PAMANANGGAP KARING LARAUAN

Ding larauan lungub la king pisamban at mibili king metung a misadiang lugal para kareti. Kabang
magaganap ing panlub kareti, mikanta ya ing Indung Alang Musing o aliua pang makayakmang dalit.

Manatad PPC Officer:

King lagyu da po ring talasalpantaya at balayan ning Dios
king Parokya mi, ing Good shepherd Parish, at kambe ning
kekaming Cura Paroko, y Rev. Fr. Eymard D. Ocampo,
matula mi lang iyatad kekayu ding larauan ning Virgen de
los Remedios, at ning Santo Cristo del Perdon y Caridad.
Meging mabunga, makabaldugan at masaya po
ing pamandalo da kekami. Sana ikuyung darasnan da,
ing lugud, tula at saya a daralan da gisingan ne ing pusu ning
balang talasalpantaya.

Pari:
Mititipun tamu ngening aldo ban tanggapan la ring larauan
ning Virgen de los Remedios, at ning Santo Cristo del
Perdon y Caridad. Kaniting pamandalo ra king balen tamu,
ipanalangin at pagkapilitan tamu sana ing milablab tamu
kasalpantayanan, miragdagan tamu lugud at mibayu tamu
kapanayan.

Iting pamandalo da ya pin ing ausan tamung Cruzada de

Penitencia y Caridad a tinatag na ning mumuna tamung
Obispo, ing lubus-kagalanggalang, Cesar Ma. Guerrero.
Nasa niting pamamisita ra kekatamu ing pakibaluan tamu
ing turu nang Jesus a Guinu tamu at Mengabus,
pagmasusian la ring sakramento ning kumpisal at Eucharistia
at mibalik tamu lub king Dios.
Antimurin, ing Indung Virgen de los Remedios,
kapamilatan niting Cruzada, ausan nakatamu ban ipakit ing
lugud nang Cristo karing pakakalulu, masakit at
mangailangan kapamilatan ning pamamie tamung lamak.

Antimurin, mayayaus tamu ban misundu king misiun ning

pamipasiag king Mayap a Balita karing aliua
lalu na ring magkakasakit, pakakalulu
at e makakilala king Dios.
Nung atin pamuntuk ning gobierno ning balen, o lider ning parokia, maliari lang mapse mapilan a
amanu ning pamananggap:

Tatanggap PPC Officer:

King lagyu da ring talasalpantaya at balayan ning Dios
keti king parokia ning Our Lady of Sorrows Parish at kambe
ning kekaming Cura Paroko, y Rev. Msgr. Ricardo Jesus T.
Serrano, matula mi la pung tatanggapan
ding larauan ning Virgen de los Remedios,
at ning Santo Cristo del Perdon y Caridad.
Mananu na sana ing pamandalo ra king komunidad tamu
palabungan na ing kasalpantayanan tamu,
pasiknangan da katamu lugud king Dios at kaparang tau
at ibayu rakatamu kapanayan
king paniatang ning kayarian na busal tamu.
Antimurin, ipayabut mi pu ing kapasalamatan karing
talasalpantaya at balayan ning Dios a menibat king Good
Shepherd Parish keng pamanatad da kekatamu karing
mal a larauan.
Pari:
Ngeni, maus tamu king Ibpa tamung atiu banua.

Ibpa mi…

Midalit ya ngeni ing Ibpa mi..

Pari:

O Dios, a alang sukad king pakalulu,

king kapamilatan da ring panalangin
ning nuan a Virgen Maria, Indu ming mapamakalulu,
pagkalam mu ing akilala mi ing malugud mung ganaka keti
king sulip ampon katataulian miras kami king ligaya banua.

Iti aduan mi keka, O Dios, king kapamilatan nang

JesuCristong Anak mu, a mabibie ampon mag-ari kambe mu
king kametungan ning Banal a Espiritu,
mangga man king alang angga.
Tuki ing Banal a Misa o ing pamagrosario.