Patanakhon Hata Ni Debata

MINGGU PALMARUM 10 April 2022

“PORSUK MAROLOPOLOP”
1. Marende Huria BE. No. 764: 1,3 " Molo So MarTuhan Ho “
2. Tangiang Pamuhai
3. Turpuk: Psalmen 31: 8-16
4. Hatorangan:
Patujolo
Adong sada ende partondion (logu rohani) na marhata Jerman mandok songon on,
“Ich sing Dir ein Lied in ihm klingt mein Leben ...dohot udutna." Molo di hata Batak
tarsongon on ma hatana. "Huendehon sada ende tu Tuhan ende na mansoarahon
porngoluanhu." Didok angka na pistar, Ende i ma ekspresi jiwa. Hatahata ni ende i ma
patuduhon hadirion nampuna ende i. Marhite ende i, gabe targombar manang boi ma dodoon
panghilaan dohot pingkiran na sedang berkecabuk di sadasada halak. Buku Psalmen i ma
punguan ni angka ende naung tarbarita sian na robi sahat tu tingkinta nuaeng.Ndang taretong
be songon torop ni bintang di langit jala songon torop ni rihit di topi laut anga na tarapul, na
monang sian angka parungkilon dohot hamaolon marhite buki Psalmen on.Ai ndada holan
laho manggombarhon panghilalaan manang holan ekspresi jiwa alai ende na mansoarahon,
manghatindangkon sejarah haporseaon dohot panghirimon; sejarah hamonangan ni sada
halak nang sada bangso maradophon ragam ni parungkilon, parsoirion na masa. Ende na
mamaritahon pengalaman ni halak na targogot, maheu, merus, naung sor mate ala naung
mandate; naung tarhatos alai sumuang gogo dohot ngoluna.
HATORANGAN
Di turpuk jamita sian Psalmen 31: 8-16 on i ma sada sian Ende ni Raja David. Ende
on mansoarahon manang mangendehon parsorionna dohot hadirion na maradophonparsorion
i. Digombarhon endena on do panghorhon ni parsorionna tu panghilaan, pingkiran, dohot
pamatangna. Tung humasusa do rohana, ndang marhasoan panghilaanna; ndang holan
rohana, ateatena na hansitan sahat do ro di tu pamatangna. Alai dipangalaho na songon i
porsuk ni panghilaan ni raja David ndang mandele ibana, ndang mamurai, ndang
marungutungut, ndang disolsoli bagianna. Gariada jumpang olopolop dohot las ni roha di
ibana atik pe naung maras jala maheu roha dohot pamatangna. Sian dia do jumpang ni Raja
David olopolop dohot las ni roha i? Aha do ojahan ni las ni roha dohot olopolop na i? I ma
na dipajojor na di Psalmen 31 on.
Somalna ia pangalaho na masa taida di parngoluan siganup ari on molo marungkil
manang marsitaonaon sada halak, tumatangis do jala holsoan manang bobonosan. Tarlumobi
ma di angka parompuan, pintor patar do idaon molo nunga ponjot rohana, sungkot pikiranna,
maheu ala ni sitaonon, isarana tilahaon manang mabalu, mangae parsahiton na renge manang
na so ra malum, ala ni hapogoson manang ala adong angka pangalaho ni anakhon manang
anggota keluarga na so patut. Sai tarilu do simalolongna jala ganjang hosanna, maheu bohina
ala disosak parungkilon i panghilalaana pola sahat manusuk tu ateatena. I ma pangalaho
hajolmaon jala na patut do i masa. Patut (wajar) do tumatangis, wajar do maheu bohi jala
gale pamatang molo manaon na porsuk manang molo marsitaonon, manusiawi do i.
Marhite ayat 8-12 dipabotohon do tu hita uju mardangol jala targogot raja David
dohot panghorhonna tu dirina sandiri. Tontu songon naung taboto uju bangkit raja David
ndang lomo roha ni Raja Saul jala sai diuji do mangonggop nosana. Ndang marhasoan ariari
ni raja David atik pe raja na miniahan ibana jala sai marhamonangan maralohon musu ni
bangso i. Bernit do panghilaan ni raja David ala ni parsorion dohot angka hatahata na so
sintong angka na tubu sian roha na mangiburu. Ndada holan onggoponggop ni raja Saul na
mangosam ibana na mambahen marsak jala maheu rohana dohot pikiranna dohot do angka
donganna raja nang angka dongan na hian. Lam bagas jala dokdok sitaononna pola sahat tu
na merus gogona. Ala ni parungkilon i gabe moru umurna, suda gogona, tarambat angka
ulaonna dohot langkana. Lola ma sude pardalanan ni ngoluna, ndang tingkos be boi denggan
mangula ulaonna songong panggomgomi.
