Lalaki Di Tegal Jurit

Karya Rachmat M. Sas. Karana

Wanci layung hurung konéng

Manéhna datang leungeunna euweuh sapotong
Bedil nyoléngkrangna tonggong
Pélor ngabérés handapeun cangkéng

Hiji lalaki bajuna héjo kapulas taneuh

Di pangperangan taya waktu pikeun nyeseuh
Sakiceup waktu ngingintip lengahna musuh
Mun manéhna masih kénéh embungeun paéh

Lebah pager imah manéhna ngarandeg heula

Uteukna nyarita mépés kanyeri nu baris tumiba
“Ema, kuring untung bisa mulang
sedeng mitra réa nu palastra
di hiji taneuh nu direbut ditebus getih.”

Panto hareup ngagerét aya nu muka

Hiji wanoja nu geus aya umurna
Ngagoak lumpat ngarangkul anu ngajanteng
Cimata indung maseuhan buuk anakna

Hiji lalaki bajuna héjo kapulas taneuh

Wanci layung hurung konéng
Manéhna datang dipapag cimata indung
Sedeng’na beungeutna taya kagambar rasa tugenah
Aki Jeung Balon
Ami Raksanagara

Beurat teuing lengkah aki ngukur jalan

kota bandung geus biasa ku aki mah dilengkahan
dibaturan ku sobat ngaran rancatan
anu rantuy digantungan barang-barang kaulinan

kakapalan kukudaan tarompet heunteu tinggaleun

geus biasa unggal poe ka unggal budak nawarkeun
ujang, eulis yeuh tingali barang aki
geura galeuh keur ameng engke di bumi

Aki! aki! Abdi mah da hoyong balon

Deudeuh teuing kasep di aki mah henteu aya
Niupna ge aki mah geus teu kawasa
Ripuh teuing da kedah nganggo tanaga
Ari aki sakieu nya kakolotan

Mending oge kasep ieu yeuh kokoloceran

Lamun angin muterna teh aduh jeung tarik pisan
Resep teuing engke ameng lulumpatan

Aki! Ka dieu! Ketang da abdi mah moal meuli

Ulah kitu kasep bet abong ka aki-aki
Ceuk sepuh mah kasep ngaheureuyan teh pamali

Hiji dua lengkahna teuing ku beurat

Aya hate milu lewang paur umurna bret pegat
Teuing dimana si aki tetep nya matuh
Bodo dina iuh tanjung atawa dipayung layung
Ngan nu nyata kulitna asak ku poe

Aki, mun ngajoprak sisi jalan saha teuing nu nulungan

Aki, mun ngajoprak di jambatan dimana nya pamatuhan
Aki, mun umur pegat dijalan saha anu ngarawatan
Aki! aki! Rek kamana lamun panon poe sare
 Pupuh Putra:
PANGKUR
Bebas wirahma
Bapa Doblang pada terang
kumis baplang nuruban biwir nu jeding
pipi kemong irung mancung
panon buringas hérang
goréng omong gawang-geuweung harung gampung
pantang mayar kana hutang
licik sarta sok curaling
Sekar tandak
Euleuh itu Bapa Doblang
notorogan boro baé kumis baplang
puas nyorang weureu gadung
beuteung bebeng lieur lanjung humaregung
matak ogé hirup urang
entong bedang bedegong curaling
bisi kawas bapa doblang
wawalesna ti suksruk jeung suwing
Pupuh Putri:
MAGATRU
Bebas wirahma
Coba teguh naon nu sukuna tilu
panon opat henteu galib
leumpang rumanggieung laun
éstuning ku matak watir
dongko bari aha-oho
Hulu nutug buntutna ngacung ka luhur
buluna carentik rintit
matana mangpuluh-puluh
rasa haseum semu amis
rajeg narangtung di kebon
Aya sumur di awang-awang ngagantung
caina hérang tur amis
eusi daging bodas alus
nyokotna éstu babari
boh dicokél boh dikerok
Sekar tandak
Sukuna pakupis tilu
panonna opat harérang
leumpangna semu nu lesu
ngaléngkah teu bisa gancang
Buntutna ngacung ka langit
buluna carentik rintit
matana mangpuluh-puluh
tangginas anu rék neguh
Sumurna di awang-awang
caina amis tur hérang
dagingna bodas ngagenyas
mesékna kudu dikupas
 KAWIH
JALAN LAYANG

Jalan layang jalan layang

Jalan di luhur ngembat panjang
Tinggeleyeng pasuliwer kendaraan
Malar gancang muru pangjugjugan

Jalan layang jalan layang

Jalan di luhur ngembat panjang
Motor mobil ngalaju antay-antayan
Tartib lancar nepi ka tujuan

Jalan layang liliwatan

Meulah kota diatur unggal jalur
Jalan layang peupeuntasan pareng nyemprung asa lelenyapan
Jalan layang liliwatan
Meulah kota diatur unggal jalur
Jalan layang peupeuntasan pareng nyemprung asa lelenyapan
 KAWIH
JABODETABÉK

Jakarta Bogor Dépok Tangerang Bekasi

Jakarta Bogor Dépok Tangerang Bekasi
Jabodetabék dayeuh maneuh tatar Sunda
Jabodetabék panyangga ka ibukota

Jakarta Bogor Dépok Tangerang Bekasi

Jakarta Bogor Dépok Tangerang Bekasi
Jabodetabék ngadeg nanjung sauyunan
Jabodetabék nanjung ngudag kamajuan

Kota asri héy kota industri

Pangwangunan mekar motékar
Kota asri héy kota industri
Pangwangunan keur karaharjan

Seni jeung tradisina

Basa jeung budayana
Alam lingkunganana
Kota métropolitan
Jabodetabék