TARAMBU’UNO TAMONO O’OSU MEKONGGA

Saritano, laa o’aso tembono wonua Sorume (hende’ino tamono Wonua Kolaka)
nokono’i abala kadu’ito owoseno. Laa manu-manunggaruda masa’ako laa mohitupi wonua
nggitu’o. Tudu oleo, manu-manunggaruda tudu monggamo, monggamo lumangge, ronga
monggamo koleleno to’ono dadio, hende’to kiniku, o sapi, o wembe. Keno tembono
no’kadadia lau-lau, menggau-menggau koleleno to’ono dadio nggo’opu.
To’ono dadio wonua Kolaka tewere ronga motaku. Keno koleleno opu’ito, nggo hiroto
no’kinano. Ieto alasano aro motaku peluarako ari laika mepolaha toro’aha. Kondu’uma
to’ono dadio peruku’aro to’ono dadio wuta molua tamono Wuta Molua Bende. Wuta molua
ino pesala’ano to’ono dadio lako ine pombahoraro. Tembu’uto nolaa manu-manunggaruda
nggiro’o molua ino monua-nua ito, lakonoto tanio to’onota barani meruku.
Laa aso tembo, nepombodea o bawo keno i wonua Solumba (hende’ino tamono
Balende) laa aso to’ono nomotau ronga kabala tamono i Larumbalangi. Laa lekeno ronga aso
lawa o sawu pusaka inakeno lumaa. Lakonoto inoliwi opio-pio to’ono ronga teposuangge
to’ono kabala i wonua Solumba. Keno te’embe yamono kinamo manu-manunggaruda,
lakoroto ando’olo motu’o ronga lakoroto mehiako pu’unggasu owose.
Dungguro i wonua Solumba, to’ono ino liwiro sumaru’ikero laa kadadia i wunuaro
Larumbalangi.
“Yamoto i tewere laa kadadia ino. Biar kuta’etai inggomiu haika mokotaha’i manu-
manunggaruda.” note’eni Larumbalangi ronga komomo.
“Keno te’embe? Yamotoka kilawa’i manu-manunggaruda, peluarako tokaa ari laika taki
barani.” note’eni to’ono inoliwi.
“Hende’ino peohai. Kombulu’i kowuna ato mbowai kowuna mondilo dai-dadio. Aringgiro’o,
peopolaha langgai barani ronga mokora nggo pombanino manu-manunggaruda i tonga wuta
molua. Ano, walai to’ono nggitu’o ronga kowuna mondilo ronga ranjau’i! Parendai
Larumbalangi.
Arino modeai, pombokondauno mbembuleiroko i wonuano mokodunggu’ikero oliwino
Larumbalangi. To’ono dadio i wonua nggitu’o mondairo langgai moseka’ako nggo eta’i
lomba numonarigi’i manu-manunggruda.
Mohinano, o etu langgai moseka leu ari laa luwuako wonua nggo leu
mokumulunggitu’o. Leu mbekumbulu i rai laikano banggonano i wonua Kolaka.
“Hende’ino Peohai nggo luwuako! Inae nggo pinowile tewali pomba’ani ronga ano
peponangiki manu-manunggaruda, keno iee ata, nggo ieeto tewali to’ono nggomesa. Ronga
keno iee to’ono nggawasa, nggo’eto tewali presideno i wonua ino.” Banggonano wonua
ne’pidato.
Aringgoro’o, sayembara pinokolako’ito kadu’ito motindino. Owa-oaso to’ono nopokiki’i
kabalano. Aringgiro’o, sayembara nggiro’o nopopenangi o ata tamono Tasahea ari wonua
Loeya.
Laa aso tembo, Tasahea niawo niwuta Bende nggo pomba’ani manu-manunggaruda.
Laato aso tembo, no laa moia i tonga wuta molua, o ata nggiro’o niwala ako kowuna
mendilo. Iee pinowehi o aso kowuna mendilo laa rasuno. Luwuako sadia’ito, luwuako to’ono
dadio meihako pu’unggasu libutano o wata lua. Moiato Tasahea dowono i tonga lapanga
umo’oloi ieno menu-manunggaruda.
