PESTA NATAL PARJOLO

Ev. Lukas 2:1-7 Ep. Jesaya 62:6-12

TOPIK :
JESUS SIPALUA PORTIBI ON

HURIA KRISTEN BATAK PROTESTAN

 SABTU, 25 DESEMBER 2021

01. PAMUHAI :
U : Mangasahon pandonganion ni Debata, Perdenggan basa i, nunga sahat
hita nuaeng tu ari Pesta Natal Parjolo di taon 2021, sadari on. Alani i,
jumolo ma pinasahat tu hamu: Selamat Natal ma di hamu saluhutna.
R : Selamat Natal ma tutu nang di hamu Parhaladonami!
U : Disoarahon Pesta Natal sadari on do tu hita marhite topik na mandok:
“Jesus Sipalua Portibi on.” Alani i, ndang tagamon mabiar be hita, alai
mangolu ma hita di bagasan las ni roha godang.
R : Las ni roha godang do diboan Tuhan Jesus tu hita, Parsaulian ni
sandok bangso i. Ido umbahen na ro hami sadari on manopot bagas
joro on laho mamuji dohot pasangaphon Debata Parasiroha i.
U : Antong, halansononta ma sadari on hinabalga ni asi dohot holong ni
roha ni Debata marhite naung tubu Sipalua i di hasiangan on bahen
haluaon dohot hangoluan na saleleng ni lelengna di hita. Antong, sian
nasa roha, tahamauliatehon ma denggan basaNa na sumurung i, tapuji
ma Ibana, marende ma hita!
02. Marende BE No. 57:1-3, “Nunga Jumpang Muse Ari Pesta i.” BL. 202)

 Nunga jumpang muse ari Pesta i

Hatutubu ni Tuhanta Jesus i
Tuat do Ibana sian surgo i Mebat tu hita on
Hasangapon di Debata, dame,dame ma di jolma.
Las ni roha ni Debata Hajolmaon muse.
 Beta, ale dongan tu Betlehem i
Itasomba ma Dakdanak na disi
Na tinongos ni parasiroha i Debata Ama i
Hasangapon di Debata, dame, dame ma di jolma.
Las ni roha ni Debata hajolmaon muse
….Musik….
 (Jongjong) Sombanami ma di Ho na tubu on
Ho siboan dame tu portibi on
Sai pasaorhon ma tu rohanami on dameMi o Jesus.
Hasangapon di Debata, dame, dame ma di jolma.
1
 Las ni roha ni Debata hajolmaon muse.

03. VOTUM – INTROITUS – DOA:

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano
on. Amen. Nunga tubu di hita sada posoposo, dilehon tu hita sada Anak,
pampe tu abaraNa do sogot harajaon, jala bahenonNa goarNa: Sipartahi
halongangan, Ulubalang ni Debata Ama. saleleng ni lelengna, Raja ni
hadameon. Endehon hamu sada ende na imbaru di Jahowa, endehon ma
Jahaowa, ale sandok tano on. Pajojor hamu ma di tongatonga ni angka
sipelebegu hamuliaonNa i. Marsomba ma hamu tu Jahowa marpahean
na marhadohoan, angka hitir ma hamu maradophon Ibana, ale isi ni
sandok tano on. Haleluya!
R : (Mangendehon): Haleluya, Haleluya, Haleluya!
U : Martangiang ma hita !
Ale Tuhan Debata, Amanami na di banua ginjang! Mandok mauliate do
hami tu Ho, alani godang ni asi dohot holong ni rohaM di hami; ai
dibasabasahon Ho do AnakMu na sasada i tu hami na di pardangolan on
asa malua hami marhitehite Ibana sian dosa dohot sian hamatean
saleleng ni lelengna. Hupangido hami tu Ho, sai sondangi ma rohanami
na holom i marhitehite Tondi Parbadia; angkup ni i sai parrohai ma
hami, asa huboto hami mandok mauliate tu Ho, asa tarapul situtu
rohanami di hagogotan dohot di pangunjunan marhitehite AnakMu,
Tuhan Jesus Kristus Tuhannami. Amen.
(Hundul)
04. Marende BE No. 602:1-2, “Di Natal na Parjolo i” BL. 602.
 Di Natal na parjolo i parmahan marborngin di ladang i,
Tusi do ro suruan i, mandok nunga sorang Mesias i.
Noel, Noel, Noel, Noel, tubu Raja ni Israel.
 Binsar do sada bintang i. Di purba torang sinondang i.
Tongtong tarida bintang i, arian nang borngin patar do i.
Noel, Noel, …………..

