TALIPAUN

Dikarang ulih; Jugam Pukung

Rindang amat Umang sekumbang ke udah dibeli ke apai iya talipaun
chulik seharinya. Ati diri iya meh besehari-sehari nyulik talipaun iya sambil
duduk nyandih ba tisi pintu rumah sida iya. Ama tuchum, ama ketawa gak
Umang pemuas ke nyulik talipaun iya nya. Bisi endar utai ngasuh iya rindang
dalam talipaun nya.
Nama utai ngasuh dek ketawa kakak? Nyau baka orang gila dek peda aku
sekumbang ke udah bisi rinpun chulik beli aba nya, pia ku menyadi biak
Umang, Christy nanya kakak iya sambil nundi ngumbai siku nya baka orang
gila.
Christy puas merati ke ulah Umang sekumbang ke udah dibeli ke apai
iya talipaun chulik sarinya. Endang sigi aruh iya dibeli ke talipaun gak
Umang. Kemaya tudah tuai kala bisi talipaun baka anembiak bukai ke
serebak umur ngau iya. Ketegal penyeranta ngau penusah idup sida sebilik
ngasuh pendiau Umang baka ke bebida ari anak orang bukai. Anak orang
bukai dalam setaun mendua tiga kali bebeli ke talipaun baru. Nyadi enggi
Umang, anang ke bisi kena betukar meli talipaun ninting taun baka enggi
orang, talipaun pan tudah tuai nadai. Sekumbang apai Umang ke patah kaki
kena tinggang kayu lebuh ke kereja numbang ba Kem Shin Yang, nadai agi
meh orang ke ngereja ngiga belanja ke sida Umang sebilik. Seninjik endar
gak bisi duit insurans apai Umang kena sida sebilik ngidup kediri. Indai
Umang, nasib endar gak pintar begiga ke duit enggau chara bejual ke asil
kebun ninting hari ba tamu. Nya meh kena sida Umang ngidup kediri
sekumbang apai Umang ke enda dapat ngereja agi.
Sibuk udu dek tu. Kaban kami meh nya. Sibuk endar merati ke pengawa
orang. Uji bup dek nya bacha. Nama peresa kita nyau ka semak deh?, pia ku
Umang nimbal. Renjan timbal Umang, baka ke ringat ke siku nya nanya iya.
Enggai madah enda ibuh gak, ka bebuya ringat Christy ninga saut menyadi
tuai iya nya.
Berumban tudah Christy angkat ari bilik besai, ngemai bup enggau
semua perengka kena iya belajar tama ke bilik. Ni enda tudah Christy ka
enda ringat ninga jaku timbal siku nya balat udu kasar didinga iya.
Ngelamatu manah amat kaul seduai iya Umang sebedau Umang bisi
talipaun. Siku nya meh ke suah ngajar iya ngaga tanya Matematik laban siku
nya ke pandai agi Matematik. Ngelamatu, enti ngereja utai ba rumah, nadai

kala neju ke pangan diri siku aja seduai iya ngereja. Laban ke seduai iya
Umang aja diri menyadi, semampai besaup belama meh seduai iya ngereja
pengawa ba rumah enti lebuh indai seduai empai pulai ari pasar. Enti siku
masu gari, siku nyembui iya gak. Enti siku nyapu, siku ngemop gak. Bela
begulai seduai ngereja pengawa, nadai nemu belak-lak ke pangan diri. Tang,
sekumbang udah bisi talipaun, nadai agi Umang enggau iya ngereja
pengawa nya. Kediri tudah tuai meh nyapu bilik, ngemop, nuchi pinggai,
bebela ngau ngereja utai bukai. Enti ngarap ke Umang, sigi enda makai sida
sebilik. Indah gari Umang, Christy masu ke iya. Pinggai, enggi Umang, teju ke
ba dalam singki aja enti udah makai. Jauh ke nemu masu lalu ngulu ke
menyadi iya ngintu utai ba dapur. Dulu agi iya ngerumban talipaun iya. Udah
gak apai seduai iya enda dapat. Mengkang garing-garing aja apai Umang
sekumbang ke udah patah kaki, nadai dapat ngangkat lalu. Ditambah ke
mega enggau penyakit ampus iya. Makai ulih nyapi, enti ka kemi ulih
nyendia ke dulu hos. Enti tinggal indai seduai nadai ba rumah, Christy
enggau Umang meh ke ngintu apai seduai iya. Tang, diatu, mina Christy aja
meh ke ngintu apai iya nya.
Ting...tong... ting... tong..., bebunyi jam dinding sida Umang nanda ke
udah pukul dua lemai.
Mupuk dulu aku kakak, nyau udah laun tu. Legi anu cikgu aku pama laun
tama kelas. Enti mak dah datai legi, padah ngagai iya, udah panduk aku
magang lauk. Aba legi peda dek kakak, enti jam udah chukup legi asuh empa
iya ubat iya, rauh-rauh Christy ari baruh rumah madah ke Umang ti duduk
bayam talipaun iya ba bilik besai. Berumban angkih tudah tuai masuk ke
kasut laban bisi kelas tambah lemai nya.
Auk, auk, nemu kami. Enda ibuh rerauh dek nya diak. Enda tuli aku, pia ku
Umang nyaut sambil mata iya mimit nadai meh lari ngelengka ke talipaun ti
dipigai iya nya. Kada ke bisi didinga iya endar pesan menyadi iya Christy
tadi. Anang aja iya semina au belau aja ngai ke kumbai siku nyin enda ninga.
Nyau semak pukul empat lemai, empai gak Indai Umang pulai ari
pasar. Enti nitih ke baka selama, pukul tiga tadi udah pulai iya ari pasar.
Engka agi mayuh empai dibeli orang utai dijual iya tadi, nya kini kebuah iya
lalu empai ka pulai.
Umang, ooooo Umang, ambi ke aba dulu spray ampus aba ba atas mija
nyin, pia ku apai Umang rauh-rauh ari dalam bilik, minta ambi ke Umang
spray ampus iya ti diengkah Christy atas mija maya nyapi iya makai tadi.