Merambi ndonga oleo. Laahuene mengga masa’ako ano rorma. Ngiro’o tandanoto
manu-manunggaruda noki’ito panino. Sana’ito penaono manu-manunggaruda nokondo’i
to’ono laa menggokoro i tonga wuta molua Bende. Ronga mearo’ito, iee lumaa oputu’ito
kumikisi Tasahea. Mano, salawahia’ito manu-manunggaruda. Okino hori umalu’i kumikisi’i
Tasahea, wotoluno ronga panino no’ohu ike kowuna mondilo.
Tasahea okino powei tembo. Ronga merare, nokalikeeto kowuna mendilo ine
wungguarono manu-manunggaruda. Ronga suara meia, manu-manunggaruda gunugiriri’ito
mohakinito ronga mekapasi panino. Tebindano panino arine kowuna mendilo, manu nggiro’o
lumaa me’ita’ito lako i kambo Pomalaa ronga luma’i kambo Ladongi, Torobulu, Amesiu,
Malili, ano pulau Maniangi. Mano, okino hori dunggu Pomalaa, iee moisa’ito i mumuosu
me’ita. No’oputo ponduleno. Sambe mate’ito i mumuosu me’ita.
To’ono dadio wunua Kolaka mokoehe-ehero nototambe’i Tasahea, iee nonaningi’i
manu-manunggaruda, lakoroto tekonggoko’te o pitu wingi pitu oleo. Mano, pewisono oleo
kopitu, masa’ako aro powuhe momate-mate. Oleo nggiro’o, tebawo haki mate. Dadio to’ono
dadio mate nokono’i haki tia ronga pe’ua. Ala pu’unggasu ronga pinopaho to’ono dadio
dadio ulerua. Mbuoki teaso pinopahono to’ono dadio nggo pinupuro, te’embe no’opui kumaa
i ule. Dadio to’ono dadio mate me’aro.
To’ono dadio laa toro mbule motaku monggi’i kadadia ini motaku akuro nggo
mumbule’ako kadadia. I hiro moliwi opip-pio to’ono ine wonua Solumba teposuangge
Larumabalangi.
“Wonua mami nokono’i abala,” laa oaso to’ono liwi laporo.
“abala hawoto kumono komiu?” laa mesuko’i Larumbalangi.
“iye, inggomiu! Wonua mami nokono’i abala.” note’eni o aso inoliwi ronga sumaruta’i
luwuako laa kadadia i wonuaro.
Meambo’ito hende nggitu bawono. Mbule’ito wonua miu. Okikeno menggau abala ino ano
tetoro.” Note’eni Larumbalangi.
Ari’ino to’oni inoliwi lako, Larumbalangi notutu’i matano ronga pepoko’aso pumbe hawano.
Lakonoto mobasa-basa o doa ronga tumangge kaeno inaruo i lahueno.
“Ya Ombu Hata’ala! Poko salama’ikona to’ono dadio i wonua kolaka ari abala. Poko tudu’i
kona usa keno te’embe mateno manu-manunggaruda ronga ule-uleno ano rongai solo
tebundu.” Hende’inoto pongoni o doa Larumbalangi.
Laa aso tembo, Ombu Hata’ala pokomadupa’ike doano Larumbalangi. Sahea lahuene i
wonua Kolaka mengga tewali roroma. O gawu tewali me’eto. Okino menggau, peia’ito o
gundu ronga o kila. Tudu’ito usa mbuoki tetoro ano sambe opiti oleo pito wingi. Luwuako ala
i wonua Kolaka tebundu owose. Mateno manu-manunggaruda nowawe’ito o solo. Ronga ule-
uleno laa-laa tuda’i ine tawa ronga puunggasu luwuako tundu’ito.
Ieto sababuno, o tahi i wonua Kolaka dadio ika ronga watu i tahino. O’osu laha’ano
mo’isa ronga laha’ano pinepate ano manu-manunggaruda tinamo’ako ieto Osu Mekongga,
batuano osu mate’ano manu-manunggaruda. Mbakopo ala owose pondu’ano mateno manu-
manunggaruda tinamo’akoito Ala Lamekongga, batuano ala tondu’ano manu-manunggaruda.
Ata langgai ari Wonua Loeya lumangi’i manu-manunggaruda tinene’ito tewali to’ono
nggawasa. Mbakoi Larumbalangi ari wonua Solumba tinene’ito tewali presideno wonua
Kolaka, ieto wonua laa pitu wonua pamarenda’a teto’oriako “Tonomotu’o”.