Ambilan Minggu VI Dob Trinitatis, 16 Juli 2023

Nats : Psalmen 65:1-9

Usul Doding : Haleluya No.503:1-3
Topik Mingguan : “Panramothonon ni Naibata bani bangsa Pinilih-Ni”
=======================================================
I. Parlobeini
Buei do alasan banta marmalas ni uhur janah mamuji Tuhan, aima halani
panramothonon ni Naibata hubanta bei. Anggo itulimati hita, humbani
panompaon nari, tangkas do bahasa inisiatif ni Naibata do na manjadihon
haganup na adong sonai age hita jolma. Mamungkah itotaphon janah
ibagahkon Naibata mamilih bangsa Israel gabe bangsa hinaholongan ni uhur ni
Naibata, aima mungkah ni na totap ijolom Naibata ronsi sadarion. Panramotion
ni Naibata lang singgan bangsa Israel tumang tapi das do hubani haganup halak
na porsaya bani sab tanoh on. Sonaha do Raja Daud manggambarhon
panramotion ni Naibata ai, sonaha do Raja Daud manggambarhon respons ni
halak na hinaholongan ni Naibata, janah sonaha do pangkorhon ni panramotion
ni Naibata i dunia on? Torang isobut marhitei Psalmen 65:1-9 on.
II. Hatoranganni
Marhitei Psalmen on Raja Daud mangakuhon bahasa pitah Naibata do
hansa na talup sipujion ampa galaron bagah-bagah (ayat 2). Mase? Halani
Naibata aima sibalosi tonggo. Artini, ihatengerhon uhur ni Raja Daud do ibagas
haporsayaon ni bahasa aha naitonggohon ni, pangindoan, elek-elek, doruh-
doruh ni naipadas ibagas tonggo, itangihon Naibata do ai. Marlegan pakon
sisombah-sombahon ni bangsa na legan, na lang boi manangihon tonggo
tarlobih use mambalosi tonggo halani jadi-jadian ni Naibata naibahen
sisombahon ni sidea. Marhiteihon ni aima lang pitah Raja Daud tumang na roh
hubani Naibata, tapi sagala na manggoluh, roh hubani Naibata, halani aha
naiporluhon ni, dong do ai jumpahsi humbani Naibata. Raja Daud mambahen
perbandingan, mangindo hubani Naibata pakon mangindo hubani naibata-
nibata nalegan, pitah bani Naibata do hansa jumpah aha na pinindahan ni
haganup na manggoluh, aima ase isobut hubani Naibata do roh sagala na
manggoluh (ayat 3).
 Dob isobut janah iakuhon Raja Daud bahasa Naibata do sitangihon tonggo,
iakui do homa bahasa dong do sasintong ni na mangambati tonggo pangindoan
ni aima banggal ni dousa ni. Dousa do na manrungkub ahu, nini Raja Daud
mangakuhon, artini sadokah ibagas dousa ope ia, lang adong naboi jumpahsi
humbani Tuhan, halani lang talup ia mandompakhon Naibata, lang talup ia
mangindo hubani Naibata halani hasalahan ampa habutakon ni ibagas dousa na
manrungkubsi (ayat 4). Tapi aha naibahen Naibata? Bagah-bagah ni humbani
mungkahni dompak bangsa-Ni, ijolom Naibata do ai poltik janah lang
marubah, aima ase ihatahon ni Martuah ma halak na pinilih-Mu, artini, isadari
Raja Daud do pinilih ni Naibata do ia ase boi gabe raja, tapi jabatan ni ai lang
boi paluahkon ia humbani dousa ni, pitah idop ni uhur ni Naibata, na palopas ia
marianan i rumah-Ni na mapansing. Hunjon boi sobutonta, gabe ruji-ruji na
bagas banta selaku halak Kristen, menurut ham, talup do ham roh
manjumpahkon Naibata? Talup do ham roh hu gareja? Talup do ham mangindo
pangindoanmu hubani Tuhan? Anggo talup do, ahama na mambahen talup ham
mangindo hubani Tuhan? Pitah halani idingat Naibata do bagah-bagah-Ni
hubani na pinilih-Ni, mambahen talup hita mangindo ampa mandohori Naibata.