05. PATIK:

2
 U : Tatangihon ma Patik ni Debata di di Pesta Natal Parjolo sadari on, i
ma na tarsurat di Lukas 2:10.b. Unang mabiar hamu; ai barita halalas
ni roha godang do huboan tu hamuna, parsaulian ni sandok bangso i.
Antong rap mangido gogo ma hita sianTuhan Debata!
R : Ale Tuhan Debata, sai pargogoi ma hami mangulahon na hombar
tu PatikMi. Amen.
06. Marende BE No. 616:1+3, “Ulina i di borngin na badia” BL. 616.
 Uli na i di borngin na badia, humirdophirdop do bintang disi.
Di borngin i do tubu Sipalua, di panggagatan di Betlehem i,
Portibi on dangol gok haholomon, marnida sondang ni Tuhantai.
Uli na i marende do suruan di borngin i do tubu Kristus i
Di borngin i di tubu Kristus i.
(Jongjong)
 Uli na i sude marlas nia roha, ala naung songgop harajaonNa i.
Huria i ria do ro marsomba, mamuji Raja na sun sangap i.
Ibana do panondang hangoluan, na mangalehon pangkirimon i
Uli na i……
07. MANOPOTI DOSA:
U : Tatopoti ma dosanta tu adopan ni Debata, martangiang ma hita!
Ale Tuhan Debata, Amanami, Pargogo na so hatudosan, Parasi roha
mida hami na dangol on! Na ro do hami tu joloM manopoti dosanami
na godang i.
R : Di bagasan hajahaton do hami tubu jala ndang adong haporseaon di
bagasan rohanami hian, saluhut do hami manimbil sian angka
dalanMu. Mansai godang do pangalaosionnami di PatikMu. Alai ingot
ma hami, ale Tuhan, ala ni denggan ni basaM dohot asi ni rohaM.
U : Sai unang paingotingot angka dosa ni haposoonnami dohot
pangalaosionnami; sai ingot ma hami hombar tu asi ni rohaM dohot
denggan ni basaM ala ni GoarMu. Ale Tuhan Jesus, marpamuati ma
rohaM di dosanami na godang i! Amen.
(Martangiang na hohom huhut manghuling organ angonangon: BE
No.174, “Torop dope na siat i,” sada ayat BL. 184).

3
 U : Bagabaga ni DebataTaringot tu hasesaan ni dosanta : Songon on
do panghaholongi ni Debata di portibi on, pola do AnakNa na sasada i
dilehon, asa unang mago ganup na porsea di Ibana, asa hangoluan na
saleleng ni lelengna di Ibana. Hasangapon ma di Debata na di ginjang!
R : Amen.
(Hundul)
08. Marende BE No. 46:1+4, “Na sian ginjang do au ro” BL. 33.
 Na sian ginjang do au ro, barita na imbaru do
Huhut na uli situtu, huboan tu sude hamu
 Diboan hangoluan i Silua ni Amana i
Ai naeng tu harajaon ni pasuangonna jolma i

09. E P I S T E L :
U : Tabege ma hata ni Debata turpuk Epistel di ari Pesta Natal Parjolo
sadari on, ima na tarsurat di buku ni Panurirang Jesaya 62:6-12.
Nunga hudokhon tu atas parikmu, ale Jerusalem, angka parjaga
manipat ari manipat borngin, tongtong ndang olo sip nasida. Hamu ale
angka na pasingothon Sion tu Jahowa, unang tung marpansadian
hamu.
R : Ibana pe, unang tung marpansadian loas hamu, paima dipahot
Jerusalem jala dibahen marbarita di tano on.
U : Nunga pola maruari Jahowa tu siamunna dohot tu tangan ni
hagogoonna: Na so tupa be lehononku emem panganon ni angka
musum, jala na so tupa be inumon ni halak sileban tuak anggurmu,
naung hinangaluthonmu.
R : Ingkon laos halak na papungupunguhon manganhon eme i, huhut
mamuji Jahowa, jala laos halak na manjantarhon manginum tuak
anggur i di angka alaman ni habadiaonku.
U : Ruar ma hamu, ruar ma hamu sian angka harbangan! Sai pahornop
hamu dalan di bangso i! Palentes, palentes hamu dalan balobung i,
paduru hamu angka batu, patindang hamu ma partonggol di
tongatonga ni angka bangso.

