PIDATO KA MAKAN-MINUM

1.1. PANDUKO RAJO

Sambah di ujuang
Sambah di pangka
Angku datuak di ujuang
Rangkayo nan di pangka

Ujuang salam ka………………………………

Tantangan sambah jo manyambah
Kok kurang taratik jo mujilih
Kurang lelo jo sopan
Lai maaf ambo mintak
Jo bana …….. ambo jalang

Sungguahpun ujuang jo pangka

Nan ambo tuntuik
Samego tumpuan puntiang
Sariek adaik nan bapakai
Naza kapado nan basamo
Niniek mamak kunjungan salam
Kariek baik samo di cinto
Salam di sinan di tiboan
Adopun salam kaditiboan
Manyiang bakeh nan tumbuh
Batenggang bakeh nan ado
Tumbuah sarupo iko kini
Pakaian syarak nan lazim
Siang malam jadi anjuran
Patang pagi samo di cinto
Dunie sah langgam badiri
Habieh hari babilang pakan
Habieh pakan babilang bulan

1
 Habieh bulan tahun batuka
Adaik badiri sandirinyo

Rumah gadang rangkiang lancang

Sasak dek alua dengan patuik
Cupak adaik labuhan kato
Nareco lautan budi
Tak agak batapuak tangan
Mancaliak dunielah takambang

Tantangan hidangan nan katangah

Lah tibo hadapan …………………..
Tibo di muko nan basamo
Basusun di ruang tangah
Balampieh piriang di dalam
Piriang aluih buatan japang
Balilieh jo aie ameh
Bungo kiambang dalam kolam
Basalo jo bungo inai
Bamacam rupo isi piriang
Banamo ragam bungo adaik
Tak usah disabuik bana
Cukuiklah nan sado itu

Sadundun cibuak jo galeh

Sarangkai tadah jo cangkie
Parahu lah lamo dek basauh
Laielah lamo tak takambang
Parahu nak mintak dilahikan
Laie nak mintak ………… kambang
Kilek jo bayang kito pakai
Pulang maklum pado …………….
1.1. MALIN BATUAH

2
 Ditiliak takadie sambah
Ditimbang nareco adaik
Tabayang cupak jo gantang
Manuruik alua jo patuik
Lai maaf ambo mintak

Dikabanaran angku nan katangah

Di buni nan ambo danga
Di rupo nan ambo liek
Maukua di ateh kayu
Mahukum di ateh kato
Manyiang tampek nan tumbuah
Batenggang bakeh nan ado
Tumbuah sarupo iko kini
Tantangan hidangan nan katangah
Sadundun cibuak jo galeh
Sarangkai tadah jo cangkie
Parahu lah lamo dek basauh
Laielah lamo tak takambang
Parahu nak mintak dilahikan
Laie nak mintak ………… kambang
Kilek jo bayang kito pakai
Kan bak itu bana kato…….

1.2. PANDUKO RAJO

Yo Bana

1.2. MALIN BATUAH

Dikabanaran …….nan katangah
Itulah kato sabananyo
Namun samantang nan bak itu
Limbago duduk tangah rapek
kato surang di bulati
kato basamo di paiyokan

3
 samantaro kami baiyo
sipaik mananti malah………

1.3. PANDUKO RAJO

Pihak disambanh nan mandatang
Takilek barieh jo balabeh
Mambayang kanduangan buek
Jaleh talago balatak-an
Lai maaf ambo mintak
Disimak di buah kato
Didanga buah rundiangan
Bukiek nan tinggi kabadaki
Lurah nan dalam kabaturuni
Alam nan leba ka bapandang
Mancari gandang kapaningkah
Limbago talempoang kapanalun
Kan bak itu bana kato……………..

1.3. MALIN BATUAH

Yo Bana

2.4. PANDUKO RAJO

Dek kami asa kandak lai buliah
Pintak lai kabalaku
Insya allah ambo nantian

( di paiyokan jo kawan- kawan kiri jo kanan )

1.4. MALIN BATUAH

Ka…………sambah di tiboan
Talalai kumbang dek bungo
Lah rintang tupai dek putiek

4
 Putuih tak kunjung taubuang
Singkek tak kunjuang tauleh
Mancari bulek nan sagoloang
Mancari pipieh nan salicak
Pado wakatu iko kini
Lah sapakaik kami nan datang
Insya allah kandak di bari
Pintak di pakukan
Sakian sambah pado ……

1.5. PANDUKO RAJO

Pihak disambah nan mandatang
Takilek bagai caramin
Tabayang umpamo paneh
Manarah aluran garieh
Bakato di alua bana
Barieh balabeh lah takanak
Ukua jo jangko lah sasuai

Pado wakatu iko kini

Dek karano kandak lah buliah
Pintaklah di palakuan
Alang kasanang dalam hati
Bak tagak bapayuang awan
Bak mandi di anak sungai
Sajuak anggoto katuahnyo

Kini bak itu manyo lai

Nak jan siang bahabieh hari
Malam jan bahabieh minyak
Jo bismillah sajo kito mulai

Padang, 15 Februari 2009

5
 BY SAPARMAN BANDARO SATI,SH