Enda ingat engkah Christy ba tisi katil iya baru tadi laban ke berumban
besikap nurun ke sekula baru.
Au aba, anang guai, memekang tu. Agi malas mesej kaban aku tu, pia ku
saut Umang ari bilik besai. Mata iya enda meleka ari talipaun sambil jari iya
nyulik-penyulik indah baka orang ke nyulik aising kek. Kaki iya dilipat ke iya
lalu dipanggai ba atas mija, ba tengah bilik besai sida iya. Kuit-kuit ujung
kaki orang menua nitih ke tiun lagu ke didinga iya ari earphone talipaun iya,
enda nyalah-nyalah baka kaki bos besai ti benung duduk ba dalam ofis. Enda
lama udah nya, ngagau baru gak apai Umang ari bilik.
Umangggg, jampat agi kehhhh, nyau makin rapas nyawa apai Umang.
Kada didinga Umang nya tadi. Iya gak Umang bekena ke earphone, lagu
gak dipasang iya inggar-inggar.
Apin lama udah nya, datai Indai Umang ari pasar. Seput-seput tudah
tuai niki anak tangga rumah sida iya sambil ngengkah ke bakul sayur ba tisi
pintu. Agi bedau tubah sayur ti dijual tudah tuai laban ke nadai mayuh orang
meli ba pasar tadi.
Ni Endut udah nurun sekula tadi Mang? Aba dek udah makai?, dudi indai
Umang nuduk kediri, dulu agi iya nanya ke apai Umang enggau menyadi
Umang, Christy ti dikangau sida iya Endut ba rumah.
Udah. Aba dia meh iya, pandak aja saut Umang baka ke enggai nyaut
tanya indai iya.
Tama indai Umang ke bilik lalu ngingkas ke kandek duit iya lalu
diengkah ba atas mija mit betunga enggau katil seduai iya apai Umang.
Udah makai dek tadi apai Umang? Ni ubat dek udah diempa?, pia ku Indai
Umang ngerandau laki iya sambil nukar gari iya lalu masuk ke kain ke
dilempai ba ujung katil seduai iya apai Umang.
Anang ke nyaut, engkebut enda meh apai Umang. Mata iya pejam
baka ke jenak amat tinduk. Tambah-tambah agi hari ujan, chelap tubuh
tudah tuai. Lalu angkat meh indai Umang tu tadi nyingkau pua ke laki iya lalu
ngebap siku nya. Tilik indai Umang jam ba dinding, nyau udah pukul 6.30
lemai. Enda lama agi, pulai Endut ari sekula. Begadai-gadai Indai Umang
pansut ari bilik, lalu nutup pintu bilik seduai iya apai Umang. Bejalai iya ke
bilik besai, ngambi bakul sayur ke dibai iya ari pasar tadi.