4
 R : Ida ma, nunga pola martingting Jahowa ro di ujung ni tano on: Paboa
hamu ma tu boru Sion: Ida ma, nunga ro hatuaonmi! Ida ma, ihut tu
ibana do upana, jala pamaloshonna di jolona.
U : Jadi goaron ni halak ma nasida: Bangso na badia, angka na pinalua ni
Jahowa; jala ho targoar na hinaholongan, huta na so sitadinghononhon
be
Ido sahatna. Martua do angka na tumangihon Hata ni Debata jala na
umpeopsa.
R : Amen.

10. Marende BE No. 53:1+3, “Di Betlehem do tubu” BL. 51.

 Di Betlehem do tubu, di hita Anak i i do sian na burju
Hupilllit Rajangki, i do, i do, hupilllit Rajangki
(Jongjong)
 Sai naeng haholonganku Ho, ale Tuhanki. Nang marsak las rohangku
Ingkon lam ganda i. Olo,olo,ingkon lam ganda i
.

11. MANGHATINDANGHON HAPORSEAON:

U : Tahatindangkon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
R : Ahu Porsea di Debata Jahowa…..
(Hundul)
12. TINGTING + TANGIANG PANGONDIANON
13. Marende BE No. 597b:1…………., “Baritahon di dolok “ BL. 597.
(Pelean I.a,I.b)
 Baritahon di dolok di rura di sude inganan,
Baritahon di dolok naung tubu Kristus i.
Ro do surusuruan tu ladang Efrata
Mandapothon parmahan tompu mansai torang.
Baritahon di dolok di rura di sude inganan,
Baritahon di dolok naung tubu Kristus i.
 Mabiar do Parmahan tu pardisurgo i
5
 Angka suru-suruan marende borngin i.
Baritahon di dolok……….
…..Musik….
 Di borhos do Tuhanta di panggagatan i.
Songon na pinaboa ni pardisurgo i.
Baritahon di dolok………..

14. JAMITA: Lukas 2:1-7

15. Marende BE No.605:1………. “Las ma roham” (Pelean tu Ulaon
Diakoni Sosial / Caritas Emergency HKBP)

 Las ma roham Tuhanta ro, gumomgom sasude.

