ibagas na
manjaga parsaoranni sidea dompak Naibata.
i. Lang malo ho marnaibata na legan i lobei ni bohing-Ku
ii. Lang malo bahenonmu gana-gana, barang suman-suman na gabe sisombahon
iii. Lang malo manobut gorannni Jahowa ibagas hampungni uhur
iv. Ingat ma pasangapkon ari Sabat (parsaranan)
4. Holongni sidea dompak Naibata manontuhon sikap goluhni sidea dompak sesama. Sonin ma homa age
hubanta bani zaman sonari on, sonaha hubunganta dompak Naibata napluahkon hita marhitei Kristus ai,
on do homa na manontuhon sonaha gayani pargoluhonta. Ipagolpa do hita ase ulang “abai” bani Tuhan na
paluahkon hita. Halani bani zaman sondahan on buei ma hamajuon na mambahen hita boi manlupahon
Naibata Jahowa. Gambaran Masir na domma itadingkon pakon Kanaan na sihol masukon, sasintongni
adong ope torus bani goluhta sonari on. Kemudahan-kemudahan na itawarhon hamajuonni tekhnologi on
boi do mambahen hita “terlena”. Tongon sedo itompah hita gana-gana (patung) na gabe sisombah-
sombahonta, tapi ra do lang isadari hita paboa domma iandalhon hita penemuan-penemuan ni jolma on na
gabe hatengeran ni uhurta ibagas na mandalani goluh on. Adong do na mangahapkon adnggo domma
sukkup arta pakon duit, songon na tarjamin ma iahapkon dirini mandalani goluh on. Anggo dong na porlu
botohonta pasal goluh on, ra mintor marsukkun hita hubani “google” na sonari domma gabe mesin
penjawab bani sukkun-sukkunni jolma. Parsaoran pakon Naibata ibagas ibadah-ibadah pe, ra domma
madabuh hubani soal selera (suka/tidak suka). Sonaha homa holongta dompak hasoman jolma bani zaman
on, lambin borgoh do ra homa. Aima ase na gabe sukkun-sukkun, ija do hita sonari? Sanggah
manadingkon rumah parjabolonan ai do? atap na mulak do use hita masuk hubagas “siding” ni
parjabolonan ai? Sonaha do holongta dompak Naibata bani jaman sonari on?