Ambilan Minggu, 02 Juli 2023 (IV Dob Trinitatis)

Doding: Haleluya 497:1-2

Topik : Manggoluh Ibagas Hapintoran ampa Holongni Tuhan
Teks : Psalmen 89: 15-18
Parlobeini
Psalmen 89 on aima humbani si Etan halak Esrahi na marisi pasal hatotapan ni Padan ni Naibata hubani si Daud ampa
ginomparni (Israel). Etan aima anak ni si Zerah humbani ginompar ni Juda mangihutkon 1 Kronika 2:6. Igoran do ia
sada halak na pentar (bijaksana) usih songon raja Salomo (1 Raja-raja 5:11). Ia ma salah sada sipandoding pakon sipalu
ogung tombaga na ipabangkit si Daud sanggah mannahkon poti parpadanan bani ianan na dob ipasirsir sanggah partalu
ni halak palistim (1 Kronika 15:19). Bani Psalmen on isobut janah isaksihon do hapintoron pakon uhum ni Jahowa
anjaha ipatalar do hapintoron pakon idop ni uhur-Ni marsundut-sundut (turun-temurun) na lang boi kahuaon ni atap ise
pe halani Ia do Jahowa simada langit, tanoh ampa haganup isini (ayat12).
Tapi lang manongtong goluh ni bangsa ai ibagas harosuh ni Jahowa. Ibahen jolma in do “parmunsuhan” dompak
Jahowa marhitei na lang mandalankon hataNi, iparnalang do padanNi. Gabe tarbuang hu Babel anjaha manaron
manaron. Marmalas ni uhur ma ganup munsuh mangidah sitaronon ni bangsa ai, (bnd. Psalm 89:39-52). Marhitei
Psalmen on, iulaki ma mangalolingkon pasal padan ni Jahowa hubani bangsaNi laho patoguhkon haporsayaon pakon
pangarapan ase “pulih” janah bangkit kembali anjaha sirsir manggoluh ibagas parpadanan (perjanjian) pakon Jahowa.
Hatorangan
1. Jahowa gok ibagas hapintoron pakon uhum, ampa idop ni uhur
Totap do berlaku hapintoron pakon uhum ni Jahowa bahkan in do na gabe onjoloan ni hotakNi (ayat 15). Artini
lang boi iosor age sadihari halani in do na gabe “onjolan” ni paratas-Ni. Age sanggah na manlembang bangsa ai
hubani dalan na lang iharosukon Jahowa, hapintoron pakon uhum (keadilan dan hukum) maningon ipajongjong
haduasi (tidak berdiri sendiri). keadilan lang boi terlepas humbani kebenaran pakon penerapan hukum yang benar,
mamakei timbangan na sintong, perilaku yang adil, jujur dan benar. Totap do hapintoron ibagas pengertian laho
mamareksa pakon manontuhon na benar pakon na salah. Tapi na mangihut isobut do bani teks ni ambilan on aima
idop ni uhur pakon hasintongan. Jadi makna pengertian hapintoron na imaksud ijon lang hape pitah martujuan
laho pasaudkon uhum na sintong (hukum yang benar) tapi itoruskon do hubani haluahon. Halani ai ipadomu ma use
idop ni uhur ni Jahowa pakon hasintongan. Jahowa na gok ibagas hasintongan pakon uhum, Ia do Naibata na
paluahkon, artini Allah yang adil adalah Allah yang membebaskan, memerdekakan dan menyelamatkan. Hapintoron
ni Jahowa adong ibagas makna makna padearhon (memperbaiki), merestorasi (pasuangkon) aha na dob maseda
hinan ase mulak use dear.
2. Marmalas ni uhur ibagas Tuhan
Boi do terjadi bani goluh on, na tarhamalaskon jolma aima olat ni na masa bani dirini do hassa. Boi do homa lepak
mangindahi sumber malas ni uhur, songon na ihorjahon bangsa Israel na domma laho hubani naibata-naibata na
legan, mangunsagahkon gogoh na hun dunia on mambahen madabuh sidea hubagas sitaronon bahkan tarbuang,
marsik anjaha marsitaronon. Hasomalan ni jolma marolob-olob gati subjektif, halani jumpah na sininta ampa sinura,
tapi sanggah situasi na idompakkon lang songon na iarapkon ijai ma panorangni madabuh hubani pusok ni uhur,
tonjan janah mandolei. Malas ni uhur ni halak na porsaya seng saguru bani dirini, tapi Jahowa do na gabe sumber ni
malas ni uhur na sejati. Tangkas do isobut bani teks ni ambilan on, martuah ma bangsa na mambotoh marolob-olob
na mardalan ibagas sondang ni bohi ni Jahowa, (ayat 16-17a). Hata “mambotoh marolob-olob” ijon laho
mangkatahon keyakinan pakon keberanian na domma jonam bani dirini, malas ni uhur na humbani Jahowa do na
sihol arapkonon janah siparayakon.
3. Naibata do hagogohan ampa hasangapon bani jolma
Keterbatasan pakon hagalekon ni jolma do mambahen ase maningon marsigantung hubani Naibata. Lang adong
jolma na gokan dear (no body’s perfect), secara fisik, emosi pakon intelektual jolma gok ibagas keterbatasan. Na
porlu aima aha do na sihol horjahonon ni jolma na domma mambotoh pakon menyadari hagalekonni ibagas goluhni.
Sirsir mangkawah dompak Jahowa na totap manogu-nogu janah mambere idop ni uhurNi. Ase lang adong alasan
bani jolma in ase lang marsigantung hubani Jahowa, halani ibagas Ia do jumpah hagogohan ampa hasangapon.
Mangkasiholhon hagogohan pakon hasangapon ibagas Tuhan, lang na hun dunia on, (ayat 18).
Panutup
Buah ni hapintoron ai ma damei, anjaha pangkorhon ni habonaron ai ma hasonangan ronsi sadokah ni dokahni.
Marianan do halak na sonai ai bani ianan hadameion, bani ianan na sonang, ampa ianan parsaranan. (bnd. Jesaya
32:17-18). Adong tolu na porlu mangihutkon ambilan on, aima : mengenal yang benar, tinggal di dalam yang benar,
dan berbuah di dalam yang benar. Pitah marhitei na orod bani Tuhan janah porsaya do boi hita mananda hasintongan
anjaha marianan bani hasintongan. Sungkup do idop ni uhur pakon hagogohon ni Tuhan laho pasuangkon hagalekon ni
halak na sirsir porsaya, (2 Kor.12:9). Halani ai barang ise na manangihon hata ni Tuhan anjaha porsaya, das ma bani
hagoluhan na sadokah ni dokahni; seng hu paruhuman, tapi domma mandipar ia humbani hamateian hu hagoluhan (Joh.
5:24). On ma jaminan bani halak na sirsir manggoluh ibagas hapintoron ampa holong ni Tuhan. Amen