FEHEDE NI’OROI’Ö BA MBONGI NI’AMONI’Ö MOROI KHÖ

BPHMS BNKP
Moroi ba wa’omasi Lowalangi, ba khö Zo’aya ya’ita Yesu Keriso
ma’owai fefu ndra’awöma so halöwö awö fefu mbanua niha Keriso ba
zi sagörö BNKP : “Ya’ahowu Wanunu Fandru 25-26 Desember 2019,
ba Ya’ahowu wamaondragö Döfi Sibohou 1 Januari 2020. Si tobali
tuho Wanunu Fandru ba ndröfi 2019 andre imane :

YA SIFAHUWU AMI BA NIHA FEFU (Fahela Yohane 15 : 14 – 15)

Tuho Wanunu Fandru andre, modane-dane ia ba ngawalö zalua

ba danö Indonesia, he göi ba zi sagörö ulidanö. Hadia da’ö..? Ba
ginötö si no talalöi he göi na irugi ia’dae oi alua wangotomosi oto-oto
ba ba gotalua niha ba gulidanö alua watitisa, fatötöisa, faudusa, ba
fasuwöta ba gotalua niha, ha börö wa’afaehu ngafu, banua, soi,
agama, la’ala’a guli, sikhala, fetaro, awö ngawalö organisasi ma
golonga si fabö’ö-bö’ö. Alua da’e ba wariawösa ba gotalua nono
wobanuasa, alua ba lala fareta, alua ba gotalua agama, alua ba ginötö
wangobini sondrönia’ö, alua ba lala wa’auri si ero ma’ökhö.

Ba ngawalö zalua andre, tekaoni ita banua niha Keriso ena’ö

tobali sifahuwu ba niha fefu, tobali sifatalifusö ba khö Yesu, tobali
solohe fangatulö ba gulidanö. Hana...? Me moroi ba wa’omasi
Lowalangi nösi gulidanö, no möi Yesu tobali niha ba wodudugö oto-
oto andrö, si no mangatulö’ö ösi gulidanö, si no mangehao
amakhaitada khö Lowalangi, amakhaitada ba nawöda niha gulidanö,
ba amakhaitada ba niwöwöi fefu. Da’ö gohitö dödö wa möi Yesu ba
gulidanö ba wolohe fangatulö ba fa’ohahau dödö. Fefu da’e, tenga
börö wa’atulö ba fa’abölöda, ha börö wa’ebua dödö Lowalangi ba
niwöwöi-Nia fefu. Andrö, da talau zinunö simane ira malaika luo no:
“Lakhömi khö Lowalangi si yawa ba fa’atulö ba gulidanö ba
niha ni’omasi’ö andrö”.

Börö da’ö ba wamaluada Fanunu Fandru ma Bongi Ni’amoni’ö,

tekaoni ita fefu banua niha Keriso ba BNKP :
1. Da tafalua si mane si no muraka ba Visi BNKP, ya’ia da’ö “BNKP
möi enoni ba tobali howuhowu” ba gulidanö, gofu heza so ita
zamösana.

2. Tafonga’eu niwa’ö ba tuho Natal andre (ena’ö sifahuwu ita ba

niha fefu), ya’ia na :
a. Tabörögö wamalua fahuwusa si sökhi andrö ba
wongambatöda ba nösi nomoda zamösana sodane-dane ba
wa’omasi Lowalangi andrö ba khö Yesu Keriso.
b. Dozi si no fatiti, fa’udu, ba si lö hasara dödö ba zilalö, ia da’e
tekaoni ba wamalua fangatulö, he ba wabanuasa, si manö göi
ba mbanua niha Keriso. No sa wahasara dödö ba mangele
howuhowu Lowalangi (Sinunö 133).
c. Böi tesöndra gamuata wamaigi bawa, famaehumaehusi niha
dali wetaro, fokhö, sekola, agama ba ma hadia gamaehuta
bö’ö nia. Me no ibali’ö “sifahuwu” khö-Nia ita, So’aya ya’ita
Yesu Keriso.

3. Ta’a’aro’ö wahasambua ba fahasara dödö ba wongambatö, ba

lingkungan, ba Jemaat, ba Resort, ba zi sagörö BNKP, ba ba
niha fefu, he fabö’ö Organisasi Gereja, fabö’ö agama, ba tanö
bö’ö nia me sifahuwu ba si fatalifusö ita fefu.

4. Tafonga’eu “wahuwusa” andrö, ya’ia na tafalua wanolo awö,

sitosasa, sinumana, si no toröi furi. Andrö ma’oroi’ö khöda fefu,
ena’ö dozi Jemaat mu’osindruhugö wamalua halöwö
DIAKONIA, halöwö fangomasi’ö, halöwö Pelayanan
Pengembangan Masyarakat, ena’ö oi falukha wa’omuso
dödö ba khö Keriso (Luka 4 : 18 – 19). Tatörö tödöda niwa’ö
Yesu ba Matai’o 25 : 40 ; ”Sindruhu niwa’ögu khömi,
 ndrege nilau khö dalifusögu andrö, fondrege zinumana,
ha niha ia, ba khögu no milau da’ö”.
5. Böi göi olifu ita wangandrö salahi zamatörö, i’otarai Presiden
Jokowi irugi zamatörö ba mbanua misa, ena’ö i’odela ira
Lowalangi wolohe fa’ohahau dödö ba nono mbanua, mendrua
manö wanga’aro’ö fahasambua ba tola göi aröu gamuata
Radikalisme/Terorisme ba danöda Indonesia, so dane-dane ba
Pancasila. Ena’ö sifahuwu fefu nono mbanua ba danö Indonesia.

Si manö wehede ni’oroi’ö soroi BPHMS BNKP ba samuza tö

ma’owai ami fefu “Ya’ahowu mbongi Ni’amoni’ö 25 Desember
2019, ba Ya’ahowu wamaondragö Döfi Sibohou 1 Januari 2020”.

Gunungsitoli, 14 Desember 2019

Badan Pekerja Harian Majelis Sinode

Ephorus, Sekum, Bendum,

Pdt. Dr. Tuhoni Telaumbanua Pdt. Dorkas Orienti Daeli, MTh Pdt. H. Zega, STh