PASIKAMBA

IJamani ambuleanoari ipulo buton nodadi amia mancuana mowine mai anakalambe
makidano. Inano kongea Wa Indi mai anakalambeno kongea Wa Irone. Mohaneno
nomolengomo nomate idunia cia natumau piwaua naice hake hangga’aso mo’ia, hawite amea
ka’ana kokodi nombilai ikaramea kampo. Wa Indi mai Wa Irone nodadi toa’ru kaeno.
mintenihuloe hangga’aso pikohunbuiano kahoci kadadia, mo’ia harusu namihamota.
Hamotano mo’ia cia wala nato’owa, hawite atampa nokapimbulasiegandu mai kasobia.
Mo’oli cuke’e moia uka pikamata sauno api hamota, aga;ano anuaso nakamaso’e mai sisano
anuaso nakapake’e wutono. Dadino moi’ia mbilai hake mai kasumanaa.
Minte nimbulea Wa Irone inte idaoa, ia tarusu nobancie mowine-mowine kampo
aga.ano, hangganomo pakeano nipakeno kadakihake. Aga’aso ia kikidilalono hangganomo
pinamisie nombilaie mai mia-mia ilepeno. Biasano ungkaka kalambe baraba mai sabangka
saumuruno, hawali ia tabe namikaraja’a anteru nahumamba Inano. Hawite mbarike’e Wa
Irone ungkaka bukua sambahaea “ aipo nake’e kato’o’u” rikenomo pogauno ilalo hateno Wa
Irone.
Kalambe-kalambe sa’umuruno Wa Irone mo’olino nokawi, hawai moapa kato’ono Wa
Irone ciapo nabundo. Kondocuaia’ari ia nohamba ianano pitoro kambose( gandu cibuka mina
kacimbeno ) Wa Irone pikabanci alagu cipindongo malingu
Ka’asi kulu’uana inda’u pihora-hora I’dunia
Camane’e elea’u namo’asisa’u
Noita isami elea tumangku
Ingkita tosabara wite, inda’u sukuru
Nongea ba’da ia’ana
Ompu…
‘dawusia’u emani mai rahmatino
Mai ‘dawusia’u ka’asimu
Pindongo kabanci Wa Irone, inano nope’ena “ ana’u moapa kabanci mbacuke’e ancu?’
Wa Irone nobalo “inda’u piburi-buri dawua’uana, moapa noratomo mba’ina ana ingkita
tomiskinimo anteru? Jodo’u ciapo uka nabundo.”
“Sabara ana’u, kato’o ilimano ompu,” balo inano Wa Irone patenangi emani hateno anano.
Samabitano rua mia anamohane akano mai aino inte Ikarompu hangga’aso nakamajere
rusa. Mo’ia anamohaneno kanto’owano buton. Aka-aka kongea La Ode Inci hande aino
kongea La Ode Sina. Mo’oli mo’ia nopitabu rusa, mo’ia tarusu kabala. Ilalono hangka’a
balea, La Ode Inci mai aino pindongo kabanciano kalambe ‘bamalinguamo. Aipo uka La Ode
Inci, ia nopintotobanga pindongo’e. ia noguguru aino pikamata inde’eno kalambe malingua
iahaleo. Para’a kalambe iahaleo Wa Irone. Mo’oli mbarike’e La Ode Inci pe’enamo I Wa
Irone,
“ kabancimu mangada hake ingka, cuhumada ‘bara iso’o cumo’ombasia’u ngeamu?”
Wa Irone nobalo, “ngea’u Wa Irone, ndane’e ahumamba simiu?”
“Ah, cia, inda’u mai ai’u hawite kabatula tolalo, ngae’u La Ode Inci mai nake’e ai’u ngeano
La Ode Sina, “ nobalo La Ode inci. Mo’oli mbarike’e kadorua ai mai akano nokaposangamo
I Wa Irone hangga’aso nakatumarusu pihangkahangka’ano. Ilalono lalano kabale La Ode
Sina nopogau I wa’akano’ “aka, kalambe iahaleo sapasino hangga’aso aka, ia ‘bamomalumo,
pogauno halusu, ajono uka mangada.”
“tarus taraha ai’u saitano inda’u tarusu pe’elue’ koajono ia kalambe omela. Inda’u piburiburi
alumosa’e. saratonto I ka’ana inda’u atumarusu amo’omba’e inanto mai amanto,” tangari La
Ode Inci. Mo’olimbarike’e La Ode Sina nope’enamouak i akano.
“ hawai aka, pantea inanto mai amanto nahumada nalumosa’aso aka? Aka itaso wutomu,
pakeani kalambe iahaleo mbakadakimo. Mai aka uka ciapo cukumonie mbilai uka.”
“ biara cia akumonie to’aru uka inda’u konie kalambe iahaleo sapasino hangga’aso inda’u.
mai inada’u tatapu a’usaha atumataku manto mai inanto hangga’aso nalumosa’aso inda’u,”
tangari La Ode Inci.”
