Bahan Sermon HKBP Ressort Panai Hilir Minggu Palmarum, 2 April 2023

PINUJI MA NA RO DIBAGASAN TUHAN I (Markus 11-1-11)

Patujolo
Hosianna! Pinuji ma na ro marhitehite goar ni Tuhan i" (ay.9). On ma soara las ni
roha na dipasahat angka natorop na paihutihut Jesus mamasuhi huta Jerusalem. Las situtu
roha nasida jala marhite soara na gogo didok nasida ma: "Pinuji ma na ro marhitehite goar ni
Tuhan i." Ndang holan marsoara na gogo nasida, alai dipataridahon nasida do las ni rohana
marhite na pahembanghon ulosnasida di dalan na dilaosi Jesus. Saluhutna i dipatupa nasida
laho patuduhon balga ni las ni roha nasida i. Ala nunga tangkas diida nasida angka tanda
halongangan na dipatupa Jesus: na pampang boi mardalan, na mapitung boi marnida, na
huliton boi malum, gariada tahe na mate boi dipangolu. Saluhutna i lam patogu roha ni
natorop i manjanghon Jesus, Ibana do Mesias (Kristus) naung leleng dipaimaima nasida.
Alani do umbahen na las situtu roha nasida jala di bagasan las ni roha i lohot do nang
panghirimon di haroro ni Mesias (Kristus) jala saluhut na binahen nasida i dipatupa nasida
songon panomunomuon tu haroro ni Mesias i. Marolopolop do roha nasida, ala marhapataran
ma panghirimon nasida nasailaon taringot tu haroro ni Mesias i. Pos roha nasida jala
manghirim situtu do roha nasida na pajongjongon ni Jesus ma harajaonNa di Jerusalem di
pesta Paska naung manjonok i. Ido umbahen na gogo nasida manjoujouhon: "Pinuji ma na ro
marhitehite goar ni Tuhan i." Dienet nasida do pandohan i sian na tarsurat di Psalmen 118:26
na marisihon barita taringot tu haroro ni Mesias. Alani tung singkop ma saluhutna martudu-
tudu tu haroro ni Jesus songon Mesias.
Hatorangan
Tutu nunga disuriranghon Panurirang Sakaria taringot tu habobongot ni Jesus tu huta
Jerusalem. Ai didok do di Sakaria 9:9 "Mariaia situtu ma ho ale boru Sion, marolopolop ma
ho ale boru Jerusalem! Ida ma, na ro ma rajam tumopot ho, partigor ibana jala siparmonang;
na serep do rohana jala marsihundul di halode dohot di anak ni halode inaina." Nunga
songgop jala patar be panurirangon i. Marhite habobongotNa tu huta Jerusalem jala
marsihundul di halode dipapatar jala diungkap Jesus

do diriNa songon Raja Israel dohot Mesias na diparbagabaga i.

Nunga diboto Jesus na ingkon marujung nama ulaonNa di na dimasuhi Ibana huta Jerusalem
jala di hatihai ma pangarimpunan ni ulaonNa songon Mesias (Kristus). Ido umbahen
dipapatar Ibana hadirionNa songon Raja dohot Mesias hombar tu naung disuriranghon
panurirang Sakaria. Molo nasailaon sai buni do i alai on ma ombasna dipapatar saluhutna.
Molo nasailaon ditonahon do tu angka siseanNa asa unang dipaboa tu natorop angka
halongangan na pinatupaNa, alai di partingkian i ndang adong oraora manundati angka
natorop laho manjoujouhon dohot manghatindanghon Jesus do Raja Mesias na pinaimaima i.
Gariada uju ro angka Parise mamincang jala mandok: "Orai ma antong angka siseanMi,
Guru," laos dialusi Jesus ma Parise i: "Hudok ma di hamu: Aut mauhom nasida, joujou ma
angka batu" (Luk. 19: 39-40). Ditulak Jesus do hata ni Parise i ala on ma tingkina
papataronNa diriNa songon Raja dohot Mesias na diparbagabaga i. On ma tingkina
marsangap ma Jesus Mesias i di jolo ni saluhut.
Alai hurang sintong do panghantusion ni torop halak Jahudi taringot tu panurirangon
na dipasahat si Sakaria. Hape asing do pangantusion nasida taringot tu Mesias i. Dihirim roha
nasida do naeng jongjong Jesus laho paojakhon hatimbulon dohot hamuliaon ni Israel
sumuang muse songon di na robi i, ima songon na masa di harajaon ni si Daud. Ido
panghirimon nasida taringot tu ha-Mesias-on ni Jesus i. Dihirim nasida do asa jongjong jala
dipauli muse parik ni huta Jerusalem, lam tu timbona jala lam tu toguna, huhut asa boi ma
nian Jerusalem gabe "pusat harajaon" manggantihon harajaon Romawi. Dihirim nasida do
Jesus jongjong gabe raja na marhuaso jala margogo manaluhon pamarenta Romawi.
 Asa sian hatorangan i boi ma idaonta andul jala marasing do pangantusion nasida
taringot tu Mesias i. Ndang sintong jala bagas diantusi nasida na disuriranghon si Sakaria.
Tutu Raja jala Mesias do Jesus, alai ndang harajaon portibi na naeng pajongjongonNa. Alani
do umbahen na marsihundul di halode do Ibana mamongoti huta Jerusalem. Ai serep do
rohana. Somalna halode dihunduli angka na pogos do, alai anggo na mora manang raja somal
do manghunduli hoda. Ido dalan na dipillit Jesus laho patigor pangantusion nasida taringot tu
harajaon ni Mesias i. Harajaon na pinajongjongNa ima harajaon na gok hadameon. Lam
tangkas ma di ayat 41-44 ondolan na pinasahat ni Jesus paboa ndada laho pajongjong
harajaon di Jerusalem haroroNa, ai ndada sian portibi on harajaonNa.

