*Almanak HKBP*

*Rabu (01/05/2024)*

*Daniel 3:28*

3:28 Jadi ro ma hata ni si Nebukadnesar: Pinuji ma Debata ni si Sadrak, si Mesak dohot si Abednego,
naung marsuru * suruanna, asa paluahon naposona, angka na marhaposan tu ibana, gabe ndang dioloi
patik ni harajaon, tung diseahon do dagingnasida, asal unang mangoloi manang marsomba tu debata
sileban, dungkon ni tu Debatana.

3:28 Berkatalah Nebukadnezar: "Terpujilah Allahnya Sadrakh, Mesakh dan Abednego! Ia telah mengutus
malaikat-Nya dan melepaskan hamba-hamba-Nya, yang telah menaruh percaya kepada-Nya, dan
melanggar titah raja, dan yang menyerahkan tubuh mereka, karena mereka tidak mau memuja dan
menyembah allah mana pun kecuali Allah mereka.

*Buku Ende 256:1+7* Tautan : https://youtu.be/ncoL2Fteq4o

*JESUS KRISTUS I DO RAJA*

(1) Jesus Kristus i do Raja, pinabangkit ni AmaNa. Manggomgomi sasude, manggomgomi sasude. Jala
nasa hajolmaon, tu Ibana do mar-Tuhan. Parhatopotonna be, parhatopotonna be.

(7) Dohot au pe di na rodop, naeng porsea, naeng marolop. Naeng mamuji Tuhanki, naeng mamuji
Tuhanki. Jesus Kristus i do Raja, ingkon tunduk saluhutna. Mangoloi Rajantai, mangoloi Rajantai.

*Sijahaon manogot: Psalmen 98:1-9*

98:1 Endehon hamu ma di Jahowa * ende na imbaru sada, ai nunga dipambahen Ibana angka
halongangan; nunga ditumpahi siamunna i dohot tanganna na badia i Ibana. 98:2 Nunga dipabotohon
Jahowa hatuaonna i, nunga dipapatar Ibana hatigoranna i di adopan ni angka parbegu. 98:3 Nunga diingot
Ibana asi ni rohana dohot hasintonganna tu bagas ni Israel, nunga diida * luhut ujung ni tano on hatuaon
ni Debatanta. 98:4 Marsuraksurak ma ho, ale sandok tano on, mangolophon Jahowa, pangiar ma soaram
marolopolop, jala marende ma hamu. 98:5 Puji hamu ma Jahowa, marangkup arbap, mardongan arbap
dohot soara ni ende! 98:6 Marolopolop ma hamu di jolo ni Raja Jahowa, mardongan sarune dohot soara
ni sangka. 98:7 Mardorom ma laut ro di isina, portibi on ro di pangisina i. 98:8 * Martopaptopap ma
angka batang aek, rap marolopolop ma angka dolok. 98:9 Dijolo ni Jahowa, ai nunga ro Ibana laho
manguhum tano on, uhumonna ma portibi on marhitehite hatigoran dohot angka bangso marhitehite
hasintongan.

*Sijahaon borngin: Pangungkapon 5:9-14*

5:9 Diendehon nasida ende na imbaru, ninna ma: Na tama do Ho manjalo buku i jala mangungkap angka
sahapna, ai naung tarbunu do Ho jala marhitehite mudarmu ditobus Ho do tu Debata jolma sian saluhut
marga, hata, houm dohot bangso. 5:10 Jala dijadihon Ho do nasida gabe harajaon hamalimon di
Debatanta, asa manggomgomi nasida di atas tano i! 5:11 Dung i mamereng ma ma ahu, gabe hubege ma
songon soara ni torop surusuruan humaliang habangsa i, nang soara ni angka parngolu i dohot angka
sintua i; ia toropnasida marloksaloksa jala marriburibu. 5:12 Marsoara na gogo nasida mandok: Na tama
do Birubiru naung tarbunu i manjalo hagogoon dohot hamoraon dohot hapistaran dohot sahala dohot
hamuliaon dohot hasangapon dohot pujipujian! 5:13 Gabe hubege ma soara ni nasa na tinompa, angka na
di banua ginjang, di tano, ditoru ni tano ro di na di laut, tung saluhutna na di bagasan angka i mandok:
Pujipujian dohot hamuliaon dohot hasangapon dohot hagogoon ro di salelenglelengna ma di Ibana, na
hundul di habangsa i dohot di Birubiru i! 5:14 Jadi didok na opat parngolu i ma: Amen! Laos manungkap
ma angka sintua i huhut marsomba.

*Tangiang*

*Ari Rabu : EKONOMI RAKYAT DOHOT LINGKUNGAN HIDUP*

1. Asa lam tu hinsatna perekonomian ni rakyat tarlumobi angka partani, pardengke, dohot partigatiga na
metmet, dohot buruh.

2. Asa dipasupasu Debata sude profesi dohot ulaon ni ruas ni Huria na marragam i bahen hadengganan di
keluargana nang di masyarakat nang huria pe.

3. Asa dipasupasu Debata angka tao, sunge, ambar, tombak nang harangan, saba nang kobun.

4. Asa lam diargahon ruas ni Huria tongtong manjagahon hahiason ni jabu, alaman, huta, dalan, onan, tao,
dohot sunge, ladang dohot kobun, nang gareja.

5. Asa dipasupasu Debata angka usaha pasuanghon angka tombak nang harangan naung sanga disegai.

6. Asa marbisuk saluhut ruas menghemat aek, listrik, dohot bahan bakar minyak (BBM).

*(Sumber: Almanak HKBP Tahun 2024)*

https://www.youtube.com/@Debatamangaramoti

Halaman 15

https://www.youtube.com/watch?v=TX9oy5VFDPQ

https://hans5958.github.io/HKBP-Guidebook/

https://alkitab.app/

https://www.youtube.com/watch?v=FLaEziptFbs