HOLONG NI DEBATA NA PALUAHON

JOH 3:14-21

Dongan sahaporseaon dibagasan Kristus Jesus,

boi do taetong nuga sadia godang manang nunga piga pulu hali hita mangarayahon
Natal manang marningot di ari Hatutubu ni Jesus? Mulai sian masa sikkola minggu, masa
remaja, masa naposo bulung, dung marhasohotan, jala dung matua saonari, ganup taon di
bulan Desember, manaringoti hatutubu ni Tuhanta Jesus. Boha amang inang? Tong dope
marpanghorhon natal i di rohanta? Adong dope makna na? manang na nga songon na bosan
be? Songon tudosan tu halak na marulang tahun, molo tikki poso, pintor sai diingot tanggal
lahirna. Sebelum hari H pe, nga sai ingot di rohana, unang lupa di ari ulangtahun nai. Alai
molo so sala, molo lam matua akka jolmai, di na deba, ndada pola diharingkothon be ari
ulangtahun na ate. Gariada molo dipaingot, sadarion ulangtahun mu ninna ianakkonna, olo do
dialusi “bah na ulangtahun do hape au?”, lapatanna nakkin, dang pola songon lasniroha
ditikkii haposoon I be marningot ari hatutubuna.
Boha molo manaringoti ari hatutubu ni Tuhanta Jesus. Tong so songon na
marulangtahun nakkin? Ido umbahen husukkun, marpanghorhon dope natal I di hita?
manang na holan mangihut sambing nama? Molo jumpa natal, natal ma. marminggu ninna ba
marminggu ma. Songoni do tahe amang inang? Alai nian, parpunguanta ditikki on, di pesta
Natal na paduahon manaringoti ari hatutubu ni Jesus, unang ma holan mandohoti sambing,
alai naeng marpanghorhon, tauhir bagas dirohanta. Boasa pola ikkon ro hita muse di tanggal
26 on. Hape nunga marpesta hita di tanggal 25? On ma tanda ni las ni rohanta di hatutubu ni
Jesus, las ni roha na bolon, jala songon tanda mauliate ni rohanta tu Tuhanta Jesus.
Molo tung pe taida, dang songon godang ni namandohoti pesta naparjolo, unang gabe
sumurut hita. Ai dang ala ni halak hita asa mangihut Jesus. Molo di akka ulaon manang pesta,
akka na solhot dope tu hasuhuton, somalna dang pintor mulak, alai didohoti dope sahat tu
nasimpul ulaon i. nuaeng pe, unang pola sumurut rohanta, molo so piga hita na ro, tarajumi
ma, angka sisolhot ni Jesus do hita umbahen na ro hita saonari. Alai tontu, dang na mandok
na so sisolhot ni Jesus angka na so ro I, ndada laho manguhumi nasida, alai mungkin ala ni
akka ulaon naso tartadingkon. Semoga ma alani I ate amang inang. Ala ni las ma rohanta di
pesta natal hatutubu ni Tuhanta Jesus jala lam patoguhon haporseaonta di Ibana.
 Dongan sahaporseaon dibagasan Kristus Jesus,
Di ayat 14 didok: (BACA AY. 14). “Naeng patimboon Anak ni Jolma I, ima Tuhan
Jesus. Ise do patimbohon anak ni jolma i? molo godang jolma mamuji Debata, lam tarpuji do
Ibana? Lam tamba do sangap Na? lam timbul do Ibana? Nunga tarpuji hian Debata, nunga
Timbul hian Ibana, jala nunga sangap hita. Jadi unang tahilala, ala ni jolma do gabe sangap
Debata manang tumimbo Ibana, alai Debata do patimbohon Jesus Kristus. dipatimbo Debata
do tutu Ibana, mulai sian hatutubuNa; nang pe di bara ni pinahan, alai ro do parroha sian
purba, angka na sangap sian huta na dao pasahathon sere, haminjon, dohot angka na angur
gabe parsombaon nasida. Ima sada tudu-tudu na dipatimbo Tuhan Jesus mulai sian
hasosorangNa.
Diturpukta sadarion, dipatudos do hamamate ni Jesus di hau pinarsilang tu ulok
tombaga na disangkothon tu hau uju diparhorsihan bangso Israel. Ala parmungut-
mungutonna, diuhum Debata ma bangso Israel marhite ulok tulung api na mamarguti nasida
gabe marmatean ma nasida. Dung disolsoli nasida parmungut-munguton nasida I, disuru
Debata ma si Musa mambahen sada ulok tulung api sian tombaga na dipatimbo tu hau
partonggol; manang ise na marnida ulok tombaga na dipatimbo I gabe mangolu (ayat 9).