Ungkap roham, jangkon rajam marende ma sude,
Marende ma sude, marende, marende ma sude.
 Tano nang laut, harangan i nang awangawang i,
Hauma i, nang sunge i, olophon Raja i,
Olophon Raja i, olophon, olophon Raja i.
….Musik….
 Bura binaen ni dosa i, marujung ma disi,
Ai nunga ro Mesias i, mamboan dame i,
Mamboan dame i, mamboan, mamboan dame i.
 Ibana do Rajanta i, Parasiroha i,
Na tigor i, na bonar i, parholong roha i,
Parholong roha i, parholong, parholong roha i.
…..Musik….
16. PANGUJUNGI: (Jongjong)
U : Disoarahon hata ni Tuhanta do sadari on tu hita paboa di bagasan
panggagatan do Jesus na tubu i, diborhos jala dipeakhon ala so adong
inganan na asing di parmianan nasida. Dipatuduhon i do haserepon ni
rohaNa mamungka sian hatutubuNa.
R : Hasangapon ma di Debata na di ginjang, dame ma di tano on, di
angka jolma halomoan i.
U : Nunga tubu Tuhan i nang di bagasan rohanta ganup. Taborhos ma
Ibana di bagasan rohanta be. Ibana ma na patauhon dohot mangalehon
6
 gogo di hita laho mangadopi nasa rumang ni parngoluon na sipata
ingkon mamolus galumbang ni portibi on.
R : Hasangapon ma di Debata na di ginjang, dame ma di tano on, di
angka jolma halomoan i..
U : Ndada holan di ngolu portibi on pandonganion ni Debata di hita alai
marhite hatutubu ni Jesus dilehon do di hita haluaon sian gomgoman
ni dosa dohot hamatean mambahen hita bolas mamongoti hangoluan
na saleleng ni lelengna. Alani i, gok pujipujian ma rohanta tu Ibana
naung tubu i laho pasangaphon Ibana ganup ari.
R : (Mangendehon BE No. 58:4, “Martumbur tungkotungko” BL.
123.
 Pinuji ma Jahowa, na asi roha i
Dilehon do AnakNa, hangoluanta i
Girgir ma hita on mamuji Debanta ala basaninon
U : Tapasahat ma pelean na tapapungu on tu Debata, martangiang
ma hita! Ale Debata, Amanami na di banua ginjang! Ho do haroroan
ni saluhut silehonlehon na denggan dohot nasa ulibasa na mauliutus.
Hupasahat hami ma sian na nilehonMi tu hami, peleannami tu Ho. Sai
jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga
ni huriaM dohot di portibi on. Buhai ma rohanami marhitehite
TondiM, asa lam hutanda hami godang ni silehonlehonMi tu hami, asa
lam girgir hami mandok mauliate tu Ho, marhitehite Jesus Kristus
Tuhannami. AMEN.
R : (Mangendehon) BE No. 204 : 2 “Ndang Tadingkononhu Ho”
 Nasa nanilehonMi, tondi ro di pamatanghu.
Hosa dohot gogongki, ro di saluhut artanghu.
Hupasahat I tu Ho, na so unsatonhu do.
U : Ale Tuhan Debata, Debata na tongtong, na so marmula na so
marpansohotan! Hupuji hami ma Ho ala saut sude tahiM, naung
sinangkapMu, andorang so marojahan dope hasiangan on. Ndang
tarambat sibolis sangkapMu; ndang sundat tahiM na badia i dibahen
dosanami, ala ni holong ni rohaM na balga, na so hadodoan i. Dibahen
i mauliate ma rohanami tu Ho, ala naung saut sangkapMu, i ma
parsuruM di anakMu gabe Sipalua jala Sipangolu di hami, asa malua
7
 hami sian dosa, hamatean dohot sian uhum, jala mansohot hami
mangulahon dosa. On pe, sai asi ma rohaM di hami, togihon ma hami
tu AnakMu. Sai bahen ma hami gabe siluaM tu Ibana, asa upa ni
halojaonNa hami, ala na tinaonNa na bernit i dohot hangaluton
humophop hami, asa Ibana nampuna hami, jala hami nampuna Ibana.
Sai sungguli ma huriaM sadari on, asa diingot habalgaonMu dohot
haroro ni AnakMu gabe jolma, laho pangoluhon hami pardosa. Sai
sungguli ma angka parhalado di huriaM, mamaritahon Barita na Uli i
tu saluhut halak naung patar hasangaponMu, jala naung jumpang
dame dohot hasonangan. Sai lehon ma pintu na ungkap tu halak
sipelebegu dohot tu parugamo na asing asa ro nasida mengoloi
Tuhannami Jesus Kristus. Sai rajai ma saluhut raja dohot angka
suruanna, asa diboto nasida naung dilehon Ho Raja, jala Tuhan na
sumurung i ro di saleleng ni lelengna. Sai lehon gogo tu angka na di
bagasan pangunjunan, apuli angka na marsak, jala palua angka na
targogot. Sai tatap jala ondingi angka na pinaburuburu ni halak ala ni
GoarMu. Sai dongani jala pasupasu hami sude, angka na magodang ro
di dakdanak di bagasan Tuhan Jesus Kristus, Tuhannami. Amen.
Ale Amanami na di banua ginjang! Sai pinarbadia ma goarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
R : (Mangendehon):
 Ai Ho do nampuna harajaon, dohot hagogoon.
Ro di hasangapon, saleleng ni leleng na, Amen
U : (Tangiang Pasupasu) !
R : (Mangendehon) Amen, Amen, Amen.
========

SELAMAT HARI NATAL