Narator : Natal akan segera tiba, semua mulai sibuk mempersiapkan segala hal yang dibutuhkan. Tidak
terkecuali komisi pemuda dan remaja, merekapun mulai mempersiapkan diri menyambut Natal dengan dipimpin
oleh seorang ketua yang berasal dari keluarga sederhana yang harus memimpin kawan-kawannya yang berasal
dari keluarga berada.
*berkumpul pemuda remaja sambil memainkan smartphone mereka masing-masing, kecuali sang ketua dan dua
rekannya*
Clara : Teman-teman.. dua bulan lagi so natal, kemarin panitia natal ada tanya apa kata itu torang mo tampilkan
for natal. menurut teman-teman apa yang bagus ?
PR : (Tidak menjawab, sibuk memainkan smartphonenya masing-masing)
Cilia : Eh...!!! ketua daba tanya, jawab kwa apa ngoni pe pendapat ?
Pricill : Ooh... ad ba Tanya pa torang ?
Mike : Yaiyalah, pa sapa kwa ?
Diana : Yah kalu torang kwa mana-mana jo !!
Patric : Taon lalu biasanya torang beking apa ? sama deng lalu jo.. spaya nda pusing !
Mike : Ya jgn bagitu. Kalu torang nda ada yang baru, kasiang katu tu penonton somo pastiu.
Cilia : seharusnya torang anak muda banyak ide
PR : (Masih sibuk dengan smartphone masing-masing)
Clara : kita pe maksud bagini, ngoni ada masukan nda ? ini toh acara bersama nda mungkin kalu Cuma
keputusan sepihak, makanya kita mo minta saran deng kerja sama pa ngoni.
Pricill : OMG Hellloooow....!!! ketua, tadi kan kita so bilang terserah pa ngoni..
Diana : Iyo torang iko2 jo
Thea : jaba cerita apa ngoni ?
Kevin : Yaelaah... lalod skali ngana..!!! nda ada.. so lewat, angin so bawa.
*muncul dua anak muda yang terlambat datang*
Lukas : Waah.. so ba kumpul kote, ta kira ngoni mo terlambat jadi deng kita sengaja ba terlambat..
Pricill : Iyalaah.. memang ngoni datang terlambat, Cuma pacaran tu hambak, datang kwa so jam bagini lebe
latihan jangan banyak bakusedu, kalu boleh main hp tunda dulu supaya lebe focus. Boleh toh?
Cilia : Ngoni pe hp ato tab simpang dulu, abis latihan baru noh terserah pa ngoni mo beking apa
Diana : Hah? Apa? Jang bagitu kwa, kalu ngoni tau torang deng torang pe hape so nembole mo kase pisah,
apalagi lebe dari 5 menit. Nda stuju kita ! (sambil memainkan hp)
Kevin : Iyo.. kita le nda bisa, ini tanggung kita main game sadiki le menang..
Mike : Cuma sementara kwa teman-teman. Pas istirahat bagini baru ngoni main hp ulang..
Prisil : Kita nda stuju, masa torang dilarang main hp mar yang pacaran ngoni nda larang. Nda adil skali, ngoni
pilih-pilih kasih !! (nada marah)
Naomi : Eh torang tau diri ee, torang tau waktu for pacaran, kepa ngana yang sewot! Bilang kalu sirik..
Clara : Bukang bagitu kita pe maksud teman-teman. Torang so mulai dewasa, jadi torang so musti tau waktu
spaya fokus, ini bukang Cuma kita pe tanggung jawab mar torang samua..
Thea : Ketua abis beking apa so? Kiapa minta tanggung jawab?
PR : Thea!!! (nada kesal..)
Cilia : Boleh nda ngana pe lemot itu kase kurang sadiki?
Thea : Kita kan cuma ba Tanya.. !!!!
Diana : Ya sudah, iko aturan jo..
Prisil : Ya sudah terserah
Mike : Manjo torang somo mulai latihan. Mulai dari awal neh?
PR : *Sibuk dengan smartphone, sibuk dengan pacaran*
Mike : Woy mulai le ngoni!!!!!! (nada marah)
Cilia : Eh fokus kwa, somo mulai ini
Diana : Sabar kwa..
Clara : Ngoni sebenarnya niat m latihan drama ato nyanda? Torang pe waktu so nda banyak, tolong fokus kwa,
hp simpang dulu, pacaran tunda dulu, tolong torang pe kerjasama
Prisil : Nah ngana yang pacaran (nyindir naomi)
Naomi : Ngana kali yang alay, autis deng hp trus, nyanda lapas.. (sewot)
Clara : Brenti jo!!!! (emosi) Kita Cuma minta ngoni pe waktu sadiki spaya fokus, tolong sadiki bantu pa kita!
