AUH MANYAKI MAMALAS PANGANTEN

Nyakiku purun eka lapik sawang, lapik sambang garantung padadukan ketun ndue hasaki, mangat akan lapik kayun penyang karuhei tatau, bajakah bulau sangkalemu Raja, lapik kapintar kaharati, mangat ureh ngalawan ketun ndue matuh kabaluman ketun ndue belum, mangat manjadi huma hai, batang panjang, tatean lumbah.

Nyakiku sala, sala handiai ketun ndue bara tamanang tambisu, sala bara utang silih, lau lutus, sala bara dahiang baya, nupi papa, sala kea bara katapas kakurang.

Nyakiku buah tuntang nyakiku mumpung tutuk tunjuk manyurung mananjung, mangat buah hayak mamumpung kare tuah rajaki, mumpung kare panatau panuhan, mumpung kayun penyang karuhei tatau, mumpung kapintar kaharati, mumpung jawet ramu anak jarian ketun ndue, uka sama tau sanang hureh ngalawan, mangat ketun akan tanggeran lewu mandereh danum, pananggak rundung hapamantai tambun.

Nyakiku likut tatapmu mangat manalatap kea tamanang tambisu, manalatap kare dahiang baya palin ketun ndue belum.

Nyakiku buku laling hila luar, mangat maling maluar peres badi, peteh untung awang pandak janjian balang belum, maling maluar kea sial indang manarantang bitim kawan mina malalundung balitam.

Nyakiku buku laling hila huang, bataling untung ukur, tuah hambit, bataling aseng nyaman ketun ndue mambelum arep nyangkelang kulan garing ije beken.