PARTORDING NI PARMINGGUON

DI MINGGU V DUNG TRINITATIS

 Ev: Rom.7 : 15 - 25  Ep: Angka Ende 2 : 8 - 13

TOPIK :

MANGHALOMOHON PATIK NI DEBATA

HURIA KRISTEN BATAK PROTESTAN

MINGGU, 09 Juli 2023

1. Marende BE HKBP No. 11 : 1-2 + 4 “AHA MA ENDEHONONHU”
BL 185
♫♪♫
Aha ma endehonongku, asa pujionhu Ho?
Ale Tuhan Debatangku, sai urupi au gogo
Ai ndang tarpajojor ahu, asi ni rohaM di ahu
Ala ni hupuji Ho, tung marribu hali do.
♫♪♫
Sai sungguli ma rohangku, mangendehon gogoMi
Dohot asi ni rohaMu, ro di habasaronMi
Ai i do dihatindanghon tondi dohot pamatangku
Ala ni hupuji Ho, tung marribu hali do.
…… (Musik - Jongjong) ……
♫♪♫
Haholongon, habasaron, hata hangoluan i
Dohot angka haporsuhon, i do parhiteanMi
Manogihon au anakMu, masuk tu harajaonMu
Ala ni hupuji Ho, tung marribu hali do.

2. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Parbadia na tumompa langit dohot tano
on. Amen. Nunga dipabotohon Ibana tu ho, ale jolma, manang aha na
denggan jala manang aha na niluluan ni Jahowa sian ho, i ma na
mangulahon uhum sambing dohot holong ni roha di habasaon, jala
marpangalaho haserepon maradophon Debatam. Haleluya!
H : (Mangendehon): BE. HKBP No. 852 : 1 ”HALELUYA HKBP (3x)
BL 852
Haleluya, Haleluya, Haleluya
U : Martangiang ma hita! Ale Tuhan Debata, Amanami na di banua
ginjang! Sai lehon ma tu hami roha na togu, na badia, pingkiran na
denggan dohot roha na ringgas pasauthon ulaon na denggan. Sai lehon
dame tu hami asa sonang hami mangolu di bagasan pangondingiM, sai
marsigantung tu HataM ma hami maradophon saluhut musunami. Sai

1
 ramoti jala pargogoi ma hami marhitehite Tuhan Jesus Kristus
Tuhannami. Amen.
(Hundul )
3. Marende BE No. 697 : 3 “MOLO HO DO HUIHUTHON” BL 697
♫♪♫
Hupelehon ma diringku mangihuthon lomoMi
Ndada be na olo salpu na manggohi rohangki
Ho tongtong ihuthonongku, Jesus na palua au
Ho sambing do oloanhu ala nii martua au.

4. PATIK:
U : Tatangihon ma Patik ni Debata di minggu sadari on, i ma PATIK V –
X. Patik Palimahon : Ingkon pasangaponmu do natorasmu asa martua
ho, jala leleng mangolu di tano na nilehon ni Jahowa Debatam di ho.
H : Patik Paonomhon : Unang ho mamunu!
U : Patik Papituhon : Unang ho mangalangkup!
H : Patik Paualuhon :Unang ho manangko!
U : Patik Pasiahon : Unang ho olo manghatindanghon hata na so tutu
maralohon dongan jolma.
H : Patik Pasampuluhon : Ndang jadi haliangan ni roham bagas ni
donganmu, ndang jadi haliangan ni roham dongan saripe ni
donganmu, manang naposona baoa manang naposona boruboru,
manang lombuna manang hodana, manang dia pe ugasan ni
donganmu.
U : Ima sahatna. Antong, rap mangido gogo ma hita sian Tuhan Debata!
U+H : Ale Tuhan Debata, sai pargogoi ma hami mangulahon na hombar
tu PatikMi. Amen

5. Marende BE No. 388 : 2 - 3 “SO MA JOLO JALA ” BL 257

♫♪♫
Nunga leleng ho so sonang, guga nasa rohami
Sai tarponjot dihilala ho di angka dalanmi
Mulak ma tu Tuhan Jesus Sipalua tondimi
Ndang ditulak ho, na dangol, boan nasa dosami.
2
 (Jongjong)
♫♪♫
Tung sibolis do manggohi rohami, na loja i
Tung maheu do rohamu di baen parungkilon i
Mulak ma tu Tuhan Jesus Sipalua tondimi
Ndang ditulak ho, na dangol, boan nasa dosami.

6. TANGIANG MANOPOTI DOSA :

U : Tatopoti ma dosanta, martangiang ma hita: Ale Tuhan Debata, Ama ni
Tuhannami Jesus Kristus, Ho do Debata pargogo na so hatudosan,
sitompa nasa na adong, paruhum na tigor, na manguhumi jolma
manisia! Na ro do hami tu joloM manopoti dosanami, angka na huula
hami marhite sian pangalaosionnami di PatikMu, i ma marhite sian
tubutubu ni rohanami na roa i, nang sian panghataionnami na so ture,
ro di pangoloionnami di hisaphisap ni rohanami. Na tama situtu do
hona uhum hami ala ni dosanami i, alai na tarsolsol bagi do hami
nuaeng ala ni i. Asi ma rohaM di hami, ale Debatanami.
Pardengganbasa jala Parasi roha do Ho ala ni Anak haholongan ni
rohaM, Tuhan Jesus Kristus Tuhannami. Sai sesa ma dosanami
saluhutna, jala suru ma Tondi Parbadia tu rohanami be, asa tarbahen
hami mangoloi Ho di bagasan hatigoran dohot habadiaon, gabe sahat
hami tu hangoluan na so ra suda, na pinarbagabagaM di angka na
porsea di AnakMu, Tuhan Jesus Kristus, Tuhannami. Amen.

