MANJALO TUANI GONDANG

PESTA BONA TAON PUNGUAN RAAJA SONAKMALELA -BORU

JAMBI

1. Gondang Mulamula

Tangan do botohon, ujungna jarijari,

Jarijari sampulu marsiganjangganjangi.
Jonjong hami dison Penasehat dohot Pengurus ni Punguanta Raja
Sonakmalela dohot boru jumolo hami marsantabi,
Santabi di amanta raja, dohot inanta soripada.

On pe nuaeng amang Parmusik nami :

oloan, panggora sungkot di langit
parsoara tandos tu tano,
pargonsi sitombus dolok,
parpanangar na gok di rura,
partaganing parunung-unung,
parsarune parende-ende,
partarias namalo.

Alualuhon Damang ma jolo tu Debata Sitompa Langit dohot

Tano ,Sigomgom Pangisina , Silehon Aek Na Tio.
Alualuhon ma muse tu Amanta raja, raja na hot di adat, raja na ingot
di uhum, sitiop parpatihon dohot sitiop hatian.
Alualuhon ma muse tu inanta soripada mulia, ina parorot, ina batak
mardinding, ina batak marparapara.

Ia nunga dialualuhon hamuna i, amang parmusik nami didok natua-

tua :
Gorga ni jabu ruma, binuat batu hula.
Naeng Manortor hami nuaeng dison,
bahen hamu ma jo Gondang Mulamula.
 Baen Damang ! Pasahat ……

2. Gondang Sombasomba
Dison hami Penasehat dohot Pengurus ni Punguanta Raja
Sonakmalela dohot boru, asa rap marsomba hami tu Debata, dung i
laos husombasomba hami ma muse amanta raja inanta soripada, di
antaran na bidang, di lobuan na godang on.

Ala ni i, pargonsi, laos bahen hamu ma Gondang Sombasomba i.

3. Sampur Marmeme
Asa songon na nidok ni umpasa:
Rintar songon bonang di gala,
Tio songon mata ni mual,
Jumpang na jinalahan,
Tarida na niluluan.

Bahen hamu ma, Gondang Sampur Marmeme i.

4. Gondang Simonangmonang ( Mangaliat )
Asa tinoto ni ulaon on, anggiat jumpang songon ni dok ni Natua-tua:
Jonjong di Uluan, manatapnatap dompak Tampahan,
Sai jumpang naniluluan, dapot najinalahan.

Didok natua-tua :

Binanga ni Sihombing binongkak ni Tarabunga

Tusanggar ma amporik di ruang ma satua
Sinur ma pinahan, gabe naniula.
Horasma partiga-tiga horas nang parkarejo
Horas angka pardalan-dalan, horas dohot angka pengusaha
Sai simbur magodang ma angka dakdanak songon ulluson purapura
Songon i  angka na magodang sai penggeng laho matua
Laos songoni nang negaranta, anggiat lam tu majuna.
 Bahen damang ma, parmusik nami , Gondang Simonangmonang i,
asa mangaliat hami.

5. Gondang Sampur Marorot

Ia nunga dibahen hamu Gondang Simonangmonang i, jala nunga
mangaliat hami, liat ni hagabeon ma i, liat ni parhorasan, manjalahi
hamonangan, dihami saluhutna rodi situan natorop, na humaliang na
lumolo.

Sai anggiat ma tinoto ni ulaon on, papitahon nauli, mandimposi na

denggan, pinarorot ni adat sian paradatan, pinarorot ni uhum sian
paruhuman, pinarorot ni patik sian parpatihan.
On pe, nuaeng pargonsi, bahen hamu ma Godang Sampur Marorot i.
6. Gondang Didangdidang
Ia nunga dibahen hamuna Gondang Sampur Marorot i, sai pinarorot
ni adat ma tutu, pinarorot ni patik dohot uhum, saluhut
Pengurus,Penasehat dohot Anggota ni punguanta on dohot
nahumaliang.

Tinoto ni ulaon on, anggiat ma

Tuhanta ma na masumasu hita, dohot mandidangdidang sude
punguan parsahutaon dos roha on , asa rap mandidang sahala ni
amanta raja, dohot badia ni inanta soripada mulia.

Bahen hamu muse Gondang Didangdidang i.

7. Gondang Sitiotio dohot Hasahatan

Pininta ni ulaon “ Pesta Bonataon Raja Sonakmalela-boru -Jambi ,

anggiat ma songon hata ni sijolojolo tubu:
Marsiaminaminan songon lampak ni gaol,
Marsitungkoltungkolan songon suhat di robean.
mangulahon dibagasan sada pangkilalaan
Asa marjunjungan songon dolok
marbanggua songon rura
jumpang na jinalahan
tarida na niluluan.

Las ma dingindingin, las ginolomgolom,

Horas ma tondi madingin, Tuhanta ma na manggomgomi.
Martantan ma baringin, mardangka hariara,
Matorop maribur ma akka pomparan Raja sonakmalela dohot boru
nami Matangkang panjuara.
Sitongka ma di hita na sambar parnidaan,
sitongka ma nipi na halobuan,
sitongka ma bala ni na niula,
sitongka ma sahitsahit tu jolma.
Tarlumobi sahit manular

Sai sipatiur na di juluan ma,

jala sipatio na di jaean,
di saluhut anggota ni punguantaon.

Sahatsahat ni solu ma, sahat tu bontean,

Sai sahat ma salulut Pengurus,Penasehat dohot anggota ni
Punguanta on.
Sahat gabe, sahat horas.
Sahat ma nauli, sahat ma na denggan hasahatan ni tortornami.
bahen hamu ma Gondang hasahatan padomu ham utu gondnag
Sitiotio.
HORAS-HORAS-HORAS
 
RAJA SONAKMALELA

1. Molo ni ida ma i torop na I SONAKMALELA I

ale amangai tung sude do di desa na wa lu
di ingani tahe.
Ai na martua ma i da oppu I
oppu parsadaan i SONAKMALELA I
di sude si bagot ni pohan i
siappudan na tahe.

2. Raja MANGUNSONG ma i anak na i

anak siahaan i/ ale amang Raja MARPAUNG ma i si paidua
pinopparna tahe
NAPITUPULU ma i da paitolu di rajahon ma muse Raja PARDEDE I
dung torop do tahe pomparan ni SONAKMALELA i.

Reff: Raja panganju do SIMANGUNSONG i

La ho manganju sude anggi na i
Raja MARPAUNG torop pinoppar ni
holan parpangkat na timbo-timbo i
NAPITUPULU dohot PARDEDE i
holan na borhat torop pinoppar ni tokke tu tokke sude pinoppar ni
na adongan goar i.

3. Adong ma sada to na ni oppu I

di Sonakmalela i/ ale amang
si naga baling na di balige I
bona ni bittatar i.
Tanda - tanda ma i molo marudan
di ulaon na i/ manang pesta na I
tanda gabe ma i da tanda horas
tu pinoppar na i.

4. Adong ma sada na istimewa i

di SONAKMALELA i/ ale amang
Si boru muli manang anak mangoli
dipesta na tahe.
Sisada dudu do anak dohot boru
boru na pe namboru marsitindihan I
tona ni oppu i padan i sai na hot do tahe.

Reff: Nang pe parboru SONAKMALELA i

holan na burju do tu boru na i
las songon ni do muse boru na i
holan na barsa parhula- hula i
ala ni i sai laku-laku do ianggo boru ni SONAKMALELA i
maradu-adu sude anak ni halak
lao mangalirik i
Ai na martu, 2x
ai na martua da ma i da 3x
oppu i raja i oppu i SONAKMALELA i

oppu i raja i oppu i SONAKMALELA