Tekanan mental na niae ni raja David manghorhon sahat tu pamatangna. Boi dohonon
secara mental dohot fisik mangae ma raja i. Pangontak ni parsorion ni sahat tu sandok
pamatangna ai gale ma sude pamatangna. Jorbut jala kejam pangalaho raja Saul manggana
angka barita gabus songon na masa tu raja David. Mangae ibana polo ndang tarpodom
simalolongnasimalolongna jala ndang margogo holiholina. Patut do adong hata peribahasa
mandok “Fitnah lebih kejam dari pembunuhan”.
Ndang marhaujungan parsorion ni raja David di udut do patoranghon avat 13-16
panghorhon ni barita ni alona gabe mago sahalana di tongatongan humaliang, di tongatonga
ni angka raja panggomgomi dohot angka alealena. Gabe roa baritana jala dipatutoru goarna
naung hushus hian (Fitnah dan berita bohong tentang raja Daud menyebar begitu cepat).
Punjung ma ibana songon tandiang na hapuloan. Tarduru ma raja David songon halak siula
na so uhum ndang marlapatan be ngoluna jala ndang marniula be angka na uli na denggan
naung pinatupana. Sobokkon ngarngar na ambolongan nama ibana. Ndang patut nian taon on
ni raja David parsorion i ai ndang adong na so uhum diula ibana.
Di sude parsorion dohot pardangolan na niae ni raja David nang pe naung maras roha
dohot dagingna, suda gogona, merus panghilalaanna, gok arsak rohana alai anggo tondina
mangangguk do tu Debata. Sian roha na maheu i ro do soara ni tangiangna mandok: "Alai
anggo ahu, tu Ho do ahu marhaposan ale Jahowa ningku do: Ho do Debatanghu." Disadari
raja David do ndang adong be na bo tarpangasahon ibana sian dirina; huasona songon raja,
goarna na tarbarita ala sai monang di parporangan. Sude na boi dipangasahon sian
hasangapon portibi on ndang margogo laho paluahon ibana. Holan asi ni roha ni Debata
sambing do na boi pasuang las ni roha dohot gogona. Ende tangiang na marharoroan sian
haporseaon na tang, marharoroan sian parsaoran na rosu dohot Hata ni Debata, i ma gogona
maradophon parsorion i.
Parsorion dohot pardangolanna i mangonjar rohana mangangguk tu Debata. Tangiang
na i mangalehon gogo na imbaru tu ibana; tumatangis do simalolongna, paet do
panghilaanna, suda do gogona alai marende do anggo tondina tu Debata parasiroha i. I do
umbahen na dihatindanghon raja David marhite endena on, marolopolop jala marlasniroha
ibana di parsorionna i ala pangurupion ni Debata.
5. Diskusi:
a. Marolopolop jala marlasniroha tingki mamolus na porsuk, na paet. Beha ma pangalaho ni
i? Uji ma jo mangarimangi ia na masa tu Raja David masa tu dirinta sandiri (Boi ma
dipangido sada manang dua halak na rade berbagi pengalaman).
b. Parungkilon manang sitaonon isarana ala ni parsahiton, tilahaon, dohot ala ni pangalaho na
masa boi mangunjuni roha dohot pingkirannta, mangunjuni haporseaonta. Aha ma na boi
dohononta maradophon parungkilon i unang diangkalakali parungkilon i hita?
c. Nunga boi dohononmu tu na humaliang nang tu Debata parungkilon manang hapaeton
naung dung diae ho gabe sada panindangion haporseaon? Jala songon dia ma pardalanna?
6. Marende Huria BE. No. 213: 1 “Dung Sonang Rohanghu”
7. Tangiang Pangondianon
8. Marende Huria BE. No. 774:3 “Tung Mabaor Sian Ho”
9. Tangiang Pangujungi