Pricil : Eh kiapa ngana yang sewot dang, kita so bilang toh kalu kita so nembole pisah deng tape hp lebe dari
5 menit, ngana kwa nda pernah rasa Oh iyo katu, ngana kwa orang susah jadi nda mungkin ada hape canggih
sama deng torang. Ngana nda pantas jadi ketua, masa ketua pemuda nda gaul bagini.. ??!! ngana kira ta suka
ngana m pimpin? Lebe cocok kita yang jadi ketua. (sewot)
Clara : Pricil, kita nda pernah minta pa ngana hargai kita sebagai ketua, deng menurunkan ngana pe derajat
spaya mo hargai pa kita. Kita Cuma minta sadiki ngana pe kerjasama. kita memang orang susah, mar satu hal
ngana musti tau, kalu Tuhan nyanda pandang torang harta dan rupa. Ngana boleh bangga deng harta ngana pe
orang tua punya deng mungkin kita memang miskin harta mar setidaknya kita masih punya hati mo menghargai
orang lain!
Pricil : Hii kiapa ngana ? Ngana memang nda pantas sama sekali, seharusnya dari dulu kita yang jadi ketua
bukang ngana! Sadar kwa, ngana nda pantas. Lebe bae ngana pigi jo, nanti kita yang ator ni anak-anak. Kita
Cuma isi akang pulsa baku 50 pa dorang, pasti dorang iko apa tape mau (nada emosi)
Lukas : Ba cerita apa ngana ? ngana pe cerita so lebe dapa tako
Clara : Oke dang, dengan sangat senang hati kita somo pigi kong kita somo serahkan pa ngana samua ini,
permisi !
Cilia : Eh clara m pi mana, tunggu.. kita iko
Prisil : Bagus, pigi kek dari dulu. (nada emosi)
Naomi : Eh kalu ba cerita ja pikir bae-bae. Ngana pe kata-kata so beking tape teman saki hati, kita tau ngana
kaya harta, mar sayang skali ngana miskin hati !
Prisil : Kiapa ? Ngana nda suka ? Mo baku iko pigi le deng ngana ? Pigi joo.., skalian deng ngana pe unyu-
Mike : sudahlah clara, nda usah jadi pikiran, bawa enjoy saja.
Cilia : Iya, dia kan memang suka bagitu, ba cerita seenaknya nda inga orang laeng..,
Clara : Mar betul apa dia bilang, kita memang nda pantas jadi ketua, lebe bae kita mundur jo. Lagipula pihak
majelis deng panitianya saja nda ada yang mo ba bantu kamari, padahal kita so minta tolong brapa kali (nada
sedih kalu boleh manangis)
Mike : Nda boleh bagitu, so tanggung torang tinggal tiga minggu lagi. kan sayang somo mulai latihan, masa
gara-gara 1 orang torang jadi mengecewakan banyak orang
Clara : Ya.. dramanya nda apa-apa tetap jalan, mar kita sudajo jadi ketua. Saki kasiang beking bagini, tanpa
dibilang juga kita sadar kalu kita bukang orang kaya, mar setidaknya nda usah bilang bagitu, kan kita nda pernah
hina pa dia. Orang yang support pa kita cuma ngoni dua (nada sedih)
Cilia : Masa ngana bilang bagitu ? ayoolah masih ada yang laeng, masih ada Tuhan Yesus yang bantu pa
torang. Mana clara yang kuat, yang tegar, yang cuek dg apa orang bilang?
Clara : Nyanda cil, pokoknya kita somo brenti sampe disini (nada nangis)
*muncul kakek-kakek*
Kakek : Perjuanganmu belum selesai anak muda
Cilia : Kakek sapa ?
Kakek : Jangan pernah meninggalkan tanggung jawabmu di tengah jalan anak muda
Clara : kong mo bagimana dang
Kakek : Hidup memang penuh tantangan, ngana masih muda, jadikan semua ini pelajaran for ngana pe hidop
kedepan, ingatlah apa yang kau tabur dengan air mata, akan engkau tuai dengan sukacita. Tuhan nda akan kase
tinggal ngana sandiri, dan Tuhan nda akan memberikan pencobaan melebihi kekuatan anak-anakNya.
Berjuanglah, tinggal sedikit lagi. Tak ada masalah tanpa jalan keluar (sambil jalan meninggalkan panggung)
Mike : Sapa so itu kakek ? kiapa dia tau torang pe masalah ?