“malingumo aka ancu, hande aka pitabuemo kasapasino inda’u siapu abantu,” patarusue La
Ode Sina.
“ tarima kasi, iso’o hingganomo ai’u emelano hake,” tangari La Ode Inci.
Rato morondo koajo biasano nkamoncuru Wa Irone nopidoa hangga’aso nadumawusie
barakati to’aro, umuru ko’ata, mai namomalusie kato’ono. Tangasano moncuru, ilalo
poninipino ia nobundo’e amia mancuana mbaju to’oba mai pikaluncu mopute. Ia
nopogau “hai ana’u, sabara iso’o, ‘dadimu mai inamu nabaruba wite.”
Abantar Wa Irone nobangu mai para’a wawala’amo. Koajo hulao biasano, sawawalano
hake Wa Irone inte Idaoa mai inano Wa Indi hangga’aso nakamara’aso sauno api
cipikumpuluno hanowia. Mo’oli nokabale mina Idaoa mo’ia inte ikarompu hangga’aso
nakarumompu auno api ikarrompu hangga’aso nakamaso’e mindua samabitano. Kabatula
huleo ia’ari ia inte wite kaso’osano I karompu, cia mai inano. Mo’oli molengo pirompu sauno
api ia cipiromo iworuno sau to’owa hingganomo nomomalemo. Tamngasano moncuru, ia
nombulasie bundo’e mancuana ilalo poninipino hamurondo mai pakea po’ita. Tete ia haleo
pogau, “ana’u Wa Irone nake’e ratomo kato’omu mai inamu nabarubah,”
 Wa Irone nobangu mina kancuruabo, ia cia namengerti para’a larono pogauno tete
iahaleo ilalo pononipino. Hinggano pinamisie kondocumo huleo, ia tarusu noangke sau-sau
cirompuno hangga’ao nabawae bale.
Saratono ika’ana, w a irone no cindala’e inano nahumowu kasobia I hamota. Ia
pikamamarimba inte ihamota mai nobawa kacikali. Hangga’asaonahumowu kasobia.
Saratono ihamota kake Wa Irone cipaleko iloko to’owa, ia tarusu papinda’e loko iahaleo
hangga’aso cia narumapo mia lumalo. Hawai mbarike’e mata Wa Irone notonto ikante
iworuno loko to’owa haleo. Ia taruru nopisese anuiahaleo mai kacikali ni’bawano. Mo’oli
noseseie pitabumo peti to’owa ia cia nakumonie isino. Hingganomo peti iahaleo
‘bata’owamo, Wa Irone noungku inano. Madawua tampano hamotano kotaro ibalakano
ka’ana. Mo’ia mo’oli pohambasie soro peti to’owa mai moboa iahaleo.
Saratono ika’ana mo’ia kadorua tarusu nobuka peti haleo nakamita’e isi peti.
Kamahano lalono mo’ia kadorua nokaita pobabacuri ‘doe mai bulawa. Wa Irone
noko’aki. “ina, nake’e harta karu.”
Mo’ia tarusu nokandole sukuru sabagai tarima kasi barakati’ana nobundo cia
nakumonie. Samarimba dadino mo’ia taurusu baruba.ka’anano mo’ia nopigaue mai
nopalangkapue mangada, mai mo’ia uka nokabalu pakea-pakea mangada uka. Mai pakea-
pakea mangada cuke’e Wa Irone noci’ita mangada hake koajo kalambe-kalambe kanto’owa
aga’ano. Mo’ia cia nakamarlulu karaja’a hangga’aso pikohumbuano ‘dadino. Hawai handa’e
rike’e cia najumadisie kocio. Mo’ia ‘bara nokabantu mia-mia maseke mai noragani paibada.
Para’a salam nake’e nipigauno cia mai papara’ano.
Piahuleo mo’oli, La Ode Inci mai mia kanto’owa aga’ano nobundo ika’anano Wa Irone
hangga’aso nakalumosa.La Ode I nci mahalalono para’a kalambe nilosano inciano Wa Irone,
higganomo nomangadamo cia koajo ipiamo ari.
Losa’ano La Ode Inci notarima’e Wa Indi inano Wa Irone, para’a uka Wa Irone
nope’elu La Ode Inci. Minte nihuleo mo’ia nokawimo. Acarano nopolele picu huleo picu
rondo, hingganomo kabiasaanomo kanto’owa nopakawi kalambe mai anamohaneno mo’ia.
Inciano wite mna kanto’owa ciungkuno, hawai mia cia dumane’e uka mo’ia hokolo ikawiano
mo’ia.
Ataku mbarike’e La Ode Inci mai Wa Irone nodawusiemo amia ungkaka mohane
nokongeasiemo La Ode Pasikamba ma’nano harta karu.