Tabege ma bagabaga taringot tu hasesaan ni dosa: Satongkin do

Hutadingkon ho, alai papungupunguonHu ma ho muse marhitehite
angka asi ni roha godang! Tagan di parpiar ni murukHu Hutabunihon
bohingKu satongkin maradophon ho, alai marhitehite dengganbasa
salelenglelengna asianHu ho, ninna Jahowa Sipalua ho. Hasangapon
ma di Debata na di ginjang!

U + H : Amen (Hundul)

7. Marende BE HKBP No. 467 : 1 - 2 “ASI NI ROHAM HUPUJI”

BL 315
♫♪♫
Asi ni rohaM hupuji ala Ho manobus au
3
 Dipaias Ho rohangku, gabe soranganMu au
IngananMu rohanami, TondiMi manggohi i
Pangke dohot ngolunami gabe ulaulaMi.
♫♪♫
Sai ramoti ma rohangku, asa boi gohanMu au
Sai mabaor ma pasupasu nang marhite sian au
IngananMu rohanami, TondiMi manggohi i
Pangke dohot ngolunami gabe ulaulaMi.

8. E P I S T E L:
U : Tangihon hamu (Tatangihon) ma Hata ni Debata turpuk Epistel di
Minggunta sadari on, tarsurat Angka Ende 2 : 8 - 13, Ndi, rupa soara
ni hasudungan ni rohangku do i! Ida ma, nunga ro ibana maringkat
sian angka dolok, marhajingjang di atas ni angka robean.
H : Tudos do hasudungan ni rohangku tu sada hije, manang tu anak
ni ursa. Ida ma, jongjong do ibana di balik ni dorpi, mandulo sian
jandela, marlinanglinang ibana mandulo sian tarali.
U : Dung i manghuling ma hasudungan ni rohangku, didok ma mandok
ahu: “Hehe ma ho, ale hasoloan ni rohangku, na mauliutus, jala ruar
ma ho!
H : Ai ida ma, nunga salpu partaonan ngali ni ari, nunga mansohot
dohot ari udan.
U : Nunga pola mullop angka bungabunga di ladang, nunga jumpang
tingki parendeon, nunga pola tarbege soara ni anduhur titi di tanonta i.
H : Parbue ni hau ara pe nunga mamungka matoras, jala marbunga
ia hau anggur, jala maruap na angur. Hehe ma ho, ale hasoloan ni
rohangku, na mauliutus, jala ruar ma ho!
U : I do sahatna. Martua do angka na tumangihon Hata ni Debata jala na
umpeopsa. Amen.

9. Marende BE HKBP No. 355 : 1 + 5 “MALUNGUN DO

ROHANGKINON” BL 173
♫♪♫
Malungun do rohangkinon, di ariMi, o Tuhan
Andigan jumpang haroroM, manopot hasudungan
Ni rohaMi ai ala nii, sonang do rohanami, hataM huingot hami
.….. (Jongjong) ……
4
 ♫♪♫
Sai ro ma Ho tu hami on, ungkap do rohanami
Naeng ingananmu i tongtong, pasaut pangeleknami
Di haroroM tu hami on, marolopolop hami, Ho pasangaponnami.

10. MANGHATINDANGHON HAPORSEAON:

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok:
H : Ahu Porsea di Debata Jahowa….. d.u. (Hundul)
11. Tingting :
12. Marende BE HKBP No. 750 : 1… “TU TONDINGKON O JESUS” B
L 750 (Pelean Ia, Ib)
♫♪♫
Tu tondingkon O Jesus, patolhas HataMi
Asa sonang rohangku unang sai ganggu i
Reff : Rohangkinon dohot tondingkon naeng tumangihon Ho
Dison do au NaposoMon rade tumangihon Ho.
♫♪♫
Parbadiai ma ahu jolma na ramun i
Pangke ma au Tuhanku manjou na lilu i
Reff : Rohangkinon . . . .
------ Musik -------
♫♪♫
Rohangkinon O Jesus ndang au nampuna i
Sandok ngolungku Jesus sahat tu Ho ma i
Reff : Rohangkinon . . . .

13. J A M I T A: Rom. 7 : 15 - 25
14. Marende BE. HKBP No. 425 : 2… ”BATU MAMAK DI AU ON” BL
285
(Pelean II)
♫♪♫
Na nidok ni patik i, maol diula jolma i
Nang na ringgas situtu, tangis ala naeng burju
Nda tung sesa dosa i, baenon ni na songon i.
♫♪♫
Ipe, hehe au nama, lao tu dolok Golgata
5
 Tu hau pinarsilangMi, ale Jesus, Tuhanhi
Unang tulak sian i au na marsak roha i.
----- Musik -----
♫♪♫
Tung saleleng au dison, manang tos pe hosangkon
Molo ro ajalhu i, nang diparuhuman i
Batu mamak di au on, sai di Ho ma Tondingkon.

15. Tangiang Pelean: ( Jongjong )

U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.
Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.
H : (Mangendehon) BE. HKBP No. 204 : 2 “NDANG
TADINGHONONHU HO” BL 73
♫♪♫
Nasa na nilehonMi, tondi ro di pamatanghu
Hosa dohot gogongki, ro di saluhut artangku
Hupasahat i tu Ho, na so unsatonhu do
U : Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
H : (Mangendehon): BE HKBP No. 841 : 1 “AI HO DO NAMPUNA
HARAJAON” BL 841
♫♪♫
Ai Ho do nampuna harajaon, dohot hagogoon
ro di hasangapon, saleleng ni lelengna, Amen
U : Tangiang Pasupasu

6
H : (Mangendehon ) BE No. 845 : 1 “AMEN, AMEN, AMEN” BL 845
Amen, Amen, Amen