Anggo hahurangan ampa dousanta do naidingat Naibata, seng talup hita
mandohori Naibata halani ai maningon malas tumang do uhur roh hu alaman-
Ni, ai holong ni na tarsulur in do na pataluphon janah palopas hita, ipabosur
ibagas rumah-Ni na maapansing in (ayat 5).
Luar biasa tumang do Raja Daud manggambarhon hinajenges ni
pambahenan ni Naibata, ai Naibata do tongon na mambahen bosur na pinilih-
Ni, marhatunggungon, martuah, janah mangidah namadear ibagas haganup
pambahenan ni Naibata. Tongon, gok ibagas kuasa-Ni do ganup tanoh on ampa
haganup isini. Anggo Naibata pajonamhon, lang adong naboi mandugur. Porini
pe marhasak gilumbang ni laut, ipaminop do ai domu hubani hapintoron-Ni.
Ase haganup bangsa na marsombah huBani, margogoh mamuji pasnagapkon
Ia, marhitei horja na madear bani pargoluhan ni siganup ari (ayat 7-8). Halani
pambahenan ni Naibata hubani na pinilih-Ni, gabe mabiar ma halak das hu
ujung ni tanoh on. Artini, na madear na binahen ni Naibata, panghaholongi ni
bani na pinilih-Ni, idop ni uhur-Ni bani bangsa-Ni ase halak na i ujung ni tanoh
on pe mangidah halongangan nabinahen ni Naibata. Maningon do gabe pasu-
pasu goluh ni na pinilihni Naibata, maningon ibere do dirini ipakei Naibata
laho manaksihon habujuron ni Naibata, gabe marolob-olob ma haganup halak
hun hapoltakan das hu hasundutan, Haleluya!
III. Hahonaanni
1. Tangkas ma banta marhitei Ambilan on, bahasa Naibata idingat do haganup
nabinagahkonni, ase sonai ma hita ibagas goluhta on. Anggo adong bagah-
bagah ta bani Naibata seng na mambayar hita, seng na marutang hita bani
Naibata. Tapi ihamalaskon uhurta dear layak ni Naibata janah hita pe igalari
hita ma bagah-bagah ta bani Naibata. Maningon tangkas banta, manggalar
bagah-bagah sedo halani naituntut Naibata ipaulak hita aha nadob ijalo hita
humbani tapi halani malas tumang uhurta, ibalosi Tuhan tonggo ta,
iramothon goluhta, ipasirsir na porlu banta. Ase malas ma uhurta manggalari
bagah-bagah ta bani Tuhan Naibata. Maningon meningkat do persembahan
bulanan ta, perpuluhanta, galangan ta, banggal ni uhurta, sedo bani jolma ai
bani Tuhan do. Janah maningon ihaporsayai uhurta, lang talup hita sasintong
ni mamberehkon aha nadong banta bani Tuhan halani banggal ni dousanta,
halani ai maningon do hape ibagas hapansingon hita homa manggalari
bagah-bagah ta.
2. Naibata do mambahen hita bosur marhitei idop ni uhur-Ni humbani rumah
ni namapansing in. Ase maringgas ni uhur ma hita roh manjumpahkon
Naibata irumah-Ni namapansing, ai pitah halak na mananda janah sirsir
mansopothon dousa ni, na bosur humbani pasu-pasu-Ni. Janah halani
Naibata do na mambahen hita martuah ampa marhatunggungon, patuduhkon
hita goluh na patunggunghon goran ni Tuhan. Porini salah pe hita, lang
halani i sangaja janah podas ma isopothon hita hubani Tuhan. Ase
margogoh hita patunggunghon horja ni Tuhan, patunggunghon rumah-Ni
namapansing in, patunggunghon hasoman jolma na hinaholongan ni
Naibata. Dingat hita ma na tolu on: bosur do hita humbani rumah ni
Naibata na mapansing in, martuah do hita ibagas bagah-bagah ni
Naibata, janah marhatunggongon do hita ibagas hapintoron ni Naibata.
3. Tambahi hita......
(Pdt Grubert Kant.D.Manihuruk, S.Th)