LITURGI V (JANJI KESELAMATAN)

1. 2MUSA 23:20
“Ida ma, sai suruonku do Suruan sada di jolom, asa diramoti ho di tongan dalan, jala
ditogihon ho sahat tu inganan naung hupadiri di ho.”

2. PSALMEN 24:7-8
(7) “Patuginjang ma tohangmuna, hamu ale angka harbangan, patuginjang ma hamu, ale
angka pintu sian na robi, asa bongot Raja ni hamuliaon!”
(8) “Ise ulaning Raja ni hamuliaon i? I ma Jahowa, na gogo jala Ulubalang, Jahowa
Ulubalang di hamusuon.”

3. PSALMEN 24:9-10
(9) “Patuginjang ma tohangmuna, hamu ale angka harbangan, jala patuginjang ma hamu,
ale angka pintu sian na robi, asa bongot Raja ni hamuliaon i!”
(10) “Ise ulaning Ibana, Raja ni hamuliaon i? I ma Jahowa Zebaot, Ibana do Raja ni
hamuliaon i. Sela.”

4. JESAYA 1:25
“Jadi ingkon mangulahi ma tanganku mangonai tu ho, jala papitaonku airmi, songon na
sinabun, jala pasurutonku ma nasa simborami.”

5. JESAYA 1:26
“Jala pasuangonku ma angka siuhum ho, songon di na robi dohot angka panuturim songon
di mulana. Dung i targoar ma ho huta ni hatigoran, huta na bonar.”

6. JESAYA 1:27
“Tartobus do sogot Sion marhitehite habonaron, jala angka na mulak tu ibana marhitehite
hatigoran.”

7. JESAYA 30:18
“Dibahen i sai maimaima Jahowa, naeng marpangulahi rohana tu hamu; laos alani borhat
ibana asa asianna hamu, ai Jahowa do Debata ni uhum. Martua ma sude na mangkaposi
ibana.”

8. JESAYA 30:26
“Jadi tiur ni bulan ma disi songon tiur ni mata ni ari, jala silompit pitu hali ganda tiur ni
mata ni ari i, doshon hatiuron ni pitu ari tahe, di ari uju liliton ni Jahowa bugang ni
bangsona, jala pamalumonna holiholi na magas binahen ni paminsangna?”
9. JESAYA 35:1
“Marlas ni roha ma halongonan dohot tano bangkalbangkal jala marolopolop ma adaran
jala marbunga songon bunga pansur.”

10. JESAYA 35:4

“Dok hamu ma tu angka parroha na tahuton: Pir ma tondimuna, unang hamu mabiar! Ida
ma Debatamuna i ro martubolhon dohot mamaloshon! Ho do ibana tongon paluahon
hamu.”

11. JESAYA 35:5

“Buhaanna ma disi mata ni halak na mapitung jala marbinege bahenonna pinggol ni angka
na nengel.”

12. JESAYA 35:6

“Marhajingjang ma disi halak na pangpang songon ursa, jala mariaia dila ni halak na
ngungu, ai marbuhalbuhal ma angka aek di halongonan jala sunge di adaran.”

13. JESAYA 35:10

“Jadi mulak ma sogot halak angka na pinalua ni Jahowa, jala mariaia ro tu Sion; jala halalas
ni roha salelenglelengna di atas ulunasida, dapotan hilas dohot las ni roha nasida, alai
maporus ma anggo arsak dohot hoihoi.”

14. MIKA 5:1

“On pe marhoronhoron ma hamu, ale boru ni parduan ni parangan! Ai hona tungkum do
hita humaliang; tungkot do dilibashon tu hurum ni siuhum Israel.”