HATA PANGUPAON

Di Ho amang Hela dohot Ho boru hasian!

Di manogot on tarpasu-pasu ma hamu gabe sada rumahtangga na imbaru.
Hombar tusi dison hu patupa hami do sapiring indahan di hamu, sada dengke
songo lompan di hamu, jala sada panginuman mu . Ditangiang dohot pangidoan
nami asa sada ma roha dohot pingkiranmu. Sada pambahenan dohot
pangulahonon muna. Masihaholongan rap mangalangka tu jolo manimbung tu
ginjang. Masiamin-aminan songon lampak ni gaol. Masitungkol-tungkolan
songon suhat di robean. Pos do rohangku na boi ulahonon muna. Burju hamu
martangiang mamuji Tuhanta. Amanta Debata ma na mandongani hamu.
MARSIPANGANONMA HAMU! MAULIATE.

HATA PASAHAT ULOS PASSAMOT

Di hamu amangbao dohot edaku dison!

Nunga mansai las rohanta di tingkion ala nunga saut na sinangkap ni rohanta,
ima di naung manjalo pamasu-masuon parsaripeon anakmu nagabe hela nami,
boru nami na gabe parumaen mu, jala uloan na tapatupa nunga mardalan
dibagasan dame dohot las ni roha.
Hombar tu paradatonta na uli i, saonari pasahaton hami ma ulos passamot di
hamu, manamot na uli manamot na denggan. Ulos na ganjang do on, ulos na
hapal, jala sitorop rambu. Sai ganjang ma umur mu, hipas-hipas torop nang
pinomparmu.
Songon hatani natua-tua ma dohonon
“Andor halumpang togu-togu lombu, Andor hatiti togu-togu ni horbo”, sai
horas-horasma hamu sahat tu na saor matua, patogu-togu pahompu sahat tu na
marnini dohot marnono.
Molo pe songonon ulos na boi hupasahat hami. Las ma rohamu manjalo
HORAS MA HAMU (DIULOSHON). MAULIATE.
 HATA PASAHAT ULOS HELA

Di hamu amang hela dohot ho boru hasian!

Sadarion nunga manjalo pasu-pasu parsaripeon hamu sian Debata marhite
naposona. Sidohonon nami “SELAMAT BERBAHAGIA DAN SELAMAT
MENEMPUH HIDUP BARU”
Sumber kebahagiaan adalah kasih, yang artinya saling mengasihi, tolong
menolong, saling harga menghargai, dan tentu saling mendukung. Masiamin-
aminan ma hamu songon lampak ni gaol, marsitungkol-tungkolan songon suhat
di robean.
Songon hata ni natua-tua :
“Balintang ma pagabe tumundalhon sitadoan”, ari muna ma gabe molo sai
tongtong hamu masipaolo-oloan. Sai tibu ma hamu dililiti andor mu. Tubuan
anak tubuan boru.
Songon hata ni natua-tua :
“Habang manuk na bontar songgop tu bona ni pinasa, sai tubu ma di hamu
anak na pistar dohot boru nauli basa. Khusus tu borungku, dohononku ma asa
burju marsimatua. Ingkon sangap bahenonmu simatuam. Patuduhon holong ni
roha nami dohot las ni roha nami pasahaton ma ulos hela di hamu, ulos na
ganjang, na hapal, sitorop rambu. Parhitean do on mangido tu Amanta Debata
asa tongtong hamu dibagasan pangaramotionNa, jala sai di pasaut nasininta ni
rohamu, jala laos mangihut pasahaton mandar tu hela nami na naeng
sipangkeonna di parhobason.
(DIULOSHON ULOS/DIAMPEHON MANDAR)
Songon hatani natua-tua ma dohonon:
“Sahat ni solu, sahat ma tu bontean”, nunga tung denggan mardalan ulaonta
sadarion, sai sahat ma hita tu parhorasan sahat tu panggabean.