Tirulah Anau dalam rimbo

Tumbuah tak rago urang tanam

Barabuik sigai nak mamanjek

Indak suatu nan tabuang

Batang nyo manganduang sagu

Makanan urang sanagari

Jo kudo-kudo malamakkan

Ruyuang di ambiak ka pincuran

Jikok di balah kabuang-kabuang

Elok ka lantai jo ka kasau

Ka paga nan rancak bana

Daun nan tuo ka jadi atok

Nan mudo bisa ka rokok

Lidih di susun jadi sapu

Ijuak nyo elok ka tali

Saga pun banyak rang gunokan

Buah lamak nironyo manih

Di masak ka jadi gulo

Di param tuak namonyo

Kok rasan ka jadi cuko

Sampai ka miang palapahnyo

Di pakai urang ka raguak api

Sungguahpun awak urang batuah

Banso anau indak ta kabua

Sifaik sombong jauah sakali

Tagak nyo manjauah2

Indak mamiliah tampek tumbuah

Di bukik atau di lurah dalam

Di lereang atau nan data

Bia di gurun tanah lakuang

Inyo basanang hati juo

Daunnyo tak rampak bana

Koq guguak silaro tuo

Jatuah balungguak ka rumpunnyo

Indak tagaduah kiri kanan

Santano manusia mancontoh anau

Batang sampia namo asiang nyo

Pastilah

Nagari aman kampuang santoso

Gemah riak loh jenawi

Bareh murah tanam manjadi

Itulah masyarakat adil dan makmu

Dibawah ampun ridho ALLAH

Mako ta capailah nagari

Baldatun thayyibatun

Warabbun gafur

Sabab baa lah dek baitu

Satiok urang punyo pancarian

Punyo padok surang- surang

Takado istilah pengangguran

Tatimbun jurang kemiskinan

Hilang lah bingik ke nan kayo

Kecembuaruan sosial kato rang kini

Sadonyo potensi

Sadonya produktif aktif

Nan buto pa ambuah lasuang

Nan tengkak pa halau ayam

Nan pakak palapeh badiak

Nan binguang suruah suruahan

Itu lah sumber daya manusia

Sumber utama pembangunan