Suang songoni ma Tuhan Jesus, dipatimbo di hau pinarsilang marhite hamamateNa, alani I,
manang ise na marnida (manghaporseai Tuhan Jesus gabe mangolu songon na tarsurat di ayat
15 ni turpuk ta on. Jadi, na dipatimboNa I Tuhan Jesus di hau pinarsilang, dang tarsirang I
sian hatutubuNa na tapestahon sadarion. Alani I songon bangso Israel I ma hita akka dongan,
na marnida holan tu Ibana, manatap silang I dibagasan haporseaon asa mangolu hita nuaeng
nang sogot. Holan dibagasan Tuhan Jesus do dapot hita hangoluan si saleleng ni lelengna (ay.
15-16). Ndang adong dalan haluaon na asing molo so sian Tuhan Jesus na tapestahon di
hatutubuNa sadarion.
Dongan sahaporseaon dibagasan Jesus Kristus
Di sada luat, adong ma sada doli doli panakko. Omakna sahalak ina namabalu. Jala
ala holan na manakkoi ulaonna, pola do dihagigihon masyarakat ibana. Jala dianggap do
ibana sebagai sampah masyarakat. Jala disada tikki tartangkup do ibana di tikki na manakko.
Alani I rame rame do masyarakat, ditangkup ibana, ditali, diboan ma tu raja di hutai asa
disidang. Dung sahat tu jolo ni raja i, didok ma songonon: hombar tu aturan na masa di luat
on, manang na ise na tartangkup manakko,, apalagi nunga diulahon lobi sian 3 hali, ikkon
uhuman gantung do pasahaton tu ibana. Jala inganan ni panguhuman i, topek ma di tonga ni
alaman I. adong ma disi gantungan, jala diginjang ni gantungan I adong ma giring giring.
Molo naeng dipatupa uhuman gantung, jolo di palu do giring giring i, ipe asa sah.
 Jadi dung dapot tikkina, mangalehon uhuman tu doli doli i, torop do ro akka
masyarakat, laho mangida na masai. nunga dihorungkon be tali tu rukkung na, asa tinggal
manarik jala digantungkon. Dung I, hundul ma raja i di jolo. Alai adong dope muse aturan,
dilehon do kesempatan tu keluarga manang sisolhot, ada dipabotohon aha pangidoanna
sebelum dipatupa uhuman i. ro ma omakna na mabalu I, dipangido ma tu raja I, raja nami,
loas ma au tu ginjang ni tiang gantungan on, asa sian I huida parmate ni anakki. Diloas raja
ima. Jala nakkok ma ibana tu ginjang. Didok raja I ma, palu ma giring giring I, pintor hatop
do inantai mangoloi. Digolom ibana ma gomos batu ni giring giring I, gabe so boi be
mangkuling giring giring i. lam dipagogo ibana do manarik giring giring I, alai laosso
makkuling. Ujungna manetehi ma mudar sian tangan ni inantai, jala nunga retak be tangan ni
inantai. Marnida i raja I, hatop ma diparenta, asa di paso uhuman i. boasa didok songon I, ala
nunga huida, umbalga do hape holong ni roha ni inanta on tu anak na on dari pada pangalaho
na diulahon anak nai. Alani dilehon raja I ma kesempatan tu si doli doli I asa bertobat. Asa
dang saut be uhuman na ro tu ibana. Dung di pa so Raja i uhuman I, sundat uhuman I, ima ala
ni panghophopon ni umak na i.
Dongan sahaporseaon dibagasan Kristus Jesus,
Songoni ma nang panghophopon ni Tuhan Jesus tu hita akka pardosa. Uju ditakkup
hita ala ni dosanta, uju tarhurung hita ala ni pangalaosionta, jala uju tarrobung hita, disi do ro
Tuhan Jesus tu portibion laho manobus hita. Pola sampe durus mudarna I sian hau
pinorsilang I, asa ias hita sian akka dosanta. Jala i do puncak ni holong ni Tuhan Jesus,
umbahen na ro tu portibion. Umbahen na didok “ Ai songonon do holong ni roha ni Debata
di Portibion, pola do AnakNa na sasada I dilehon, asa unang mago ganup na porsea di
Ibana, asa hangoluan na salelenglelengna di ibana….(Joh 3:16). Sian on akka amang
inang, haroro ni Jesus ima laho manobus akka jolma pardosa. Molo porsea nasida, jala
ddiihuthon nasida Tuhan Jesus I, saut ma nasida dipalua. Alai molo so porsea nasida, saut ma
nasida diuhum. Lapatanna, SUDE JOLMA DO DITOBUS SIAN PARDOSAONNA, SUDE
JOLMA DO DIHOKKOP TUHAN JESUS, Alai holan akka na porsea tu Ibana do dapotan
haluaon, dapotan hangoluan na saleleng ni lelengna.