Raya gak dek Umang, mengkang nadai ngangkat sekali pama udah migai
talipaun. Besehari-sehari migai talipaun nya. Perut kada udah isi dek nya
dia? Aba dek udah tinduk enda meh nemu ngebab ngau pua. Iya gak hari
ujan, kati ke enda berunding ke aba dek chelap ba bilik din? Bangat enda tau
meleka jari dek nya migai talipaun nya. Empa sekali nya neh. Enda rindu aku
meda pengawa dek nya, meretih aja munyi Indai Umang nganu Umang ba
bilik besai.
Umang, anang ke ninga utai ku indai iya, malik ke bukai pungka iya.
Lagu ba dalam talipaun dipasang iya inggar agi nyentukka enda didinga agi
bunyi ujan ninggang atap rumah sida iya. Amat pama Umang, mimit nadai
meh mereti ke jaku indai iya, jauh ke nemu berumban angkat ngereja nulung
indai iya bebela ba dapur. Nyau majak kediri iya beluit kaki bayam talipaun
baru iya nya.
Enda lama udah nya, datai Christy mai beg ma iya. Nyau memusu
gamal tudah tuai, jempuk laban ujan. Berumban iya belanda ke dapur lalu
nuju bilik mandi.
Makai Mang, Christy! Nya lauk udah mansau. Berenah seduai. Aku ka nyapi
apai seduai dulu, pia ku Indai Umang ngangau ke Umang seduai Christy ari
dapur. Pinggai asi serta lauk apai Umang endang udah disedia ke iya dulu ba
dalam stan. Begadai-gadai iya mai stan tama ke dalam bilik seduai iya apai
Umang lalu diengkah ke iya ba atas mija.
Apai Umang, angkat dulu wai. Makai dulu. Nyau udah malam hari tu,
begadai-gadai jaku Indai Umang ngerak apai Umang ti benung jenak tinduk.
Angkat dulu meh wai. Legi tinduk baru. Makai dulu, pisit Indai Umang
ngerak apai Umang tang apai Umang mimit pen nadai engkeretik. Jenak
amat iya tinduk, diumba ke hari ujan, chelap, ni enda jenak iya tinduk.
Meda apai Umang lalu enda ngangkat, dia Indai Umang lalu ngusak
tubuh apai Umang. Sepi iya te chelap tubuh laki iya taja dibalut pua. Enda
nyamai asai ati Indai Umang, ditegu iya gak kuyu apai Umang, chelap gak.
Seput Indai Umang nyau majak laju. Ba dalam ati iya din enggau naka ulih
enda mikir ke utai ke sebengkah nya, ngau naka ulih iya ngumbai apai
Umang semina tinduk jenak. Nyau majak irau ati Indai Umang meda laki iya
lalu enda engkebut sepengudah digusak penapat inat, dia iya lalu ngagau ke
Umang seduai Christy ngau sabak-sabak.
Umanggggggg!!! Endut!!!!!! Sah apai seduai dek, inggar panjung Indai
Umang diserta enggau sabak, ngangau ke Umang ngau menyadi iya.

Pinggai ke dipigai Umang nyau tebeleka ari jari iya lebuh ninga indai iya
nyerauh ngagau ke nama seduai iya Christy. Tekala nya mega, talipaun ke
diengkah iya ba atas mija labuh kena situr Christy laban ke berumban
ngesah indai iya ba dalam bilik. Berumban dua iku diri menyadi nya tama ke
dalam bilik. Maya seduai iya muka pintu, dia seduai meda indai seduai iya
sigi udah lama nyabak sambil merap apai seduai iya.
Lapa aba mak? Lapa aba?, enggau sabak-sabak Christy nanya indai iya
taja dalam ati iya din sigi udah nemu apai iya nyau udah ngejang ke Batang
Mandai ninggal ke sida iya.
Udah nyau apai seduai anak, ninggal ke kitai, ku Indai Umang ngau sabaksabak nyaut tanya Christy.
Umang enda memunyi. Tekala nya mata iya malik ngagai spray ampus ti
diengkah ba atas mija sepiak kandek indai iya. Maya nya mega ai mata iya
lalu beterutu naya ninggang kuyu iya.
Ampun ke Umang aba, ampun ke penyalah Umang abaaaaa. Umang salah
aba...Umang salah..Enti Umang alu tama ke bilik tadi aba, nadai nyadi
bakatu, rauh-rauh Umang nyabak merap tubuh apai iya.
Ampun Umang indai, ampun ke Umang...Salah Umang tu indai enda nyua ke
spray ampus aba maya iya minta tadi. Salah aku tu indai, bendar Umang
merap tubuh indai iya.
Tubuh Indai Umang enda engkebut ninga Umang nusi penyalah iya. Peli-peli
aja mata iya merening ke teluk dinding. Ai mata iya seruran labuh nerutu
naya nitih ke pengelaju titik ujan ti ninggang atap rumah sida. Nyau nadai ati
agi Indai Umang ninga cherita ti pansut ari mulut Umang. Andal amat ati iya
ngarap ke Umang nyaga ngemata ke apai iya ba rumah tinggal iya bejual ba
pasar, ngiga duit belanja kena nupi sida sebilik. Nama kebuah Umang
sanggup ngaga utai bakatu? Semua tu ketegal ulah Umang ti rindang main
talipaun ti dibeli apai iya ke iya. Diatu, ka bakani Umang nyabak, ka iya
pansut ai mata darah, enda meh apai iya ulih pulai angkat idup baru. Nesal
pen Umang diatu ke penyalah iya nadai meh guna, amat munyi ku
sempama, nesal dudi sigi nadai reti.
----- ABIS---Nya alai, ngelalau kitai semua ke balat udu rindang bayam talipaun
besahari-sehari, anang sampai enda ingat ke pengawa diri ba rumah. Manah

kitai nesal dulu ari nesal dudi. Jam enda ulih ditikal ke pulai baru enti udah
telabuh ngejang.