Clara : Yah kita le bingo, soalnya baru ini kali kita lia pa itu kakek. Mar depe kata-kata itu betul, deng beking kita
sadar kalu memang seharusnya kita musti lebe kuat hadapi ini samua..
Cilia : Nah itu toh, Tuhan pe petunjuk itu. Ya sudah manjo pulang jangan sedih-sedih lagi aah
*Clara, Cecilia dan Mike meninggalkan panggung*
Narator : Berkat petuah sang kakek Clara pun akhirnya tidak jadi mengundurkan diri, dan kembali mengajak
rekan-rekannya untuk latihan
*Pemuda Remaja berkumpul, tanpa Prisil*
Kevin : Ketua, kita mewakili Patric, Diana, deng Thea, mo minta maaf kalu so beking ketua saki hati, maaf kalu
torang samua nda bisa di atur, torang janji mulai skarang somo serius.
Clara : Iya nda apa-apa
Naomi : Iyo ketua.. se maaf akang le pa kita deng lukas, so beking teman-teman laeng sirik pa torang.
PR : Wooo Hahahaha (tertawa bersama)
*muncul Prisil*
Prisil : Teman-teman, kita boleh ba gabung ?
Mike : Boleh noh, manjo ba gabung..
Thea : Iiih mau jo, sabantar dia ejek pa kita lagi
Prisil : Teman-teman samua, kita datang mo minta maaf.. kita sadar kita so banyak salah, terutama pa ketua,
kita menyesal.. samua yang kita lakukan itu salah, kita so beking saki hati pa ngoni samua, tolong se maaf pa
kita.. (sambil merundukkan kepala dengan penuh rasa bersalah)
PR : Nda ! (selang beberapa detik) Hahaha nyanda katu, torang so kase maaf..
Prisil : (terkejut) Hehe makase banyak samua.. kita janji berusaha jadi lebih baik..
Clara : Ya sudah, kalu bagitu torang lupakan yang so berlalu, torang mulai yang baru, pokoknya torang pe
penampilan nanti musti yang terbaik, torang kase bahagia pa jemaat, terutama pa Tuhan Yesus spaya Tuhan
Yesus bangga punya anak-anak sama deng torang.. semaaangaaaatttttttt
PR : Yeaayy semangat
*muncul kakek*
Kakek : Uhuk uhuk (batuk maksudnya)
Prisil : kakek ?
Clara : sil, ngana le pernah baku dapa deng ini kakek ? (ekspresi heran)
Prisil : Iya ini kakek yang kase inga pa kita, ini kakek yang kase nasihat pa kita..
Clara : kong kakek ini sebenarnya sapa ?
Kakek : Taraaa (berubah jadi Bpk. Pendeta)
PR : Bapak Pendeta ? (ekspresi syok kaget)
Kakek : Kage toh ngoni ? hehehe Walau bapak nda salalu ada di dekat pa ngoni, mar bapak pantau samua apa
ngoni pe kegiatan. akhir-akhir ini bapak lia ngoni rupa nyanda kompak, makanya bapak cari ide sampe bapak
beking ide bagini..
Clara : Ya ampun jadi ternyata ??? (terhenti)
Kakek : Iya clara, bapak juga dibantu sama Patric, Kevin, Diana, dan Thea
Prisil : Jadi dorang bajaoh dari pakita itu juga bapak pe rencana? Trus bilang kita mo cepat mati juga cuma
bakusedu dang
Kakek : Iya betul sekali, maaf ya prisil
PR : Hahahaha
Diana : Maaf ne hihi
Prisil : Aaahh jaha skali ngoni (manyun), mar nda apa-apa kita senang katu. Kalu nyanda bagitu, mungkin kita
masih prisil yang dulu hehehe (senyum)
Kakek : Ya sudah, kalu bagitu sebelum latihan bagimana kalu torang manyanyi satu lagu
PR : Setuju Pak, Hahahaha
(menyanyi lagu jalanMu tak terselami, oleh setiap hati kami/atau lagu apa saja, request boleh asal yang
berhubungan dengan cerita)
Narator : (sementara lagu dinyanyikan) Terkadang selalu ada rencana Tuhan dalam kehidupan kita yang tak
pernah kita tebak sebelumnya, inilah kehidupan kita, selalu Tuhan buat menjadi indah, selalu ada tawa sukacita
dibalik tetesan air mata, selalu ada pembelajaran dibalik sebuah permasalahan, selalu indah tepat pada waktuNya. Ingat saudara-saudara, hal baik apapun yang engkau tabur dengan air mata, suatu saat akan engkau tuai
dengan sukacita.
Selamat Natal, Tuhan Yesus memberkati kita semua