Damang dainang na hinaholongan dibagasan Kristus Jesus,
Aha do parasingan ni tanda tanda ni jolma na porsea dohot na so porsea tu Tuhan i?
didok nakkin. Molo halak na so porsea, dihalomohon i do na holom, dihagigihon i do na tiur,
asa ditabunihon nasida nasa parulaonna na jahat i. unnang nian patar i, ninna nasida. alai
halak na olo porsea, ido manghalomohon akka na TIUR, asa patar parulaonna I di adopan ni
Debata. “ berani karena benar, takut karena salah”. Nang pe sabotulna, on do siingotonta,
dang adong nanggo sada jolma i na boi manabunihon akka pangalahona sian adopan ni
Debata. Saluhutna do I patar di adopan ni Debata. Na tumagon do hita mangokkui
hahuranganta diadopan ni Debata. Jala olo hita paubahon diri, paubahon roha laho
mangihuthon Ibana.
Attong ro ma hita tu hatiuron I, asa jangkononna do hita disi. Songoni do nabinaen ni
sahalak guru Jahudi, na margoar Nikodemus. Ido na dipatolhas dibagasan turpuk ta sadarion.
Di Johanes 3:1-2, ro do si Nikodemus manndapothon Jesus borngin borngin. Molo borngin
biasana holom, alai sian haholomon i do ibana ro mandapothon hatiuron I, asa tiur rohana,
asa tiur pikkiranna, asa tiur nang pangalahona. Ditopot ibana do Jesus, gabe dapotan haluaon
Ibana.
Attong, aha do na diigil ni jamita on tu hita saonari? Di pesta natal na paduahon on,
nda patut ma hita marolop olop tu Jahowa? Nda patut ma hita pasahathon hamuliateon ni
roha? Nda patut ma ikkon marsihohot haporseaonta tu ibana? Unang be munggil rohanta,
unang be sai holsoan hita, unang be sai tajugulhon pangalahonta na hurang denggan, alai ro
ma hita tuu joloNa, tasomba ma Ibana. Tatiru ma holong ni roha ni Debata tu hita, na
mangalehon hosana jala manghophop hita sian pardosaon. Asa ganup na porsea di Ibana
dapotan hangoluan. Lapatanna aha do sitiruon? Asi ni rohana tu hita dohot holong ni rohaNa
tu hita. Ai ido na pinatupa ni Debata tu hita, marhite anakNa Jesus Kristus.
Ilustrasi sebesar apa cinta. Sebesar gunung? (meletus), seluas samudera (menyempit),
sedalam lautan (pasang surut). Cinta 1 lg seujung kuku, kecil namun setiap hari bertumbuh.
Walaupun dipotong, tetapi setiap hari terus bertumbuh. Demikianlah cintaku pd mu setiap hr
bertumbuh.
Lapatanna, mangulahon holong ni roha, ndada ikkon holan perkara besar.ttp lakukan
jg perkara kecil. Alai ingot:ganup ari harus semakin bertumbuh. Biarlah kasih kita bertumbuh
setiap hari kepada org lain/ sesama kita, khususnya dihadapan Tuhan kita.
Dung tajangkon Jesus Kristus marhite natal ta on, dung tajangkkon Ibana di ngolunta,
Ibana do Asi dht holong ni roha na tutu, na tinongos ni Debata tu hita, ala ni holong na do
tutu umbahen tarbahen hita malua, ala ni nang hita pe dihaholongi Debata gabe parholong
ma hita tutu di humaliangta manang didia pe hita maringanan. Tahamauliatehon ma holong ni
roha ni Debata marhite angka ulaonta na denggan nang hasintongan, unang be tahalomohon
ulaon haholomon, alai taulahon ma ulaon hatiuron. Selamat Natal ma dihita saluhutna.
Amen