P Wari raya Maria Sibadia iangkat ku surga e me kap sada ajaren ibas Gereja

Katolik. Ibas Konsili Vatikan II iajarken nge, "Nande Maria si sokeliamen, si labo
pernah erdosa e, dung kenca ndungi perdalinen geluhna i doni enda, enggo iangkat
alu mulia ku bas kinirajan surga alu kula ras tendina. Enggo ipeganjang Tuhan ia
bage ratu man kerina doni, segelah banci bagi anakna Yesus Kristus, Raja kerina
doni, si naluken dosa ras kematen. Emaka wari raya enda mereken pengarapen si
mbelin man banta, e me kap pekeken pusuh peratenta gelah kita nggeluh ibas pasu-
pasu Dibata, nggit ngendesken kegeluhenta kempak Dibata, dingen ndarami
kesadaan si tetap ibas kinirajan surga.

TOTOPEMENA
P O Dibata si erkuasa la ersibar ras si tetap, Maria si sokeliamen, Nande Yesus
Kristus, enggo iangkat-Ndu kubas kemulian surga dingen kula ras tendina. Mindo
kami O Bapa, min erkiteken ngalaken pusuh peraten kami kubas kegeluhen si rasa
lalap, kami ngasup muat bagin ibas kemuliaan-Na. Erkiteken Kristus Tuhan karni,
si ersada ras Kam ibas Kesah Sibadia, geluh dingen erkuasa, Dibata, seh rasa lalap.
Amin.
MAZMUR Nehen buku Mazmur Pengaloi hlm. 436.
OGEN 2 Nehen Kitab Ogen hlm...
BERIT A SIMERIAH Nehen Kitab Evangeliarium
TOTO PERPULUNGEN
P Erkiteken Nande Maria, nggit nge Dibata Bapa ringan i tengah-tengahta ibas
Kristus Anakna, Mari dage kita ertoto ibas penampat Nande Maria gelah kita banci
tuhu-tuhu nandai Dibata Bapa erkiteken AnakNa Yesus Kristus.
U1. Sitotoken me Bapa Paus, Uskup ras kerina pastor.
O Dibata Bapa, kawali min usur Bapa Paus, Uskup ras kerina pastor kami, gelah
ngasup ermakani kerina umat-Ndu alu kiniteken si nteguh, bage Nande Maria
sangana ngaloken dahin simulia jadi Nande Yesus ras Gereja.
Ertoto me kita....
U2. Sitotoken me pemimpin masyarakat.
O Dibata Bapa, terangi dingen sampati min pemimpin masyarakat kami alu
sinalsal kelengNdu segelah dahinna lako ngelai masyarakat banci ncidahken
keleng ras ukur si meteruk bage Nande Maria.
Ertoto me kita....
U3. Sitotoken ka dage kerina pernanden.
O Dibata Bapa, min kerina pernanden ngenehen usihen simehuli arah Nande Maria
guna negu-negu keluarga gelah alu ergiah-giah banci ncidahkan kesadaan ibas
keluarga.
Ertoto me kita ....
U4. Sitotoken ka dage kita kerina sipulung ijenda.
O Dibata Bapa, peteguh min kiniteken, pengarapen ras kekelengen kami, gelah
kami ngasup ncidahken kekelengen ibas kerina penggejapen kami si teptep wari
janah gelah banci ngataken bujur man Bandu ibas kerina kegeluhen kami.
Ertotome kita....
P O Dibata Bapa si erkuasa ras si tetap, bujur iendesken kami man Bandu sabap
enggo iangkat-Ndu Nande Maria ku surga alu mulia, Kesenangan si igejabkenna e
me si jadi padan ras jaminen man keselamaten kami. Erkiteken Kristus Tuhan
kami. Amin
TOTO PERSEMBAHEN
P O Dibata Bapa, min persembahen kami enda nangkihku lebe-lebe-Ndu, janah
erkiteken toto Nande Maria sini angkat-Ndu ku surga kubas kemulian kinirajan-
Ndu, pusuh peraten kami ersinalsal alu keleng, si rusur metedeh man Bandu.
Erkiteken Kristus Tuhan kami. Amin.

TOTO PENDUNGI
P O Dibata Bapa, enggo ialoken kami roti sibadia eme sakramen simulahi kami.
Min toto Nande Maria sibadia siniangkat-Ndu ku surga maba kami kubas kemulian
kekeken-Ndu, gelah kami pe nggejapken kemulian sini padanken Anak-Ndu man
kerina kalak si erkiniteken kempak Ia, Erkiteken si e, kami ngasup jadi saksi-saksi
kiniteken ibas kegeluhen si teptep wari segedang-gedang geluh kami. Erkiteken
Kristus Tuhan kami.
Tuhu-tuhu patut ras bujur,
kearusen kami ras keselamaten kami kap,
ngataken bujur lalap ras ija pa pe
man Bandu, Tuhan, Bapa Sibadia,
Dibata Simadakuasa ras Sirasa lalap.
Terlebih ibas... [wari raya/pesta/peringeten]
Maria Sibadia Sisokeliamen ... enda,
patut nge Kam ipuji janah imuliaken kami.
Sabap enggo itatang-Na ibas bertinna
Anak-Ndu Sitonggal alu kuasa Kesah Sibadia.
Ia si tetap sisokeliamen janah mulia
mbincarken sinalsal si rasa lalap kempak doni
em kap Jesus Kristus, Tuhan kami.
Erkite-kiteken Kristus e jine,
kerina malekat ras kerina kuasa surga muji kinihagan-Ndu.
Kami pe ikut pesadaken sora raduken ia
penangkih pujin alu ngendeken/ngalepken: