Assalamualaikum saya sampaikan

Waalaikumsalam saya beri jawaban

Dengan Bismillah kita memulai
Bermadihin untuk kita semua
Mun ulun salah, muhun dimaapakan
Mun ulun bujur, itu patunjuk Tuhan
Lawan guru wajib kita hormati
Lawan kuitan itu apalagi
Kawan nang baik capati dirakati
Nang kada baik janganlah dimusuhi

Terima kasih pian mau datangan

Hari ini gembira perasaan
Mudahan kita samua selalu beriman
Diganjar Tuhan seribu rahman
Ingatlah tafsir hadits dan firman

Dangarakan dangsanak samuanya

Menuntut ilmu itu wajib hukumnya
Jagan kada ingat lawan pengalamannya
Ilmu wan amal itu sama pentingnya
Wayah ini zaman globalisasi
Ujar ahli bahasa, dunia basa-basi
Ujar ahli teknik, dunia teknologi
Ujar wartawan, dunia informasi
Ujar mahasiswa, dunia reformasi
Ujar guru-guru, dunia sertifikasi

Guru nang baik bisa jadi taladan

Amun maajar janganlah kalandungan
Mambari tugas jangan ditinggalakan
Kalasnya bubar kakanakan kuciakan
Guru nang baik harus bainovasi
Siswa balajar jadi tamotivasi
Banyak caramah bapiragah pina musti
Guru taliur siswa kada mangarti
Wayahnya ulun bapandir kabarsihan
Kabarsihan itu pangkal kasihatan
Kalau ada ratik-ratik bahamburan
Lakas putiki jangan tunggu patugas kabarsihan
Liwat Madihin kita balalucuan
Jangan marangut, ayo batatawaan
Amun tatawa jangan banyanyaringan
Di rumah sakit banyak urang bagaringan
Liwat Madihin ulun batitip pasan
Banyak tatawa itu memang dianjurkan
Jangan jua tatawa batatarusan
Dikira urang kita ni sakit ingatan
Sampai di sini ulun bamadihinan
Ngalu kapala pandir kada karuan
Pian nang nyaman rami batatawaan
Ulun taliur maarit kahausan
Sadang bamandak sadang pula batahan
Ulun pang sudah marasa kauyuhan
Sakali lagi, muhun dimaapakan
Tarima kasih, muhun batapuk tangan