Di saluhut hatorangan i gabe tarhirim ma torop sian bangso Jahudi, tarlumobi pangisi
ni huta Jerusalem. Laos gabe ditulak nasida ma Jesus. Di ujungna gabe manggogo do nasida
mandok: "parsilangkon ma!" Ndang apala leleng sian hatiha diolopolophon nasida haroro ni
Jesus tu huta Jerusalem, laos gabe direherehei nasida ma muse Ibana. Andul situtu ma na
masa i. Pamangan nasida do mamujimuji Jesus uju mamasuhi Jerusalem, alai laos pamangan
i do muse na mangaleai Ibana huhut mansoadahon Ibana. Nasida do na mandok: "Pinuji ma
na ro marhitehite goar ni Tuhan i" alai laos nasida do muse na mandok: "parsilangkon ma!"
Masa do si songon i ala hurang bagas jala ndang sintong panandaion nasida taringot tu Jesus,
huhut do hurang bagas jala ndang sintong panandaion nasida taringot tu angka panurirangon
na dipasahat di Padan na Robi. Na boi masa do si songon i ala holan pingkiranna do
dipangasahon nasida laho mangantusi pambahenan ni Debata di portibi on. Na boi masa do si
songon i ala ndang jongjong nasida songon sisean na rade manangihon jala na rade marsiajar
sian pangajarion ni Jesus dohot angka panurirang taringot tu haroro ni Mesias.
Siparhusorhusoron
Antong boha ma hita? Nunga tajaha buku na badia i (Bibel) jala nunga tatangihon
angka jamita na patoranghon taringot tu ulaon ni Jesus di tongatonga ni portibi on. Udut tusi
sai adong do pengalamanta pribadi na mar-Tuhan i na manogunogu hita asa lam bagas
mananda Ibana. Naeng ma saluhutna i lam manosoi rohanta mamuji Ibana jala
mangolopolophon huhut mandok: "Pinuji ma na ro marhitehite goar ni Tuhan i"
Naeng ma saluhut na i lam mangonjar rohanta tongtong manghatindanghon Ibana asa
lam torop na mambege jala mamboto angka ulaonNa huhut asa lam torop na manghaporseai
jala mangihuthon Ibana. Asa marsomba tu goar ni Jesus nasa ulu ni tot jala nasa na marsoara
marhatopothon: Jesus Kristus do Tuhan" (Pil. 2:10-11).
Dipatau Tuhan i do hita membege, marnida jala manghilalahon angka pambahenan ni
Tuhan i di portibi on nang di ngolunta, naeng ma saluhutna i lam patogu haporseaonta tu
Ibana. Nang pe sipata angka na masa di pardalanan ni ngolunta ndang songon na tapingkiri
jala na ta- hirim, alai unang ma i gabe mambahen sumurut rohanta mamuji Ibana. Alai naeng
taauhon ma songon na didok apostel Paulus: "Alai taboto do, saluhutna do manumpak tu na
denggan di angka na marholong ni roha di Debata, angka na jinouNa sian tahina hian" (Rom
8:28). Asa naeng pos rohanta, angka las ni roha nang angka arsak ni toha, saluhut nai di
pangke Tuhan do laho mamasumasu hita. Antong hot ma hita porsea tu Ibana saleleng hita
mangolu. Manang aha pe na masa ta puji jala ta pasangap ma goarNa na badia i. Amen

Cal. Pdt. Frido Juniper Nainggolan